A distrikt kongres fu Yehovah Kotoigi na ini 2007
1, 2. (a) Fa Moses ben gi den Israelsma deki-ati fu kon makandra èn fu kisi wini fu dati? (b) Sortu sani wi musu bigin sreka nownow kaba?
1 Moses ben komanderi ala den Israelsma nanga trakondre sma di ben e libi drape fu kon makandra ibri seibi yari fu arki a Wet. Fu san ede den ben musu du dati? Den ben musu du dati ’so taki den ben kan arki èn so taki den ben kan leri’ (Deut. 31:10-12). Yehovah ben si taki a ben de fanowdu fu tyari en pipel kon makandra na ini bigi grupu. Heri esi, a pipel fu Yehovah sa kon makandra baka na a distrikt kongres di sa hori dri dei langa.
2 Yu bigin sreka sani kaba? A de fanowdu fu aksi yu wrokobasi primisi fu kisi fri tapu den dei dati? Yu kan yepi yu bijbelstudenti noso memre fu yu osofamiri di no de na bribi, fu kon na a kongres nanga yu? Tra sma de na ini a gemeente di abi yepi fanowdu fu go na a kongres? Yu abi na prakseri fu go na wan tra kongres, na presi fu go na a wan pe yu gemeente musu go? Den tori di e kon now sa yepi yu fu sreka yusrefi.
3. (a) Fa Yesaya 25:6 e kon tru na ini a ten disi? (b) San e pasa na a freida fu a kongres, èn san wisrefi kan du ini a tori disi?
3 De drape ala den dri dei: Yehovah e gi en pipel bun furu yeye nyanyan (Yes. 25:6). Disi abi fu du sosrefi nanga a switi yeye nyanyan di wi e kisi ibri yari na den kongres. Wi kon si taki tapu freida furu sma no e kon. Du ala muiti fu go na a kongres di Yehovah en organisâsi sreka gi wi. Iya, ala den dri dei! Efu a de fanowdu fu aksi fri na yu grontapuwroko, dan yu musu begi Gado fu yepi yu. So esi leki yu kon sabi o ten a kongres e hori, yu musu aksi Gado fu ’gi yu deki-ati’ fu man taki nanga yu wrokobasi (1 Tes. 2:2; Neh. 2:4, 5). Kande a bun fu fruteri en taki a kongres di e hori ibri yari abi fu du sosrefi nanga na anbegi fu yu. Te yu e du disi frukufruku, dan a sa de moro makriki gi yu wrokobasi fu seti sani, so taki yu kan kisi fri fu go na a kongres.
4. Fa wi kan sreka wi bijbelstudenti nanga memre fu wi osofamiri di no de na bribi gi a kongres?
4 Yepi yu bijbelstudenti nanga yu osofamiri fu sreka sani na fesi: A ben o de wan prisiri sani te yu bijbelstudenti ben o go makandra nanga yu na a kongres, èn taki densrefi ondrofeni fa den brada nanga sisa de „na ini a bigi gemeente”! (Ps. 22:25) Fruteri den frukufruku so taki den kan poti ten na wan sei fu de drape tu. Fruteri den fu san ede yusrefi e prisiri fu den kongres. Yu kan fruteri den studenti san den kan fruwakti, fu di yu e sori den video fu den kongres di pasa, spesrutu a video Verenigd door Goddelijk onderwijs. Fruteri den memre fu yu osofamiri di no de na bribi, san yu o du. Kande den kan kon luku a drama, noso kande den kan kon awinsi wán dei nanga yu na a kongres.
5, 6. (a) Fa wi kan teki a moi eksempre di skrifi na 1 Timoteyus 6:18? (b) Sortu sani seti gi sma di kande abi yepi fanowdu fu feni wan sribipresi?
5 Yepi yu brada nanga sisa: Na apostel Paulus ben taigi den Kresten brada nanga sisa di ben man yepi trawan na materia sei, taki den musu ’du bun, den musu du furu bun wroko, den no musu gridi fu gi sma sani, èn taki den musu lobi fu prati sani nanga trawan’ (1 Tim. 6:17, 18). Wi kan teki na eksempre disi fu Paulus te wi e poti prakseri na a situwâsi fu den granisma, den sikisma, den sma di e du a furuten diniwroko, den osofamiri pe soso wan papa noso wan mama e sorgu gi den pikin, èn trawan na ini a gemeente di kande abi yepi fanowdu fu go na a kongres. Famiriman di de na bribi abi a fosi frantwortu fu yepi den sma disi, ma den owruman nanga tra sma kan yepi den sma disi tu efu den abi yepi fanowdu.—Gal. 6:10; 1 Tim. 5:4.
6 Efu wan sma na ini a gemeente abi wan sribipresi fanowdu, dan a Diniwroko Komte fu a gemeente sa luku efu a preikiman doro den markitiki fu kisi wan Kameraanvraagformulier voor bijzondere omstandigheden. Bifo a Diniwroko Komte seni a papira disi go na den brada di e sreka sribipresi, dan den musu luku den rai na tapu a papira èn na ini a brifi fu 14 december 2006, di seni go gi ala skin fu owruman.
7, 8. (a) Sortu sani sreka gi wi fosi wi doro na a presi pe a kongres o hori? (b) Fa wi kan sori warderi nanga tangi gi ala a wroko di du gi a bun fu wi? (Leisi Hebrewsma 13:17.)
7 Wroko makandra nanga den sani di seti: Te wi e doro na a presi pe a kongres e hori, dan wi e si krin taki sma wroko tranga fu sreka sani fu wi doro drape. Lobi brada di e dini leki dienst-yepiman e bari wi odi, den e gi wi wan programa, èn den e yepi wi fu feni wan sidonpresi. Brada nanga sisa krin a presi èn den seti wan moi podium. Prenspari wroko du sosrefi fu sreka den pisi fu a programa, èn wan lo tra sani.
8 Bifo ibri kongres, furu sma wroko furu mun na fesi fu sreka sani di de fanowdu. Den osofamiri fu den sma disi du furu tu, fu di den gi pasi taki den sreka den prenspari sani disi. Wi abi warderi gi a muiti di sma e meki fu a bun fu wi? Wi kan sori taki wi de nanga tangi te wi e gebroiki den rai na ini na artikel disi, èn den tra rai di wi o kisi kande bifo a kongres fu wi (Hebr. 13:17). Te ala sma de klariklari fu wroko makandra, dan ala sani o „pasa na wan fasi di fiti èn soleki fa sani seti”.—1 Kor. 14:40.
9. (a) Fu san ede a de so prenspari na ini a ten fu wi taki wi e kon makandra? (b) San ibriwan fu wi kan du now?
9 Fu di wi e ’si taki a dei e kon krosibei’, meki a de moro prenspari taki a pipel fu Gado e kon makandra (Hebr. 10:25). Na den kongres fu wi, a getrow èn koni srafu e gi wi rai di e yepi wi fu „du ala den wortu” di Yehovah wani wi fu du (Deut. 31:12). Bigin sreka sani nownow kaba fu go ala den dri dei na a distrikt kongres, èn fu kisi wini fu ala den rai di wi sa kisi na yeye fasi, èn fu abi switi demakandra nanga wi brada nanga sisa!
[Faki na tapu bladzijde 3]
Programa ten
Freida nanga satra
9:20 mamanten - 5:05 bakadina
Sonde
9:20 mamanten - 4:10 bakadina