„Duman fu a Wortu fu Gado” Distrikt Kongres fu Yehovah Kotoigi 2000
1 „Mi wani prèise yu ini a bigi gemeente; na mindri fu wan pipel di abi furu sma mi sa preise yu” (Ps. 35:18). ¡Prakseri pikinso o switi David ben o firi na ini a ten disi fu si someni dusundusun sma di e kon makandra na ini vrede na den kongres fu wi fu kisi rai di e kon fu Gado! ¿Yu ben de na mindri den 4599 sma di ben fisiti wan fu den „A Profeiti Wortu fu Gado” Distrikt Kongres? Den distrikt kongres fu wi na ini a yari 2000 sa gi wi nyun okasi fu kon makandra nanga kompe-preiseman fu Yehovah, sma di „sabi den nowtu na yeyefasi” èn di e prisiri èn de fayafaya fu „yere san a yeye e taigi den gemeente”.—Mat. 5:3; Openb. 2:29.
2 Sorgu gi Den Wan Di Abi Spesrutu Fanowdu: Famiriman, den owruman, èn tra sma ini a gemeente di sabi na aparti situwâsi fu den owru sma, den sikiwan, èn den wan di de na ini a furuten diniwroko, noso fu tra sma di abi spesrutu fanowdu, kan sori a lobi-ati fasi nanga a sorgu gi den fu di den e yepi den sma disi fu fisiti a kongres. (Teki gersi 1 Timoteus 5:4.)
3 Seti Sani fu Kan De Drape Ala Dri Dei: ¿Satan ben pruberi fu hari yu prakseri puru fu yeye afersi? A de wan sari sani taki furu brada nanga sisa nanga na osofamiri fu den e misi nyanyan na yeye fasi di de tranga fanowdu. Fa? Fu di den no e fisiti den freida distrikt kongres programa. Na ini wan tu kefal a sori taki wan bigi ipi brada fu wi e misi a rai na yeye fasi nanga demakandra di den freida programa e gi.
4 A kan taki son brada e draidrai fu go na den wrokobasi fu den fu aksi fu kisi fri fu fisiti a kongres. Na so a de nanga yu? Fu san ede yu no e begi Yehovah fu na afersi èn teki a deki-ati fu fruteri yu wrokobasi fu na afersi fu yu? Prakseri fa sani ben waka bun gi Nehemia, di ben abi wan srefi sortu afersi (Neh. 2:1-6). Abi bribi taki wi hemel Tata wani fu yepi yu, fu di a sabi taki efu yu poti Kownukondre afersi na a fosi presi, a sa sorgu fu san yu abi fanowdu na ini a libi.—Mat. 6:32b, 33.
5 Na a ten fu a lasti pisi fu den lasti dei, wi abi wi alayari distrikt kongres fanowdu moro leki iniwan ten bifo. A de wan sani di Yehovah gi wi fu tan hori wi gosontu nanga balansi na yeye fasi. Fu dati-ede, teki a fasti bosroiti fu fisiti ala den dri dei fu a „Duman fu a Wortu fu Gado” Distrikt Kongres fu a yari disi. Na tapu freida nanga satra a programa sa bigin 9.30 a.m. te go miti 5.00 n.m. èn sonde a sa bigin 9.30 a.m. te go miti 4.00 n.m. Fa yu kan go doro nanga a fasti bosroiti di yu o teki? Aksi yu wrokobasi na fesi fu kisi fri fu wroko so taki yu kan fisiti a heri kongres. Efu yu no e kisi furu moni, dan bigin nownow kaba fu poti a moni na wan sei di de fanowdu fu fisiti a kongres. Aksi Yehovah fu yepi yu fu lusu ala problema. Te yu du dati, dan yu kan fruwakti taki yu o nyan bun fu a lobi demakandra fu yu brada nanga sisa èn taki yu o yere den wortu fu têgo libi di de fu wi lobi hemel Tata, Yehovah.—Teki gersi Yohannes 6:68.
[Faki na tapu bladzijde 6]
Distrikt Kongres 2000
18-20 augustus
PARAMARIBO Bakratongo A
25-27 augustus
PARAMARIBO Bakratongo B
1-3 september
GAKABA Sranantongo
8-10 september
PARAMARIBO Sranantongo
15-17 september
PARAMARIBO Ingrisitongo