„A profeiti wortoe foe Gado”-distrikt kongres foe Jehovah Kotoigi 1999
1 Di den Israèlsma ben de na ini a gran sabana, dan Jehovah ben gi Moses a komando foe meki toe solfroe trompeti. Efoe den ben bro wán foe den trompeti nomo, dan den edeman foe den lo ben moesoe kon makandra na a dromofo foe a tenti foe a konmakandra. Efoe den ben bro ala den toe trompeti, dan dati ben o jepi a heri gemeente foe Israèl foe sabi taki den ben moesoe kon makandra (Num. 10:1-4). A no de so, taki wi e prisiri srefisrefi na ini a ten disi te wi e jere sani e meki bekènti di, neleki a babari foe trompeti, e meki wi kon makandra na den alajari distrikt kongres foe wi? Na den kongres foe wi, wi e jere foe den sani di Jehovah e leri wi nanga a tiri di a e gi nanga jepi foe en Wortoe èn nanga jepi foe den sma di A poti na wroko foe teki presi gi en. Disi e jepi wi foe tan doe a diniwroko foe Gado nanga wan fasti bosroiti. Wi no e prisiri te wi e si doesoendoesoen—kande tin doesoendoesoen—getrow kompe anbegiman di kon makandra na ini lobi èn na ini vrede? Troetroe wi e prisiri!—Ps. 122:1, 7, 8.
2 Foe mei te nanga september 1998, so wan 198 „Gado pasi foe libi”-distrikt kongres nanga internationaal kongres ben hori na ini 69 foto foe Amerkankondre. Brada nanga sisa na ini fo foto pe den ben hori den kongres, ben gi tanpresi na doesoendoesoen sma di ben kon foe kondre na heri grontapoe èn di ben go na den internationaal kongres di hori foe a fosi leisi baka na Amerkankondre sensi 1978. Den difrenti tongo di den sma ben taki no ben tapoe den foe sori waran lobi di ben de na den kongres. Den brada di ben opo den oso foe den foe gi tanpresi na den sma foe tra kondre di ben go na den kongres, ben prisiri moro foe abi den sma disi na den. Zendeling nanga internationaal friwani wrokoman go baka na den kondre foe den foe go na den kongres. Ala sma ben kisi deki-ati foe di den ben de drape. Na ini augustus nanga september 1998, 4054 sma ben kon na den feifi kongres di ben hori na Sranan, ala di 64 sma ben teki dopoe. Wan toe brada nanga sisa ben man fisiti wan foe den internationaal kongres na dorosei kondre èn drape den ben njan boen foe a switi demakandra nanga trawan. Te wi e kon makandra gi a distrikt kongres foe wi na ini 1999, dan wi sa abi njoen okasi foe ondrofeni a warti bradafasi di wi abi èn foe taigi Jehovah tangi foe a wánfasi di a gi wi.
3 Sorgoe foe den wan di abi spesroetoe sani fanowdoe: Grantangi poti prakseri na den spesroetoe sani di den owroewan abi fanowdoe, so srefi den sikiwan, den wan di de na ini a foeroeten diniwroko, noso trawan na ini joe gemeente di kande moesoe kisi jepi foe kon na a kongres. Famiriman, den owroeman, nanga tra sma na ini a gemeente di sabi na aparti situwâsi pe den wan di abi spesroetoe sani fanowdoe de na ini, kan jepi den na wan lobi-atifasi foe sreka densrefi gi san de fanowdoe.—Teki gersi 1 Timoteus 5:4.
4 A Kameraanvraagformulier voor bijzondere omstandigheden di a Genootschap e gi, e sori san na den markitiki di wan sma moesoe doro foe man gebroiki a formulier disi. A seti disi de soso gi preikiman di abi wan boen nen, so srefi den wan nanga pikin di abi boen maniri, èn di a Gemeente Dienstkomte feni boen. Bifo joe e skrifi na aanvraag disi, grantangi leisi a rai na ondrosei foe a formulier heri boen. Den aanvraag disi moesoe seni go na a afdeling Huisvesting so esi leki a kan, ala di joe e gebroiki na adres pe a kongres sa hori, na bakasei foe a formulier. Efoe wi wani taki a seti disi e waka boen, dan ala sma di abi foe doe nanga disi, moesoe wroko makandra. (Teki gersi Hebrewsma 13:7.) So boen, wi e aksi ala sma foe wroko makandra dorodoro nanga na afdeling Huisvesting.
5 Sori warderi: Wan osofamiri di de Kotoigi ben skrifi go na a basi foe a hotel pe den ben tan: „A hotel foe joe na a moro boen hotel pe na osofamiri foe wi ben tan oiti. Den kamra ben krin heri boen èn ala sani di wi ben sa kan abi fanowdoe, ben drape. Den dei di wi ben tan drape ben de so wan switi ten foe di ibriwan na ini joe hotel ben jepi wi boen. Wi wani taigi joe tangi foe di joe wroko makandra nanga den sani di a Waktitoren Kongres seti, foe di joe ben meki oenoe pai wan prijs di wi ben man foe pai.” Joe abi warderi toe gi den foeroe sani di den sreka foe joe ede? Nanga ala prisiri a Genootschap e sorgoe foe boen tanpresi di wi kan pai na a ten foe a kongres, èn nanga dati den e sorgoe taki wi alamala kan poti ala prakseri na den winimarki di a kongres nanga a programa e gi wi.
6 A e gi wi deki-ati te wi e jere fa sma e prèise a nen foe Jehovah foe di wi brada nanga sisa e tjari densrefi na wan boen fasi na den kongres. Wan man di e wroko na wan hotel ben taki: „Den sma foe joe di kon na a kongres èn di ben tan djaso na wi, na sma nanga den moro boen maniri.” Wan trawan ben taki: „Wi e prisiri foe hori kamra gi den sma foe joe. Den abi boen maniri èn den man taigi wi den joisti sani, te wi e aksi den foe dati. Èn den na a moro makriki groepoe foe wroko makandra nanga den.” A basi foe wan restaurant ben taki: „Wi e prisiri taki wan groepoe sma de na ini foto di wi kan breiti nanga den.” Nanga 10 procent a restaurant ben saka a prijs gi iniwan sma di ben go na den kongres èn di ben weri wan lapelkarta foe a kongres! Èn wan basi foe wan hotel ben taki: „Wi prisiri taki den sma foe joe ben de na ini wi hotel.” Den wortoe disi na wan boen kotoigi di sma e gi di no de wan foe wi. A boen nen di wi kisi e gi Jehovah glori èn e meki taki a breiti nanga wi.—1 Tes. 4:12; 1 Petr. 2:12.
7 Wi e gi joe deki-ati foe sreka joe tori now so taki joe kan de na ala den dri dei foe „A profeiti wortoe foe Gado”-distrikt kongres foe 1999. Makandra nanga joe wi e wakti a momenti te wi sa jere a ’babari foe prisiri èn a tangi na jejefasi di den wan e gi’ di kon de na ini wánfasi leki wan groepoe foe anbegi Gado (Ps. 42:4). Meki Jehovah blesi ala den sani di wi sreka foe tan kon goedoe na jejefasi!
[Faki na tapoe bladzijde 3]
Programa ten
Freida nanga satra
9.30 v.m. – 5.00 n.m.
Sonde
9.30 v.m. – 4.00 n.m.