„Bribi na ini Gado Wortoe”—distriktkongres foe Jehovah Kotoigi 1997
1 „Wan dei na ini joe fesidjari, moro boen leki doesoen dei na wan tra presi” (Ps. 84:10). Te a psalm singiman ben anbegi Jehovah na en tempel, a ben kan firi taki na almakti Gado ben de drape. Te a nâsi ben konmakandra gi den alajari fesa èn troe anbegiman ben foeroe Jerusalem srefisrefi, dan den Israèlsma ben abi prisiri demakandra nanga kompe bribiman te den ben e kon makandra na ini den fesidjari foe a tempel. Dati ben e memre den foe a wánfasi foe den leki nâsi èn leki a wan-enkri pipel na tapoe grontapoe di Gado ben gi en blesi èn di Gado ben feni boen. Ibri jari wi abi na okasi foe abi den srefi firi foe wánfasi èn prisiri nanga hondrohondro brada nanga sisa foe wi. Na ini a ten foe wi, distriktkongres di e hori ala jari baka, na wan foe den fasi fa Jehovah e tjari en pipel kon makandra foe gi rai èn foe abi demakandra nanga kompe bribiman.
2 Organisâsi ben de fanowdoe, foe sorgoe gi den bigi groepoe sma foe a pipel foe Jehovah di ben e libi ini èn lontoe Jerusalem na ini a ten foe den fesa. So srefi a hori foe orde nanga vrede ben e aksi taki sma kisi bodoi foe sribipresi, konmakandra ten, èn tra sortoe sani di moesoe seti. Foe di den afersi disi ben abi foe doe nanga a troe anbegi foe den, dan den Israèlsma ben sa hori den bodoi disi nanga prisiri.—Ps. 42:4; 122:1.
3 Spesroetoe fanowdoe: A formulier foe a Genootschap, gi sma di abi spesroetoe fanowdoe foe sribipresi, e poti den markitiki di wan sma moesoe doro foe man meki a Speciale Kameraanvraagformulier so taki den brada kan loekoe en: „Efoe joe abi wan boen nen na ini a gemeente èn abi spesroetoe sani fanowdoe di a gemeente no man sorgoe gi, dan joe mag aksi tanpresi via na afdeling Huisvesting foe a Genootschap.” A seti disi de soso gi preikiman di abi boen nen, èn so srefi den wan di abi pikin di e tjari densrefi boen èn di a dienstkomte foe a gemeente feni boen. Den wan nanga spesroetoe fanowdoe de wi brada nanga sisa, èn wi wani jepi den.
4 Den owroesma, den swakiwan, den wan di de na ini foeroeten diniwroko, noso trawan, kande abi jepi fanowdoe foe go na a kongres. Famiriman, den owroeman, nanga trawan na ini a gemeente di sabi den aparti situwâsi foe den, kan seti sani na wan lobi fasi èn no skoifi a frantiwortoe foe famiri èn foe a gemeente gi a kongres-organisâsi. (Teki gersi 1 Timoteus 5:4.) Bifo joe meki wan Speciale Kameraanvraagformulier, leisi a bodoi finifini di skrifi na ondrosei foe a formulier. Den formulier disi moesoe seni go na a afdeling Huisvesting so esi leki a kan.
5 A de krin gi wi alamala foe si taki Jehovah e horibaka gi den sani di seti gi den kongres foe ibri jari. Foe di foeroe foe den brada di e rèis go na den distriktkongres abi sribi presi fanowdoe, wi kan de seiker taki Jehovah sa sorgoe boen gi den fanowdoe disi. Foe di den afersi disi abi foe doe nanga a troe anbegi foe wi, dan wi moesoe hori den bodoi disi di wi kisi nanga prisiri. Te wi e sori taki wi de „getrow na ini a moro pikin sani”, dan dati e meki taki wi man kisi den bigi blesi di den wan di Jehovah lobi e froewakti foe kisi na ini a ten di e kon.—Luk. 16:10.
6 Jesaja 33:20 e taki: „Loekoe Sion, a foto foe den fesa foe wi!” Wi kan prakseri nomo fa den prisiri ipi ben de, di ben e foeroe Jerusalem èn di ben e handri klariklari na tapoe a komando foe Jehovah foe „kon de nanga prisiri nomo” (Deut. 16:15). Den distriktkongres foe wi di e hori ala jari e gi a bigi okasi foe teki rai foe Gado èn foe njanboen foe a waran demakandra foe wi brada nanga sisa. Meki Jehovah blesi den moeiti foe joe te joe e sreka foe go na den serie „Bribi na ini Gado Wortoe”-distriktkongres foe 1997.
[Faki na tapoe bladzijde 3]
Programa Ten
Freida nanga satra
9.30 v.m. - 4.50 n.m.
Sonde
9.30 v.m. - 3.50 n.m.
[Faki na tapoe bladzijde 3]
DISTRIKTKONGRES 1997
SRANANTONGO: 15, 16, 17 augustus, Gakaba
BAKRATONGO: 22, 23, 24 augustus, Paramaribo
SRANANTONGO: 29, 30, 31 augustus, Paramaribo
INGRISITONGO: 5, 6, 7 september, Paramaribo