„Leriman fu Gado Wortu” Distrikt Kongres fu Yehovah Kotoigi 2001
1 A profeiti Yesaya ben taki dati Yehovah na a Bigi Leriman, di e gi wi deki-ati neleki wan papa: „Disi na a pasi. Waka na tapu” (Yes. 30:20, 21). Ma fa wi kan yere den wortu fu Yehovah di taki fu wi eigi bun ede? Yehovah e taki nanga en pipel nanga yepi fu Bijbel, èn so srefi Bijbel publikâsi, gemeente konmakandra, kring konmakandra nanga distrikt kongres di „a getrow èn koni srafu” e orga (Mat. 24:45). Wi kan de nanga tangi na ati taki Yehovah e tan sori wi a pasi di wi musu waka.
2 Ibri yari wi e kisi na okasi na a distrikt kongres fu kon makandra nanga tra bribiman èn fu arki den tirilin fu Yehovah bun. A yari di pasa, 4599 sma ben kon na den „Duman fu a Wortu fu Gado” Distrikt Kongres di gi sma nyun krakti. Na ini a yari 2001, den dri dei „Leriman fu Gado Wortu” Distrikt Kongres o hori na ini a heri kondre. Fu di wi sabi taki yu wani seti sani kaba fu kon na a kongres, meki wi e gi yu den rai di e kon now fu yepi yu.
3 Sorgu gi den Sma Di Abi Spesrutu Yepi Fanowdu: A kan taki den owruwan, den sikiwan, den wan di e du furuten diniwroko, noso trawan abi yepi fanowdu fu kon na a kongres. Famiriman, owruman nanga trawan fu a gemeente di sabi den spesrutu situwâsi fu den wan di abi spesrutu yepi fanowdu kan seti san de fanowdu na wan lobi-ati fasi. A frantwortu fu sorgu famiriman no musu skoifi go na tapu den wan di e orga a kongres (1 Tim. 5:4). A Genootschap abi wan papira pe skrifi sortu markitiki wan sma musu doro fu kan poti en nen fu aksi sribipresi efu dati de fanowdu. A Dienstkomte fu a gemeente musu luku efu den sma di aksi a sani disi doro den markitiki, bifo a papira disi e seni go na den brada di poti fu sorgu gi sribipresi. A sekretarsi fu a gemeente musu poti en telefon-nomru tu tapu a papira, so taki den brada di poti fu sorgu gi sribipresi kan bel en efu wan sani de fu aksi. Den papira fu den sma di doro den markitiki fu feni wan sribipresi, musu seni go na a adres di skrifi na baka sei fu a papira.
4 Bosroiti: Ala di a ten fu go na a kongres e kon krosibei, meki a de so taki yu e begi Yehovah fu yu kan de drape na ala pisi fu a programa den dri dei, so taki yu kan kisi moro wini fu a programa. Yu aksi kaba na yu wrokope fu kan de fri den dri dei di yu wani fu go na a kongres? Efu yu no du dati ete, dan du dati so esi leki a kan. Moro furu den no e gi primisi te sma e aksi fakansi tumusi lati. A yari disi a getrow èn koni srafu sreka a „Leriman fu Gado Wortu” Distrikt Kongres gi wi so taki wi kan kisi Bijbel leri, èn so taki a bribi fu wi kan kon moro bigi. So bun, bigin seti sani nownow kaba fu kan de drape, ala di yu e teki a frumane fu David: „Blesi Gado na ini na ipi sma di kon makandra”!—Ps. 68:26.
[Faki na tapu bladzijde 6]
Freida nanga Satra
9.00 v.m – 5.00 n.m.
Sonde
9.30 v.m. – 4.00 n.m.