A distrikt kongres fu Yehovah Kotoigi na ini 2008
1. (a) Fu san ede a rai di Paulus gi den Hebrew Kresten de tumusi prenspari na ini a ten disi? (Leisi Hebrewsma 10:24, 25) (b) Sortu okasi wi o kisi fu du san Paulus ben gi leki rai?
1 Na apostel Paulus ben gi den Hebrew Kresten a rai fu kon makandra èn fu gi makandra deki-ati „o moro” den ben e si a dei e kon krosibei (Hebr. 10:24, 25). Moro nanga moro buweisi e sori taki „a dei” di Paulus ben taki fu en, de heri krosibei! Fu dati ede, wi breiti te wi e kisi na okasi fu kon makandra nanga wi brada nanga sisa fu kisi leri fu Gado, so taki wi kan kisi tiri na ini „den lasti dei” disi, di e kon ogri moro nanga moro (2 Tim. 3:1). Wi sa kisi na okasi fu du dati, na a distrikt kongres fu 2008.
2. (a) Fu san ede a de tumusi prenspari fu go ala den dri dei na a kongres? (b) Fa wi kan bigin seti sani fu go na a kongres?
2 Go ala den dri dei: Wi e gi yu a deki-ati fu go ala den dri dei na a kongres. Fu di wi ’no e misi konmakandra’, meki wi no sa misi a tumusi prenspari leri fu Gado di wi sa kisi na a kongres (Hebr. 10:25). Bigin seti sani gi a kongres so esi leki yu man. A ben o bun fu taigi yu wrokobasi frukufruku kaba taki yu o go na a kongres, so taki a kan seti sani na wrokope. Efu den pikin fu yu o de na skoro na a ten fu a kongres fu yu, dan taigi den skoromisi nanga skoromeester taki unu o go na a kongres. Fruteri den taki a kongres abi fu du nanga na anbegi fu yu. Yu kan de seiker taki Yehovah sa blesi a muiti di yu e du fu poti Kownukondre afersi na a fosi presi.—Mat. 6:33.
3. Na sortu fasi wi kan sori taki wi e poti prakseri na trawan?
3 Yepi trawan fu go na a kongres: Paulus ben gi den brada nanga sisa a deki-ati tu fu „poti prakseri na makandra” (Hebr. 10:24). A de so taki brada nanga sisa na a Gemeente Bukustudie fu yu abi yepi fanowdu fu go na a kongres? Yu kan yepi yu bijbelstudenti fu go nanga yu na a kongres, awansi den kan go wán dei nomo? Te yu o fruteri den famiriman fu yu di no de na bribi taki yu o go na a kongres, dan yu kan gi den wan kari fu kon nanga yu. A muiti di yu e du fu di yu lobi tra sma, kan tyari blesi kon di yu no ben fruwakti.
4. Fa wi kan kon sabi o ten èn pe den distrikt kongres o hori?
4 Fa fu kon sabi o ten èn pe den kongres o hori: Ibri yari furu sma e bel go na a bijkantoro fu aksi o ten èn pe den kongres sa hori. Pikinmoro ala den sma di bel, na brada nanga sisa di kisi fu yere den sani dati kaba. Fosi yu bel go na a bijkantoro, a ben o bun fu luku A Waktitoren fu 1 maart 2008.
5. San na wan tu sani di wi musu hori na prakseri di abi fu du nanga a papira di nen Kameraanvraagformulier voor bijzondere omstandigheden?
5 Spesrutu sani di de fanowdu: Efu wan preikiman na ini a gemeente abi wan sribipresi fanowdu, dan a Diniwroko Komte fu a gemeente sa luku efu a preikiman doro den markitiki fu kisi wan fu den papira di nen Kameraanvraagformulier voor bijzondere omstandigheden. Bifo a sekretarsi fu a gemeente seni a papira disi gi den brada di e sreka sribipresi, dan a musu luku den rai na tapu a papira èn na ini a brifi fu 14 december 2007, di seni go gi ala skin fu owruman.
6. (a) Na sortu fasi wi kan gi Yehovah glori te wi e go na a kongres fu wi? (b) San wan tu sma di e wroko na ini wan hotel taki, fu di wi brada nanga sisa tyari densrefi na wan bun fasi?
6 Du bun wroko: Te wi e gi yesi na a komando fu Yehovah fu kon makandra fu anbegi en, dan dati sa meki taki wi man ’kisi wini gi wisrefi’. Ma san de moro prenspari, na taki wi e kisi na okasi fu gi Yehovah nen glori (Yes. 48:17). Furu sma na den distrikt kongres e si ’krin san na den bun wroko di wi e du’, èn a sani disi naki na ati fu sonwan fu den sma disi, taki den prèise wi (1 Tim. 5:25). Na ini wan foto pe den kongres fu wi e hori furu yari kaba, wan driktoro fu wan hotel ben taki: „Furu sma na ini a foto disi e taki fu Yehovah Kotoigi, èn fu a fasi fa den sani di unu e du na a kongres abi krakti tapu wi. Wi e si fa unu e krin a presi pe unu o hori a kongres èn a presi pe sma o poti den wagi. A de wan prisiri sani taki unu de dyaso nanga wi na ini a waran pisi ten fu a yari. Wi howpu taki wi kan tan wroko bun nanga makandra na ini a ten di e kon.” Baka di wan driktoro fu wan hotel ben fruteri fu den problema di a ben kisi nanga tra grupu sma di ben kon tan na ini a hotel, dan a ben prèise den brada nanga sisa di ben tan na ini a hotel, fu di den Kotoigi ben de klariklari fu wroko makandra nanga den sma fu a hotel èn den ben abi pasensi. A ben taki: „Wi e winsi taki ala den sma di e kon tan na a hotel, de leki Yehovah Kotoigi!” A fasi fa den brada nanga sisa fu wi e tyari densrefi, e meki taki furu sma e prèise den, èn a no de fu taki dati a e prisiri na ati fu wi Gado, Yehovah!
7. Fa Mateyus 4:4 e sori o prenspari a de fu poti ala wi prakseri na ibri pisi fu a programa?
7 Yesus ben taki dati wi sa tan na libi efu wi e gi yesi na „ibri wortu di Yehovah mofo taki” (Mat. 4:4). Na den kongres fu wi di e hori ibri yari, Yehovah e gi wi „nyanyan na a reti ten”, èn „a getrow èn koni srafu” e sreka dati gi wi (Mat. 24:45). Den brada musu du furu wroko fu sreka èn fu prati a yeye nyanyan na a fesa disi. Meki wi sori taki wi de nanga tangi gi a lobi-ati fasi fa Yehovah e sorgu wi, fu di wi o de na a kongres èn fu di wi o poti ala wi prakseri na ibri pisi fu a programa.
[Faki na tapu bladzijde 3]
Programa ten:
Freida nanga satra
9.20 mamanten – 4.55 bakadina
Sonde
9.20 mamanten – 4.00 bakadina