A distrikt kongres fu Yehovah Kotoigi na ini 2009
1. (a) Sortu blesi wi sa kisi te wi de na a distrikt kongres ala den dri dei? (b) Sortu sani wi musu bigin seti now?
1 Wi alamala e wakti fu go na a distrikt kongres fu 2009 èn drape wi o kisi na okasi fu kon makandra nanga tra anbegiman fu Yehovah di „sabi taki den de na nowtu na yeye fasi” (Mat. 5:3). Fu di a dei fu Yehovah de heri krosibei, meki wi e gi unu alamala a deki-ati fu de na a kongres ala den dri dei. Disi sa meki taki wi kisi wini fu a demakandra di wi o abi nanga wi Kresten brada nanga sisa èn wi o kisi deki-ati fu Bijbel, so taki wi tanapu kánkan na ini a bribi (Sef. 1:14). Meki yu leriman na skoro nanga yu wrokobasi sabi taki a kongres na wan prenspari pisi fu na anbegi fu yu. Bigin fruku fu seti sani gi a kongres èn aksi Yehovah fu yepi yu. Te yu du dati, dan yu kan de seiker taki Yehovah sa horibaka gi yu.—Yes. 50:10.
2. Fu san ede son kongres o de leki internationaal kongres?
2 Internationaal kongres: Fu di den kongres disi sa hori na ini wan tu kondre nanga foto nomo, meki soso den sma di kisi wan kari, musu go na den kongres disi. Te wi e hori wisrefi na a seti disi, dan dati o meki taki tumusi furu sma no de na den kongres disi (1 Kor. 14:40; Hebr. 13:17). Ma toku furu fu den distrikt kongres o de leki internationaal kongres, fu di furu zendeling, sma di e wroko na Bethel na ini wan tra kondre, nanga internationaal wrokoman sa go na wan kongres na ini den eigi kondre.
3. Fa wi kan sori Kresten lobi gi son sma na ini wi gemeente?
3 Yepi trawan fu go na a kongres: A de so taki son sma na ini a gemeente fu yu abi yepi fanowdu fu go na a kongres? Te yu e yepi den, dan na so fasi yu ’no e poti prakseri na yu eigi afersi wawan, ma yu e poti prakseri na den afersi fu trawan tu’.—Fil. 2:4.
4. Fa yu kan kon sabi o ten èn pe den kongres o hori?
4 Fa fu kon sabi o ten èn pe den kongres o hori: Furu sma e bel go na a bijkantoro fu aksi o ten èn pe den kongres o hori. Fu sorgu taki dati no pasa so furu, dan a ben o bun fosi fu aksi a sekretarsi fu yu gemeente den sani di yu wani sabi.
5. San den owruman musu du te wan preikiman abi yepi fanowdu fu feni wan sribipresi?
5 Te wan preikiman abi yepi fanowdu fu feni sribipresi, dan a Diniwroko Komte fu a gemeente sa luku efu a preikiman doro den markitiki fu kisi wan fu den papira di nen Kameraanvraagformulier voor bijzondere omstandigheden. Bifo a sekretarsi fu a gemeente seni a papira disi gi den brada di e sreka sribipresi, den musu luku den rai na tapu a papira dati.
6. San musu de a moro prenspari sani di wi musu hori na prakseri te wi e sreka wisrefi fu go na a distrikt kongres fu 2009 èn te wi de drape?
6 Du sani di e gi Gado glori: Wi musu sori den froktu fu a yeye na ini ala sani di wi e du, èn wi musu poti spesrutu prakseri na a fasi fa wi e taki èn a fasi fa wi e tyari wisrefi te wi de nanga trawan na a kongres. Disi sa meki taki sma tan taki bun fu a pipel fu Yehovah èn wi no o meki trawan naki futu (1 Kor. 10:31; 2 Kor. 6:3, 4). Meki a de so taki Gado kisi glori na a distrikt kongres fu 2009, fu di yu o de drape èn fu di yu o tyari yusrefi na wan fasi di fiti!—1 Petr. 2:12.
[Faki na tapu bladzijde 4]
Programa ten:
Freida nanga satra
9.20 mamanten – 4.55 bakadina
Sonde
9.20 mamanten – 4.00 bakadina