„Gi Gado glori” Distrikt Kongres fu Yehovah Kotoigi gi a yari 2003
1 Nanga yepi fu en getrow profeiti Yesaya, Yehovah ben gi a komando: ’Poti prakseri na mi, o mi pipel; nanga yu den nationaal grupu fu mi, poti yesi arki mi’ (Yes. 51:4). Wi no e agri dati a de tumusi prenspari fu poti prakseri moro leki oiti bifo na den komando fu Yehovah na ini den lasti dei disi di e kon muilek moro nanga moro? Wan fasi fa wi kan ’poti yesi arki’ Yehovah, na fu gi yesi na a komando fu en fu kon makandra fu anbegi. Wi e luku go na fesi trutru na a spesrutu okasi di wi sa kisi na a distrikt kongres di e hori ala yari! A Tiri Skin fu Yehovah Kotoigi seti sani so taki distrikt kongres sa hori na ini Sranan na ini a yari 2003.
2 Soleki fa a ben skrifi na ini A Waktitoren fu 1 yuli 2002, dan internationaal kongres sa hori sosrefi na ini spesrutu foto na ini son kondre, pe sma fu ala sei, di kisi kari, sa go. Fu di den foto pe so wan internationaal kongres sa hori no de furu, soso den gemeente di kisi a kari fu go na den kongres dati, sa go drape. Ma na ala den distrikt kongres a sa de leki yu de na wan internationaal kongres. Zendeling sa de na den kongres di sa hori na difrenti presi, èn wi sa kisi na okasi fu arki wan tu ondrofenitori fu den. San wi kan du fu kisi furu winimarki fu den sani di e seti nownow gi a kongres?
3 De drape ala dei: Fu kisi wini fu a rai di wi e kisi fu a getrow èn koni srafu, wi musu du ala san wi man fu de na a heri programa (Mat. 24:45). Yu musu aksi yu wrokobasi fakansi fu man go na a kongres ala den dei? Bifo Nehemia ben aksi Kownu Artakserkses fu kisi primisi fu go na Yerusalem fu bow den skotu baka, dan a ben „begi a Gado fu den hemel” (Neh. 2:4). Na a srefi fasi yu musu begi Yehovah fu gi yu deki-ati so taki yu kan aksi a wrokobasi fu yu fakansi, fu man go na a kongres ala den dri dei. Ma san efu a wrokobasi no wani gi yu na okasi fu go? Kande a kan teki wan tra bosroiti te wi e fruteri en dati den rai di wi e kisi na a kongres e yepi wi fu de wan wrokoman di de eerlijk, di e wroko tranga èn wi e tron sma di trawan kan frutrow. Boiti dati, efu wi abi sma na ini na osofamiri di no de na ini a bribi, dan a ben o bun fu fruteri den so esi leki a kan taki yu o go na a kongres.
4 Yepi den wan di abi spesrutu yepi fanowdu: Sma de na ini yu gemeente di abi yepi fanowdu fu go na a kongres? Owrusma, swakiwan, noso den wan di de na ini a furuten diniwroko di abi spesrutu yepi fanowdu, moro furu e kisi yepi fu den famiriman di de na ini a bribi. Ma owruman, nanga tra sma di sabi fu a situwâsi fu den kan gi yepi tu na wan lobi-ati fasi.
5 A Dienstkomte fu a gemeente sa luku ala den papira di den preikiman gebroiki fu aksi wan sribipresi. A dienstkomte sa gebroiki den tirilin di skrifi na tapu a papira fu luku efu den sma di aksi fu kisi sribipresi no man kisi a yepi dati fu tra sma na ini den eigi gemeente. A seti disi na soso gi preikiman di abi wan bun nen na ini a gemeente, makandra nanga den pikin fu den di e tyari densrefi na wan bun fasi tu. Den brada di e seti sribipresi sa kontakti a sekretarsi fu a gemeente te den abi sani fu aksi fu sma di de na ini nowtu èn di ben aksi wan sribipresi.
6 Efu yu musu go na wan tra kongres: Efu a situwâsi fu yu de so taki yu no man go na a kongres pe yu ben musu go, ma dati yu e go na wan tra kongres èn yu abi wan sribipresi fanowdu, dan grantangi taki nanga a gemeente sekretarsi. A sekretarsi sa seni a papira pe yu e aksi fu wan sribipresi go na den brada di e sreka den sani fu a kongres. A sekretarsi sa sorgu taki na tapu a papira skrifi sortu dei yu wani go na a kongres. Den brada di e seti den sribipresi sa sreka ala sani so taki yu kisi wan sribipresi.
7 Ala ai de na wi tapu: Sma e si dati wan difrenti de na mindri den Yehovah Kotoigi nanga den sma fu grontapu? Iya, krinkrin! Arki san wan tu hotel driktoro na ini Amerkankondre ben taki: „Wi gwenti fu kisi sma dyaso di e hori bigi konmakandra, ma unu na den wan-enkri sma di no gi wi nowan enkri problema, èn unu na bun sma.” „A wiki di pasa, wan tra grupu kerkisma ben de dyaso. A difrenti na mindri unu nanga den de krin fu si.” „Wi sabi dati unu de klariklari doronomo fu yepi wi èn fu wroko makandra nanga wi.” A no de so taki dati a prèise di sma e prèise wi e meki taki wi e warderi fa a „koni fu tapusei” abi krakti tapu a fasi fa wi musu de? (Yak. 3:17) Fu di wi de leki ’wan komediprei gi grontapu’, meki wi tyari wisrefi ala ten na wan fasi di e sori a wartifasi nanga a glori fu wi Gado, Yehovah.—1 Kor. 4:9.
8 Fu di ’a komediprei fu grontapu e kenki’ meki wi abi a distrikt kongres fanowdu fu kisi yepi so taki wi kan poti prakseri na a yeye fasi fu wi (1 Kor. 7:31). Fu seti sani so taki wi kan de na a kongres ala dei sa aksi fu wi taki wi du furu muiti, ma a muiti di wi e meki no de fu soso. Den brada sreka a „Gi Gado glori” Distrikt Kongres na so wan fasi, taki wi kan tan tanapu kánkan aladi wi e wakti a pori di Yehovah sa tyari kon tapu a grontapu fu Satan. Meki noti no tapu wi fu kisi den rai di Yehovah sreka gi wi.—Yes. 51:4, 5.
[Faki na tapu bladzijde 3]
Programa ten
Freida nanga satra
9:30 mamanten - 5:00 bakadina
Sonde
9:30 mamanten - 4:05 bakadina