„Fayafaya Kownukondre preikiman” Distrikt Kongres fu Yehovah Kotoigi gi a yari 2002
1 „Mi ben prisiri di den ben taigi mi: ’Meki wi go na a oso fu Yehovah’” (Ps. 122:1). Te wi e luku den wortu disi fu a psalm skrifiman, dan hori na prakseri (1) fa a ben firi di a ben kisi a kari fu go anbegi Yehovah, (2) taki a ben abi demakandra nanga bun mati di ben wani anbegi Yehovah na a yoisti fasi tu èn (3) san a ben musu sreka fu gi sma a kari fu kon makandra, èn san a ben musu sreka fu teki waka go na a oso fu Gado.
2 Den wortu fu a psalm skrifiman no e sori fa wisrefi e firi te wi e yere taki sani e bigin sreka kaba fu wan tra kongres? Te wi e prakseri a kongres dati, dan wi ati e prisiri srefisrefi bika wi e prakseri den prisiri sani fu den kongres di pasa. Wi e prisiri tu te wi e prakseri taki na a kongres disi wi o kon makandra baka nanga mati di lobi Yehovah tu. Sani e seti kaba fu hori a dri dei „Fayafaya Kownukondre preikiman” Distrikt Kongres na Sranan ini a yari 2002. Wi musu bigin sreka sani now fu go èn kisi wini dorodoro fu a yeye fesa disi di wi o abi.
3 „A getrow basya, a koniwan” bigin kaba fu sreka a yeye nyanyan di wi o kisi na a reti ten na a kongres (Luk. 12:42). Den sori ibri gemeente na sortu kongres den musu go, so taki tumusi furu sma no de na a presi pe a kongres e hori. Boiti dati, furu brada bigin fu sreka sani gi den difrenti kongres afdeling so taki „ala sani [kan] feni presi na wan fasi di fiti èn leki fa sani seti” (1 Kor. 14:40). Someni sani sreka kaba gi wi so taki sani kan waka bun èn taki wi sa kisi wini fu dati. Ma san wisrefi kan du fu sreka gi a kongres?
4 Sreka sani nownow fu de drape ala dri dei: Yu musu aksi yu wrokobasi fu kisi fri ten so taki yu kan go ala dei na yu kongres? Yehovah sabi taki son wrokobasi de di yu ’no man plisi so esi’ (1 Petr. 2:18). Ma den kongres fu wi prenspari srefisrefi. Wi wani du ala muiti fu de drape fu arki a heri programa. Te yu e begi, dan taki nanga Yehovah fu den sortu sani disi. Aksi en fu yepi yu taki sani kan waka bun.—Neh. 2:4.
5 Luku suma na ini a gemeente abi yepi fanowdu: Kande wi sabi taki wan brada noso wan sisa e siki noso taki a pôti, so taki a no man kon na a kongres. Wi kan „opo [wi] ati bradi” èn yepi so wan brada noso sisa, dan? (2 Kor. 6:12, 13; Deut. 15:7) Ini 2 Korentesma 8:14 Paulus ben gi wi deki-ati fu du dati. Fu san ede yu no e aksi den sortu sma disi fu rèi makandra nanga yu go na a kongres? Efu den e pionier, dan den kan fruteri furu moi ondrofenitori te unu e rèi go. Efu den na owru sma di de na ini a gemeente wan pisi ten kaba, dan a kan taki den kan fruteri unu tori fu sani di pasa ini a waarheid; sani di unu no yere noiti ete. A no de so taki, yu nanga yu osofamiri o kisi deki-ati te unu e taki nanga den brada nanga sisa disi? Den brada nanga sisa o warderi en srefisrefi taki yu yepi den. Yehovah o blesi yu tu te yu e du dati.—Odo 28:27; Mat. 10:42.
6 Den Kresten famiriman fu den wan di abi spesrutu yepi fanowdu musu sorgu gi den. Ma toku owruman nanga trawan ini a gemeente di sabi a situwâsi fu den sma disi kan yepi den tu na wan lobi-ati fasi, fu sreka sani gi a kongres (1 Tim. 5:4). Den brada fu a dienstkomte musu luku efu den wan di poti den nen na tapu a papira di nen Kameraanvraagformulier voor bijzondere omstandigheden (CO-5) doro den markitiki, bifo den seni den papira dati gi den brada di e sorgu gi sribipresi. A sekretarsi fu a gemeente musu skrifi en eigi telefon-nomru tu tapu a papira, so taki den brada fu na afdeling di e sorgu gi sribipresi kan bel en te den wani aksi wan sani. Seni den papira nanga den nen fu den sma di doro den markitiki go na a adres fu a kongres di de na bakasei fu a papira.
7 Gi yu nen fu wroko leki wan friwani wrokoman: Te a kongres e hori dan bun furu friwani wrokoman e yepi taki sani e waka bun na tapu den afdeling. Dienst-yepiman di de drape na a presi pe a kongres e hori e sori sma pe den kan sidon. Dienst-yepiman di de pe oto nanga baisigri e poti, e luku den oto nanga den baisigri. Na afdeling di e sorgu taki ala sani krin, abi a grani fu sorgu taki sma e tan si unu leki krin sma, fu di den e sorgu taki a presi pe a kongres e hori kon moro krin moro leki di wi kon miti en. Wi kan yepi na a afdeling disi noso na wan trawan? Yu wani de wan friwani wrokoman di e wroko „skowru na skowru” makandra nanga den brada fu yu?—Sef. 3:9.
8 Sma e luku trutru san wi e du? Wan man ben e wroko na ini wan hotel na a pisi ten fu a Distrikt Kongres di ben hori a yari di pasa. Twenti yari pasa a man disi ben studeri nanga Yehovah Kotoigi, ma a ben tapu nanga a studie. A ben taigi wan tu fu den Kotoigi taki a ben wani bigin baka nanga en bijbelstudie èn taki a wani go baka na den konmakandra. Fu san ede? Fu di den Kotoigi di ben tan na ini a hotel a pisi ten dati, ben sori en switifasi.
9 Wan man di e wroko gi hotel ben taki fu den brada fu wi taki: „Fu ala den sma di e kon tan na den hotel fu wi, unu na den moro bun sma. Un abi furu pasensi èn un abi bun maniri tu.” Yesus ben gi wi a rai disi: „Meki un leti skèin na fesi sma, so taki den kan si den bun wroko fu unu èn kan gi glori na un Tata, di de na hemel.” Wi hemel Tata e firi bun srefisrefi te a e si fa wi e teki a rai disi!—Mat. 5:16.
10 Meki a de so taki wi e denki neleki Kownu David, di ben prisiri fu go na Yehovah oso fu anbegi. Den Distrikt Kongres fu wi na prenspari presi gi wi bika drape wi e kisi yeye nyanyan. Den kongres na spesrutu okasi tu fu abi switi demakandra nanga den brada nanga sisa fu wi. Dati meki nanga ala prisiri wi e gi yu wan kari fu bigin sreka sani fu de drape na ala pisi fu a programa fu dri dei fu a „Fayafaya Kownukondre preikiman” Distrikt Kongres di o hori a yari disi!
[Faki na tapu bladzijde 5]
Den yuru di a programa o hori
Freida nanga satra
9.30 mamanten - 5.00 bakadina
Sonde
9.30 mamanten - 4.00 bakadina