Tyari Yusrefi Bun èn Meki Sma Prèise Yu!
1 „Den de sondro broko-ede, wan sani di mi no si noiti na iniwan tra grupu sma.” „Na wan prisiri sani taki a grupu sma disi de na mi.” Disi na wan tu fu den furu bun sani di sma ben taki baka a kongres di ben hori a yari di pasa. Dati ben poti krakti tapu a bun nen di wi abi leki organisâsi (Odo 27:2; 1 Kor. 4:9). Te fu kaba, na Yehovah e kisi a grani disi (Mat. 5:16). Now wi abi wan tra moi okasi fu prèise Gado a yari disi na a „Leriman fu Gado Wortu” Distrikt Kongres.
2 Ala yari wi e kisi frumane na wan switi fasi fu tyari wisrefi bun na a kongres. Fu san ede? Bika wi no wani tyari wisrefi leki grontapu, fu di a fasi fa sma fu grontapu e denki, den krosi di den e weri, èn a fasi fa den e tyari densrefi, e kon moro takru dei fu dei. Wi no wani pori a bun nen fu wi (Ef. 2:2; 4:17). Fu dati ede, meki wi hori den warskow di e kon now na prakseri.
3 Tyari Yusrefi Bun—Na a Hotel Noso na a Presi Pe Yu E Sribi: Sma sabi taki wi na eerlijk sma (Hebr. 13:18). Fu dati ede wi musu taki soifri omeni sma o tan na ini a hotel kamra noso na a presi pe wi e sribi. Wi no musu bori na ini a kamra efu dati no mag. Wan basi fu wan hotel ben taki dati a ben man saka a moni di a e aksi fu yuru kamra gi Yehovah Kotoigi, bika noiti a ben abi fu poti nyun wasiduku, fu di den ben mankeri. A sabi taki den e sorgu bun gi den sani di de na ini den kamra. A no de fu taki dati wi no o teki „souvenir” (moimoi sani) fu a hotel. Na presi fu dati, efu sma gwenti fu gi den wan moni fu sori taki den e warderi a fasi fa den kisi sorgu, dan du dati tu. Abi ala ten switifasi nanga pasensi te yu e taki nanga den sma di e wroko na ini a hotel noso nanga den sma di gi yu wan sribipresi.
4 Sma di e luku fa wi e du sani e feni en wan bigi sani te den e si taki den yonguwan fu wi abi maniri, èn taki den e gi yesi (Ef. 6:1, 2). Papa nanga mama, grantangi luku yu pikin so taki den no e hendri trawan. No wan sma musu naki den doro tapu bun tranga noso meki babari, spesrutu latilati na neti.
5 Tyari Yusrefi Bun—Na a Presi Pe a Kongres E Hori: A kon na krin taki son sma di kon na a kongres, weigri fu wroko makandra nanga den dienst-yepiman, èn den e taki srefi na wan grontapu fasi nanga den. Skowtu kon hari a wagi puru fu son sma di kon na a kongres, fu di den no ben arki den bodoi di den brada ben gi den èn ben poti den oto pe dati no mag. A no de fu taki dati wan sma di e denki ensrefi nomo, no e sori taki en na wan sma di e du bun noso taki a e gi Yehovah Gado grani nanga dati. Fu dati ede meki wi de sma di e sori lobi, sma di abi pasensi èn di e wroko makandra nanga trawan.—Gal. 5:22, 23, 25.
6 Ala di wi kisi a rai fu nyan lekti sani na brekten, toku a no fiti fu go seti tafra na a parkeerpresi fu nyan bun furu sani. Disi ben o meki sma denki taki wi go koiri soleki fa dati e pasa te sma e go luku sport.
7 Tyari Yusrefi Bun—Fu di Yu E Weri Krosi Di Fiti èn E Sorgu Yusrefi Bun: Baka wán fu den distrikt kongres di hori a yari di pasa, a skrifiman fu wán prenspari koranti fu wan foto ben skrifi: „A fasi fa den Kotoigi ben tyari densrefi ben de a moro prenspari sani di naki mi ati. A ben de trutru wan moi sani fu si taki someni sma e tyari densrefi na so wan warti fasi èn nanga so furu lespeki. Nanga den moro moi kerki krosi fu den, hondrohondro osofamiri fu ala sortu ras nanga nâsi ben kon na ini a stadion sondro fu meki opo-opo. Den ben tyari densrefi na wan heri tra fasi leki moro furu fu den grupu sma di lobi fu kon na ini a stadion. Fu taki en leti, den Kotoigi e difrenti srefisrefi fu moro furu fu den grupu sma. A kon tron wan aladei sani now fu si taki sma no e tyari densrefi bun srefisrefi na publiki. . . . Fu tru, a de wan prisiri sani fu si a grupu fu Kotoigi.” No meki a de so, taki wi weri krosi, èn sorgu wisrefi noso tyari wisrefi na wan fasi di e puru sma prakseri fu trawan na a demakandra di wi abi nanga wi brada nanga sisa na a kongres.—Fil. 1:10; 1 Tim. 2:9, 10.
8 Tyari Yusrefi Bun—Na a Dopu Okasi: Den sma di o teki dopu wani si na okasi disi na wan tumusi warti fasi. Efu den e weri krosi di fiti fu teki dopu dan den o sori taki den e frustan o santa na okasi disi de. A de moro bun taki sma di e hori bijbelstudie e taki nanga den studenti fu den di o teki dopu, fu na „Aksi fu Leisiman” fu A Waktitoren fu 1 april 1995, bifo den e kon na a kongres.
9 Efu wi e weri wi krosi èn tyari wisrefi neleki fa Gado wani, dan dati e fruteri sma san wi leki Kresten e bribi èn a e meki taki a moro makriki gi opregtisma fu feni a waarheid. Fu dati ede, meki a de so taki wi e „tan du bun” èn taki sma e prèise wi te wi e kon na a „Leriman fu Gado Wortu” Distrikt Kongres.—Rom. 13:3.