Fa joe moe handri!
1. Fa gemeente-konmakandra foe Jehovah Kotoigi e tyari boen gi osofamiri?
NOWNOW moro leki 43.000 gemeente foe Jehovah Kotoigi de tapoe na heri grontapoe. Den kristen disi e kon ibri wiki makandra ini den Kownoekondre-konmakandra-presi foe den foe bijbelstudi èn konmakandra di de foe soso gi ibriwan sma di abi na opregti lostoe foe meki en bijbelsabi kon moro foeroe. Heri osofamiri, nanga pikin foe ala jari, e go na den konmakandra disi ini na kownoekondre-konmakandrapresi. Dja no wawan dati joe sa kisi piki tapoe foeroe bijbel aksi di ben broko joe ede ini na ten di pasa, ma joe sa kisi foeroe moro bigi winimarki. O moro joe heri osofamiri e teki prati ibriwan wiki na den konnakandra disi wán ofoe moro joeroe, èn o moro alamala e teki ini den sabi foe bijbel gronprakseri, na so safri-safri den oorzaak foe trobi nanga mankeri foe takimakandra ini na osofamiri sa gwe (Ps. 119:165). Moro harmoni nanga moro froetrow na mindri makandra sa de. A no dati osofamiri abi precies fanowdoe?
2. Ini sortoe difrenti maatschappelijke stand na gebroiki foe bijbel gronprakseri sa jepi èn ini sortoe fasi?
2 Te joe leri sabi bijbel gronprakseri èn joe e poti den ini joe ala dé libi, dan ini foeroe situwasi nanga omstandigheden disi sa de wan blesi gi joe. A sa gi na skoropikin wan marki na en fesi èn jepi en foe teki na leri moro betre ini en èn njan moro boen foe en. A sa jepi na oso-oema foe froestan na prenspari fasi foe na rol foe en ini na osofamiri. A sa abi leki bakapisi dati a wrokoman sa hori moro boen matifasi nanga en kompewrokoman èn dati en basi sa si en leki wan warti krakti. Sosrefi toe na basi sa froestan dati soleki a de handri nanga den soema di de na en ondro, na so Jehovah sa handri nanga en. Na so fasi redelijkheid nanga wrokomakandra sa teki na presi foe gridi, srefidensi fasi di de ini algemeen ini na owroe grontapoe disi. — Jak. 3:17, 18.
„Mi de nanga oenoe ala den dé”
3. Sortoe stré sondro foe weri den dienstknekti foe Gado moe stré, ma nanga sortoe djaranti?
3 Te den markitiki nanga praktijk foe na disiten seti foe sani e tan go na baka, dan den sma di lobi Gado èn di e waka baka Kristus, no sa saka go ini den dipi foe porifasi, sodati wan sma sa tjari soso gado strafoe kon a tapoe en ini na moro bigi moeilijkheid foe ala ten. Getrow Kotoigi foe na troe Gado ini wanfasi èn sondro foe weri sa stré gi na bribi, ala di Gado feanti e doe moeiti foe waka na wan kibrifasi kon na den mindri èn wroko na wan takroe fasi tapoe den (Teki gersi Judas 3, 4). Den dienstknekti disi foe Jehovah abi na pramisi foe na Kownoe di Gado ben teki èn di no de foe si nanga ai: „Loekoe! Mi de nanga joe ala den dé te na besroiti foe a (disten ogri) seti foe sani.” — Matt. 28:20.
4. Sortoe kenki toestand wi kan froewakti baka na „bigi benawtoe”?
4 Dati Jezus Kristus ben sa de te na a ten dati nanga den, wani taki toe dati a sa meki den sma di pasa libilibi na „bigi benawtoe” go ini wan kenki situwasi na grontapoe, wan situwasi pe Kristus tirimakti komoto foe hemel sa sorgoe dati sma „no sa doe no wan sortoe ogri moro èn no sa pori sani tapoe heri mi santa bergi (na kownoekondre); bikasi na grontapoe sa kon foeroe nanga na sabi foe Jehovah soleki den watra e tapoe den se” (Jes. 11:9; Openb. 7:14). Den poriman foe na grontapoe, nanga ala den supermodern èn verfijnde kernfeti-sani, sa figi komoto foe na grontapoe! Sosrefi toe den kwinsiman èn léman nanga kiriman no sa de moro! Ini a ten foe Kristus Jezus doesoen jari tiri a sa tjari den libisma di o libi na grontapoe tapoe wan faste, ma switifasi go tapoe na pasi foe libisma volmaakti fasi. — Openb. 21:4.
5. Sortoe warskow na a reti ten wi e feni ini Lukas 21:36 èn 2 Petrus 3:10?
5 Heri esi now, na radicaal kenki ini na grontapoe-toneel sa kon na wi tapoe, na wan ten di na moro bigi pisi foe den sma no e froewakti en, bikasi den no e poti prakseri tapoe na warskow foe bijbel: „Tan dan na ai, begi alaten dati joe sa man foe eskép ala den sani disi di sa go pasa seker, èn foe tanapoe (teki wan boen positsi) na a fesi foe na Manpikin foe libisma” (Luk. 21:36). Toemsi bigi sekseki a mindri den tirimakti di de foe si èn di no de foe si nanga ai foe na ogri seti foe sani disi sa feni presi. Petrus ben skrifi ondro krakti foe santa jeje na warskow disi di e kon: „Tog Jehovah dé sa kon leki wan foefoeroeman, pe den hemel sa pasa gwe nanga wan (sneki) babari, ma den elementi di kon faja, sa loesoe, èn grontapoe nanga den wroko a tapoe sa tjari kon na krin” (2 Petr. 3:10). Ja, te Jehovah e meki wan heri grontapoe-seti go na ondro tapoe wan fasi di a verdini, dan a sa tjari ala den triki foe ogri sma nanga ogri jeje kon a doro krinkrin. — Jer. 25:31-33.
Bigi winti warskow
6. (a) San den marki foe den ten e sori foe a krosbé ten di e kon? (b) O bigi na pori foe Gado doe sa de?
6 Soleki den marki na den letterlek hemel de wan warskow na fesi foe bigi winti nanga bigi pori, na so den marki foe den ten e sori tapoe na laatste bigi winti èn pori di e opo kon na a grontapoe-horizon (Luk. 12:54-56). O bigi na pori foe den bakapisi foe na doe foe Gado sa de gi na onregtvaardiki seti foe na grontapoe-tirimakti? Disi joesrefi kan si ini den wortoe di e kon now foe Gado proféti ondro santa jeje krakti: „Jehovah abi atibron nanga ala naatsi èn bigi atibron nanga heri na legre foe den. A moe gi den abra na pori; a moe gi den abra foe srakti. Èn heri na legre foe hemel moe frot gwe. Èn na hemel moe lolo tapoe leki wan boekoelolo; èn heri en legre moe krempi èn lasi gwe, neleki den blati e krempi èn e fadon foe na droifibon èn soleki wan ploiploi figa e fadon foe na figabon.” — Jes. 34:2, 4.
7. (a) Fa Jesaja 51:6 e skrifi foe na kaba foe na grontapoeseti? (b) Fa Jehovah ferloesoe nanga regtvaardiki fasi de ini a tori disi?
7 Te na proféti e taki agen na fesi foe na kaba foe wan heri grontapoeseti, pe den tiriman e brenki leki stari èn pe den ondrodaniki sma foe den tanapoe na den baka, a de taki ini Jesaja 51:6: „Opo joe ai go na hemel srefi, èn loekoe go na grontapoe na ondro. Bikasi na hemel moe fadon panja ini pisi pisi leki smoko, èn leki wan krosi na grontapoe srefi sa kon broko, èn den sma di e libi a tapoe srefi sa dede leki wan maskita. Ma foe taki foe wi ferloesoe (Jehovah e taki), dati sa de srefi te ten di no abi marki, èn mi regtvaardiki fasi no sa broko.”
Tjari na kroetoe kon
8. San de den edeprakseri foe na toemsi ogri boskopoe ini Openbaring 6:12-17?
8 Sosrefi toe na glori Kownoe Kristus Jezus, via en engel, na apostel Johannes ben gi na komando foe skrifi na toemsi ogri boskopoe: „Èn mi si, di a ben opo na ségel di meki siksi, èn wan bigi aardbéfi ben kon; èn son ben kon blaka leki wan saka foe wiwiri, èn na heri moenkenki ben tron leki broedoe, èn den stari foe hemel ben fadon na grontapoe, soleki te wan figabon e trowe en groen figa, te wan krakti winti wai. Èn na hemel ben hari gwe baka leki wan boekoelolo di e lolo tapoe, èn ibri bergi èn ibri eilanti ben poeroe foe en presi. Èn den kownoe foe na grontapoe èn den hé soema èn den sroedati koemanderiman èn den goedoeman èn den trangaman èn ibri srafoe èn ibri friman ben go kibri ini den olo èn ini den ston foe den bergi. Èn den e tan taki gi den bergi nanga den ston: ’Fadon na wi tapoe èn kibri wi foe na ai foe na soema di sidon tapoe a troon (Jehovah) èn foe na atibron foe na Lam, bikasi na bigi dé foe en atibron ben kon, èn soema man foe tan tanapoe dan?’” (Openb. 6:12-17). Nowan enkri feanti foe Jehovah nanga foe na Kownoe Kristus sa tan na libi!
9. (a) Sortoe difrenti groepoe den sa dwengi foe erken Jehovah kroetoe gi den? (b) San Psalm 83:17, 18 èn Ezechiël 39:6, 7 e ferteri wi foe na reden foe na kroetoe disi?
9 Na bijbel e sori dja dati den maktiwan foe na grontapoe — den tiriman foe den naatsi, den sroedati tiriman, den goedoe bisnismagnaat — èn ala sma di, ofoe ondro dwengi ofoe nanga den fri-wani, e hori baka gi den, sa kisi foe doe nanga na kroetoe foe Jehovah. Den no sa abi no wan fasi foe eskép! Den gridi plan nanga moeiti foe den foe hori na owroe, ogri seti disi tanapoe, sa fadon. Den sa dwengi den foe si dati na boen-ati foe Gado no de tapoe den. Gado sa jere na begi foe Psalm 83:17, 18, bikasi den feanti disi foe Gado „sa kon redi foe sjen èn lasi gwe”. Èn foe san-ede? „Sodati sma kan kon sabi dati joe, di nen Jehovah, joe wawan de na Moro Héwan tapoe na heri grontapoe.” Ja, a ten foe Jehovah sa doro foe doe na sani di a ben meki bekenti nanga mofo foe en proféti so wan 60 tron, dati den sa „moe sabi dati mi na Jehovah”. — Ezech. 39:6, 7.
Kolokoe den sma di e tan na libi
10. Pe den sma no sa kan feni kibri ini na ten foe na benawtoe?
10 Foe kan kibri na libi foe den pasa na moro bigi benawtoe ini na heri libisma historia, meki den sma sa lon go soekoe kibri. Ma pe? Den no sa poti froetrow ini Jehovah, ma ini den égi organisaatsi. Foe datede meki den e drai go na libisma, politiek tiri èn bisnis organisaatsi, di e basi na grontapoe leki hé bergi, leki a baka-bonjo foe a disiten seti foe sani. Na profétitori foe Gado sa kon troe nomonomo. Te ala gensman foe Gado kownoekondre e koti poeroe foe tego ini pori, dan den sani di den marki foe den ten ben taki na fesi, ben sa hari miti den.
11. Kari difrenti reden foe kolokoe di den sma sa abi di e pasa libilibi?
11 Ma fa dati sa de wan glori dé gi ala safri-ati-sma foe na grontapoe! A sa de leki den ben wiki foe wan takroe dren. Den sma dati di pasa libilibi sa de kolokoe. Na lobi foe moni, „na roetoe foe ala takroe sani”, soleki bidrigi èn concurrentie-stré foe kiri trawan, sa roetoe poeroe (1 Tim. 6:10). Den sma di e libi na grontapoe sa wroko ondro prisiri omstandigheden èn den sa prisiri ini den froktoe foe den tranga wroko, bikasi na proféti foe Gado e verklari: „Èn den sa sidon troetroe ibriwan ondro den droifibon èn ondro den figabon foe den, èn nowan sma sa de di e meki den béfi; bikasi a de na mofo foe Jehovah foe den legre di ben taki dati” (Micha 4:4). Go prakseri pikinso! Ala roetoe foe spanning nanga sorgoe sa gwe foe alaten! Wi no e prisiri foe so wan froewakti na wi fesi?
12. (a) Na sortoe kon gosontoe ini a ten di e kon Maleachi 4:2 e sori? (b) Sortoe handicap Gado srefi sa poeroe foe na libisma famiri?
12 Na presi foe na hati son foe takroe rigeri èn kwinsi foe na sé foe Satan, na falsi gado, Jehovah foe den legre e pramisi dati „gi den sma di e frede en nen, na son foe regtvaardiki fasi seker sa go skijn, nanga gosontoe ini en fré (ofoe straal)” (Mal. 4:2). Èn no wawan den siki na skinfasi sa dresi, ma sosrefi toe den siki foe a froestan èn den firi, di de a bakapisi foe ala pina ini a ten di pasa. Na sortoe fasi? Foe di na dede nanga den pori di a tjari kon na mindri a libisma famiri sa tron noti. Wi kan de seker foe disi, bikasi na trowstoe boskopoe foe Gado de: „Loekoe! Na tenti foe Gado de na den libisma, èn a sa tan na den, èn den sa de en pipel. Èn Gado srefi sa de na den. Èn a sa figi poeroe ala watra na den ai, èn na dede no sa de moro, no sari, no babari, no pen sa de moro. Den fosten sani pasa kaba.” — Openb. 21:3, 4.
13. (a) Fa na bijbel e taki foe a howpoe foe na opobaka? (b) Sortoe okasi foeroe sma sa abi foe na fosi tron?
13 Ma fa a de nanga den miljard-miljard sma di ben dede èn „di e sribi ini na stof foe na grontapoe”? (Dan. 12:2). Howpoe de gi den? Ja, bikasi akroederi na leri foe Kristus Jezus, dan en getrow apostel Paulus ben taki: „Tapoe Gado mi ben poti mi howpoe . . . dati wan opobaka sa de foe den regtvaardiki wan èn den onregtvaardiki wan” (Tori foe den Apostel 24:15). Na doesoen jari tiri foe Kristus sa gi foeroe foe den sma disi di e drai baka foe na grebi na okasi foe kisi wan krin froestan foe Gado prakseri, na fosi okasi foe tjari nanga den friwani den libi kon akroederi a wani foe Gado. Fa disi sa de wan toemsi moi ten foe prisiri kon miti makandra baka!
14. (a) Ini sortoe boen positsi wi de now? (b) Foe san den marki foe den ten moe gi wi tranga?
14 Wi abi seker wan bigi grani dati wi de now ini so wan boen positsi foe kan si boen ini sortoe ten wi e libi! Wi e si now alape lontoe wi den marki di e sori tapoe wan kon esi èn bigi kenki. Wi kan froestan dati Jehovah ben gi pasi ini wan redelijke ten dati gridi fasi sma nanga pori ogri jeje ben tiri den naatsi, foe sori dati den no ben man kwetkweti foe tjari vréde nanga tanboen gi ala sma. Nownow den marki foe den ten e tjari kon na krin gi wi ai foe wi froestan dati ten no de foe lasi. A de tranga fanowdoe, dati . . . wi doe stap, sodati wi sa kisi na boen-ati foe Gado. Den wortoe di na apostel Paulus ben taki gi wan ipi arkiman ini na owroe Athene, moe meki wi opo doe wan sani now. A ben taki dati Gado „e taigi den sma dati den alamala èn alape moe abi beraw” (Tori foe den Apostel 17:30). Te wi doe disi tapoe na gron foe soifri sabi èn moro fara gi wi srefi abra na Gado, dan wi abi na okasi foe sori na bigi Kroetoeman foe ala sma dati wi de na a sé foe en Kownoekondre ondro Kristus. Ma den stap dati wi moe doe now sondro draidrai, èn ala di Satan e rigeri ete tapoe a grontapoe. Disi sa de na tesi tapoe wi opregti lobi gi Gado waarheid èn regtvaardiki fasi. — 1 Petr. 1:6, 7.
15. (a) Sortoe aksi joe kan piki now foe a boen foe joesrefi? (b) Soleki Psalm 146 e sori, dan sortoe fasi foe libi èn waka foe joe sé, sa tjari troe kolokoe kon?
15 Joe sa de na mindri na kolokoe ipi sma di sa pasa libilibi? Ini loyaliteit soso na Gado, joe sa de tegen Satan nanga ala onregtvaardiki fasi èn teki a sé foe Gado nanga en kownoekondre ondro Kristus? Joe sa abi wan prati na a warskow foe joe medesma èn joe sa gi den na okasi foe kisi ferloesoe komoto foe wan ogri libisma famiri di e go na pori? Meki dati de na blesi pisi foe joe èn meki a de so dati joe agri foe tego nanga na singi-groepoe di e tjari nanga tangi prijse gi Jehovah, na Mekiman foe na hemel nanga na grontapoe nanga na se èn ala sani di de na ini. — Ps. 146:1, 2, 5, 6.
[Prenki na tapoe bladzijde 193]
Ini Armageddon kibripresi no sa de foe den goddelowsoe soema