A Wortoe foe Gado abi libi
Fa Kristus e kon baka
JEZUS KRISTUS ben moe dede foe ben kan gi en volmaakti libisma-libi leki wan ferloesoe paiman gi wi. Wan tron a ben tjari kon na krin: „A brede di mi sa gi, de mi skin foe na boen foe na libi na grontapoe” (Joh. 6:51). A ben sa teki oiti na skin baka, bakadi a ben gi en na wi? Kristus sa drai kon baka leki libisma?
A bijbel e taki dati Kristus e kon baka ini glori, nanga ala engel, èn dati „a e teki presi tapoe en glori troon” (Matt. 25:31). Efoe Jezus ben sa kon leki libisma èn ben sa teki presi tapoe wan grontapoe tron, dan te joe loekoe en positie a ben sa lagi moro leki den engel. Ma a e kon leki na makti èn gloriwan foe ala den jeje manpikin disi foe Gado, èn foe dat’ede a no de foe si nanga ai neleki den disi no de foe si nanga ai. — Fil. 2:8-11.
Tokoe ete foeroe sma e bribi taki Jezus ben teki en skin foe meti go na hemel èn taki a sa kon baka ini wan skin foe meti nanga broedoe. Den e sori a tapoe taki a Jezus di ben opo komoto foe dede na moro leki wantron ben sori ensrefi na en discipel foe sori den taki a ben de na libi. Wan tron Jezus ben aksi na apostel Thomas foe troesoe en anoe go na ini na soro na ini en sé sodati Thomas ben sa bribi taki a ben opo komoto foe dede (Joh. 20:24-27). Disi no e sori taki Jezus, di a ben opo komoto foe dede, ben abi na srefi skin di ben spikri na a postoe?
Nono, bika Jezus ben teki soso a skin foe wan libisma ofoe a ben teki na skin foe meti, soleki engel ben doe disi ini a ten di psa. Foe overtoigi Thomas soema a ben de, a ben sori ensrefi ini wan skin pe den olo foe na soro ben de. A ben gersi, ofoe so a ben gersi, troetroe leki wan sma èn ben kan njan èn dringi, netleki den engel di Abraham ben sori taki a lobi foe teki sma ini en oso. — Gen. 18:8.
Ala di na skin pe Jezus ben sori ensrefi na Thomas ben gersi na skin di den ben kiri en, a ben teki sosrefi toe tra skin di a ben sori ensrefi na en bakaman. Na so Maria Magdalena ini na bigin ben denki taki a ben de wan djariman. Na tra okasi den discipel foe Jezus no ben herken en ini a bigin. Ini den geval disi den no ben man sabi en te den ben loekoe fa a ben tan na dorosé na skinfasi, ma foe di a ben taki ofoe doe wan sani di den ben erken. — Joh. 20:14-16; 21:6, 7; Luk. 24:30, 31.
Loekoe pikinso na fasi fa Jezus ben gwe libi en apostel di a ben gwe na hemel. Na bijbel e taki: „Aladi den ben loekoe a ben teki opo go na loktoe èn wan wolkoe ben poeroe en na den ai” (Tori. 1:9). Di Jezus ben bigin go na loktoe, wan wolkoe ben kibri en soboen foe den letterlek ai foe den apostel. Na Jezus di ben gwe foe dat’ede ben de wan sani di wi no ben kan si nanga ai. Den no ben kan si en. A ben go ini wan jejeskin na hemel (1 Petr. 3:18). Den engel di ben de na a okasi disi ben taigi den apostel: „Na Jezus disi, di ben teki foe go na loktoe, na a srefi fasi a sa kon baka leki fa oenoe ben si ai go na loktoe” (Tori. 1:11). Na kon baka foe Kristus soboen ben sa de sosrefi wan sani di no ben sa de foe si nanga ai, ini wan jejeskin.