A presenti foe Gado foe wroko gi en dienstknekti
„Mi ben gi joe glori na grontapoe. foe di mi ben klari na wroko di joe ben gi mi foe doe.” — Johannes 17:4.
1. Fa Jezus ben doe en wroko, foe san a ben seni kon na grontapoe?
JEZUS KRISTUS, na wan enkri gebore Manpikin foe Gado, de na moro prenspari dienstknekti foe na Mekiman foe hemel nanga grontapoe. Di Jehovah ben seni en go na grontapoe foe soifri en universele soevereiniteit èn foe bai na grontapoe foe na libisma-famiri kon fri, dan Jezus ben tron wan toemsi skreki sani, spesroetoe gi na libisma-famiri. Ini Jesaja 52:13, 14 disi ben taki na fesi na a fasi disi: „Loekoe! Mi knekti sa handri nanga koni. A sa de ini wan hé presi èn séker a sa poti hé èn poti boen hé na tapoe. Na a fasi dati foeroe sma ben loekoe na en nanga skreki — na so na pori ben de foe en fesi moro leki ibri tra sma èn foe en grani skin moro leki di foe den libisma-manpikin.” A ben klari na ongewoon wroko disi getrow, soleki a ben taki ini en begi nanga Jehovah Gado nanga den wortoe: „Mi ben gi joe glori na grontapoe, foe di mi ben klari a wroko di joe ben gi mi foe doe” (Joh. 17:4). A de wan eksempre foe ala tra dienstknekti foe Gado.
2. Na sortoe fasi wi ben meki na a prenki foe Gado?
2 Man nanga oema abi na fanowdoe foe wroko. Disi abi foe doe nanga na fasi fa den ben meki den: „Meki wi meki libisma na a prenki foe wi, akroederi na gersifasi foe wi”, Jehovah ben taki di a ben meki na libisma leki en dienstknekti na grontapoe (Gen. 1:26). Nanga na „gersifasi” disi, a no wani taki dati na libisma gersi Gado na skinfasi, bikasi Gado na wan jeje èn libisma ai no kan si en. A wani taki moro foeroe dati bepaalde égifasi foe Gado ben gi na a sondro-fowtoe libi-sma, égifasi soleki geregtigheid, koni, lobi nanga tra wan, di e poti libisma aparti foe den lagi meti. Dati disi de na joisti loekoe foe a tori, e kon a krin ini Kolosse 3:9, 10, pe den kompedienstknekti foe Jezus di gi densrefi abra na Gado e kisi na komando foe kenki den égifasi foe den: „Poeroe na owroe égifasi nanga en wroko èn weri na njoen égifasi leki joe krosi, di nanga jepi foe soifri sabi e kon njoen na a prenki foe na Sma di ben meki en.”
3, 4. (a) San Gado sori dati a de ini den biginwortoe foe na bijbel? (b) A sortoe fasi a ben teki bro di den mekiwroko ben klari?
3 Wán marki foe na „prenki” foe Gado de, dati a de wan wrokoman. Jehovah abi ala fri foe doe san e plisi en, èn a de plisi en foe wroko. Den biginwortoe foe na bijbel e meki wi kon sabi en leki wan wrokoman di no e weri: „Ini a bigin Gado ben meki hemel nanga grontapoe” (Gen. 1:1). Di a ben doe disi, a no ben weri sote: „Jehovah, na Mekiman foe den oekoe foe grontapoe, na wan Gado foe ten di no abi marki. A no e weri.” — Jes. 40:28.
4 Dati Jehovah ben teki bro na a kaba foe na mekidé di meki siksi, soboen no ben kan taki dati a ben moe kisi ensrefi foe ala weri. Na bijbel e taki: „Ini siksi dé Jehovah ben meki hemel nanga grontapoe èn na a dé di meki sébi a ben stop èn a ben go abra foe bro pikinso” (Ex. 31:17, voetnoot foe na Ingrisi uitgave foe na Njoen-Grontapoevertaling). Gado no ben rostoe foe ala wroko, ma soso foe na aparti mekiwroko disi. Baka di a ben klari en, a ben loekoe en èn a ben taki dati a de heri boen, dati a ben doro na en markitiki foe sondro-fowtoe-fasi. A ben firi kowroe-ati, a ben de tevréde dati a ben klari na hé kwaliteit wroko disi. Foe si dati na toemsi moi wroko disi ben klari, ben gi na Mekiman foe ala disi, Jehovah, prisiri, satisfaksi nanga kowroe-ati (Gen. 1:31; Joh. 5:17). Ala disi e sori wi krin dati libisma, di ben meki foe gersi Gado, gebore nanga na fanowdoe foe no de wawan wrokoman, ma foe abi kowroe ati, foe di a abi na firi dati a doe wroko di doe boen.
Na fanowdoe foe libisma foe doe wroko di wani taki wan sani
5. (a) San Gado sori dati a de moro èn san e kon foe disi? (b) San e tjari pikinso kon na krin na go na baka foe na wroko-ethiek?
5 Boiti dati, Jehovah de wan Gado nanga wan prakseri èn en wroko e doe nanga wan prakseri, wan marki. „Ala sani Jehovah ben meki foe En prakseri”, nanga na libisma-famiri toe na ini (Odo 16:4). Foe datede meki dati den wroko foe libisma moe doe sosrefi toe nanga wan prakseri. „Na feti, dati na libi taki wan sani gi wi”, na psychiater Viktor Frankl e skrifi „de na moro prenspari krakti ini libisma foe boewégi en . . . Noti de ini grontapoe, so mi e prefoeroe foe taki, di kan jepi wan sma so boen, srefi foe pasa den moro takroe toestand, leki na sabi dati na libi foe wan sma wani taki wan sani.” Ma foeroe sma e feni en wan ferferi sani foe doe na srefi sani baka na wan banti di e lon foe meki wan product di den no abi belangstelling foe en ofoe di den no kan meki bigi foe en. Disi e tjari pikinso kon na krin na lasi foe wroko-ethiek — foeroe foe na wroko di e doe now, no e doro na psychologische lostoe foe libisma foe abi wan libi di wani taki wan sani èn foe abi na firi dati wan sani doe.
6. Sortoe wroko di wani taki wan sani ben gi na a fosi libisma?
6 Foe di ala sani di Gado ben meki abi wan marki, meki na libi-sma ben meki nanga wan prakseri. Gado ben meki en èn ben poti en na grontapoe foe doe wroko. Na wroko di Gado ben gi en foe doe ben wani taki wan sani èn a ben abi foe doe nanga a boen gebroiki foe en froestan èn en anoe. „Jehovah Gado now ben teki na libisma èn poti en ini na djari foe Eden foe wroko en èn foe sorgoe en.” Na sondro-fowtoe libisma ben moe „abi na en ondro den fisi foe se èn den fowroe foe hemel èn den osometi èn na heri grontapoe èn ala meti di e boewegi ensrefi na grontapoe”, èn „Jehovah Gado (ben meki) komoto foe na gron ala den wilder meti foe boesi èn ibri fowroe foe hemel, èn a ben bigin foe tjari den go na a libisma foe si fa a ben sa kari ibriwan foe den; èn soleki fa na libisma ben kari ibri wan, ibri libi sili, na dati ben de en nen”. — Gen. 2:15; 1:26; 2:19.
7, 8. (a) Foe san-ede wi kan kari wroko di e doe ini na dienst foe Gado, nanga reti wan presenti di komoto foe Gado? (b) Foe san-ede hobby’s no de wan boen sani, foe teki na presi foe wroko?
7 Jehovah ben gi na libisma wroko foe doe di ben fiti èn di ben sa gi en satisfaksi, èn prisiri. A wroko ben sa foeroe en libi, poeroe ibri mogelijkheid foe froeferi ofoe soi èn sondro difrenti ini sani èn gi en na firi foe satisfaksi, dati a abi warti. A ben sa de wroko di wani taki wan sani, foe di na Mekiman foe na grontapoe nanga na universum, na Almakti Gado nanga wan prakseri, ben gi na wroko dati. Na presi dati den égifasi foe Gado ben onderdrukt ofoe ben kon na wan kaba ofoe no ben kan gro moro, soleki fa e pasa foeroe tron, na wroko di Jehovah ben gi na fosi man nanga oema, Adam nanga Eva, ben gi den na okasi foe sori den firi tapoe wan fri fasi. Èn srefi baka di na libisma ben jagi poeroe foe na djari foe Eden èn baka di den ben taigi en dati „ini na sweti foe en fesi” a ben sa doe wroko, dan a wroko disi ben de ete foe na boen foe na libisma. — Gen. 3:19.
8 Wetenschappelek studi di ben doe no so langa pasa kaba e sori dati na bijbel waarheid de troe, dati na libisma ben meki foe doe wroko. Den ben sori dati moro foeroe foe den grani sma di abi wan boen gesontoe, no wani stop nanga wroko, dati pensioen nofotron e tjari froeferi leki kolokoe. Sma di e ondrosoekoe sani e bribi dati te wan sma hari ensrefi komoto foe na publiki libi, disi abi leki bakapisi dati sma di e froeferi foe di den no abi noti foe doe, e lasi na wani foe libi moro fara, sodati foe troe na libiten foe den e kon moro sjatoe. Hobby’s no kan teki tapoe wan tevréde fasi na presi foe wroko ini na libi foe sma di kisi pensioen. Hobby’s kan de switi te wan sma kan gi wantoe joeroe ini wan wiki na en foe kan doe wan tra sani leki na normaal wroko èn foe teki wan kenki, ma den e kon de wan weri-ede sani te wan sma gi ala en ten na den. Den no kan gi wi na firi dati wi libi e dini wan boen sani. Na koni kownoe Salomo ben skrifi: „Mi ati ben prisiri foe ala mi tranga wroko ede, èn disi ben de na porsi foe ala mi tranga wroko. Noti de moro betre gi wan libisma leki dati a njan èn dringi troetroe èn meki en sili si na boen foe en tranga wroko ede. Disi toe mi ben si, ja, dati disi komoto foe na anoe foe na troe Gado.” Wroko di e doe foe datede ini a dienst foe Gado, de wan presenti di komoto foe Gado. — Prék. 2:10, 24.
Na wrokoman moe njan boen foe den froktoe foe en wroko
9, 10. (a) Sortoe eksempre e sori dati libisma moe njan boen foe den froktoe foe en wroko? (b) Na a kré foe soema Gado e arki?
9 Jehovah no wani dati libisma lasi den froktoe foe en wroko. „A gronman di e wroko tranga”, so na apostel Paulus ben skrifi, „moe de na fosi wan de e gebroiki den froktoe.” A wan tra presi a ben go moro dipi tapoe na gronprakseri disi foe Gado nanga den wortoe: „Soema e prani wan droifidjari èn no e njan foe den froktoe foe en? Ofoe soema e tjari wan ipi-meti go na wé èn no e njan pikinso foe na merki foe na ipi? Mi e taki den sani disi akroederi libisma markitiki? Ofoe na wet no e taki den sani disi sosrefi toe? Bikasi ini na wet foe Mozes ben skrifi: ’Joe no moe tai na mofo foe wan kaw te a de masi na alési.’ Gado e broko en ede nanga kaw? Ofoe a de taki en soso foe na boen foe wi? Ja, foe wi ede a ben skrifi, foe di wan sma di e ploegoe, moe ploegoe ini howpoe, èn a sma di e sjoeroe, moe doe disi ini na howpoe foe kisi en porsi.” — 2 Tim. 2:6; 1 Kor. 9:7-10.
10 Srefi den meti di e wroko ben moe njan boen foe den froktoe foe den wroko foe den. Efoe Jehovah e kibri den afersi foe den meti di no abi froestan, omeni moro a sa feti gi a zaak foe libisma wrokoman! Foe troe a de sori krin, dati a sa doe disi troetroe: „Loekoe! Na paiman di den wrokoman ben moe kisi, di ben koti na njanjan foe oen gron, ma di oen ben hori na oenoe, e tan bari tranga, èn den jepibabari foe na sé foe den kotiman ben doro te na den jesi foe Jehovah foe den fetiman.” — Jak. 5:4.
Jezus nanga en foetoeboi de wrokoman
11. Fa Jezus ben prakseri foe wroko, èn foe san-ede wi moe teki na fasi fa a ben loekoe wroko na ati?
11 Neleki en hemel Tata Jehovah, na so Jezus de wan wrokoman. „Mi Tata tan wroko te now”, Jezus ben taki, „èn mi e tan wroko toe” (Joh. 5:17). A de doe a wroko di Jehovah ben gi en. Nanga prisiri èn nanga fri wani a de doe a wroko disi èn a de sori dati a de feni en switi. A de si en leki wan sani di e gi krakti nanga satisfaksi leki njanjan. Moro leki dati srefi, bikasi na wan séker okasi di en discipel ben gi en tranga foe njan, a ben piki: „Mi njanjan de, dati mi doe a wani foe en, di ben seni mi kon èn foe klari en wroko” (Joh. 4:34). Na prisiri dati a ben doe boen wroko, ben sa gi en kowroe-ati na a kaba foe en wroko, ben sa poeroe weri di ben kan de èn gi en wan tevréde èn prisiri firi. Den sma di taki dati den de kristelek, moe teki na fasi nanga doe disi foe Kristus Jezus na ati. Foe san-ede? Foe di a bijbel e sori dati Kristus ’ben libi gi wi wan model, sodati wi ben sa waka soifri ini en foetoestap’. — 1 Petr. 2:21.
12, 13. (a) Sortoe agersitori e sori dati boen wrokoman moe kisi prijse, èn sortoe paiman ben gi na den? (b) San ben psa nanga den srafoe di no ben meki froktoe? (c) Sortoe prakseri fakansi e dini?
12 Nanga jepi foe wan agersitori Jezus ben sori dati wroko e gi en égi paiman foe prisiri. Wan man ben go na reis. A ben meki en srafoe kon na en èn a ben prati en goedoe na mindri den, akroederi nanga den difrenti koni foe den. A no ben aksi foe den moro leki den ben man foe doe, ma a ben froewakti wel dati den ben sa meki froktoe akroederi na koni foe den. Baka wan langa ten, dati a no ben de, a ben kon baka foe aksi frantwortoe foe den. Na sma di ben kisi féfi talent, ben meki den kon toe tron so foeroe, na sma di ben kisi toe talent, ben meki a kon toe tron so foeroe, ma na sma di ben kisi wan talent no ben doe noti nanga en. Fa den toe faja wrokoman ben kisi pai? Nanga wan fakansi? Nono, ma nanga moro foeroe wroko! Na masra ben prijse ibriwan foe den nanga den wortoe: „Heri boen, joe boen èn getrow srafoe!” Èn a ben taki moro fara: „Joe ben de getrow abra pikinso. Mi sa poti joe tapoe foeroe. Go ini na prisiri foe joe masra.” Na prisiri foe na masra ben de ini a wroko disi, èn foe di den srafoe disi nanga faja ben kisi moro foe en foe doe, meki den ben go moro foeroe ini na prisiri foe en. Ma fa a ben de nanga na lesi srafoe? Na besroiti ben de: „Teki na talent poeroe na en anoe èn gi en na en di abi tin.” — Matt. 25:14-30.
13 Now na lesi srafoe ben kan kiri en ten. Ma a ben de kolokoe? Nono, a ben de gi en dati a „ben kré èn kawtifi”! Foe kan de kolokoe, wi abi boen wroko fanowdoe. Wi abi ten toe fanowdoe foe teki bro. Kontrari leki fa a de nanga Jehovah, wi e weri. Ma baka te wan fakansi ben meki wi skin nanga jeje krakti kon boen baka èn ben gi wi njoen krakti baka, dan wi de klari foe doe njoen wroko — ja, wi e lostoe troetroe foe go baka na wroko. Disi de so, efoe a wroko no de froeferi èn no de a srefi sani baka alaten èn de gi na wrokoman sondro marki èn a no wani taki wan sani, soleki ini disi ten wi kan taki foe foeroe grontapoe wroko.
14. Omeni boen wan libi foe soekoe goedoe e tjari kon?
14 Ma boiti dati ini disi ten foeroe sma moe doe wroko di no de interessant, san e tjari na go na baka foe na wroko-ethiek, foeroe sma e fadon go ini na trapoe foe na lobi foe goedoe. Ma omeni boen di e tan, na tjari konmakandra foe goedoe di no de fanowdoe abi? Wan disi ten odo de: „Wan libisma no kan tjari noti gwe nanga en.” Salomo e tjari en kon moro krakti a fesi: „Joisti soleki wan sma ben komoto foe en mama bere, na so nanga sososkin wan sma sa go baka, joisti leki fa wan sma ben kon; èn kwetkweti wan sma no kan tjari noti gwe foe en tranga wroko, di a kan teki gwe nanga en anoe. Èn disi toe de wan ernstig rampoe: soleki wan sma ben kon, na so a sa gwe baka; èn sortoe wini de gi na sma di e tan wroko tranga gi na winti?” — Prék. 5:15, 16.
15. Sortoe tra sososani e kisi son tra sma?
15 Son sma e kon ini wan tra soso sani: den e wroko „foe de a srefi leki den Jansens”, soleki sma e taki. Ofoe, moro ogri, foe psa den Jansens. „Mi ben leri toe foe san-ede libisma e wroko so tranga foe a waka den boen” Salomo ben taki. „A kon, foe di den e djaroesoe nanga den sani di den birti abi”, ofoe foe di „a wani taki na stré foe a wan sma nanga a tra sma” (Prék. 4:4, Today’s English Version; NW). Na libi nanga na wroko foe den sma di no e frede Gado troetroe no wani taki noti èn de wan soso sani: „Joe sa tron leki wan bigi bon di den wiwiri e flaw, èn leki wan djari di no abi watra. Èn na tranga man séker sa tron leki tité, èn na froktoe foe en wroko leki wan faja di koti; èn ala toe séker sa go makandra ini flam, sondro dati wan sma kan kiri en.” — Jes. 1:30, 31.
Na span wroko di de ini na ten di e kon
16. Sortoe wroko di e gi satisfaksi didon na a fesi foe na libisma-famiri di e gi jesi?
16 Na wroko gi libisma na grontapoe no sa de alaten wan feti baka winti. A sa wani taki wan sani, na a srefi fasi neleki na wroko di a fosi man nanga oema ben kisi ini Eden. Jehovah prakseri foe abi wan paradijs na a heri grontapoe, di regtvaardiki libisma sa sorgoe, sa kon troe (Jes. 55:11). Na kownoekondre foe Gado, di Kristus sa tiri sa tiri abra wan grontapoe di foeroe nanga volmaakti libisma. Na libi ini na njoen seti dati no sa de a srefi sani baka alaten ofoe wan froeferi sani, foe di nofo wroko sa de foe doe — no a soso wroko foe na owroe grontapoe disi, sodati a de wan hebi sani foe psa na wrokowiki èn foeroe sma na a bigin foe na wiki e gersi dati den abi na „moende-siki”. Nono, a sa de na interessant èn moi wroko foe meki na grontapoe kon moi, foe tiri tapoe wan lobifasi tapoe den meti, foe kweki pikin, èn foe leri sma di wiki komoto foe dede, te leki a grontapoe kon foeroe nanga wan regtvaardiki libisma-lo, èn foeroe moro prisiri, di sma e denki dati a no kan de so. Dan sma di lobi foe doe sani sa „njan boen langa foe na wroko foe den anoe èn gebroiki en dorodoro”. — Jes. 65:22.
17. San e sori dati na libi noiti sa de soi, foe di wi ben leri èn doe ala sani kaba?
17 Boiti wroko di sa de foe doe nanga anoe, problema sa de di sa tjalansi na volmaakti froestan, sodati wi sa gebroiki na denki-krakti dorodoro. Na libisma-famiri noiti sa kan sabi ala sani, bika „na libisma-famiri noiti (kan) doro te na a roetoe foe na wroko di Gado ben meki, foe na bigin go na a kaba”. „O na dipi foe Gado goedoe nanga koni nanga sabi! Fa den roetoe foe en kroetoe no de foe feni èn den pasi foe en de dangra sma!” (Prék. 3:11; Rom. 11:33). Alaten njoen tjalansi nanga kibritori sa de di wi moe ondrosoekoe èn feni na roetoe foe den. Ala di dienstknekti foe Jehovah sa libi foe tégo, na tégo libi srefi no sa de noiti nofo gi den foe leri ala sani san de foe sabi foe na grontapoe nanga na universum di Jehovah ben meki.
18. San wi moe doe fosi, bifo wi kan prisiri ini Gado presenti foe wroko tapoe wan paradijs?
18 Bifosi na span wroko disi sa de wan porsi foe wi, wi moe doe wan disi ten wroko foe de séker, dati wi sa de drape èn wi sa kan njan boen foe na libi tapoe na paradijs-grontapoe dati. Nownow a de wan afersi gi wi foe libi ofoe dede foe kon sabi san de na toemsi prenspari wroko dati.
□ Foe san-ede a de fanowdoe gi libisma dati den wroko?
□ Na sortoe fasi Jehovah ben go rostoe baka di a ben meki den hemel nanga grontapoe?
□ Sortoe wroko di wani taki wan sani Gado ben gi na libisma na a bigin foe doe?
□ Foe san-ede wi kan taki dati wroko, srefi ini a fowtoe toestand di libisma de na ini, a de boen gi en?
□ Fa Jezus ben sori sortoe fasi a abi gi wroko?
□ Sortoe toemsi moi wroko didon na a fesi foe Gado dienstknekti?
□ San e sori dati a ben de na prakseri dati na libisma sa njan boen foe den froktoe foe en wroko?
[Prenki na tapoe bladzijde 256]
Gado gi libisma wroko foe doe di wani taki wan sani