Lobi, na „sondro fowtoe banti foe wanfasi”
„Ma na ala den sani disi weri gi joesrefi lobi leki wan krosi, bika a de wan sondro fowtoe banti foe wanfasi.” — KOLOSSESMA 3:14.
1. Foe san-ede na komando ini Kolossesma 3:14 de now wan tjalansi?
NA MINDRI foe wan grontapoe di prati na pispisi èn di foeroe nanga ogri-ati, dan na komando di Jehovah kotoigi ini disiten e kisi ini Kolossesma 3:14 foe a skrifi Wortoe foe Gado de séker wan tjalansi. Pikinmoro a gersi taki a no kan foe libi akroederi na komando disi, bika a de taki: „Ma na ala den sani disi weri gi joesrefi lobi leki wan krosi, bika a de wan sondro fowtoe banti foe wanfasi.” Ma tokoe den e handri akroederi na komando disi leki wan grani gi Jehovah.
2. San gersi taki a de wan wan wanfasi banti di e tai den sekte foe na kristenheid kon na wan, èn leki na bakapisi foe disi, dan foe san na kristenheid e tron wan pisi?
2 A de wan sani di krin taki lobi, leki wan sondro fowtoe banti foe wanfasi, no de na ini a kristenheid, bika a kristenheid prati ini hondrohondro kerki sekte di de kontrari densrefi nanga kerki di abi difrenti sortoe bribi nanga doe. Ma na wan moi sani foe poti prakseri na tapoe, dati a sani di e gersi taki a e dini leki wan banti, di e tai den kerki systema foe na kristenheid ini wanfasi, de na ogri-ati nanga a gens foe den tegen na kristen gemeente foe Jehovah pipel di gi densrefi abra èn teki dopoe, en kotoigi ini disiten (Jes. 43:10, 12). Nanga na sori foe sowan sortoe ogri-ati nanga gens, den kerki-organisaatsi foe a kristenheid e meki densrefi de wan pisi foe na grontapoe, di de ondro na hé tirimakti foe Satan na Didibri, na „gado foe disi grontapoe” (2 Kor. 4:4, Willibrordvertaling). Na man di ben opo na kristendom ben taki ala den sani disi na fesi èn den ben kon troe soifri. Di Jezus ben hori en laatste taki nanga en getrow apostel, bakadi na verraderlek Judas Iskariot ben opo gwe, a ben taki: „Den sani disi mi e komanderi oenoe, dati oen lobi makandra. Efoe na grontapoe abi ogri-ati gi oenoe, oen sabi dati a ben abi ogri-ati gi mi fosi. Efoe oenoe ben sa de wan pisi foe grontapoe, dan na grontapoe ben sa lobi a sani di de foe en, ma foe di oenoe no de wan pisi foe na grontapoe ma mi ben teki oenoe poeroe foe na grontapoe, dati meki na grontapoe abi ogri-ati foe oenoe.” — Joh. 15:17-19.
3. Sortoe aksi e kon ini a tori foe a prakseri foe na ogri-ati foe na grontapoe?
3 Te wi loekoe den wortoe foe Jezus Kristus, dan na logisch aksi e kon: Sortoe kerkigroepoe na grontapoe — sondro foe poeroe a kristenheid a ini — abi ogri-ati foe den now èn e loekoe den nanga feantifasi? Ibri opregti ondrosoekoeman sa kisi jepi foe na libisma historia, spesroetoe sensi na Fosi Grontapoefeti foe kon sabi na groepoe disi sondro foe meki wan fowtoe.
4. Nanga soema na komando foe Paulus ini Kolosse 3:14 abi foe doe, èn soema de den gemeenschappelek jeje Tata?
4 Foe den bigin wortoe foe na brifi foe na apostel Paulus gi den Kolossesma Jehovah kotoigi ini disi ten e froestan taki en gebod ini kap. 2:14, „weri gi joesrefi lobi leki wan krosi, bika a de wan sondro fowtoe banti foe wanfasi”, abi wantronwantron foe doe nanga den. Wi e lési: „Paulus nanga na wani foe Gado wan apostel foe Kristus Jezus, nanga Timoteus, wi brada, gi den santa wan èn getrow brada ini wanfasi nanga Kristus na Kolosse: Meki oenoe abi no-ferdini boenfasi èn vréde foe Gado, wi Tata” (Kol. 1:1, 2). Wenow, soema ben de na gemeenschappelek hemel Tata foe den fosi-jarhondro kristen ini na foto Kolosse ini Pikin Asia? A ben de na Tata foe den jeje Tiriman, Jezus Kristus èn en Tata de na Gado di „de Na Moro Héwan foe na heri grontapoe” èn „di nen Jehovah”. — Ps. 83:18.
5. Foe soema di Paulus e skrifi en brifi gi, moe de foe dat’ede anbegiman foe en, èn fa Jezus nanga na apostel Johannes ben agersi disi?
5 Ai, den sma di Paulus ben skrifi en brifi gi, soboen moe de anbegiman foe Jehovah Gado, neleki Jezus kristus srefi de disi! Tapoe na bergi foe tesi, Jezus ben wégri foe teki na pristeri foe na Didibri, di ben pristeri en a heri grontapoe efoe Jezus ben boigi nomo èn anbegi en. Jezus ben jagi na koriman wantronwantron gwe èn a ben taki na komando: „Jehovah, oen Gado, oen moe anbegi èn gi en wawan oen moe doe santa dienst” (Matt. 4:8-11; Luk. 4: 8; Deut. 6:4, 5, 13). Leki fa Jezus ben doe na so en disipel moe anbegi na srefi Gado di ensrefi ben anbegi alaten, Jehovah (Joh. 20:17). Ini akroederi nanga disi, meki a engel di ben gi na Openbaring moro fara na Johannes, ben wégri, dati na apostel ben fadon foe anbegi en. A ben taki: „Anbegi Gado; bika a de na gi kotoigi foe Jezus di e meki proféti-tori kon.” — Openb. 19:10; 1:1.
6. Baka sortoe libifasi foe na kristenheid, na komando ini Openbaring 18:4, 5 ben kon de moro tranga fanowdoe, èn soema ben handri akroederi na komando dati, èn nanga sortoe bakapisi?
6 Baka na bericht di ben afrontoe Gado, di Babylon na Bigiwan ben bow gi ensrefi ini na fosi grontapoefeti, dan na komando foe Gado di skrifi ini Openbaring 18:4, 5, ben kon de moro tranga fanowdoe leki di a ben taki ete wantron ini na Ingrisi nomroe foe december 1880 foe Na Wachttoren ofoe moro tranga fanowdoe leki sortoe ten a fesi. Na komando disi e taki namkoe: „Komoto foe en mi pipel efoe oen no wani teki afoe foe en sondoe èn efoe oenoe no wani kisi afoe foe en plaag. Bika en sondoe ben kon hé go te na hemel, èn Gado ben memre en ongeregtigheid.” Ini gehoorzaamheid na a gebod disi den sma di ben wani de na „pipel” foe Jehovah Gado, ben gwe libi Babylon na Bigiwan èn den ben kon na bosoe na makandra foe na boen foe kristen wanfasi foe meki lobi gro di de wan „sondro-fowtoe banti foe wanfasi”. Den ben teki ernstig na ati san na apostel ben taki ini 1 Kor. 14:33: „Gado no de wan Gado foe broeja, ma foe vréde.” Te wi e loekoe dan na den pikin-moro 45.000 gemeente foe den kotoigi foe Jeho vah ini disiten, dan wi e kisi tranga foe taki den wortoe foe Ps. 133:1-3.
„Loekoe o boen èn o switi a de te brada e libi ini wanfasi nanga makandra! A de leki na boen oli tapoe na ede, di e lon tapoe na barba, na barba foe Aäron, di e lon tapoe na borki foe en krosi. A de leki na dow foe Hermon di e saka tapoe den bergi foe Sion. Bika drape Jehovah e gi en ségi, ja, libi te ten di no abi marki.” — Ps. 133:1-3.
7. Tapoe soema ini disiten na verplekti de na den tapoe foe kibri na wanfasi disi èn nanga sortoe marki na ede meki Gado ben kibri en kotoigi psa libilibi na Fosi Grontapoefeti?
7 Neleki fa a ben de nanga na gemeente ini Kolosse, ini na pisiten foe na fosi jarhondro foe wi so kari kristen teri, na so na ferprekti de tapoe den disiten kotoigi foe Jehovah foe kibri na froewondroe wanfasi disi di de wan marki foe den organisaatsi na mindri foe na grontapoe disi di prati na pispisi. Disi de spesroetoe so sensi na kaba foe „den faste ten foe den naatsi” ini na jari 1914 di feti ben troeboe! (Luk. 21:24) Na Fosi Grontapoefeti ben de wan gefaar gi noti moro leki na tan na libi foe Jehovah Kotoigi leki wan troetroe kristen organisaatsi, ma foe na préki foe „na boen njoensoe disi foe na Kownoekondre na a heri grontapoe pe libisma e libi leki wan kotogi gi ala naatsi”, meki na Almakti Gado no ben gi pasi dati den féanti ini na kristenheid èn na heidendom, di ben bondroe kon makandra, ben figi ala en salfoe kotoigi poeroe foe na fesi foe grontapoe (Matt. 24:14; Mark. 13:10). Ini na fosi jari baka na feti, namkoe 1919 G.T. Jehovah Gado ben fri den foe den skotoe di ben poti gi den èn ben seni den go na mindri ala naatsi foe doe na prékiwroko.
8. Foe di Satan no ben man foe broko na kristen wanfasi nanga sani komoto foe dorosé. fa a go wroko now ini wan moeiti foe meki disi feni presi?
8 Satan na Didibri no ben man foe pori Jehovah kotoigi nanga sortoe sani ofoe wrokosani toe di ben komoto foe dorosé kon na den, èn foe dat’ede a ben proberi sensi a ten dati foe broko tapoe wan konifasi na wanfasi structuur foe den foe di a meki foe inisé, na ini na organisaatsi foe Gado srefi, pori krakti ben de e wroko. Ini Openb. 12:17 ben taki na fesi ini na tori disi: „Èn na kaiman ati ben bron na na oema èn a ben go feti nanga den wan foe en siri di ben tan abra, di e hori den komando foe Gado èn di abi na wroko di de ini na gi kotoigi foe Jezus.”
Den égifasidi wi moe broko wi ede nanga den
9. Foe kisi sortoe flaka Jehovah kotoigi moe loekoe boen, èn san Psalm 91 e taki foe disi?
9 Na ogri-atifasi di flaka na ogri grontapoe disi e panja ensrefi es’esi, soleki Jezus ben taki a fesi foe „na bosroiti foe na seti foe sani” nanga den wortoe: „Èn foeroe falsi proféti sa opo tanapoe èn kori foeroe sma; èn foe na kon moro foeroe foe kroektoedoe meki na lobi foe moro foeroe sma sa kon kowroe. Ma na sma di sa hori-doro te na a kaba, en sa kisi ferloesoe” (Matt. 24:3, 11, 13). Na geest foe ogri-ati de wan sani di e flaka toemsi, èn dat’ede meki den memre srefi foe na organisaatsi foe Jehovah Gado, di wi kan si nanga ai, moe loekoe boen, dati den no kon flaka nanga dati. Fa wi kan doe disi, na Psalmsingiman, di ben abi Gado jeje, e sori nanga den wortoe: „Iniwan sma di e libi ini na kibripresi foe na Moro Héwan, sa feni sribipresi a ondro na Almaktiwan. Mi wani taki gi Jehovah taki: ’Joe de mi kibripresi èn mi fortresi, mi Gado, na tapoe soema mi e poti mi fertrow.’ Joe no sa frede gi wan skreki sani ini na neti, noso gi na péri di e fré na déten, noso gi na pestsiki di e waka lontoe ini na doengroe, noso gi na pori di e foefoeroe sani na wan ogrifasi a bakadina ten. Doesoen sa fadon srefi na joe sé èn tin doesoen na joe reti-anoesé ma na joe a no sa doro. Soso nanga joe ai joe sa loekoe èn si na refensi srefi na den ogri-wan.” — Ps. 91:1, 2, 5-8.
10. Fa wi sa kan komoto na a pasi foe abi wan égifasi, di sa kan meki wi tan leki sma foe na grontapoe, èn fa Gado e si wi, kontrari na fasi fa a de si na dede grontapoe?
10 Wi e kisi na djaranti foe na kibri foe Gado, ma wi moe hori wisrefi na den kondisi di poti na disi. Te na jejefasi wi tan farawe foe a fertrow demakandra, di e tjari dede kon, nanga na siki grontapoe, dan wi no sa weri leki krosi den égifasi di sa meki wi tan leki sma foe na grontapoe. Wi no sa weri leki wan krosi na ogri-atifasi foe na grontapoe. Let abrasé foe ogi-ati, lobi de, lobi gi Jehovah, gi en Kristus èn gi wi kristen brada nanga sisa. Akroederi na apostel Paulus di ben abi santa jeje, dan wi moe weri leki discipel foe Jezus Kristus den égifasi di e meki na fasi disi kan kon na krin. Te wi e doe disi èn e sori wan „lobi, fri foe hoigrifasi”, dan wi sa pristeri wisrefi ini den ai foe trawan leki dinari foe Gado (2 Kor. 6:4-10). Na lobi disi e feni en bigin na Gado, èn na abi foe na lobi dati, wani taki dati wi kon ini wan boen matifasi nanga en foe di wi drai baka gi na grontapoe èn no de moro langa ini akroederi nanga en nanga wi ati èn sili. Gado e si na grontapoe leki a dede èn e si sosrefi toe den sma di de wan pisi foe en leki den dede. Den séker no de na libi ini en ai. Wi leki dopoe discipel foe Jezus Kristus di gi wisrefi abra, de na libi wel ini den ai foe Gado. Ja, wi e libi leki wan pisi foe en organisaatsi pe lobi de. Ini 1 Joh. 3:14 foe dat’ede wi e kisi foe jere sondro foe taki sani psa marki: „Wi sabi dati wi ben go abra foe dede kon na libi, foedi wi lobi den brada. Soema no lobi trawan, e tan ini dede.”
11. Lobi e tjari wi go ini sortoe bradafasi?
11 Soboen wi e si taki lobi e tjari wi go ini wan bradafasi, pe Jezus Kristus, na Manpikin foe Gado, de wi moro bigi brada. Na kristen égifasi disi, de wan krosi di nanga jepi foe san wi moe sori san wi de troetroe, sondro hoigrifasi. A de na kroon èn marki di wi moe kweki èn sori akroederi na Wortoe foe Gado.
12. San wan sma moe doe foe kon so fara taki a sori na troe sortoe foe lobi, èn a de so taki den égifasi disi di wan sma ben kisi moe libi na wan sé?
12 A de wan sani foe froestan taki wan discipel di e gi jesi moe doe bepaalde sani foe kon so fara dati a sori na troe sortoe foe lobi. Ini 2 Petrus 1:5-8 den e taki nanga den sma di na glori prijs foe na natuur foe Gado poti gi den ini hemel: „Ija, joisti foe a rede disi foedi oenoe, leki wan piki foe oen sé e doe ernstig moeiti, foe moksi na oen bribi boenfasi, na oen boenfasi sabi, na oen sabi dwengi oensrefi, na oen dwengi oensrefi horidoro, na oen horidoro na frede foe Gado, na na frede foe Gado bradalobi, na oen bradalobi lobi. Bikasi efoe den sani disi de na oenoe èn de psa marki, den sa tapoe oenoe foe de inactief ofoe foe no de e meki froktoe ini a tori foe soifri sabi foe wi Masra Jezus Kristus.” Den difrenti fasi di moe moksi na makandra, no moe poti na wan sé baka te wi doro na fasi di de leki wan kroon. Nono, bribi, boenfasi, sabi, dwengi joesrefi, horidoro, frede foe Gado nanga bradalobi moe de pisi foe wan balans égifasi dorodoro di e tan. Den moe demakandra nanga lobi psa marki. Ini a geval disi den sma di abi den sortoe marki disi foe den égifasi disi, sa kisi te a ten foe Gado doro na prijs foe na anoe foe Gado.
13. Fa Paulus ini Kolossesma 3:12-14 e go moro fara nanga tra égifasi?
13 Moro égifasi de di wi nanga leti moe loekoe leki wan uitbreiding foe den sani di wi ini a tori foe wisrefi moe doe foe kisi wan paiman di fiti. Na apostel Paulus e taki taki wi moe weri den égifasi disi leki wan krosi, leki wan sori foe den égifasi foe wi èn a e kari den bifo a gi bodoi san na sondro fowtoe banti foe wanfasi de. „Weri gi joesrefi . . . leki sma di Gado verkisi santa èn di den lobi, nanga den safoe lobifasi foe sarfasi, boenfasi, sakafasi foe geest, safri fasi nanga langa pasensi. Tan verdrage makandra èn gi makandra pardon na wan frifasi te na wan abi reden foe krage na a trawan. Soleki Jehovah e gi oenoe pardon na wan frifasi, sosrefi toe oen moe doe disi toe. Ma weri gi oensrefi leki wan krosi lobi bikasi a de wan sondro fowtoe banti foe wanfasi.” — Kol. 3:12-14.
Wan kontrari nanga den di no de ini wanfasi
14. Sortoe sma den sma foe na kristen gemeente ben de bifo den ben handri akroederi nanga den komando foe den apostel?
14 Den komando dati foe den apostel e sori sortoe sma den memre foe na kristen gemeente moe de. Na fesi den ben de wan pisi foe na ogri grontapoe di no abi lobi nanga ala en didibrifasi. Sortoe sma den ben de na a ten dati? Ini 1 Korinte 6:9-11, na apostel Paulus e tjari disi kon na krin nanga den wortoe: „San! Oen no sabi taki onregtvaardikiwan no sa kisi Gado Kownoekondre? No kori oensrefi. No den hoeroeman, no den afkodréman, no den soetaman, no den man di den e hori foe tegen natuurlek marki, no den man di e didon na man, no den foefoeroeman . . . sa kisi Gado Kownoekondre. Tokoe sonwan foe oenoe ben de dati. Ma oenoe ben wasi kon krin, ma oen ben kon santa, ma oenoe ben kon de regtvaardiki ini na nen foe wi Masra Jezus Kristus èn nanga na geest foe wi Gado.”
15. Foe san-ede grontapoe sma no abi na „banti foe wanfasi” di e tan, awinsi san e kon?
15 Gi sma foe na grontapoe, di ben sa doro den marki di skrifi dja na tapoesé, a ben sa de moeileki foe abi wan sani, sondro gridifasi èn soifri, di ben sa kan dini gi den leki wan sondro fowtoe banti di no kan broko. Nono, den no abi „wan sondro fowtoe banti foe wanfasi”. Foe dat’ede meki na libisma maatschappij ini na owroe grontapoe na dorosè anga na makandra leki loesoeloesoe santi. Afersi foe gemeenschappelek égi belang kan hori den sma na makandra foe wan pisiten. Ma te den afersi disi foe gemeenschappelek égi belang baka wan pisiten poeroe na pasi, dan sma foe na grontapoe e lasi na belangstelling gi makandra. Den banti di e hori den makandra e loesoe. Èn te foe kaba den e ferdrage makandra soso leki sma di e libi na sé makandra ini wan gemeenschap pe joe no kan komoto na ini.
16. Grontapoe sma e fadon go ini sortoe sani te afersi di ben tjari den wan pisiten konmakandra, fadon gwe, èn fa disi e kon?
16 Nationalisme! Patriottisme! Kerki sektarisme! Racisme! Te den sortoe firi disi di e meki den afersi disi kon faja leki korsoe, dan den sa foeroe den sma di de ini a tori nanga wan séker firi foe prekti. Na sma te foe kaba e tan den srefi sma di na égi belang e kon na a fosi presi. Soboen te den ben doe den prekti èn den de fri foe handri akroederi den persoonlek lobi nanga sani di den no lobi, dan den sa sori taki den de den sma leki fositen, di ben dini den égi belang. Aladi sma di gersi na grontapoe disi kande foe grontapoe dienst ofoe foe a gi di den gi densrefi sondro foe seki na wan afersi foe na grontapoe ede, kande sa kisi prijse èn sma e verklari den warti foe kisi hemel grani èn glori, tokoe akroederi den markitiki foe na bijbel den no kan feni den warti foe kisi wan presi ini na hemel Kownoekondre foe Jehovah Gado foe tiri nanga Kristus drape.
17. San Gado kownoekondre e aksi foe na sé foe den sma di e soekoe na kownoekondre disi fosi, èn san sa jepi den ini disi?
17 Gado kownoekondre no abi noti foe doe nanga a grontapoe disi nanga den sma di lobi en. Te wi loekoe taki na grontapoe ondro Satan ben misi krinkrin foe tjari en bakaman kon makandra, dan Gado kownoekondre ondro Kristus e aksi foe dopoe kristen di gi densrefi abra di e soekoe na kownoekondre fosi, taki den handri ini wanfasi èn doe dienst. A kownoekondre disi de na froktoe foe a lobi foe Gado. Na heri geest foe na hemel tiri dati, na lobi, moro foeroe lobi foe Gdo, ma sosrefi toe foe no wan si na moro prenspari féanti Satan na ai èn na grontapoe di a de „na gado” foe en. Aladi ala moeiti foe tjari pratifasi kon foe na sé foe Satan de, tokoe na lobi disi, di e komoto foe Jehovah Gado, na hemel Tata, e tan wroko gi ala sma di e hori faste na en grontapoe organisaatsi di wi kan si nanga ai, ija gi na heri famiri foe Gado ini hemel èn na grontapoe leki a „sondro fowtoe banti foe wanfasi”.
Joe sabi disi ete?
□ Fa troe kristen de nanga makandra kontrari na kristenheid?
□ Fa Satan e proberi foe broko wi kristen wanfasi?
□ Fa wi kan weri leki wan krosi ’lobi’ aladi ogri-ati foe na grontapoe de?
□ Fa lobi kan hori wi moro tranga na wan leki na banti di e meki sma kon makandra ini na grontapoe?
[Prenki na tapoe bladzijde 4]
Kristen de wan pisi foe wan lobi bradafasi pe Jezus Kristus de wan bigi brada