Weri lobi gi wisrefi leki wan krosi èn tan weri na krosi disi
1. Nanga san wi moe weri wisrefi leki wan krosi, èn oten na fasi disi sa kon ondro na moro hebi tesi?
FOE DI lobi na wan „sondro fowtoe banti foe wanfasi”, meki a de na toemsi prenspari égifasi sondro hoigrifasi di wi moe weri gi wisrefi. Na krosi disi wi moe tan weri alaten ini ala opregtifasi. A no de wan mantel di e kibri san wi de troetroe. Sodati wi ini disiten ben sa kan kisi rai, meki den wortoe foe santa jeje ben tan kibri: „A lobi foe joe moe de sondro hoigrifasi . . . abi ini bradalobi safoe lobifasi gi makandra” (Rom. 12:9, 10). Na moro hebi tesi di na troe-fasi foe wi lobi, na „banti foe wanfasi” disi, sa kon na ondro, moe kon ete — ini na krosbé ten di e kon.
2. Joe kan kisi lobi sondro dati wan sani waka na en fesi?
2 Dat meki a de now na moro boen ten foe kweki na lobi dati èn foe froestan dati na fasi dati e kon pas volmaakti na fesi, te wi wroko na foeroe tra fasi fosi. Foe dat’ede na apostel Paulus e poti wan kroon tapoe en pristeri foe difrenti sani, di soboen discipel foe Kristus di ben gi densrefi abra ben moe doe, nanga den wortoe: „Ma na ala den sani disi weri gi oensrefi lobi leki wan krosi, bikasi a de wan sondro fowtoe banti foe wanfasi” (Kol. 3:14). San de now „den sani disi”, di wi moe weri lobi toe leki wi krosi?
Wini den sani di e tjari pratifasi kon
3. San wi moe doe foe kisi lobi akroederi Kolossesma 3:9-13?
3 Na a ten dati ini den dé foe den apostel Paulus nanga Johannes, marki ben de di ben kan dini leki wan sani foe pratifasi. Ma den wanten sani dati di ben abi boen fundamenti ben moe poti now na wan sé èn foe taki foe na prenspari fasi foe den, ben moe kon now na wan presi di no abi waarde. Den kristen ben de alamala wán gemeente, wán skin ondro Jezus Kristus. Ala sani na skinfasi foe meki pratifasi kon ben moe poti a wan sé. Den jeje troe tori di e tjari sani konmakandra ben moe poti now alaten na fesi. Ini akroederi nanga disi na apostel Paulus ben taki: „Poeroe na owroe égifasi nanga den doe poti na wan sé èn weri gi oensrefi leki wan krosi na njoen égifasi, di nanga jepi foe soifri sabi e kon njoen nanga a prenki foe a sma di ben meki en, pe Griki noso Djoe no de, besnijdenis noso no besnijdenis, dorosésma, Scyth, srafoe, friman, ma Kristus de alasani èn ini alamala. Weri sani gi oensrefi leki wan krosi, leki sma di Gado ben verkisi, santa èn di a e lobi, nanga den safoe lobifasi foe sar’ati, boenfasi, sakafasi foe geest, safrifasi, nanga langa pasensi. Tan verdrage makandra èn gi makandra pardon na wan frifasi te na wan abi wan rede foe kragi na a trawan.” — Kol. 3:9-13.
4. Foe san-ede a ben de fanowdoe ini na fosi jar-hondro gemeente taki den ben feni en nanga makandra, èn tapoe na gron foe san wan sma ben sa kan loekoe psa bepaalde sani?
4 Na ala den difrenti sani di kari dja na tapoesé foe na nationaal afkomst nanga kerki background, maatschappelek positie, raciale marki èn difrenti ini skinkloroe, tokoe ben de ini na gemeente problema foe feni en nanga makandra. A froestan foe makandra ben de fanowdoe èn den ben moesoe leri foe hori makandra na prakseri. Bika awinsi den sani dati ben de prenspari gi sma na skinfasi, tokoe den no ben teri kwetkweti na Gado èn na en Manpikin Jezus Kristus di ben dede gi na heri libisma-famiri ini wan ten pe ala den difrenti disi ben de kaba èn ben de ete. A no de foe taki, dati a ben kan, taki sma di e denki bradi, foe na lobi èn boen-ati di den ben abi gi tra sma, ben loekoe psa den sortoe difrenti disi tapoe na gron foe algemene gronprakseri. A ben sa de srefi wan boen froestan sani, nono moro foeroe srefi foe doe sani pe e sori taki wi lobi trasma. Tokoe a ben kan de so taki soifri lobi sondro gridifasi ben kan mankeri.
5. Sortoe gewoon libisma prakseri moe kon na a di foe toe presi na Jehovah Kotoigi te den no e loekoe na ai sani di e tjari pratifasi kon, èn nanga soema den e sori taki den de ini wan fasi nanga en?
5 Foe dat’ede meki wi, leki bakaman di gi densrefi abra èn dopoe foe na Sma di foe na boen foe ala sortoe sma ben gi en libi, moe go moro fara leki soso wan formele fasi, moi fasi ini demakandra, switfasi, manirifasi, firi gi libisma; wi moe meki wan opregti lobi sondro foe soekoe wi égi afersi leki wan froktoe foe na jeje foe Jehovah Gado bewégi wi. Na froktoe disi de leki winimarki gi tra sma. A wani doe wan sani foe na jeje tanboen nanga na kolokoe foe trawan. A de sori taki wi de ini wanfasi nanga Gado, di de lobi ini persoon. Ini na lobi disi wan krakti de na ini di e hari sani kon. Akroederi nanga disi, 1 Joh. 4:19 e taki: „Wi ben lobi tra sma foe di en ben lobi wi fosi.”
6. San e hari den memre foe na „wan ipi” kon na makandra, èn san de na fundamenti foe na froktoe foe Gado jeje?
6 Te sma nanga difrenti fasi ini na ’wan ipi’ ondro na ’wan herder’ foe dat’ede e sori lobi gi makandra, dan disi e hari den krosbé kon makandra èn ai de wan wegi tegen na pratifasi di e kon foe na krakti foe den difrenti background foe den memre foe na ’wan ipi’. A gersi taki wan krakti e hari den konmakandra foe di den e weri na ’njoen égifasi’. Alamala abi na ’wan jeje’ di e kon foe na wan Fonten, na Gado èn Sma di ben gi libi na ala sma. Na froktoe foe en jeje di e waran sma ati de wan lobi di no abi en fundamenti tapoe seks ofoe tapoe lostoe foe gridifasi, ma di abi en fundamenti tapoe wan faja warderi gi den égifasi foe Gado foe na „njoen égifasi”. Soso na lobi disi e wroko leki wan „sondro fowtoe banti foe wanfasi” èn ai sorgoe dati na harmonie nanga geest foe wroko makandra e tan.
De ini wanfasi gi wan spesroetoe wroko
7. San Jehovah Kotoigi moe doe sensi 1914, èn nanga sortoe wroko ini prakseri?
7 Na a lati pisi ten disi ini „na bosroiti foe na seti foe sani” sensi 1914 a de gi Jehovah Kotoigi di no de wan pisi foe na seti foe sani disi, fanowdoe foe opo doe makandra wan sani. Den kisi na plekti foe gi kotoigi na a heri grontapoe foe na moro prenspari ontwikkeling ini a heri libisma historia (Matt. 24:14; Mark. 13:10). Na situwasi moe doro na hémarki di ala sma kan si soleki na apostel Paulus ben taki ben de ini en ten. Ini Kolossesma 1:23 a ben poti prakseri tapoe disi nanga den wortoe: „No meki den hari joe poeroe foe na howpoe foe na boen njoensoe dati, di joe ben jere èn di ben préki ini na heri mekisani di de na ondro hemel. Foe na boen njoensoe disi mi Paulus ben tron wan dinari”. We, ala oen bedinari foe na boen njoensoe foe disiten, san de foe taki foe na srefi préki di ben sa doe ini na heri mekisani èn spesroetoe ben moe doe ini wi moeileki ten?
8. Sortoe visioen di Johannes skrifi foe en ini Openbaring 14:6-12 wi e si ini disi ten e kon troe?
8 Wi e si now fa na visioen e kon troe di na apostel Johannes ben kisi ini Openb. 14:6-12 èn a skrifi foe en nanga den wortoe: „Èn mi ben si wan tra engel e fré na ini na mindri foe na hemel, èn a ben abi tégo boen njoensoe foe meki dati bekenti leki prisiri ten gi den sma di e libi na a grontapoe, èn gi ibri naatsi èn lo èn tongo èn ibri pipel èn a ben taki nanga wan tranga sten: ’Frede Gado èn gi en glori, bikasi na joeroe foe na kroetoe foe na anoe foe ben kon èn anbegi foe dat’ede en di ben meki na hemel, èn na grontapoe èn na se èn den watra foe na se.’ Èn wan tra engel, wan di e meki di foe toe, ben kon na en baka, di ben taki: ’A fadon! Babylon na Bigiwan fadon, en di e meki ala naatsi kon droengoe nanga na win di e wiki a lostoe foe hoeroedoe!’ Èn wan tra engel, wan di e meki di foe dri, ben kon na den baka, a ben taki nanga wan tranga sten: ’Efoe wan sma e anbegi na wilder meti nanga en popki èn e kisi wan marki tapoe en fesi ede ofoe en anoe, a sa dringi toe foe na win foe na ati-bron foe Gado di sondro foe moksi ben kanti go ini na beker foe en atibron, èn a sa kisi skinati nanga faja èn swarfoe na fesi foe den santa engel èn na fesi foe na Lam. Èn na smoko foe na skinati foe den ben opo go na tapoe foe tégo alaten, èn dé nanga neti den no abi rostoe, den di e anbegi na wilder meti nanga en popki èn alasma di e kisi na marki foe en. Djaso a e kon tapoe horidoro gi den santawan, gi den di e hori den komando foe Gado nanga na bribi foe Jezus.’”
9. O ten Jehovah Kotoigi ben si na visioen foe na apostel Johannes kon troe, èn foe san-ede den ben de now fri foe meki na boen njoensoe bekenti alape?
9 Na salfoe fikapisi, di na apostel Johannes e agersi, ben si ini disiten wan sani di e akroederi nanga na wroko foe na engel di ben fré na ini na mindri foe na hemel nanga „tégo boen njoensoe” di moe meki bekenti na ala sma di e libi na grontapoe, ja na ibri naatsi nanga lo nanga tongo èn ibri pipel wansi fa den skinkloroe ben de? Ja, foe sensi na jari 1919 di ben kon baka na feti. Ne wan bigin ben meki nanga a doe foe na profétitori foe Jezus foe Matteus 24:14 di ben de leki wan komando. Na fikapisi di ben tan na libi na a ten dati ben abi „tégo boen njoensoe” foe meki bekenti gi na heri mekisani di ben de na ondro na hemel? Ija, foe troe! Den ben kanmeki bekenti leki bréti ten taki na kownoekondre foe Gado di Kristus e tiri ben opo na a kaba foe den ten foe den heiden ini 1914 ini hemel. Èn ai boi, fa a ben de gi na fikapisi foe den jeje Israëlsma wan span boen njoensoe foe kisi foe jere nanga den sani di psa baka na feti, dati a moro bigi kwinsiman foe den, Babilon na Bigiwan, ben fadon èn ben lasi en makti tapoe Jehovah Kotoigi. Den ben de now fri foe meki bekenti na prenspari njoensoe disi gi ala folkoe di ben de ini kerki katibo foe taigi den dati den ben moe gwe libi Babylon na Bigiwan èn dati den ben kan jepi den nanga dati. — Openb. 18:4.
10. Den sma di ben gwe libi Babylon na Bigiwan ben sroiti densrefi na san èn sortoe banti foe wanfasi ben tai den?
10 Wan „bigi ipi” sma di lobi fri ben teki na boen njoensoe kaba tapoe wan boen fasi èn den ben handri ini akroederi nanga na tranga kari foe gwe libi na grontapoe makti foe falsi bribi foe Babylon. Den ben poti densrefi na a sé foe na fikapisi, foe den jeje Israëlsma di kisi ferloesoe. Na so fasi den ben tai densrefi na a organisaatsi foe Jehovah, di joe kan si èn densrefi ben tron Jehovah kotoigi. Na „sondro fowtoe banti foe wanfasi” dati, na lobi di de wan froktoe foe na jeje foe Jehovah Gado, ben tai den sosrefi toe. — Kol. 3:14; Gal. 5:22.
11. Gi soema na kristenheid abi lobi èn oten Jehovah Kotoigi sa opo wan prisiri babari nanga den wortoe foe Openbaring 19:1, 2?
11 Na moro prenspari pisi foe Babylon na Bigiwan de na so kari kristenheid. Ala di en nen de kristenheid, tokoe a no de wan troetroe kristendom, èn den hondro-hondro miljoen kerkisma foe en no e tai kon na makandra nanga na „sondro fowtoe banti foe wanfasi”, èn dati wi e si ini na pratifasi foe en ini den foeroe hondrodondro kerkisekte nanga prakseri. Na lobi di na kristenheid ben teki weri leki wan krosi, de na lobi gi den fréri foe Babylon na Bigiwan, den politik èn maatschappelek elementi foe a grontapoe disi, nanga soema a ben doe kerki hoeroedoe. Na prisiri sa bigi foe troe te Babylon na Bigiwan, makandra nanga na kristenheid, na a ten di Gado o pai en, no sa fadon wawan, ma sa kisi pori krinkrin. Dan den kotoigi foe Jehovah Gado, nanga prisiri babari sa teki den wortoe foe Openbaring 19:1, 2: „Prijse Jah! Na ferloesoe nanga na glori nanga na krakti de foe wi Gado, bikasi en kroetoe de troe èn regtvaardiki, bika a ben tjari na kroetoe kon tapoe na bigi hoeroe, di nanga en hoeroedoe e pori na grontapoe, èn a ben teki refensi foe na broedoe foe en srafoe foe en anoe.” A pori foe en leki nanga faja kan go doro sondro wan kaba, „te foe tégo”. — Openb. 19:3.
12. Sortoe égifasi Jehovah Kotoigi sa moe sori te na a pori foe Babylon na Bigiwan, te joe sa loekoe na situwasi pe den de na ini èn fa den moe waka go miti na féanti foe na leti?
12 Ma ini na pisten dati Babylon na Bigiwan de ete, foe di Jehovah gi pasi foe disi, dan den sma di „e hori den komando foe Gado èn na bribi foe Jezus” moe hori-doro, te wi loekoe na grontapoe situwasi pe den de now na ini (Openb. 14:12). Den abi ala reden foe tjari Jezus wortoe ini Matteus 24:13 abra „na bosroiti foe na seti foe sani” kon tapoe densrefi, namkoe: „Na soema di ben hori-doro te na a kaba, en sa kisi ferloesoe.” Den wortoe disi e waka kon wantronwantron baka den wortoe di Jezus ben taki: „Foe na kon moro foeroe foe na kroektoedoe meki na lobi foe moro foeroe sma kon kowroe” (Matt. 24:12). Lobi foe na sé foe Jehovah Kotoigi sa jepi den foe horidoro te na a kaba foe na seti foe sani disi. O moro den e sori lobi gi makandra èn foe den sma di wani kon ini wan matifasi nanga Jehovah Gado, o moro tranga na „sondro fowtoe banti dati foe wanfasi” sa kon. Soboen go na fesi oen kotoigi foe Jehovah nanga na grontapoe kotoigi foe na Kownoekondre ini den 205 kondre pe oenoe e wroko kaba, nanga moro kondre ete di wi abi na wi fesi foe go èn pe moro sma kan kon. A de na ten foe opo go miti na féanti leki wán man. Wi moe sroiti wisrefi na wan èn feti nanga den krakti foe na doengroe foe na grontapoe disi leki wán man.
13. Sortoe wrokosani di Jehovah e gebroiki e ferdini wi jepi alaten?
13 Na Watch Tower Bible and Tract Society foe Pennsylvania (VS) de now kaba pikinmoro wan jarhondro langa wan wrokosani di de ini wanfasi èn di Jehovah e gebroiki foe na boen foe en kotoigi. A de wan makti wrokosani di na „getrow èn koni srafoe”-klasse e gebroiki foe gi Jehovah Kotoig „[jeje] njanjan na a reti ten” (Matt. 24:45-47). Èn fa a de wan sani di de krin dati na wrokosani disi, nanga en 95 bijkantoro-organisaatsi na a heri grontapoe, abi Jehovah blesi! Solanga Jehovah wani foe gebroiki na wrokosani disi, a sa de a sani di e tan ferdini na loyaal jepi nanga wroko makandra foe wi. Fa wi moe taki na wrokosani disi tangi foe foeroe sani!
Tan nanga jepi foe lobi ini wanfasi
14. Sortoe krosi wi moe tan weri, èn fa Jehovah pipel e sori na so wan fasi taki den de en kotoigi?
14 Satan na Didibri nanga en féanti grontapoe e tan proeberi foe pori wi, ma na lobi di de na froktoe foe na jeje foe Gado di e basi ala sani, sa tan de wan sondro fowtoe „banti foe wanfasi”. Te wi weri na „njoen égifasi”, dan wi e wéri gi wisrefi lobi leki wan krosi soleki na apostel Paulus ben komanderi wi èn wi moe tan wéri na égifasi disi alaten leki wan krosi di de wan pisi foe wi égifasi di meki na a prenki foe Gado. Di Gado Manpikin ben gi en discipel wan toe laatste instructie, a ben taki: „Mi e gi oenoe wan njoen komando dati oenoe lobi makandra net soleki mi ben lobi oenoe, dati oenoe sosrefi toe lobi makandra. Nanga disi alasma sa sabi taki oenoe de mi discipel efoe oenoe lobi makandra” (Joh. 13:34, 35). Den wortoe dati foe na manpikin foe Gado ben fiti, bika en hemel Tata, Jehovah, de na ini persoon lobi, èn wi moe ferteri na heri libismalo dati wi de troetroe en kotoigi foe di wi e kweki na froktoe foe en jeje, namkoe lobi!
15. Soema Jehovah Kotoigi moe lobi toe leki wan sori foe den lobi?
15 Efoe joe wani handri ini akroederi nanga na troe tori taki joe lobi Jehovah, dan joe moe lobi mede-kotoigi. Leki wan bewijsi foe dati dan 1 Johannes 4:20, 21 e memre wi na den wortoe di e kon now: „Efoe wan sma e taki: ’Mi lobi Gado’, èn tokoe abi ogri-ati gi en brada, a de wan léman. Bika a sma di no lobi en brada, di a ben si, no kan lobi Gado di a no ben si. Èn a komando disi wi kisi foe en, dati na sma di lobi Gado sosrefi toe moe lobi en brada.”
16. Foe san-ede Jehovah Kotoigi no kan hori densrefi na baka foe lobi makandra, èn foe san-ede lobi no sa figi poeroe noiti foe na grontapoe?
16 Jehovah disiten kotoigi e poti na gronprakseri disi na ini den libi, foe di den e lobi makandra opregti, awinsi den de foe den mede-erfgenaam di ben gebore nanga jeje foe na Kownoe Kristus Jezus ofoe awinsi den de wan pisi foe na „bigi ipi” „tra skapoe”, di abi na howpoe foe na grontapoe paradijs. Fa wi ben sa kan hori wisrefi na baka foe lobi den sma di abi lobi gi Jehovah Gado nanga en lobi Manpikin Jezus Kristus? Wi lobi den troetroe, èn leki wan bakapisi foe dati na „sondro fowtoe banti foe wanfasi dati” e tai wi kon na wan. Awinsi san Satan na Didibri nanga en ogri grontapoe kan proeberi foe doe foe pori na froktoe disi foe Jehovah jeje, noiti lobi sa figi poeroe foe na grontapoe. Den sma di te na a pori foe na didibri seti foe sani e tan weri lobi leki wan krosi, sa kisi kibri foe na loyaal Gado foe den èn tjari den psa boen na „bigi benawtoe” di no sa abi en speri èn di sa kon tapoe na heri grontapoe disi (Matt. 24:21; Gal. 5:22). Na a fasi disi soso den sma sa tan na libi di lobi Gado nanga en osofamiri, en organisaatsi, èn go ini na krin grontapoe di sa kenki kon tron wan moi paradijs. Na paradijs dati noiti sa figi poeroe, ma sma di de ini persoon lobi sa libi foe tégo a tapoe èn meki a kon moi. Lobi foe tégo sa wini, leki wan grani gi na Fonten foe lobi, Jehovah Gado.
Joe ben froestan den sani di e kon now?
□ Foe san-ede den fosi-jarhondro kristen ben man foe feni en boen nanga makandra, awinsi den ben abi difrenti sortoe background toe?
□ Sortoe krakti lobi abi tapoe den toe groepoe di de ini „na wan ipi” foe kristensma ini disi ten?
□ Fa ini disi ten e kon troe san tanapoe ini Openbaring 14:6-12?
□ Sortoe wrokosani Gado e gebroiki foe jepi en pipel?
□ San joe moe teki na faste bosroiti foe doe te joe loekoe Kolosse 3:14?
[Prenki na tapoe bladzijde 13]
Na ondro na tiri foe engel . . .
[Prenki na tapoe bladzijde 13]
. . . Jehovah Kotoigi ini disi ten e meki „tégo boen njoensoe” bekenti