Joe de toemsi njofi foe kan de wan sani?
JOE abi sontron na firi taki no wan sma e broko-ede nanga joe? Joe e firi wan ten dati joe de joe wawan, aladi sma lontoe joe? Fa a ben sa kon dati den sortoe prakseri disi e kon tapoe joe? Foe di na a dé foe tide na sma di de en wawan foeroetron no e teri moro.
Ini foeroe kondre na bureaucratie ben meki sma de soso pisi foe bodoi foe sani di e lasi gwe ini wan doolhof foe computerprogrammatuur. Den tron nomroe, cijfer, gi wan lantikantoro di no abi fesi. Joe ben kisi na firi dati wantron?
Ofoe kande joe e wroko gi wan bigi firma nanga hondrohondro doesoen wrokoman. Nanga dati joe e firi joesrefi kande moro mendri leki wan pikintifi ini wan bigi wiel nanga foeroe tifi. Srefi sma di e libi ini bigi foto, kan firi densrefi leki den de den wawan srefsrefi. Fa dati e kon? Foe di birtisma foeroetron de vreemde sma gi makandra.
Ija a de toemsi makriki foe bribi dati joe de toemsi njofi foe kan de wan sani, dati joe no de noti foe den kan si joe. Disi de spesroetoe so ini na disiten maatschappij, pe na stré nanga makandra ben tjari someni sma kon so fara dati den no e broko ede nanga makandra.
Ma a de so nanga Gado? En, na soeverein Masra foe na universum, de so moro bigi leki libisma dati wi alamala de toemsi njofi dati a ben o broko-ede nanga wi? Na bijbel de sori dati Jehovah Gado na wan bepaalde okasi ben abi „tidoesoen tron tin doesoen [100 miljoen]” engel na en fesi (Dan. 7:10). A de sosrefi toe na Mekiman foe den hipihipi stari ini na universum. A ben lasi na heri jeje èn stoffelek mekisani kande ini prakseri? Na bijbel e piki: „A e teri den nomroe foe den stari; a e kari den alamala na den nen” (Ps. 147:4). Den hemelskin séker no de sondro dati a de loekoe den. Foe taki foe den regtvaardiki engel, Jehovah e kari den, sondro degedege, sosrefi toe na den nen, aladi na nen foe soso toe foe den, Michaël nanga Gabriël, ben tjari kon na krin gi libisma. — Dan. 12:1; Luk. 1:26.
Fa a de now nanga na libisma-famiri? Gado e broko-ede nanga den? Na Psalmsingiman David ben skrifi: „O Jehovah meki mi sabi a kaba foe mi libi èn a marki foe mi dé — san a de, sodati mi kan sabi fa mi de wan sani di e go pori. Loekoe! Joe ben meki den dé foe mi de soso wantoe; èn na libiten foe mi de leki noti gi joe. Foe troe, ibriwan sma foe grontapoe . . . de noti moro leki wan bro.” (Ps. 39:4, 5). Efoe wan sma de wan sani di e go pori, leki wan bro, fa wi kan de séker dan dati a no de toemsi njofi èn foe wan pisi ten dati Gado ben sa broko-ede nanga en? Te joe loekoe en foe na sé foe Gado, dan libisma wani taki troetroe wan sani? Joe e teri troetroe na Gado?