Joe e teri troetroe na Gado?

JOE ben teki ten oiti na neti foe loekoe wan dé na loktoe? Joe ben aksi joesrefi wanten o fara joe e loekoe go ini na loktoe troetroe, ofoe omeni stari joe kan si nanga joe soso ai? Ondro na froewondroe foe na toemsi moi fasi foe na hemel, joe ben aksi joesrefi dan wan dé ofoe na libisma di no de no wan sani e teri troetroe na Gado? Gado e broko-ede troetroe nanga mi, wan sma di de en wawan?

Dri doesoen jari pasa kaba na Hebrews singiman kownoe David foe Juda ben taki a froewondroe foe en nanga den wortoe: „Te mi e si joe hemel, na wroko foe joe finga, na moen nanga den stari di joe sreka, san na a libisma di e dede, dati joe e prakseri en, èn na manpikin foe na libisma na grontapoe, dati joe e sorgoe foe en?” (Ps. 8:3, 4) Ija, aladi David no ben froestan dati, a ben loekoe nanga en soso ai na sowan siksi hondro doesoen leti-jari ini na loktoe. A ben froewondroe dati na Mekiman foe na bigi loktoe dati ben e hori na libisma na ini prakseri toe.

David ben tjari ini Psalm 144 wan srefi prakseri kon ondro wortoe. Wi e lési drape: „O Jehovah san na libisma, dati joe ben sa si en, na Manpikin foe na libisma di e dede, dati joe ben sa hori en na prakseri? Na libisma srefi gersi noti moro leki wan bro; en di de leki wan sombra di e grati psa” (Ps 144 vs. 3 èn 4). Ete David ben sabi dati na libisma, aladi a no ben wani taki wan sani, èn a ben e dede, ben e teri wèl na Gado. Fa a ben kan de séker foe dati? Foe di a ben kweki ensrefi wan persoonlek matifasi nanga Gado.

Sortoe matifasi kan?

Fa wi sabi dati David ben de ini wan persoonlek matifasi nanga Gado? Te wi loekoe esesi wan foe den Psalm foe David ofoe den poëmasingi, a no abi trobi sortoe wan foe den, dan a moe de nofo foe kan overtoigi wisrefi foe dati. Meki wi teki foe eksempre Psalm 23 pikinso èn nanga anoe foe den eenvoudig wortoe dati proeberi foe tesi na fertrow di David ben abi sondro wan kondisi di a ben poti ini en Herder, Jehovah Gado.

„Jehovah na mi Herder.

Noti sa mankeri mi.

Ini grasi wé a e meki mi didon;

Na rostoepresi di lai nanga watra a e tjari mi go.

Mi sili a e gi kowroe-ati.

A e tjari mi ini den pasi foe regtvaardikifasi foe en nen ede.

Awinsi mi e waka ini na lagi presi foe dipi sombra,

Mi no e frede no wan ogri,

Bika joe de nanga mi;

Joe tiki nanga joe staf, e trowstoe mi.” — VS. 1-4.

Djaso na krosbé matifasi foe David nanga Gado e kon na krin. San a Psalm dati e doe gi joe? Joe e si na ini na tranga banti foe fertrow na mindri na „skapoe” David di no ben abi no wan kibri, èn na Herder Jehovah di ben e kibri en? Sondro degedege David ben froestan dati aladi a libisma no de „noti moro leki wan bro”, persoonlek wèl e teri na en Gado èn Herder. Foe dat’ede David ben kan taki nanga overtoigi: „Jehovah na mi Herder. Noti sa mankeri mi.” Fa joe kan meki now na srefi fertrow gro?

Foe bigin, wan toemsi prenspari punt de di wi no moe lasi na prakseri. A no e go wawan dati na Herder e sori belangstelling gi en skapoe. Den skapoe sosrefi toe moe waka baka den herder èn poti prekseri tapoe en sten. Nanga tra wortoe, efoe wi wani teri na Gado, dan sosrefi toe wi moe hori Gado na prakseri. Efoe skapoe e lon gwe foe na koi ofoe no e broko-ede nanga na herder, dan noti de moro foe kibri den. Na matifasi e broko nanga na espresi tranga-jesi foe na skapoe srefi. Awinsi san na historia foe na libisma e sori ini na pisi tori disi, tokoe Gado e broko-ede nanga na libisma famiri, no wawan nanga den leki groepoe, ma sosrefi toe nanga aparti sma. Sortoe bewijsi wi abi foe dati?

Sensi oten na libisma e teri na Gado?

Foe sensi na bigin kaba foe na libisma historia Gado ben sori belangstelling nanga sorgoe gi na libismalo èn na ten di de na fesi foe na libisma. Di wan gridifasi oproeroe ben broko kon ini Eden dan Gado no ben libi na libisma famiri na wan sé èn a no ben libi den sondro howpoe. A ben pramisi foe wiki „wan siri” kon ini a ten di ben o kon, wan siri di ben sa teki stap tegen na moro prenspari féanti foe na libisma èn a ben sa tjari ferlekti kon te a ben sa masi na ede foe Satan (Gen. 3:15; Rom. 16:20). Bakadati Jehovah ben tan bemoei nanga na libismalo, sontron nanga aparti sma èn na tra okasi nanga naatsi.

Wan moi eksempre foe a sorgoe foe Jehovah gi ibri aparti sma ini na owroe Israël ben de na wet pe sani ben seti gi wési-pikin èn weduwe, den mofinawan foe na naatsi. Foe eksempre ben taki dati den ben moe teki prati ini na koti foe njanjan, aladi den no ben abi wan pisi gron. Den ben kisi a reti foe piki njanjan baka te sma ben koti a njanjan poeroe foe den gron. Fa disi ben de wan superieur wet te joe teki en agersi nanga den foeroe seti foe jepi sma di den naatsi foe now sabi! Ini Israël na libisma ben hori a respeki gi ensrefi aladi a ben de póti. Foe san-ede wi kan taki disi? Foe di a no ben abi fanowdoe foe begi ofoe foe opo en anoe gi lanti. Nanga en égi anoe a ben go piki njanjan baka te den sma ben koti njanjan poeroe foe den gron foe a sorgoe gi den sani di a abi fanowdoe. A ben doe wroko di ben wani taki wan sani èn a ben firi tangi gi en Gado Jehovah di ben gi sani so fri. — Lev. 19:9, 10; Ruth kap. 2.

Kristus ben meki na sorgoe foe en Tata kon boen na fesi?

Den fo Evangelium e sori krin dati Jezus Kristus ben broko-ede nanga libisma. Èn foe di a ben tjari den égifasi foe en Tata kon soifri na fesi, en broko-ede ben de wan boen bewijsi dati na libisma ben e teri na Gado troetroe (Joh. 14:9). A leri foe Kristus ben abi lobi fasi èn praktisch wet na ini foe wan libifasi sondro gridifasi. Fa disi ben kon boen na fesi di en discipel ben drai kon baka foe wan prékiwaka di weri den skin! Fa Jezus ben doe? A ben sori dati a ben firi gi den èn a ben ferstan den. Jezus ben ferstan den firi èn a fanowdoe di den ben abi foe rostoe. „A ben taigi den: ’Kon, oen wawan, na wan tiri presi èn rostoe pikinso.’ Bika foeroe sma ben de di ben kon èn ben go, èn den no ben abi okasi srefi foe njan.’” Soboen den ben gwe alamala ini wan boto na wan tiri presi foe ben kisi densrefi.

Ma na ipi sma ben waka go na den baka. Fa Jezus ben teki disi? Sondro pasensi èn nanga atibron? „Di a ben komoto ini a boto, a ben si dan wan bigi ipi, ma a ben kisi sari-ati nanga den, foe di den ben de leki skapoe sondro herder, èn a ben bigin foe leri den foeroe sani.” — Mark. 6:30-34.

Fa Kristus sori dja krin fa en papa e sorgoe gi libisma? A ben meki disi kon boen na fesi toe di a ben taki: „A no de so dati féfi pikin fowroe e seri foe toe moni di no abi foeroe waarde? Tokoe no wan foe den Gado e frigiti. Ma srefi den ede-wiwiri foe joe den ben teri alamala. No frede; oenoe de moro warti leki foeroe pikin fowroe.” — Luk. 12:6, 7.

Ini Gado ai na sma di e proeberi foe waka baka Jezus, Kristus, séker no e lasi gwe ini den bigi ipi sma. Ma a punt pe a tori e drai lontoe de: Joe e doe ala moeiti foe waka baka Jezus Kristus? Joe sabi joe jeje nowtoe foe na tori disi? (Matt. 5:3). Prakseri dati Jezus sjatoe bifo den ben kisi en èn baka dati ben kiri en ben begi na en Tata: „No wawan foe den [den 11 getrow apostel di makandra nanga en ben gebroiki na laatste avondmaal] mi e begi, ma sosrefi toe gi den [tra discipel] di nanga jepi foe den wortoe e poti bribi ini mi” (Joh. 17:20). Jezus ben sabi dati no wawan en apostel ben sa teri na Gado, ma sosrefi toe den sma di bakaten ben sa tron bribi-man tapoe na gron foe den préki. Dati e sori dati na bigi Herder, Jehovah Gado, ala sma di abi wan sakafasi foe skapoe, kan go na en. — Psalm 23:1.

Libisma e teri ini disi ten na Gado?

Ma kande joe e aksi joesrefi now: ’Efoe libisma e teri troetroe na Gado, fa disi e kon na krin dan ini disi ten? Èn fa mi kan njan boen foe a sorgoe foe Gado gi na libismalo?’

Now Jehovah, na bigi Herder, ben seti sani sodati sma di gersi skapoe na a heri grontapoe kan jere en sten. Fa a de doe disi? Jezus e piki: „No wan sma kan kon na mi, efoe na Tata, di ben seni mi, no hari en.” Soboen, Jehovah e hari sma nanga wan sakafasi ati kon na en nanga jepi foe en „toemsi boen herder”, Jezus Kristus. — Joh. 6:44; 10:11, 14-16.

Fa na ’hari’ disi e kon? Nanga jepi foe na prékiwroko foe den getrow bakaman foe Kristus di neleki Jezus de kotoigi foe na troe Gado, Jehovah. Ija, den kristen kotoigi foe Jehovah e préki alepe pe libisma de foe feni. Fri èn sondro frede den poti prakseri na ibriwan sma di e winsi foe leri sabi Gado. Joe de klari, efoe joe no ben doe disi ete, foe doe joe fosi stap foe bow wan persoonlek matifasi nanga na Bigi Herder Jehovah? Joe de klari foe soekoe Gado nanga jepi foe Jezus Kristus? Prakseri na dek’ati foe Jezus: „Tan soekoe èn joe aa feni; tan naki èn mi sa opo gi joe.” Foe di a ben seni en Manpikin kon na grontapoe foe na boen foe wi, dan na bigi Herder ben doe kaba na fosi positief stap ini na sé dati. Efoe joe teki disi tapoe wan boen fasi, dan esesi joesrefi sa si dati libisma e teri troetroe na Gado. — Matt. 7:7; 1 Joh. 4:7-10.

Na ten di e kon foe na libisma e teri na Gado?

Dati na de foe na libisma e gersi nanga wan bro, wan enkri hari bro, e sori fa na libiten foe wan libisma sjatoe. Ma olanga joe sa ben wani libi troetroe efoe joe ben kan prisiri ini kolokoe èn wan volmaakti gesontoe? Joe e taki „tego”? Na dati Jehovah now e pramisi, tégo libi tapoe wan paradijs grontapoe. Na so wi e lési ini na brifi foe na apostel Paulus gi Titus foe na „howpoe tapoe na tégo libi, di Gado, di no kan lé, ben pramisi farawe ini a ten di psa” (Tit. 1:2). Tapoe a fundamenti disi foe na pramisi dati Paulus ben gi trawan na rai: „doe boen, de goedoe ini toemsi boen wroko, lobi doe sani, lobi foe prati sani nanga trawan, poti gi joesrefi wan toemsi boen fundamenti foe na ten di e kon, leki wan goedoe, sodati joe kan graboe tranga na troetroe libi”. A troetroe libi dati e tjari joe go na a tégo libi. — 1 Tim. 6:17-19.

Den dedewan e teri na gado?

’Ma’, so joe e aksi kande joesrefi, ’fa a de nanga den dedewan? Den e teri na a bigi Herder?’ Srefsrefi! Dati de na rede foe san-ede na apostel Paulus „ben meki na boen njoensoe bekenti foe Jezus èn na opobaka” (Tori. 17:18). Na opobaka de troetroe wan eksempre foe na sorgoe foe Gado gi aparti sma di e kon na fesi. Fa so? Foe di e kon na krin foe disi dati a ben skrifi wan bericht pe de a ini na moro pikin fini pisi foe na égifasi foe den sma di sa kon baka na libi. Na moro Hé Tiriman foe na heelal nanga en miljoenmiljoen merkipasi sistema nanga stari, no e meki na fanowdoe foe memre ala den bodoi dati foe na égifasi èn foe tjari den kon baka ini wan ede tonton nanga ati, skreki en. Dati meki a no de wan vreemde sani dati Jezus nanga foeroe overtoigi ben kan bari taki: „No froewondroe bika na joeroe e kon pe ala den sma di de ini den memre grebi, sa jere en [Jezus] sten èn den sa kon na doro.” — Joh. 5:28, 29.

Efoe joe wani dati na bigi Herder, Jehovah, nanga jepi foe en Manpikin, Jezus Kristus, meki a feni joe boen, no draidrai dan foe aksi Jehovah Kotoigi foe jepi joe. Ini joe égi oso joe kan aksi ala den bijbel aksi di joe wani èn joe kan de séker foe logisch piki di joe sa kisi. Ofoe joe kan skrifi go na den sma di e meki na tijdschrift disi, di sa jepi joe foe joesrefi kon si taki joe kan teri troetroe na Gado, now èn ini a ten di e kon.

[Prenspari pisi na tapu bladzijde 5]

Psalm 23 — Wan melodie foe David

1 Jehovah na mi Herder. Noti sa mankeri mi.

2 Ini grasi wé a e meki mi didon; Na rostoepresi di lai nanga watra a e tjari mi go.

3 Mi sili a e gi kowroe-ati. A e tjari mi ini den pasi foe regtvaardikifasi foe en nen ede.

4 Awinsi mi e waka ini na lagi presi foe dipi sombra, Mi no e frede no wan ogri, Bika joe de nanga mi; Joe tiki nanga joe staf, e trowstoe mi.

5 Na mi fesi joe e seti wan tafra na fesi foe den sma di e sori féanti fasi gi mi. Nanga oli joe e wrifi mi ede; Mi béker foeroe boen.

6 Foe troe, soso boenfasi, èn lobi switi fasi sa waka na mi baka ini ala den dé foe mi libi. Èn séker mi sa libi na ini na oso foe Jehovah te ini na langa foe den dé.