Sortoe sé joe e teki ini na kownoekondrestré-aksi?
SAN a wortoe „stré-aksi wani taki dja? A wani taki wan afersi pe toe ofoe dri sma ofoe groepoe foe sma abi wan kesekese èn di e kon loesoe nanga jepi foe wan bosroiti foe sma di abi makti ofoe nanga jepi foe wan overtoigi bewijsi. Na stré-aksi di de now tapoe talment de wan gi na heri grontapoe. A abi temake nanga na Kownoekondre foe Gado ini anoe foe na tiriman Jezus Kristus di en ben poti. Sensi na jari 1919 baka na feti, sowan 64 jari psa kaba, Jehovah Kotoigi ini 205 kondre ben meki na profétitori di na tiriman disi ben taki, kon troe, namkoe: „Na boen njoensoe disi foe na kownoekondre sa préki na a heri grontapoe pe libisma e libi leki wan kotoigi gi ala naatsi, èn dan na kaba sa kon.” — Matt. 24:14.
San disi ben tjari kon? Disi: Ala tirimakti na grontapoe sensi a ten dati ben kon abi foe doe nanga na stré-aksi, efoe den e feni disi wan switi sani ofoe den no e feni en wan switi sani. Safrisafri a ben kon krin srefsrefi dati den no e feni en switi. A ten foe den kownoekondre foe na grontapoe disi di de na wi fesi de nownow leki a domroe ini na doengroe foe mofoneti. Leki wan bakapisi foe toe grontapoe feti, dan foeroe grontapoe kownoekondre ben trowe na gron èn tra sortoe tirimakti ben teki den presi — republiek, socialistis dictatuur ofoe tra autoritaire tiri.
Na poeroe na pasi foe libisma kownoekondre
Wi tanapoe na fesi na wai poeroe krinkrin foe libisma kownoekondre no soso foe di kownoekondre leki wan fasi foe tiri de moro pikinso, ma foe di ala libisma fasi foe tiri sa poeroe na pasi foe meki presi gi wan tiri gi na heri grontapoe di no sa de wan tiri di libisma ben meki. Ini na profétitori ini Daniël 2:44 di ben taki moro leki 2580 jari pasa kaba, disi ben taki foe en: „Ini den dé foe den kownoe dati na Gado foe hemel sa opo wan kownoekondre di noiti sa kon na wan kaba èn na kownoekondre srefi no sa go abra na wan tra pipel. A sa masi ala den kownoekondre disi èn a sa meki wan kaba kon na den èn srefi a sa tan te ten di no abi marki.” Na Fosi Grontapoefeti, di ben bigin ini 1914, no ben sori tapoe na kontroe foe na profétitori dati foe Daniël di ben gi dek’ati, ma na feti disi ben sori dati na Gado foe hemel ben poti en kownoe di a ben ferkisi tapoe na hemel troon èn ben gi en na makti foe meki na profétitori dati kon esesi troe.
Now pori de foe kon tapoe ala grontapoe tiri, wan pori di densrefi sa tjari kon tapoe densrefi nanga den toemsi wetenschappelek fetisani. Sma di e gi kommentaar tapoe na pisi tori foe grontapoe afersi èn di sabi sani boen e gi wi alamala na warskow dati so wan skreki sani de foe kon. Den e froestan dati wi e libi ini wan pisi ten di a bijbel e kari na „ten foe na kaba” ofoe „den laatste dé” (Dan. 12:4; 2 Tim. 3:1). Den naatsi e frede toemsi foe bigin wan di foe dri grontapoe feti foe di disi sa wani taki gi alamala foe den a pori di den sa pori makandra. Den ben sa wani nanga ala prisiri foe meki wan toestand kon pe nanga foeroe fertrow den kan bari „Vréde nanga sékerfasi!” (1 Thess. 5:3). Te heri esi den sa meki na publiki so wan sani bekenti troetroe, dan disi no sa wani taki dati den abi vrede nanga na Gado foe hemel. Nono, bikasi sensi 1914 den naatsi de ini feti nanga en. Den e handri kontrari nanga en boen prakseri nanga na libismalo. Nanga na primisi di Gado ben gi den, den ben sori ini na heri libisma historia dati den no ben man foe tiri na grontapoe disi so dati disi ben tjari boen di e tan, gi na libismalo èn dan no foe taki srefi leki wan grani gi Gado.
Na Almakti Gado srefi ben bepaal oten a sa meki wan kaba kon na a seti foe sani di no e gi satisfaksi. Precies tapoe na ten di en ben poti a sa poeroe na seti foe sani. Den naatsi ben kisi disi foe jere nanga mofo foe Jehovah Kotoigi. Den no kan taki dati den no ben sabi.
Tirimakti foe na sé foe libisma ofoe foe na sé foe Gado?
Den naatsi, dati wani taki den tiri foe den, ben sori nanga wan fasti bosroiti sortoe sé den e teki ini na tori foe na stré-aksi foe Gado kownoekondre ini anoe foe Kristus. Den ben teki a sé foe wan tirimakti foe na sé foe libisma na presi foe tirimakti foe na sé foe Gado. Nanga tranga-ede den e teki wan sé di de kontrari na tiri foe Jehovah Gado èn en Kristus. Den e tanapoe na a sé foe Satan na Didibri, na ’granman foe na grontapoe’ di wi no kan si, soleki Jezus ben kari en di a ben taki nanga en apostel: „Na tiriman [’na granman’, akroederi son vertaling] foe na grontapoe de e kon. Èn en no abi makti na mi tapoe.” — Joh. 14:30; loekoe sosrefi toe Matt. 4:8-11; 2 Kor. 4:4.
Foe di den naatsi ben teki den bosroiti èn e hori na dati, meki ibri aparti sma moe piki gi en na toemsi prenspari aksi: Sortoe sé mi e teki ini na tori foe na kownoekondrestré-aksi? Mi no kan lon komoto foe moe teki wan bosroiti ini na toemsi prenspari stré-aksi disi di e go foe na heri grontapoe. Te wi no poti prakseri na tapoe, dan no wan sma foe wi no sa kan fri ensrefi foe ondrofeni den bakapisi. Neutraliteit de wan sani di no kan. Wi moesoe foe teki wan sé ofoe na a sé foe a kownoekondre foe Gado ofoe kontrari na kownoekondre foe Gado.
A moro bigi pisi foe den sma ini disi ten kande no ben si na feti di ben seki na jari 1914. Soboen den no kan memre foe égi ondrofeni èn sani di den ben si, sortoe spesroetoe sani di ben psa sensi na ten dati alamala. Na „marki” di Jezus Kristus ben taki na fesi di e de wan marki foe „bosroiti foe na seti foe sani”, ben tron wan sani di ala naatsi nanga pipel kon si, èn e si te now ete. Den e firi alamala na krakti foe na „marki” dati. Wi abi foe lési soso san Jezus Kristus ben taki na fesi ini na tori ini Mattéus 24, 25, Markus 13 nanga Lukas 21, foe kan sabi dati a no ben taki wawan na fesi foe feti ma sosrefi toe foe angriten, pestsiki, grontapoe-seki, ferfolgoe foe en discipel, benawtoe di ben tan hori foe den broeja pe den naatsi de na ini èn sosrefi toe dati na „boen njoensoe foe na Kownoekondre” ben sa préki nanga dek’ati.
A no de foe taki, dati den troetroe kristen ini a pisi ten foe na fosi jarhondro foe wi gewoon teri ben préki na boen njoensoe foe na kownoekondre di boo kon na wan bigi pisi ini Asia, Afrika nanga Europa. Disi ben psa langaten bifo sma foe Europa foe sensi na di foe 15 jarhondro ben ontdek den pisi foe grontapoe leki Noord- nanga Zuid-Amerika nanga Australië, èn sosrefi toe foeroe eilanti ini na Atlantische nanga Bigi Oceaan. Zendeling ben seni go na den kontren disi di den ben kon feni njoenjoen. Ini ten di no psa langa kaba bijbelgenootschap ben opo di ben panja ini foeroe tongo na bijbel. Ma den zendeling nanga kerki fesiman foe na kristenheid no ben préki na boskopoe foe na kownoekondre, nono, na so wan fasi dati na kownoekondre foe Jehovah Gado ini anoe foe Jezus Kristus ben tron wan stré-aksi di abi foe doe nanga na heri grontapoe. A no ben de na sortoe foe préki di ben meki na kownoekondre barwroko ben tron wan pisi foe na „marki” di ben marki „na bosroiti foe na seti foe sani disi”.