„Tanapoe makandra na ini na feti lin”
„Ala den disi ben de fetiman, èn den tanapoe makandra na ini na fetilin; nanga wan ati di no prati den kon na Hebron foe meki David tron kownoe abra heri Israël.” — 1 KRONIEKEN 12:38.
1. Sortoe tranga fanowdoe situwasi ini disi ten, e meki wi moe de na ai?
MEKI na kari foe go na fesi de tranga foe jere! Meki ala dek’ati kotoigi foe Jehovah kon tanapoe foe doe den plekti! Na feti tegen na féjanti doro na ini wan moeiliki watra. Den dé de tranga fanowdoe. Wi no kan gi wisrefi pasi foe doe en moro makriki ofoe foe dodoi wisrefi na ini sribi nanga na prakseri dati na feti kon kowroe. Dati na féjanti ben sa wani wi bribi so te, foe di a sabi dati en ten de sjatoe. Foe dat’ede wi kan froewakti dati na féjanti sa fadon kon wantronwantron na wi tapoe na ini na howpoe dati a sa man masra den fetiman gi waarheid sondro foe den froewakti. — 1 Thess. 5:1-6.
2. Foe san-ede Jehovah Kotoigi no abi foe frede den féjanti? (Ps. 24:8)
2 Jehovah e si en getrow kotoigi ini a ten disi leki fetiman na ini wan jeje feti di sa doro es’esi wan hémarki. Te den omstandigheden e aksi disi, dan Jehovah e tron wan mansma foe feti, di en let’anoe kan masi èn trowe en féjanti (Ex. 15:3, 6, 7). En pramisi na den Israëlsma foe owroeten di en engel ben sa tjari, de te now ete: „Efoe oen sa jere mi sten soifri èn troetroe doe ala sani san mi sa taki, dan foe troe mi sa de nanga féjantifasi nanga joe féjanti èn benawtoe den di e benawtoe joe.” — Ex. 23:20-22.
3. (a) Ferteri fa Jezus positsi de foe sensi 1914 G.T.? (b) Ini sortoe feti a de now? (c) Foe san-ede den e fadon kon feti nanga den salfoe bakaman foe Jezus now?
3 Proféti waarheid e tjari kon na krin na fesi wi ai foe bribi dati Jehovah ben poti na glori Kristus Jezus sensi na herfst foe na jari foe 1914 G.T. leki na Gransroedati-edeman foe den hemel legre foe engel di de klari foe feti (Ps. 110:1, 2; Matt. 25:31). A ben tjari den fetiman disi ini wan es’esi feti tegen didibri nanga en èngel, sodati na hemel ben kon krin foe a de di den ben de drape e pori sani èn ala den ogri jeje disi ben a dwengi foe go tan na a kontren foe wi grontapoe planeet. Aladi Kristus Jezus e wakti now na marki di Jehovah sa gi foe pori na féjanti, dan a de tjari na a heri grontapoe wan wroko di sma kan si nanga ai pe feti nanga stré de ini a tori toe (Openb. 12:7-9). Satan nanga en ogri jeje, di e froestan dati den ten de sjatoe, e feti srefi srefi tegen den wan foe den salfoe bakaman foe Kristus di tan abra. Foe san-ede? Foe di den e gi jesi e barwroko gi na kownoekondre foe den Gado èn en Kristus. — Openb. 12:17.
’Sroedati foe Kristus Jezus’
4. Tjari kon na krin san a wani taki foe de „wan toemsi boen sroedati foe Kristus Jezus”?
4 Foe disi e kon na krin dati ala sma di sroiti densrefi na a fikapisi foe Kristus salfoe pipel èn di tanapoe a den sé, sosrefi toe de na marki foe na kefarlek aanval-feti disi. Gi ibriwan sma di na a fasi disi na ini disiten e doe dienst leki wan foe Jehovah Kotoigi, na dek’ati foe Paulus di e gi wi tranga de foe dat’ede gi en: „Tjari leki wan toemsi boen sroedati foe Kristus Jezus joe pisi ini na njan pina foe ogri. No wan sma di e dini leki sroedati, e go moksi ensrefi na ini den bisnis afersi foe na libi, sodati a kan kisi na boen ati foe na sma di ben teki en leki sroedati ini dienst (2 Tim. 2:3, 4). Ibri tra activiteit na ini na libi moe kon na a di foe toe presi te wi teki en gersi nanga wi dienst gi Jehovah bigi Sroedati-edeman.
5. (a) Fa Paulus e ferteri foe na jeje feti foe wan kristen? (b) Sortoe faste bosroiti kristen sroedati ben teki, èn san sa gi den tranga na ini na feti?
5 Na troetroe fasi foe na jeje feti disi e kon na krin gi wi te wi go prakseri foe den fermane di e kon now foe na apostel Paulus: „Bika awinsi wi e waka na ini meti, wi no e feti akroederi na sani san wi de na ini meti. Bika den fetisani foe wi feti no de foe meti, ma krakti foe na sé foe Gado foe trowe sani di skotoe tranga. Bika wi e trowe taki-go-taki-kon na doti èn ibri hé di hopo poti tegen a sabi foe Gado, . . . èn wi e hori wisrefi klari foe gi strafoe foe ibri tranga-jesi, o dra joe egi gi-jesi kon boen dorodoro” (2 Kor. 10:3-6; loekoe sosrefi toe Efesesma 6:12). Leki sroedati foe Kristus Jezus wi wani sori na fesi foe ala sma dati wi e saka wisrefi na ondro den komando èn tanapoe klari foe wroko akroederi den koni foe feti di a ben teki. Foe kan kisi dek’ati ini a tori foe na jeje feti di wi moe feti, meki wi teki dan na Wortoe foe Gado èn naki den blad go baka na ini na historia na wan historia sani na ini Israël foe owroeten. Na ini na toemsi moi tori wi kan feni proféti prenki di wani taki wan sani gi sani di e feni presi now. — Rom. 15:4; 1 Kor. 4:11.
Na teki foe wan kownoe — na ini a ten di psa èn now
6. Ferteri foe den sani di ben meki dati den ben teki David leki kownoe èn fa disi ben abi krakti na tapoe aparti sma?
6 Loekoe pikinso na situwasi na ini a ten foe kownoe David di Gado ben teki leki kownoe abra heri Israël. Baka na dede foe Saul, dan den man foe Juda ben de den fosiwan di ben erken dati Gado ben teki David leki kownoe. Den tra lo ben teki Saul manpikin Isbóseth leki kownoe, san ben meki dati alaten stré ben de (2 Sam. 2:1-11; 3:1). Di den ben kiri Isbóseth dan na pasi ben opo gi den tra lo foe sroiti densrefi na Judah. Baka wan pisiten dan David den ben salfoe foe dat’ede abra heri Israël (2 Sam. 4:5-12; 5:1-3). Ma na ini na pisiten a mindri dan foeroe aparti sma ben moe teki a besroiti soema den ben sa wani. Den ben moe loekoe den brifi foe bribi foe na jongoeman David. A ben de troetroe na salfoewan foe Gado? A ben de a sma di ben sa abi na blesi foe Jehovah, kontrari Saul, di Jehovah ben poti na wan sé? David ben sa man tjari den legre foe Israël nanga boen winimarki tegen den féjanti di ben lontoe den?
7. San ben de ini a tori na ini a teki foe na kownoe wroko foe David?
7 A ben de krin dati son Israël-sma ben teki wan besroiti go na a sé foe na oso foe Saul di ben kisi kroetoe. Tra sma ben teki na besroiti na tapoe na gron foe san ben gersi gi den persoonlek leki san sa tjari wini gi den. Trawan baka ben tan sondro foe teki wan besroiti. Ma froekoe ofoe lati wan besroiti ben moe teki, èn wan pikin kolokoe ben kon gi den sma di ben teki nanga den heri ati na besroiti foe hori baka gi na kownoe wroko foe David! Den sma disi no ben abi gridifasi ofoe no ben teki a moro makriki fasi. Den no ben de nanga toe ati. Na hori baka di den ben hori baka gi Jehovah kownoe, ben tjari den moro foeroe go so fara foe gi densrefi krinkrin leki David ondrodaniki sma èn sroedati gi en kownoe wroko. Ini 1 Kronieken 12:22 wi e kisi disi foe jere: „Dé foe dé sma ben tan kon na David foe jepi en, te leki a ben de wan bigi kampoe, leki na kampoe foe Jehovah.”
8. Fa wi e kon sabi den sma na ini 1 Kronieken 12:32 di ben teki David Kownoe wroko?
8 Te wi e loekoe den pikin pisi foe na tori, dan wi e si taki na mindri ala den sma disi sma ben de „di ben sabi foe si den ten, foe sabi san Israël ben moe doe” (1 Kron. 12:32). Den no ben de leki broko-kowroe na ini den getrowfasi na a kownoe. Den ben abi boen foeroe fetisani foe presteri densrefi leki sma di ben de klari foe kon feti na ondro na stré foe David. Den no ben froewakti foe ben kan abi wan makriki libi, ma, den ben si den ten èn den ben sabi dati féjanti ben lontoe a kownoekondre èn dati den ben de so fara foe swari Israël èn foe wai na anbegi foe Jehovah poeroe. Den sma di ben kon foe na oostsé foe na libi na Jordaan, ben de „sroedati, di ben tanapoe makandra na ini na fetilin” èn di ben de klari foe „doe dienst nanga wan ati di no prati” na ondro David. — 1 Kron. 12:38.
9. (a) Wi e si wan paralel foe na situwasi di ben de na ini David ten? (b) Ala libisma tanapoe na fesi foe sortoe stré-aksi?
9 Fa a de wan span sani now foe si nanga wi égi ai dati wan disi ten prenki foe na situwasi dati e sori ensrefi na wi fesi! Na Moro Bigi David, Kristus Jezus, Jehovah ben teki èn a de tiri now leki hemel kownoe. Den grontapoe naatsi de tegen en kownoe wroko. Den e taki taki den o wai den onderdaan foe na kownoe poeroe na grontapoe (Ps. 2:1-3). Foe dat’ede meki na tapoe na heri grontapoe gi aparti sma wan kari e kon foe teki wan foe den toe sé foe na stré-aksi. Na stre-aksi disi de: Den de na a sé foe ofoe kontrari a kownoekondre foe Jehovah Manpikin? Foeroe sma de di no e teki wan besroiti. Trawan e teki wan sé soso tapoe na gron foe san e gersi sa tjari wini kon gi den, èn na ini a tori dati na wan gridi fasi den ben abi soso den égi tanboen nanga sékerfasi na prakseri; den loekoe o fara den kan kon moro boen. — Zef. 2:2, 3; Joël 3:14.
10. (a) Foe san-ede foeroe sma no e teki wan besroiti na ini a tori foe a teki foe Kristus Kownoewroko? (b) Sortoe frantwortoe de now na tapoe Jehovah Kotoigi?
10 O moro na barinen foe den kownoe vertegenwoordiger foe Gado na grontapoe e panja kon moro bigi nomonomo, o moro foeroe sma e kon ini na okasi foe teki wan ferstan besroiti (Micha 4:1-3; Zach. 8:23). Foeroe sma no e teki wan besroiti, foe di den no sabi na troe tori, den no e si san na ten disi wani taki èn o tranga fanowdoe a de foe teki na sé foe Gado Kownoekondre na wan kraktifasi. Foe dat’ede meki boen foeroe sma te now ete de a ondro na makti foe den propaganda foe Didibri èn den de na ini gevaar foe kisi pori makandra nanga Satan nanga en bakaman. Foe dat’ede meki na tranga fanowdoe foe kari e go na ala kotoigi foe Jehovah foe weri den fetisani èn de srekasreka foe na feti tegen na féjanti, na a sé foe na Moro Bigi David, Kristus Jezus. — Teki gersi Matteus 12:30.
Soema boen gi na feti?
11. Tjari kon na krin na sortoe fasi na gi jesi di wi moe gi jesi na Kristus kan „doe dorodoro”.
11 Ala sroedati foe Kristus moe doro na ini na jeje feti wan toe toemsi prenspari marki. Paulus ben sori foe eksempre fa den égi gi jesi na Kristus ben moe doe dorodoro (2 Kor. 10:5, 6). Fa wi kan kon sabi ofoe disi e kon na krin na ini wi égi fasi foe libi nanga waka? Den aksi di e kon now sa jepi wi foe kan si dati na wisrefi:
Wi ben poti wi dienst gi Gado nanga Kristus boen fara tapoe sortoe libisma matifasi toe? (Matt. 10:37).
Wi ben poti ibri ambisi foe kon goedoe na skinfasi ofoe foe abi wan boen nen na grontapoe na wan sé? (Luk. 6:20-26)
Wi wani prisiri wi tjariman èn Komanderiman sote na presi dati wi broko wi ede nanga den sani di Jehovah ben sa gi akroederi en pramisi — njanjan, krosi, nanga wan oso? (Matt. 6:25-32)
Wi ben stop foe kroetoe èn feni fowtoe na wi mede-sroedati foe Kristus, sodati wi no-sai prati-fasi nanga feti na ini den santa groepoe? (Luk. 6:37; Ps. 133:1-3)
Wi lobi wi brada nanga sisa troetroe èn wi e soekoe na tanboen foe ala sma di de ini disi jeje feti tegen Gado féjanti? (Joh. 13:35; 1 Petr. 4:8)
Disi na aksi di e ondrosoekoe wi èn di ala den bakaman foe Kristus moe piki persoonlek.
12. Fa wi kan kon sabi mati nanga féjanti foe Gado kownoekondre? (Matt. 25:31-46)
12 Ete wan prenspari afersi di moe loekoe na ini wi kristen feti, de dati wi moe si krin na bigi olo di de na mindri na krin organisaatsi foe Gado èn na organisaatsi foe na grontapoe disi di e gi ensrefi abra na hoeroedoe èn di e gi pasi foe wan sma kan doe san a wani (Gen. 3:15; Ps. 97:10). Legre di e feti nanga makandra moe kan si na difrenti mindri mati nanga féjanti. Disi kan foe di den abi krosi e weri nanga fetisani di abi bepaalde marki. Wi ben kisi leri ini na sori foe den froktoe foe na jeje foe Gado. Den ben poti wi prakseri na tapoe den wroko foe na skin, di neleki froktoe de foe si na dorosé toe (Gal. 5:19-24). Soboen seker oen no kan taki foe wan kondre di no wan sma abi, na mindri Gado organisaatsi nanga Satan organisaatsi.
13. San wi abi leki marki na prakseri na ini wi jeje feti te wi e go geregeld na konmakandra?
13 Boiti dati, wi e sori nanga wi libifasi dati alaten wi „e ferstan wi jeje nowtoe”? (Matt. 5:3; Hebr. 10:25) Na ini wan letterlek feti a de toemsi prenspari dati den officiri nanga den sroedati e go na komakandra pe den e kisi leri, sodati den e tan de up to date nanga den bewégi foe den troepoe na tapoe na fetigron èn dati den sabi ooktoe precies san de den laatste koni foe feti nanga a fejanti. Na so toe wi komakandra na ini na kownoekondre komakandrapresi de toemsi prenspari gi ibriwan foe wi sodati na Wortoe foe Gado nanga en santa jeje e tranga wi alaten èn wi e sabi fa den bewégi foe den troepoe foe a féjanti de. — 1 Petr. 5:8.
14. Fa wi firi kan tjari kon boen na fesi nanga den wortoe foe Zacharias di skrifi ini Lukas 1:74, 75?
14 Fa wi alamala moe taki Jehovah nanga en Manpikin grantangi dati a ben sreka wi so boen foe na jeje feti! Neleki Zacharias na tata foe Johannes na Dopoeman na so wi e firi foe prijse Jehovah, foe di, „baka di a ben ferloesoe wi poeroe foe na anoe foe wi féjanti, ben gi wi na grani foe doe santa dienst gi en sondro frede nanga loyalitieit èn regtvaardikifasi na en fesi ala wi dé” (Luk. 1:74, 75). Wi kon fri foe Babylon na Bigiwan. Èn now di wi doro den marki foe wi tjariman èn wi Komanderiman dan wi de ini na positsi foe tanapoe makandra ini den feti lin tegen den fejanti foe Gado nanga Kristus.
15, 16. (a) Sortoe „tak-go-tak-kon” èn „sani di skotoe tranga” Satan ben poti na ini na prakseri foe sma? (b) Fa wawan a kan psa dati disi „trowe na doti”, èn o fara disi e psa?
15 Ala fetisani nanga sroedati foe na grontapoe disi de soso leki pikinnengre présani te joe teki den agersi nanga den falsi filosofie nanga overlevering foe libisma di komoto foe Satan nanga en ogri jeje. Foe di Satan ben poti leki marki foe de speri nanga Gado na ini glori nanga makti, meki a panja en lé-mofo leri na ala sé. A e taki kontrari na troe Gado èn a de taki na wan bedrigi fasi dati ensrefi de na fonten foe sabi sani. A e leri dati libisma no abi Jehovah fanowdoe èn dati libisma na ini égi krakti sa doro a marki dati a sa de leki Gado. Didibri e taki dati a no de so dati Gado kan taki dati a abi na reti dati a de na Mekiman èn a ferteri libisma dati libisma na wan wroko foe evolutie. A meki a go so fara dati foeroe sma e bribi dati wan troetroe dede no de èn dati a sani di e sori ensrefi leki dede de soso wan abra go na wan tra fasi foe libi. A ben sorgoe dati difrenti sortoe foe tiri ben kon di alamala abi den roetoe na ini hoigrifasi. Ala den sani disi èn moro foeroe ete de den „tak-go-tak-kon . . . èn ibri hé di e opo poti kontrari na sabi foe Gado”. — 2 Kor. 10:5.
16 Den ’denki dati di skotoe tranga’ moe trowe na doti èn den moe poeroe den bere na doro, sodati sma di den kori kan kon fri na ferstan èn na jejefasi (2 Kor. 10:4). Wi abi den fanowdoe fetisani — bribi leki wan skilt, waarheid leki wan leribanti di e tranga joe, regtvaardikifasi leki wan kibri gi na ati, na howpoe foe ferloesoe leki wan helm, na Wortoe foe Gado leki feti-owroe èn na boen njoensoe foe vréde, foe jepi den sma di wani foe saka densrefi na ondro na kownoe di Jehovah ben wani teki (Ef. 6:14-17). Te den e gebroiki den jeje fetisani disi dan den kristen kotoigi foe Jehovah e meki boen foeroe strafoeman kon fri!
Na victori de séker
17. San sa de na bakapisi akroederi Psalm 45:3, 4 te Kristus o fadon kon tapoe na féjanti na ini a laatste feti?
17 Na ten e kon moro krosbé pe Jehovah sa gi en kownoe di a ben ferkise na marki foe fadon go na tapoe na féjanti na ini wan laatste feti. Te Jehovah e taki nanga den tjariman foe na hemellegre dan a sa bari nanga den wortoe foe Psalm 45:3, 4: „Gepsi joe feti-owroe na joe bowtoe, o maktiwan, nanga joe wartifasi èn joe glorifasi. Èn go moro fara ini joe glorifasi foe wini sani; rij go foe na afersi foe waarheid èn sakafasi èn regtvaardikifasi èn joe reti-anoe sa leri joe foe doe sreki sani.” Na bakapisi foe na doe dati de séker. Satan heri organisaatsi, na organisaatsi foe en di wi e si èn di wi no e si, sa wai poeroe na pasi, sodati na grontapoe sa kon fri foe ala ogri tiri di e kwinsi sma. Fa dati sa de wan kolokoe dé gi den sma di sa tan na libi te ala kwinsiman, léman. hoeroedoeman, èn den sma di e pori na grontapoe sa komoto krinkrin! — Openb. 11:16-18; 19:11-21.
18. Fa Gado dienstkengti ben „tanapoe na ini na fetilin” sensi 1914 G.T.?
18 Fa disi sa de wan wondroe sani foe si nanga wi égi ai fa dramatisch situwasi di skrifi ini den boekoe, e kon now troe! Ini na ten foe wi den salfoe jeje brada foe Kristus Jezus ben de den fosiwan di ben teki en, bakadi a ben poti na tapoe na troon na ini 1914 G.T. leki den kownoe. Den alamala ben „tanapoe makandra na ini na fetilin”. Èn spesroetoe sensi 1935, di leti ben kon na tapoe Openbaring 7:9-17, dan wan „bigi ipi” sma ben hari konmakandra sodati den ben si san ben de na troetroe fonten foe winimarki nanga blesi. Den ben sroiti densrefi na den disiten jeje Israëlsma, èn den ben tanapoe alamala „na ini na fetilin”, klarklari foe abi wan prati na a njan foe pina èn den moeiliki ten foe wan publiki jeje feti tegen Satan heri organisaatsi — èn disi foe na grani èn glori foe Jehovah. — Zach. 2:11.
19. Sortoe faste besroiti ibri dek’ati kotoigi foe Jehovah moe teki foe dat’ede?
19 Soboen a de wan sani di de krin dati den de de tranga fanowdoe. A no de now na ten foe go denki dati na jeje feti sa kaba. Meki noiti a psa dati na féjanti fadon kon na wi tapoe onverwakti na ini na moeiliki piswatra foe wi santa dienst di e kon es’esi. Meki wi, ofoe wi de now foe na fika pisi foe den jeje Israëlsma, ofoe foe den „bigi ipi” kompe foe den, ’tanapoe na ini na fetilin nanga wan ati di no prati”. Meki wi go doro foe opo na stré-babari nanga dek’ati foe di Jehovah e gi wi na djaranti dati wi sa wini! — 2 Kron. 20:15.
Aksi foe loekoe san wi ben leri:
□ Foe san-ede a de now tranga fanowdoe foe wi tanapoe „ini na fetilin”?
□ Na ini sortoe feti Jehovah Kotoigi de na ini?
□ Na fesi foe sortoe prenspari stré-aksi ala sma tanapoe na ini disiten?
□ Soema boen nofo foe de wan „sroedati foe Kristus Jezus”?
□ Foe sortoe wini wi kan de séker now?
[Prenki na tapoe bladzijde 3]
Na go geregeld na den konmakandra na ini a Kownoekondre Konmakandrapresi (1) e tranga wi gi na jeje feti, (2) e jepi wi foe „si den ten” èn (3) e sori wi fa wi kan doe dienst nanga „wan ati di no prati”