¡„Wan Ten Gi Vrede” De Krosibei!
„Gi ala sani wan fasti ten de, . . . wan ten fu feti èn wan ten fu vrede.”—PREIKIMAN 3:1, 8.
1. Sortu situwâsi di abi fu du nanga feti èn nanga vrede, ben de na ini a di fu 20 yarihondro, tra fasi leki san sma ben sa fruwakti?
MORO furu sma e angri fu vrede, èn den abi bun reide fu dati. Na ini a di fu 20 yarihondro, sma ben abi a moro pikinso vrede leki na ini ala den yarihondro na ini a historia. Ma toku wi e si, taki noiti na fesi sma du someni muiti fu tyari vrede kon. Na ini 1920 den ben seti a Folkubontu. Na ini 1928, „pikinmoro ala den nâsi na grontapu . . . di ben agri taki den no ben o si feti moro leki wan wrokosani fu a nationaal politiek”, ben horibaka gi a Kelogg-Briand Kruderi di wan buku ben kari „a moro moiwan fu ala den sani di sma du fu pruberi tyari vrede kon, baka a Fosi Grontapufeti”. Baka dati, na ini 1945 den ben seti den Verenigde Nâsi fu kon ini a presi fu a Folkubontu di no ben wroko moro.
2. San den Verenigde Nâsi taki dati a marki fu den de, èn omeni bun bakapisi den ben abi?
2 Neleki a Bontu, na so a marki di den Verenigde Nâsi taki dati den abi, na fu sorgu taki vrede e kon na grontapu. Ma a no ben abi furu bun bakapisi. A tru, taki na no wan presi na grontapu wi e si feti di gersi den tu grontapufeti. Toku wan heri ipi pikin feti e puru a vrede fu hondro dusundusun sma, èn den e puru den gudu fu den èn nofotron a libi fu sma tu. ¿Wi kan prefuru fu howpu taki den Verenigde Nâsi kan meki a di fu 21 yarihondro tron „wan ten fu vrede”?
A Fasi Fu Tyari Tru Vrede Kon
3. Fu san ede trutru vrede no kan de makandra nanga a si di sma no wani si makandra na ai?
3 Fu meki vrede de na mindri pipel nanga nâsi, dan moro de fanowdu leki soso a frudrage di sma e frudrage makandra. ¿Wan sma trutru kan abi vrede nanga wan sma di a no wani si na ai? No soleki fa 1 Yohanes 3:15 e taki: „Ibriwan sma di no wani si en brada na ai, na wan kiriman.” Soleki fa a historia e sori di no pasa so langa ete, dan a si di sma no wani si makandra na ai kwetikweti, makriki kan meki den go du ogri nanga tranga.
4. Suma wawan kan abi vrede, èn fu san ede?
4 Fu di Yehovah na „a Gado di e gi vrede”, meki soso den sma di lobi Gado èn di abi bigi lespeki gi den regtfardiki gronprakseri fu en, kan abi vrede. A de krin, taki Yehovah no e gi ala sma vrede. „’Vrede no de,’ a Gado fu mi taki, ’gi den godelowsu wan.’” Disi de so fu di den godelowsu sma no wani meki a santa yeye fu Gado tiri den, di abi vrede leki wan fu en froktu.—Romesma 15:33; Yesaya 57:21; Galasiasma 5:22.
5. San tru Kresten no kan du kwetikweti?
5 Trutru Kresten no e feti kwetikweti nanga tra libisma — soleki fa sma di e kari densrefi Kresten du someni leisi kaba, spesrutu na ini a di fu 20 yarihondro (Yakobus 4:1-4). A tru, taki den e feti nanga den leri di e fruteri lei fu Gado, ma a feti disi de fu yepi sma, no fu du den ogri. Fu frufolgu tra sma fu trobi ede di abi fu du nanga relisi noso fu gi sma mankeri fu nationalistisch reide ede kwetikweti no e kruderi nanga a tru Kresten bribi. „Efu a kan, so langa a e anga fu unu,” na so Paulus ben taigi den Kresten na Rome, „abi vrede nanga ala sma.”—Romesma 12:17-19; 2 Timoteus 2:24, 25.
6. Pe wawan wi kan feni trutru vrede na ini a ten disi?
6 Na ini a ten disi, a vrede di Gado e gi de fu feni na mindri den tru anbegiman fu Yehovah Gado wawan (Psalm 119:165; Yesaya 48:18). No wan trobi di abi fu du nanga politiek e pori a wánfasi fu den, fu di den no e bumui nanga politiek na no wan presi (Yohanes 15:19; 17:14). Fu di den „de makandra na ini wánfasi soleki fa a fiti, nanga a srefi denki èn nanga a srefi fasi fu prakseri”, meki no wan trobi di abi fu du nanga relisi, e pori a vrede fu den (1 Korentesma 1:10). A vrede di Yehovah Kotoigi abi na wan disiten wondru, wan wondru di Gado du soleki fa a pramisi: „Mi wani poti vrede leki opziener gi unu, èn regtfardikifasi leki den sma di e gi unu wroko fu du.”—Yesaya 60:17; Hebrewsma 8:10.
Fu San Ede a De „wan Ten fu Feti”?
7, 8. (a) Fa Yehovah Kotoigi e si a ten disi, ala di den lobi vrede? (b) San na a moro prenspari fetisani na ini a feti di Kresten e feti?
7 Ala di Yehovah Kotoigi e libi na ini vrede nanga sma, toku den e si a ten disi moro furu leki „wan ten fu feti”. A no de wan trutru feti, bika efu den ben o gebroiki fetisani fu dwengi sma fu teki a Bijbel boskopu, dan dati no ben o kruderi nanga a kari di Gado gi fu „meki ibriwan sma di wani so, teki a watra fu libi fu soso” (Revelation 22:17). ¡Den no e dwengi no wan sma fu kenki a libi fu den! A feti fu Yehovah Kotoigi na soifri wan feti na yeye fasi. Paulus ben skrifi: „Den fetisani fu a feti fu wi no de na skin fasi, ma abi a krakti fu Gado fu trowe sani di seti steifi.”—2 Korentesma 10:4; 1 Timoteus 1:18.
8 A moro prenspari „fetisani fu a feti fu wi” na „a feti-owru fu a yeye, dati na Gado wortu” (Efeisesma 6:17). A feti-owru disi tranga. „A wortu fu Gado de libilibi èn a abi krakti èn a srapu moro leki iniwan feti-owru di e koti na tu sei, èn a e boro go srefi so dipi taki a e prati sili nanga yeye, èn den skrufu fu a skin nanga a fatu na ini den bonyo fu den, èn a man fu si krin san na ati e denki èn abi na prakseri” (Hebrewsma 4:12). Te Kresten e gebroiki a feti-owru disi, dan den man naki „den prakseri [trowe] èn ala den hei sani di den opo kontrari a sabi fu Gado” (2 Korentesma 10:5). Disi e yepi den fu puru den falsi leri kon na doro, èn so srefi den ogri di sma e du, nanga den filosofia di e sori a koni fu libisma na presi fu sori a koni fu Gado.—1 Korentesma 2:6-8; Efeisesma 6:11-13.
9. Fu san ede wi musu tan du muiti na ini a feti di wi e feti nanga a sondu skin?
9 Wan tra sortu feti na yeye fasi na a wan di den e feti nanga a sondu skin. Kresten e teki na eksempre fu Paulus, di ben erken: „Mi e fon mi skin èn e tyari en leki wan srafu, so taki, baka te mi preiki gi trawan, den no poti mi na wan sei na a wan noso tra fasi” (1 Korentesma 9:27). Den Kresten na Kolose ben kisi deki-ati fu kiri den „memre fu [a] skin [fu den] di de na grontapu ini a tori fu hurudu, libi di no krin, seks lostu, ogri lostu, nanga bigi-ai, di de a dini fu kruktu gado” (Kolosesma 3:5). Èn a Bijbel skrifiman Yudas ben frumane Kresten „fu feti wan tranga feti gi a bribi di den santawan ben kisi fu ala ten” (Yudas 3). Fu san ede wi musu du dati? Paulus e piki: „Efu unu e libi akruderi a skin, dan unu sa dede seiker; ma efu unu e kiri den sani di a skin e du nanga yepi fu a yeye, dan unu sa tan na libi” (Romesma 8:13). Te wi e hori a krin fruklari disi na prakseri, dan wi musu tan na ai na ini a feti di wi e feti nanga takru firi.
10. San ben pasa na ini 1914, èn san sa de a bakapisi fu disi na ini a ten di o kon dyonsro?
10 Ma wan tra reide fu san ede wi kan si a ten disi leki wan ten fu feti de taki ’a dei di a Gado fu wi o teki refensi’, de krosibei (Yesaya 61:1, 2). Na ini 1914, Yehovah en fasti ten ben doro fu opo a Kownukondre fu a Mesias èn fu gi en a makti fu feti wan hebi feti nanga a sistema fu Satan. A ten di libisma kisi fu pruberi tiri na ini na anu fu libisma sondro taki Gado e kon na mindri, ben kon na wan kaba na a ten dati. Na presi taki sma e teki a Mesias Kownu fu Gado, moro furu fu den e tan drai den baka gi en, neleki san furu sma ben du na ini a fosi yarihondro (Tori fu den Apostel 28:27). Dati meki Krestes ben musu „go poti na [en] ondro na mindri fu den feanti fu [en]” fu di sma e gens a Kownukondre (Psalm 110:2). Koloku taki, Openbaring 6:2 e pramisi taki a sa „kaba a wini fu en”. Disi a sa du na ini „a feti fu a bigi dei fu Gado na Almaktiwan . . . , di den e kari Har–Mágedon ini a Hebrewtongo”.—Revelation 16:14, 16.
„Wan Ten fu Taki” Doro
11. Fu san ede Yehovah ben abi bun furu pasensi, ma san sa kon te fu kaba?
11 Sensi a ten di wan bigi kenki ben kon ini den afersi fu libisma na ini 1914, aiti tenti na feifi yari pasa kaba. Yehovah ben abi bun furu pasensi nanga libisma. A meki den Kotoigi fu en kon frustan krin o seryusu a situwâsi de. A libi fu hondrohondro milyunmilyun sma de ini kefar. Den ipi-ipi sma disi musu kisi wan warskow bika „Yehovah . . . no wani taki wan sma e kisi pori, ma a wani taki ala sma musu abi berow” (2 Petrus 3:9). Ma toku a ten sa kon dyonsro taki „den sa tyari Masra Yesus kon na krin na hemel makandra nanga den makti engel fu en”. Na a ten dati, ala den sma di fu espresi drai den baka gi a boskopu fu Gado Kownukondre sa kisi fu du nanga a „refensi” di Yesus sa tyari kon „tapu den wan di no sabi Gado èn tapu den wan di no e gi yesi na a bun nyunsu fu wi Masra Yesus”.—2 Tesalonikasma 1:6-9.
12. (a) Fu san ede a no de prenspari fu go rai o ten a bigi banawtu ben sa kan bigin? (b) Fu sortu kefar Yesus ben warskow wi ini a tori disi?
12 O ten wan kaba sa kon krinkrin na a pasensi fu Yehovah? A no de prenspari srefisrefi fu go rai o ten „a bigi banawtu” ben sa kan bigin. Yesus ben taki krin: „A dei nanga a yuru dati no wan sma no sabi.” Na a tra sei, a ben frumane: „Tan na ai doronomo, bika unu no sabi sortu dei un Masra e kon. . . . Sori taki unu de srekasreka, bika a Manpikin fu libisma e kon na wan yuru di unu no prakseri” (Mateus 24:21, 36, 42, 44). Fu taki en leti, disi wani taki dati wi musu luku ibri dei fa sani e waka na grontapu èn hori a bigin fu a bigi banawtu na prakseri (1 Tesalonikasma 5:1-5). ¡A no bun kwetikweti fu denki taki wi kan go du sani safrisafri, èn fu libi a sani di sma e kari wan normaal libi, ala di wi e wakti fu si fa sani ben sa waka kande! Yesus ben taki: „Poti prakseri na unsrefi taki noiti un ati musu kon hebi nanga nyan pasa marki èn dringi pasa marki èn den broko-ede fu a libi, èn a dei dati e kon na un tapu wantronso, na ini wán momenti leki wan trapu” (Lukas 21:34, 35). Fu disi wi kan de seiker: Den „fo winti” di sa tyari pori kon èn di den „fo engel” fu Yehovah e hori now, den no sa hori fu têgo.—Openbaring 7:1-3.
13. Sortu sani so wan siksi milyun sma e erken?
13 Now di wi sabi taki a dei disi pe sma sa musu gi frantwortu e kon krosibei esi-esi, dan den wortu fu Salomo di e taki dati „wan ten de fu taki” e kisi spesrutu waarde (Preikiman 3:7). Pikinmoro siksi milyun Yehovah Kotoigi di kon si taki a ten disi de trutru wan ten fu taki, e taki fayafaya fu a glori fu Gado en makti leki kownu èn den e warskow sma gi a dei di a sa teki refensi. Den e gi densrefi nanga den fri wani tapu a dei disi fu Krestes en legremakti.—Psalm 110:3; 145:10-12.
Den Wan Di E Taki Dati „Vrede De, Ala Di Vrede No De”
14. Sortu falsi profeiti ben de na ini a di fu seibi yarihondro b.G.T.?
14 Na ini a di fu seibi yarihondro b.G.T., Gado en profeiti Yeremia nanga Esekièl ben meki boskopu fu Gado bekènti taki a ben o tyari krutu kon tapu Yerusalem fu di a ben waka a takru pasi fu trangayesi Gado. A pori di den ben taki na fesi fu en, ben pasa na ini 607 b.G.T., ala di heihei relisi fesiman di ben abi furu makti ben gens den boskopuman fu Gado. Den relisi fesiman disi ben de „profeiti sondro frustan [di] . . . ben meki a pipel fu [Gado] lasi pasi, fu di den ben taki: ’¡Vrede de!’ ala di vrede no de”.—Esekièl 13:1-16; Yeremia 6:14, 15; 8:8-12.
15. ¿Yu abi den sortu falsi profeiti disi tu na ini a ten disi? Fruklari disi.
15 Neleki den „profeiti sondro frustan” na ini a ten dati, na so moro furu relisi fesiman na ini a ten disi no e warskow sma taki a dei di Gado o tyari krutu kon, de krosibei. Na presi fu dati den e gi sma wan moi prakseri taki politiek grupu sa tyari vrede nanga seikerfasi kon te fu kaba. Den wani plisi libisma moro leki Gado, èn dati meki den e taigi den sma fu den kerki san den wani yere, na presi taki den e tyari kon na krin gi den taki Gado Kownukondre opo èn taki dyonsro a Mesias Kownu o wini a strei fu en krinkrin (Danièl 2:44; 2 Timoteus 4:3, 4; Openbaring 6:2). Neleki falsi profeiti, den tu e taki fu „vrede, ala di vrede no de”. Ma dyonsro a sani di den e bribi sa tron wan sani di sa frede den trutru, te den sa kisi fu du nanga na atibron fu a Sma di den e fruteri lei fu en èn di den tyari bigi syen kon na tapu en nen. Den fesiman fu a grontapumakti fu falsi relisi, di Bijbel e taki fu en leki wan huru-uma, sa dede ala di den e bari kari na wan bidrigi fasi taki vrede de.—Openbaring 18:7, 8.
16. (a) Leki sortu sma, trawan kon sabi Yehovah Kotoigi? (b) Fa den e difrenti fu den sma di e bari kari taki „vrede de, ala di vrede no de”?
16 Taki moro furu fu den heihei fesiman di abi furu makti e tan pramisi vrede na wan hoigri fasi, no e meki den sma tweifri di e bribi den pramisi fu Gado taki tru vrede sa kon. Moro leki wan hondro yari kaba, sma sabi Yehovah Kotoigi leki sma di e opo taki gi Gado Wortu na wan loyaal fasi, ala di den e gens falsi relisi na wan deki-ati fasi, èn taki den de sma di e horibaka gi Gado Kownukondre nanga wan fasti bosroiti. Na presi taki den e meki sma fadon na sribi nanga wortu di e taki fu vrede, soso fu switi sma yesi, den e du muiti fayafaya fu wiki sma meki den si san e pasa trutru, taki a ten disi na wan ten fu feti.—Yesaya 56:10-12; Romesma 13:11, 12; 1 Tesalonikasma 5:6.
Now Yehovah E Opo En Mofo fu Taki
17. San a wani taki dati dyonsro Yehovah sa opo en mofo fu taki?
17 Salomo ben taki tu: „A tru Gado sa krutu den regtfardiki wan èn so srefi den godelowsu wan, bika wan ten de gi ibri afersi èn gi ibri wroko drape” (Preikiman 3:17). Iya, Yehovah abi wan fasti ten fu tyari krutu kon na tapu falsi relisi èn na tapu „den kownu fu grontapu [di] seti densrefi . . . teige Yehovah èn teige a salfuwan fu en” (Psalm 2:1-6; Openbaring 16:13-16). Te a ten dati doro, dan den dei di Yehovah „tan tiri” sa kon na wan kaba (Psalm 83:1; Yesaya 62:1; Yeremia 47:6, 7). A sa gebroiki Yesus Krestes, a sma di a poti leki Mesias Kownu, fu „taki” na ini a wan-enkri tongo di den gensman fu en e frustan kande: „Yehovah srefi sa hari go leki wan tranga man. Leki wan fetiman a sa wiki faya na ini sma. A sa bari, iya, a sa bari wan feti babari; a sa sori taki a tranga moro den feanti fu en. ’Mi tan pî wan langa pisi ten. Mi ben tan tiri. Mi ben tan dwengi misrefi. Leki wan uma di e meki pikin mi o dyeme, hari bro esi-esi èn o bro hebi na a srefi ten. Mi sa broko den bergi nanga den pikin bergi puru, èn mi sa meki ala den sani di e gro na den tapu mi sa meki kon drei. Èn mi sa meki den liba tron èilanti, èn den watra di abi hei grasi mi sa meki kon drei. Èn mi sa meki den breniwan waka wan pasi di den no ben sabi; mi sa meki den waka wan pasi di den no ben sabi. Mi sa meki wan dungru presi di de na den fesi kon tron leti, èn wan gron di lai nanga ston mi sa meki kon tron wan grati pisi gron. Disi na den sani di mi sa du gi den, èn mi no sa libi den.’”—Yesaya 42:13-16.
18. Nanga sortu sani a pipel fu Gado sa „tan tiri” dyonsro?
18 Te Yehovah ’e opo taki’ gi en makti leki Gado, dan en pipel no sa abi fu opo taki moro gi densrefi. Na den e „tan tiri” now. Neleki fa a ben fiti gi den futuboi fu Gado na ini a ten di pasa kaba, na so den wortu disi sa fiti now tu: „Na a okasi disi unu no sa abi fu feti. Teki a posisi fu unu, tan tanapu èn si a frulusu fu Yehovah fu a bun fu unu ede.”—2 Kroniki 20:17.
19. Sortu grani den yeye brada fu Krestes sa kisi dyonsro?
19 ¡Dati na trutru wan bigi lasi gi Satan nanga na organisâsi fu en! Den glori brada fu Krestes sa teki prati na wan tumusi aparti fasi fu wini a feti gi regtfardikifasi, soleki fa a pramisi e taki: „Fu en sei, a Gado di e gi vrede, sa masi Satan na ondro un futu dyonsro” (Romesma 16:20). Te fu kaba, a ten di wi ben wakti someni langa taki vrede e kon, doro.
20. Gi sortu sani a sa de a ten dyonsro?
20 ¡Blesi fu a libi fu ala den sma na grontapu di no sa dede te Yehovah sa sori en makti na a kefalek moi fasi disi! Syatu baka dati, getrow man nanga uma fu fositen fu suma a fasti ten fu kisi wan opobaka sa doro kaba, sa moksi densrefi nanga den. A Dusun Yari Tiri fu Krestes sa de trutru „wan ten fu prani . . . , wan ten fu meki kon betre . . . , wan ten fu bow . . . , wan ten fu lafu . . . , wan ten fu dyompodyompo . . . , wan ten fu brasa sma èn . . . wan ten fu lobi”. Iya, èn fu têgo a sa de „wan ten fu vrede”!—Preikiman 3:1-8; Psalm 29:11; 37:11; 72:7.
San Yu E Piki?
◻ Fa têgo vrede sa kon?
◻ Fu san ede Yehovah Kotoigi e si a ten disi leki „wan ten fu feti”?
◻ O ten a pipel fu Gado musu „taki” èn o ten den musu „tan tiri”?
◻ Fa en o ten Yehovah sa opo en mofo fu taki?
[Faki/Prenki na tapu bladzijde 13]
Yehovah Abi wan Fasti Ten Fu
◻ meki Gog suku fu du Gado pipel ogri.—Esekièl 38:3, 4, 10-12
◻ poti en na ini na ati fu libisma tiriman fu pori Babilon a Bigiwan.—Openbaring 17:15-17; 19:2
◻ meki a Pikin Skapu trow.—Openbaring 19:6, 7
◻ bigin a feti fu Har-Magedon.—Openbaring 19:11-16, 19-21
◻ tai Satan so taki a Dusun Yari Tiri fu Yesus kan bigin.—Openbaring 20:1-3
Den sani disi skrifi soso akruderi a fasi fa den skrifi na ini Bijbel. Wi kan de seiker taki ala feifi sani sa pasa soleki fa Yehovah poti den fu pasa èn soifri na tapu a ten di a poti.
[Prenki na tapu bladzijde 15]
Krestes en dusun yari tiri trutru sa de wan ten . . .
fu lafu . . .
fu brasa sma . . .
fu lobi . . .
fu prani . . .
fu dyompodyompo . . .
fu bow . . .