Trowe den lostoe foe grontapoe
1, 2. (a) Fa wi moesoe anbegi Jehovah? (b) San disi e aksi foe en kotoigi?
JEHOVAH GADO e ferdini en taki ala sma di gi densrefi abra na en, anbegi en na wan krin èn soifri fasi. Alaten èn na ibri fasi den e gi en grani na ini wortoe èn na ini doe èn séker den no moe abi „na jeje foe na grontapoe” — na sondoe, gridi èn nofotron bedrigi denki ofoe krakti di e poesoe den (1 Korintesma 2:12). Leki wan pipel di orga foe prijse Gado, Jehovah Kotoigi moe kon a fesi leki sma di de tra fasi leki a grontapoe disi. Den moe teki nanga den heri ati poti na ini den libi na leri foe Gado foe „poti a wan sé ogridoe èn lostoe foe na grontapoe èn foe libi nanga gesontoe ferstan èn regtvaardikifasi èn vréde foe Gado na mindri foe den disiten seti foe sani”. — Titus 2:11-14.
2 Ma na wan sari sani taki a no ala sma di teki taki den lobi Jehovah, e gi en grani alaten èn e sori krin taki den e trowe lostoe ofoe fasi foe na grontapoe. Wi kisi foe jere taki wan toe kristen man e kon nanga oemakrosi na wan bal maské (na wan dansi pe den sma e weri masker). Wan sma kan taki foe sowan sortoe libifasi dati a no gersi na grontapoe disi ofoe a de foe a grani foe Jehovah? Dati séker no de fasi foe libi di wi ben sa kan froewakti foe den sma di no de „wan pisi foe na grontapoe” (Johannes 15:19). Na ondro moro foeroe omstandigheden wan man di e weri wan oemasma pruik nanga oemasma krosi, no wawan ben sa gersi wan oemawege, ma a ben sa kan opo na pasi gi tra sma foe kon na en nanga fasi di no krin foe abi seks demakandra di de tege na natuur. — Deuteronomium 22:5.
3. Sortoe aksi na ini a tori foe grontapoe pasi nanga lostoe wi moe soekoe?
3 Leki kotoigi foe Jehovah wi sa erken kande dati ’den afersi foe na grontapoe no moe teki wi krinkrin abra’, soleki ben tjari kon na fesi na na artikel dja na fesi (1 Korintesma 7:31, The New Testament: A New Translation, foe na anoe foe Olaf M. Orrlie). Wi sa ferstan taki na no-ferdini boenfasi foe Gado „e leri wi foe taki ’Nono’ gi ogridoe èn lostoe foe na grontapoe” (Titus 2:11, 12, New International Version; NW). Ma san wi moe doe te wi ati no e doe na a fasi disi? Ofoe kon wi taki dati wi wani meki wi bosroiti foe trowe grontapoe lostoe kon moro tranga. San kan jepi wi na ini disi?
Aksi na „Jereman foe begi”
4, 5. (a) Sortoe sortoe foe begi nanga reti wi kan seni go na Gado? (b) Fa wi sa moe begi na ini a tori foe a toestand foe wi ati?
4 Wan fasi foe kan si winimarki na ini na trowe foe grontapoe lostoe, de dati wi moe seni faja, tranga begi foe jepi go na a „Jereman foe begi” (Psalm 65:2). Ma san wi ben sa kan taki na ini wi begi efoe wi ati e angri grontapoe sani?
5 Leki kotoigi foe Jehovah wi moe meki na „ini ala sani wi begi kon bekenti na Gado”. Efoe wi e doe disi na ini bribi, dan a „vréde foe Gado” di pasa ala sani sa kibri wi jeje èn wi ati. A no de foe taki taki Jehovah srefi ben taki „na firi foe libisma ati de sensi en jongoe jari takroe” (Filipisma 4:6, 7; Genesis 8:21). Foe dat’ede joisti meki wi moe begi wawantron foe wan tra jejefasi, wan kenki foe ati. Efoe den moi sani foe na grontapoe di e hari wi foe eksempre e kori wi ati, dan wi moe aksi wi hemel Tata foe jepi wi foe meki gesontoe jeje lostoe kon na ini na presi foe na angri dati.
6. Fa wi ben sa kan begi efoe den pasi nanga kori foe na grontapoe e gersi spesroetoe moi?
6 Hondrohondro jari pasa kaba dati na Psalm skrifman David ben seni na tranga begi di e kon now na Gado: „Meki joe pasi bekenti na mi, o Jehovah . . . Meki mi waka ini joe waarheid èn leri mi” (Psalm 25:4, 5). Jehovah ben doe disi gi David, èn seker a kan jere so wan sortoe begi foe na boen foe en disiten dienstknegti. Foe di „den pasi” nanga „waarheid” foe Jehovah no de foe a grontapoe, dan den prakseri disi foe begi leki di foe David kan de boen te den pasi foe na grontapoe disi spesroetoe e gersi leki den de wan moi sani di e hari wi kon.
7. Sortoe koni libifasi wi moe waka na en baka efoe wi e firi taki grontapoe prisiri di no de gosontoe e hari wi?
7 A grontapoe disi abi hoeroedoe fasi foe doe sani èn a foeroe nanga takroedoe. Foeroeron disi e kon na fesi na ini grontapoe singi, dansi, boekoe, komediepré, film, televisieprogramma èn den sortoe sani dati. San foe doe efoe wi, leki kristen di gi wisrefi abra e firi taki grontapoe prisiri di no de gesontoe e hari wi? Na ini na fosi presi wi sa loekoe den mogelekheid foe prisiri na ini na leti foe na Wortoe foe Gado. Leki fa a e sori na ini disi dan wi ’moe abi wan tegoe gi san de ogri èn anga na san boen’ (Romeinisma 12:9). Moro fara wi kan begi foe na jepi foe Jehovah, sodati ini wi ati, onvolmaakti leki a de, no moe angri moro langa den wisiwasi sani.
Jepi foe na santa jeje
8. San kan psa leki fa Psalm 51:11 taki, srefi efoe wi abi now na santa jeje?
8 Baka di kownoe David foe Israël ben kon sabi na tapoe wan krakti fasi na ernst foe en sondoe nanga Bathséba a ben begi Jehovah tranga: „No trowe mi komoto foe joe fesi; èn joe santa jeje, o no poeroe dati foe mi” (Psalm 51:11). Gado ben jere na begi dati. Ma loekoe pikinso taki wan sma kan lasi na santa jeje ofoe dati disi kan teki poeroe foe en.
9. San ben sa kan meki wi go na ini na swampoe foe pori fasi èn nanga sortoe bakapisi kande?
9 Efoe wi leki kristen di gi wi srefi abra, gi pasi dati na grontapoe hari wi go na ini en „lagi swampoe foe sjen libi”, dan wi kan dede drape na ini jejefasi na watra (1 Petrus 4:4). Disi kan bigin nanga a gridi foe kon sabi sani, kande foe di wi e bigin foe foeroe ferstan nanga ati nanga hoeroedoe, grontapoe prakseri di e prani go drape nanga jepi foe boekoe di bijbel e trowe èn sortoe foe prisiri di no boen. A Wortoe foe Gado e gi wi tranga foe de „pikinnengre na ini san de takroe” èn foe no proberi foe kon sabi den hoeroedoe ofoe takroe sani (1 Korintesma 14:20). Ma a gridi foe kon sabi sani ben sa kan hari wi go na ini wan draiwatra foe pori, èn wi ben sa kan bosroiti sani na sowan don fasi dati wi de lepi ofoe tranga nofo na ini jejefasi foe kakafoetoe gi doti libi. Morofara ferberde ben sa kan gro kon, sodati wi no e meki ’no wan sma ferteri wi san wi moe doe’ — te foe kaba srefi no Gado srefi. Den bakapisi kan de wan rampoe foe di no wan sma di e tjalansi Gado foe di a de trowe en rai nanga tranga-ede, ’kan tan sondro wan sani psa nanga en’. — Job 9:1-4.
10. (a) San kan psa nanga wi na ini a tori foe na santa jeje efoe wi no poti skotoe na grontapoe lostoe? (b) San sa jepi wi soboen foe kakafoetoe gi na grontapoe nanga en kori?
10 Efoe skotoe no ben poti na grontapoe lostoe, dan den sa tjari wi go so fara foe gi Gado santa jeje sari foe di wi no e respeki en, èn disi o de foe di wi e waka baka wan libifasi di de kontrari na tiri foe Gado jeje èn foe di wi o poti wi libi na tapoe marki di kenki foe den marki di na jeje e proberi foe gi wi tranga na ini. ’Gi sari na Gado santa jeje’, wani taki toe a trowe foe en Wortoe (Efesesma 4:30; teki gersi Tori foe den Apostel 7:51-53). Disi kan tjari wan sma go foe meki oproeroe espresi tége den krin sori foe Jehovah jeje èn disi kan wani taki gongosa tége na jeje dati, wan sondoe di no e kisi pardon. (Mattéus 12:31, 32; Markus 3:29; teki gersi Hebrewsma 6:4-6; 10:26-31). Meki wi noiti go a tapoe na pasi foe srefidensi soboen èn gi wisrefi abra na grontapoepraktijk di wi ben kon fri foe den nanga jepi foe Gado noverdini boenfasi. Meki na ini a presi foe dati wi begi foe na santa jeje èn saka wisrefi na ondro na krakti foe en. Disi sa jepi foe wi kakafoetoe gi na grontapoe nanga den kori foe en. — Psalm 143:10; Lukas 11:13.
A Wortoe foe Gado na wan jepi
11. Sortoe sani seti, di sa jepi wi foe kakafoetoe gi na kori foe meki gebroiki foe na grontapoe dorodoro?
11 Wan toemsi moi froktoe foe Gado santa jeje na en Wortoe (2 Samuël 23:2; 2 Timoteus 3:16; 2 Petrus 1:20, 21). Na ini a wortoe ’sani tanapoe di ben skrifi leki wan leri foe wi’ èn ’warskow eksempre gi wi na tapoe soema den kaba foe den seti foe sani ben kon’ (Romeinisma 15:4; 1 Korintesma 10:11). Fa son sma na ini a bijbeltori ben si na grontapoe foe dat’ede?
12. Soema Demas ben de èn fa wi kan njan boen te wi loekoe en libifasi?
12 Srefi wan eksempre di no de so boen kan abi winimarki, foe di a e sori wi fa wi moe komoto na a pasi foe en. Leki wan eksempre a sani disi: Demas ben gwe libi Paulus di a ben de wan kompe wrokoman foe en foe di Demas „ben lobi na disiten seti foe sani”. A tori no e tjari kon na krin o fara èn nanga sortoe marki a ben libi Paulus, ma a kan de taki a lobi foe Demas gi grontapoe prisiri nanga goedoe ben kon moro tranga leki a lobi gi jeje sani. Awansi fa a no fa Demas no ben meki gebroiki foe den toemsi moi okasi di a ben abi foe tranga en brada Paulus (2 Timóteus 4:10). Disi moe boewégi wi foe tan getrow na wi kompe bribiman èn no libi den foe di wi e gi pasi dati na lobi gi na disiten seti foe sani foeroe wi ati!
13. Sortoe bewijsi de taki Abraham nanga Sara „no ben teki krinkrin abra” nanga grontapoe afersi?
13 Now wi abi na heri bijbel leki wi tjariman. Ma sondro srefi foe abi wan heri bijbelboekoe — Genesis — den famiri-edeman Abraham nanga Jakob nanga den loyaal oema foe den di ben frede Gado, no ben meki gebroiki foe na grontapoe dorodoro. Abraham (Abram) foe eksempre ben doe san Jehovah ben komanderi en foe di a gwe libi Ur, wan Chaldew foto nanga moi oso èn foeroe makriki sani. Ija, sma di diki gron drape tjari kon na krin dati Abraham nanga en lobi oema Sara (Sarai) ben moesoe tjari toemsi bigi offer foe goedoe foe go na a presi pe Gado ben taigi den foe libi ini na kondre foe na pramisi na ini tenti leki vreemde sma. Izaäk nanga Jakob ben handri sosrefi toe na ini bribi leki sma di ben de makandra nanga Abraham ’erfgenaam foe a srefi pramisi’. Abraham no ben sori toemsi foeroe belangstelling gi grontapoe afersi „bika a ben froewakti na foto di abi troetroe fundamenti, a foto di Gado de na Mekiman èn basi foe en”. — Hebrewsma 11:8-10.
14. (a) Fa wi kan sori taki Mozes no ben meki gebroiki foe na grontapoe dorodoro? (b) Fa wi kan njan boen foe na eksempre foe Mozes na ini a tori foe a fasi fa wi e loekoe jeje afersi?
14 Na proféti Mozes na ete wan eksempre foe wan sma di ben poti fertrow a ini Jehovah èn di ben trowe grontapoe lostoe. Nanga jepi foe bribi Mozes ben teki a bosroiti foe den handri en takroe makandra nanga a pipel foe Gado èn „a ben loekoe a sjen foe na Kristus [dati wani taki na troe tori taki a ben de na salfoe dienstknegti foe Gado] wan moro bigi goedoe leki den goedoe foe Egypte.” Foe dat’ede a ben kisi boen bigi grani aladi a ben tan faste foe doe dienst „leki a Sma di no ben de foe si”, Jehovah (Hebrewsma 11:24-27). A de krin dati Mozes no ben kan teki wan moro boen bosroiti leki a bosroiti di a ben teki di a wans sortoe grontapoe kori ben de toe, a poti jeje afersi na a fosi presi na en libi. A srefi sani disi de ooktoe gi wi. — Mattéus 6:32.
15. Te wi loekoe sortoe ondrofeni foe den Israëlsma, wi sa kon so fara foe tegoe gi grontapoe kori foe hoeroedoe?
15 A mindri den sani foe na grontapoe di e pasa gowe nanga na grontapoe de ooktoe „na lostoe foe na skin”, di e sori ensrefi tapoe difrenti sontron pori fasi (1 Johannes 2:15-17). Den grontapoe kori foe go na ini hoeroedoe de boen foeroe èn sontron den abi srefi na tapoe den sma di ben gi densrefi abra na Jehovah wan pori krakti. Na so doesoendoesoen foe den Israëlsma bakaten ben feni dede, ala di den ben kon fri foe na katibo foe Egypte, foe di den ben bigin foe abi hoeroedoe demakandra nanga den oemapikin foe Moab (Numeri kapitel 25; 1 Korintesma 10:8). Fa disi de wan tranga gi wi foe tegoe gi grontapoe kori go na ini hoeroedoe.
16. (a) San Jozef ben doe di a kisi kori foe go doe hoeroedoe? (b) Fa wi ben sa kan kisi winimarki foe na eksempre foe Jozef?
16 Meki wi go loekoe na toemsi moi eksempre foe Jozef na manpikin foe Jakob. Ala tron agen na oema foe en meester foe Egypte ben taki nanga en foe kon didon èn abi seks nanga en. A ben wégri disi nanga faste bosroiti. A tori no e taki taki na oemafesi ben de so takroe dati a ben troesoe wan man gwe. Na presi foe dati Jozef lon komoto foe pe a ben de foe di a no ben wani sondoe tége en regtvaardiki Gado (Genesis 39:7-20). Wi moe tjari sontron kenki kon na ini san wi e lési, na ini wi ontspanning ofoe bepaalde omstandigheden moe komoto na a pasi foe sondoe tege Gado? Efoe a de so, dan meki wi neleki na Jozef di ben frede Gado handri sondro draidrai. — 1 Petrus 2:11, 12.
17. (a) Sortoe fasi e kon foeroetron leki wan bakapisi foe wan grontapoe denki? (b) Fa hémemre oema foe Juda ben weri densrefi moi, èn san ben psa nanga den èn den gowtoe sani foe den?
17 Wan grontapoe denki foeroetron e meki srefidensi èn hémemre kon. Na krakti di e poti na ini grontapoe na tapoe goedoe foe na libi, e panja go na ini na weri foe gowtoe sani, san de spesroetoe prenspari gi oema di wani loekoe moi sote. Na ini na owroe Juda na ini den dé foe Jesaja den hé-memre oema ben weri densrefi moi nanga foeroe gowtoe sani. Kande foe mode ede, den sortoe hémemre oema disi ben weri „foeroe keti”, di ben tai na den aifoetoe. Te wan oema e waka, dan den keti disi ben meki wan babari foe wan gengen èn den ben e tapoe en ini en normaal waka, sodati a ben e waka „nanga pikin pas” èn den ben e boewégi densrefi nanga san sma e si leki wan moi waka foe wan oema. Na wini di Babylon wini Juda na ini 607 bifo G.T. a no de foe taki ben tjari wan kaba kon na den gowtoe sani dati èn na a fri. — Jesaja 3:16-24.
18. San na a markitiki foe bijbel na ini a tori foe na weri krosi foe oema?
18 Fa wan difrenti ben de na ini a fasi foe weri krosi moi leki oema a mindri na asranti, grontapoe Izébel èn na safri-ati Esther di ben frede Gado èn tokoe ben weri moi! (2 Kownoe 9:30; Esther 2:7; 5:1). A de krin taki kristen oema wani de leki Esther. Foe dat’ede den e weri densrefi moi sodati „den krosi sori boen . . . , nanga safri fasi nanga gosontoe ferstan”. Den e sorgoe taki a moro prenspari weri moi foe sani de a ini „a kibri sma foe na ati ini a krosi foe a tiri èn safrifasi di no kan pori, èn di de foe bigi waarde na ini ai foe Gado”. — 1 Timotéus 2:9; 1 Petrus 3:3-5.
19. Fa Jezus Kristus ben gi wi na moro boen eksempre na ini a tori foe „kondre fasi”?
19 Jezus Kristus ben gi wi na moro boen eksempre na tapoe a kontren foe no de nanga na fasi foe na grontapoe. Ala di a ben de wan volmaakti libisma nanga moro foeroe mogelekheid foe sani waka boen gi en a grontapoe leki sortoe tra sma toe, tokoe a ben broko en ede moro foeroe nanga jeje sani — srefi na so wan fasi dati „a no ben abi wan presi srefi foe poti en ede” (Mattéus 8:20). Na presi dati Jezus na moreel fasi ben meki na grontapoe disi pori en, na bijbel e skrifi foe en leki „loyaal, sondro fowtoe, sondro flaka, aparti foe den sondari” (Hebrewsma 7:26). Leki onvolmaakti libisma wi no kan waka volmaakti na ini Jezus foetoe marki. Ma wi moe doe ala moeiti nanga na jepi foe Jehovah. — 1 Petrus 2:21, 22.
Go doro foe trowe grontapoe lostoe
20. Efoe joe de wan anbegiman foe Jehovah, fa joe kan tan fri foe na jeje foe na grontapoe?
20 Efoe joe de wan pisi foe na kolokoe pisi foe Jehovah anbegiman dan joe de wan biesi soema foe troe. Joe ben feni wan sani di de moro boen leki ala sani di na bidrigi grontapoe disi di de foe dede e pristeri. Tan hori foe dat’ede na a troe anbegi èn tan fri foe na jeje foe na grontapoe disi. Kari nanga dati na ini prakseri nofotron na „Jereman foe begi”, soekoe na jepi foe en santa jeje, doe alaten leki fa na rai foe na Wortoe foe Gado e taki èn no gwe libi noiti na groepoe foe na langa — now someni jarhondro owroe — lin foe getrow kotoigi foe Jehovah. — Teki gersi Hebrewsma 12:1-3.
21. San moe de na bosroiti foe wi na ini a tori foe na grontapoe disi?
21 Meki a de joe bosroiti foe no meki gebroiki foe na grontapoe dorodoro. Moro foeroe meki joe ferstan nanga ati tan teki na faste bosroiti foe doe na wani foe Gado. Efoe joe e doe disi, dan joe sa kisi na jepi foe Jehovah „tégo anoe” di noiti sa fadon (Deuteronomium 33:27, Njoen Vertaling foe na Nederlands Bijbelgenootchap). Meki joe nanga ala fertrow na ini na jepi foe Gado go doro foe libi nanga gesontoe ferstan, regtvaardiki fasi èn a dini foe Gado nanga fred èn foe trowe grontapoe ogridoe nanga grontapoe-lostoe.
San joe ben sa piki?
◻ Fa begi kan de boen te joe ati e angri pikinso foe grontapoe sani?
◻ Fa na santa jeje kan jepi wi foe kakafoetoe gi na grontapoe nanga en kori?
◻ Sortoe bijbel eksenpre kan jepi wi foe trowe grontapoe pasi nanga lostoe?
◻ Fa wi kan tan fri foe na jeje foe na grontapoe disi?
[Prenki na tapoe bladzijde 13]
No meki bemoei hari joe go na ini a pori fasi foe grontapoe
[Prenki na tapoe bladzijde 14]
Jozef lon gwe foe no fadon go na ini sondoe. Sosrefi wi toe moesoe handri gawgaw foe komoto a pasi gi pori fasi