’No meki gebroiki dorodoro foe na grontapoe’
„Den sma di abi foe doe nanga na grontapoe, no moe meki a teki den abra krinkrin. Mi e taki disi foe di na grontapoe soleki wi sabi dati, e pasa gowe.” — 1 KORINTESMA 7:31, The Jeruzalem Bible.
1, 2. (a) Fa foeroe sma e denki foe a ten di e kon gi na grontapoe? (b) San Paulus e taki foe na grontapoe èn na fasi fa wi e meki gebroiki foe en?
„WAN sma no kan taki a fesi sortoe onfroewakti prisiri ofoe froewakti di no e kon troe a ten di e kon sa tjari kon . . . Tokoe na grontapoe e gersi taki a e go na fesi na wan loboso fasi ofoe na tapoe wan grati fasi èn a sa go na fesi.” Na disi na historiaskrifiman H.G. Wells di foeroe sma sabi ben ferklari wantoe tintin jari psa kaba. Ala di foeroe moeilekheid nanga rampoe de tokoe foeroe sma e prakseri taki na libismafamiri sa loesoe en problema tapoe wan ofoe tra fasi èn dati na grontapoe soleki fa wi sabi disi na bigi, sa tan.
2 Na kristen apostel Paulus, di ben skrifi na ondro krakti foe santa jeje, ben gi wan heri tra loekoe di a ben gi tranga na kompe bribiman: „Meki . . . den di e meki gebroiki foe grontapoe, [de] leki den no e meki gebroiki dorodoro foe en; bikasi na toneel foe na grontapoe disi de bezig e kenki.” Wan tra fasi fa den wortoe disi vertaal de: „Den sma di abi foe doe nanga na grontapoe disi, no moe meki a teki den krinkrin abra. Mi e taki disi foe di na grontapoe soleki wi sabi dati e pasa gowe” (1 Korintesma 7:29-31, Njoen Grontapoe vertaling; JB). San na rai disi wani taki gi dienstknegti foe Jehovah Gado na ini a ten disi?
’Na grontapoe e pasa gowe’
3. Foe san Paulus ben taki foe en na ini 1 Korintesma 7, èn sortoe punt a meki kon na fesi na ini na kapitel dati?
3 Na ini 1 Korintesma kapitel 7, na apostel Paulus ben go taki foe na trowlibi na mindri kristen. Ala di a ben rikomanderi na fasi pe wan sma de na ini sondro foe trow leki na moro boen libifasi, a ben erken tokoe dati den sma di de ini wan trowlibi „no e doe sondoe”. Tokoe, a taki moro fara, dati den ben sa abi benawtoe na ini den skin foe di na trowlibi e go makandra nanga bepaalde broko-ede. Na siki foe wan lobi patna foe eksempre kan meki wan bepaalde druk doe kon. Ala di Paulus no ben ferteri dja foe ferfolgoe, tokoe trow man nanga oema kan kisi ekstra benawtoe foe pasa na ini ten pe den patna prati foe makandra ofoe te papa nanga mama prati foe den pikin. — 1 Korintesma 7:25-28.
4. San 1 Korintesma 7:29 wani taki?
4 Paulus taki moro fara: „Boiti foe dati mi e taki disi, mi brada: na ten di tan abra kon sjatoe. Bigin foe now, meki den sam di abi wak wefi de leki den no ben abi no wan” (1 Korintesma 7:29). Foe di ’na ten di tan abra kon sjatoe’, meki trow kristensma no moe gi densrefi so foeroe abra na ini na njan boen foe den grani foe a trow èn na doe foe trow ferplekti sodati disi de a heri libi foe den. Moro foeroe den moe poti den kownoekondre afersi na ini na fosi presi na ini den libi ala di den no sa misi foe doe den trowfrantwortoe foe den (1 Korintesma 7:3-5, 29-40). Foe di wi e libi na ini den „laatste dé” meki wi abi moro foeroe réde foe waka na baka na rai disi. — 2 Timotéus 3:1-5.
5. San na a grontapoe di wi no moe meki gebroiki foe en dorodoro?
5 Foe di ’na ten di tan abra kon de sjatoe’, meki Paulus ben taki dati ’den di e meki gebroiki foe na grontapoe, moe de leki den di no e meki gebroiki foe en dorodoro’ (1 Korintesma 7:29-31). Na ini na pisi disi na Griki wortoe di vertaal nanga „grontapoe” (kosmos), no de abi foe doe langalanga na na libismafamiri na ini Johannes 3:16, ma na tapoe na libismasfeer foe libi nanga ala sani san anga na dati. Na libismafamiri abi en groepoe foe tongo, naatsi, lo, famiri, goedoeman nanga pótiwan, èn na algemene raamwerk di e lontoe libisma èn di abi krakti na tapoe en (1 Korintesma 14:10; Jakobus 2:5, 6; Openbaring 7:9; 14:6). Ija, Paulus ben sori na a libismasfeer foe libi èn san disi abi foe gi di a ben taki: „Awasi joe e meki gebroiki foe a grontapoe, no proberi foe poeroe dorodoro ala sani san joe kan poeroe foe en.” — 1 Korintesma 7:31, The New Testament in the Language of Today, William F. Beck.
6, 7. (a) Fa na ’toneel foe na grontapoe disi de bezig foe kenki’? (b) San na apostel Johannes ben taki foe na ten di e kon gi na grontapoe?
6 Paulus ben sori ooktoe a tapoe taki kristensma no moe meki gebroiki dorodoro foe na grontapoe ’foe di na toneel foe na grontapoe disi de bezig foe kenki’. A grontapoe disi de leki tafereel di e kenki na tapoe wan toneel. Ala di wan tafereel kan de kefarlek moi, tokoe den préman nanga den skotoe e kenki. Sma e kon na „tapoe na toneel”, èn foeroe foe den e tjari densrefi na wan hémemre fasi. Ma heri esi den no de foe si moro nanga ageslagti foe den èn sma e frigiti den (Prékiman 1:4). Foe na owroe grontapoe disi pe wi e libi na ini, wi kan taki taki ibri momenti na ’garden kan fadon tapoe’! Ija, „na grontapoe soleki wi sabi dati, e pasa gowe”. — 1 Korintesma 7:31, JB.
7 Na apostel Johannes e tjari wan srefi prakseri kon na fesi di a ben taki: „Na grontapoe e pasa gowe èn sosrefi toe en lostoe, ma na sma di e doe a wani foe Gado e tan foe tégo” (1 Johannes 2:15-17). Sondro degedege Johannes ben wani taki taki na onregtvaardiki libisma maatschappij ben sa pasa gowe. Foe di Gado ben sa pori den neleki disi ben pasa nanga na ogri grontapoe bifo na Froedoe (Hebrewsma 11:7; 2 Petrus 2:5; 3:6). A no de foe taki den onregtvaardiki sma no sa de foe si moro makandra nanga na disiten libisma raamwerk foe sani nanga ala sani di a abi foe gi.
8. Sortoe howpoe kristensma abi ala di a de troe taki a grontapoe e pasa gowe, èn sortoe krakti disi moe abi tapoe a fasi fa wi moesoe meki gebroiki foe a grontapoe?
8 Ma neleki fa regtvaardiki ati sma ben pasa libilibi na Froedoe, na so, soleki ben sori, boen foeroe sma sa de ooktoe di sa pasa libilibl na „bigi benawtoe” di de so krosbé (Mattéus 24:21, 22, 36-39; teki gersi Openbaring 7:9-17). Now kaba „wan njoen grontapoe”, wan maatschappij foe libisma di sa libi na ondro na kownoekondre tirimakti na tapoe disi grontapoe e seti ensrefi (2 Petrus 3:13; Openbaring 21:1; teki gersi Psalm 96:1). Efoe wi persoonlek abi na howpoe dati wi sa tan na libi èn sa kisi tégo libi na ini na njoen seti, foe san-ede wi ben sa teki na moro bigi pisi foe wi ten nanga krakti foe gi na owroe grontapoe di sa pasa gwe.
„So frafra leki a kan”
9. Na sortoe balans fasi kotoigi foe Jehovah kan meki gebroiki foe a grontapoe?
9 Leki kotoigi foe Jehovah wi e libi na ini na seti foe sani disi, wi no kan ’komoto troetroe foe na grontapoe disi’ (1 Korintesma 5:9, 10). Foe dat’ede wi kan meki gebroiki foe na grontapoe na wan balans, joisti èn skotoe fasi. Foe di wi e pai wi edemoni, meki foe eksempre wi abi reti na tapoe bepaalde dienst di den ’hé tirimakti’ e gi (Romeinisma 13:1-7). Nanga reti wi e meki gebroiki foe post nanga skowtoe nanga tra dienst foe lanti soleki a waka nanga bus. Nanga sortoe prakseri? Foe kan libi tapoe wan boen fasi èn foe doe na kownoekondre wroko di Gado ben gi oenoe. Ma foe di a no de na prakseri dati wi moe „meki gebroiki foe na grontapoe dorodoro” meki wi e gebroiki den sani disi toe so fara leki oenoe kan dini den kristen belang.
10. (a) San moe de na ini wi libi na a fosi presi? (b) Fa Jezus ben agersi na bigi waarde foe a kownoekondre? (c) Efoe den kownoekondre-afersi nanga na fertrow demakandra nanga Jehovah wani taki foeroe gi wi, dan sortoe krakti disi sa abi dan na tapoe na fasi fa wi e meki gebroiki foe na grontapoe?
10 Wi no kan gi wisrefi pasi taki wi belang na grontapoe teki wi abra. Moro foeroe wi moe sorgoe taki na matifasi foe wi nanga Jehovah, wi anbegi foe en èn wi dienst gi en, de na a fosi presi. Den doe foe wi e tjari kon na krin taki „a fertrow demakandta nanga Gado” de troetroe prenspari gi wi? (Job 29:4) Èn wi e erken na waarde foe jeje sani di e psa ala sani? Jezus ben meki wi si nanga jepi foe wan agersitori o diri na kownoekondre de. Wan koopman ben feni „wan peri” di ben abi someni waarde dati „a ben seri wantewante ala san a ben abi èn bai na peri disi” (Mattéus 13:45, 46). Na so fasi Jezus ben sori taki wan sma di e ferstan na troetroe waarde foe na kownoekondre de klarklari foe gi ala grontapoe goedoe foe disi ede. Efoe na kownoekondre nanga den afersi foe en, èn spesroetoe na fertrow demakandra nanga Jehovah, wani taki someni gi wi, dan ibri „kontakti nanga na grontapoe wi sa hori so frafra leki a kan.” — 1 Korintesma 7:31, Philips.
’Wi no kisi na jeje foe na grontapoe’
11, 12. (a) San na „a jeje foe na grontapoe”? (b) Kristensma ben kisi sortoe jeje, èn fa dati e kenki nanga na jeje foe na grontapoe disi?
11 Ete wan réde foe no meki gebroiki foe a grontapoe dorodoro, de taki a de wan sani di no kan foe de na ini wan prisiri fertrow demakandra nanga Jehovah te wan sma abi „na jeje foe na grontapoe” (1 Korintesma 2:12). A jeje ofoe na krakti di e poesoe joe di hori na grontapoe — na onregtvaardiki libisma maatschappij — ini en makti, de foe den ogrijeje èn de vreemd na Gado. Foe di na grontapoe de na ini na makti foe Didibri a e gi ensrefi abra na gridifasi èn den lostoe foe na fadon skin, san abi leki bakapisi féjantifasi nanga Gado. — Johannes 14:30; Efesesma 2:1-3; 1 Johannes 5:19.
12 Na apostel Paulus ben poti na jeje foe na grontapoe abrasé foe na jeje foe Gado, èn a ben taki foe kristensma: „Now wi no e kisi na jeje foe na grontapoe, ma na jeje di e komoto foe Gado” (1 Korintesma 2:12). Foe di na denki patron nanga libifasi foe na grontapoe de tra fasi leki na krakti foe Gado santa jeje nanga na jeje di wi e feni na ini en Wortoe, meki taki sma di e frede Gado moe lon komoto gi na jeje foe na grontapoe. Ma presi foe dati meki den sma di lobi Jehovah e hori densrefi nanga reti bezig nanga na kweki èn na sori foe den froktoe foe na santa jeje, namkoe lobi, prisiri, vréde, langa pasensi, switifasi, boenfasi, bribi, safriati-fasi nanga dwengi joesrefi. — Galaciasma 5:22, 23.
13. San Johannes ben skrifi na ini 1 Johannes 4:1-6, èn disi abi foe doe nanga iniwan fasi tapoe fa wi e meki gebroiki foe a grontapoe?
13 Na wan moi sani foe si dati na owroe apostel Johannes ben sori dati Gado troetroe „wortoe di komoto foe santa jeje” di waka psa na djoe kristen gemeente kon na wi no foe presi foe na grontapoe di no de kristen. Moro fara a ben taki: „A sma di kisi na, sabi foe Gado, e arki na wi.” A de troe taki Johannes e skrifi foe na tori: „Den wortoe di komoto foe santa jeje”. A ben sori taki kristensma no e „taki san komoto foe na grontapoe” (1 Johannes 4:1-6). Foe san-ede foe dat’ede wi ben sa meki gebroiki foe na grontapoe dorodoro?
Kibri joesrefi „sondro flaka foe na grontapoe”
14. Fa den salfoe kristen nanga den kompe foe den leki sma di „no de wan pisi foe na grontapoe” de aparti?
14 Nanga a wrokokring foe den nanga tra activiteit meki kotoigi foe Jehovah na ini bepaalde fasi abi foe doe „nanga na grontapoe”. Ma ete wan réde foe san-ede wi „no moe meki a teki wi krinkrin abra” (JB). Jezus ben taki taki en bakaman „no de wan pisi foe na grontapoe” (Johannes 17:14). Jehovah Gado nanga jepi foe Kristus ben meki ferloesoe kon foe na grontapoe disi di de ondro na loekoe foe Satan (Kolossesma 1:13, 14). Den salfoe kristen kon de santa efoe meki kon santa èn poti aparti foe Gado gebroiki den na ini en dienst foe gi den na leti foe na waarheid foe Jehovan Wortoe di tjari kon na fesi. Na so fasi den nanga den kompe foe den foe na „bigi ipi” di gi densrefi abra ben poti densrefi aparti leki sma di „no de wan pisi foe na grontapoe” di no e hori na a waarheid foe Jehovah (Openbaring 7:9; Johannes 17:16, 17; Jakobus 1:18; 1 Petrus 1:22). Fa a ben sa de wan sani di no fiti te den sortoe sma dati ben sa meki gebroiki foe na grontapoe dorodoro!
15. Leki fa Jakobus 1:27 e taki foe wi, sa a e aksi foe wi efoe wi wani anbegi na wan fasi di de sondro flaka?
15 Efoe wi no wani „de wan pisi foe na grontapoe”, dan wi moesoe de neutraal na fesi foe den kesekese èn politiek foe na grontapoe (Mattéus 22:21; Johannes 18:36, 37). Den salfoe bakaman foe Kristus nanga den kompe foe den di gi densrefi abra ooktoe moe lon komoto foe jeje hoeroedoe di de leki wan bakapisi foe matifasi nanga na grontapoe. Den e aksi foe den dati den de krin na moreel èn na jeje fasi (Efesesma 4:25-32; Jakobus 4:4). Foe anbegi Jehovah na tapoe wan krinfasi sondro flaka, „wi moe kibri wisrefi foe dat’ede sondro flaka” foe di wi no e teki na fasi, den wortoe èn den libifasi abra di de gewoon gi na sondoe libisma famiri di de vreemd gi Gado (Jakobus 1:27). Wi moe hori wisrefi aparti foe na bedrigifasi, na tranga, na onregtvaardiki plan, nanga so moro fara, foe na gronatpoe, ja, na fanowdoe ’foe kibri wisrefi sondro flaka foe na grontapoe’ de ete wan toemsi prenspari réde foe no ’meki gebroiki foe na grontapoe foe kan kisi ala san wi kan kisi foe en’. — Beck.
Tan ’santa gi wi Gado’
16. Foe san-ede den Israëlsma ben moe meki na den krosi foe den „lanki di abi franja”?
16 Den dienstknegti foe Jehovah kenki foe na grontapoe te joe loekoe a howpoe, den sani di den e feti a baka èn a gi di den e gi jesi na a wani foe a santa Gado foe den (Exodus 39:30). Den sori taki den de santa a fesi foe Gado. Na ini akroederi nanga dati meki den Israëlsma foe owroeten „ben moe meki krosi di ben abi franja na den lanki foe den son”, nanga wan blaw tité na tapoe sé foe na franja. Den ben moe doe disi foe no waka na baka na fasi foe weri krosi foe den Moabietsma, Egyptesma ofoe trawan èn foe ben kisi a memre taki den ben moe de leki Jehovah pipel trafasi, dati den ben moe gi jesi na Jehovah èn ’ben moe sori taki den de santa gi a Gado foe den’ (Numeri 15:37-41). Na lostoe foe ’de santa gi wi Gado’ moesoe gi wi tranga foe meki gebroiki foe wi grontapoe na wan fasi pe wi de na ai.
17. Fa na grontapoe marki foe kisi goedoe, kan tjari wi matifasi nanga Jehovah kon na ini gevaar?
17 Marki foe na grontapoe abi na ini goedoe, barinen nanga jeje activiteit di no de gesontoe èn di kan njan na kristen bribi na ondro. Te foe eksempre wi gi pasi taki na feti baka goedoe na skinfasi nanga meki goedoe teki na moro prenspari presi na ini wi libi, dan disi kan kori wi srefi foe handri fowtoe foe gridi winimarki ede, sodati wi kan tjari wi matifasi nanga Jehovah kon na ini gevaar (Odo 28:20; teki gersi Jeremia 5:26-28; 17:9-11). Den sma di e meki gebroiki foe na grontapoe na sowan fasi dati den ben meki na feti baka goedoe leki a moro prenspari sani foe den libi, de troetroe na ini gevaar foe go ini praktijk di no de eerlek èn foe lasi den bribi foe di den e poti jeje afersi na wan sé. Wan sma di sani e waka boen gi en na ini na bisnis libi ofoe di e kon goedoe, kan kisi „bigimemre” èn abi bigimemre prakseri taki en égi fasi foe si sani moe de moro hé leki na rai foe a gemeente foe Gado (1 Timoteus 6:9, 10, 17). Disi seker no de a fasi foe tan ’santa gi wi Gado’.
18. Foe san-ede wi no moe feti foe abi neleki na grontapoe goedoe pasa marki?
18 Nanga reti Jezus ben taki: „Meki mati nanga na onregtvaardiki goedoe, so dati te den disi libi joe a pasi, den [joe hemel Mati, Jehovah Gado nanga Jezus Kristus], kan teki joe na ini de tégo libipresi” (Lukas 16:9). Soboen ala di wi abi wantoe goedoe fanowdoe èn wi kan gebroiki den sani disi foe meki den kownoekondre afersi go na fesi èn kisi wi hemel Mati, tokoe wi no moe gi pasi dati wi ati kon pori foe di wi e feti na baka grontapoe marki foe soekoe den sani dati pasa marki. — Lukas 12:34.
19. Fa wi moe prakseri foe na grontapoe marki foe kisi grani?
19 Ete wan grontapoe marki de, a kisi foe wan boen positsi, barinen nanga grani. Nofotron disi e aksi jari langa foe hé leri, a kren go na tapoe na sociale trapoe èn den sortoe sani dati. Ma den sma di e soekoe den sortoe sani dati, a bijbel e teki den gersi nanga den sma di e njan toemsi foeroe oni, san sa abi leki bakapisi dati wan sma e kisi na firi foe braak. Wi e lési: „Foeroe oni no boen, a so toe a soekoe foe foeroe grani” (Odo 25:16, 27, Bigi Njoensoe Bijbel; NW). Na sotoe a no de tapoe na gron foe na bijbel foe gi grani na grontapoe barinen man nanga ster, wan sani di kristen papa nanga mama moe ferstan teki den moe meki disi kon krin gi den pikin na tapoe wan switi fasi. (Teki gersi Tori foe den Apostel 12:21-23.) Wan joisti loekoe na tapoe den sortoe afersi disi de séker ooktoe prenspari efoe wi wani tan ’santa gi wi Gado’ èn foe komoto na a pasi foe meki gebroiki foe na grontapoe dorodoro.
No meki ’gebroiki foe na grontapoe dorodoro’
20, 21. Foe san-ede wi no moe meki gebroiki dorodoro foe na grontapoe?
20 Leki getrow kotoigi foe Jehovah foe dat’ede, wi no moe meki gebroiki foe na grontapoe dorodoro. Wi „no moe meki a teki wi krinkrin abra” foe di (1) ’na ten di libi abra kon de sjatoe’, (2) „na grontapoe soleki wi sabi dati, e pasa gowe”, (3) na diri matifasi foe wi nanga Jehovah moe de a prenspari sani na ini wi libi, (4) wi moe sori na jeje foe Gado èn no di foe na grontapoe, (5) wi moe ’kibri wisrefi sondro flaka foe na grontapoe’ (6) wi moe tan santa gi wi Gado.
21 Wi kan doe ala den sani disi wawan nanga na jepi foe Jehovah. (Teki gersi Zacharia 4:6.) Foe di wi abi a toemsi moi kownoekondrehowpoe, meki wi no moe meki gebroiki foe na grontapoe dorodoro, neleki den sani di na grontapoe e pristeri, de ala sani san wi abi. Ma san sa jepi wi troetroe foe trowe den pasi nanga lostoe foe na grontapoe?
Joe kan memre disi ete?
◻ Sortoe „grontapoe” e bedoel na ini 1 Korintesma 7:31?
◻ Fa kristensma moe si a fasi fa den e meki gebroiki foe na grontapoe foe di ’na toneel foe na grontapoe disi de bezig foe kenki’?
◻ Te o fara kristensma sa meki gebroiki foe na grontapoe na wan fasi di fiti?
◻ San na a jeje foe na grontapoe, ma sortoe jeje den sma e sori di lobi Jehovah?
◻ Fa Jehovah pipel de tra fasi leki a grontapoe te joe sa loekoe den marki di den abi na den fesi?
[Prenki na tapoe bladzijde 8]
Na seriman seri ala sani san a ben abi foe „bai van peri foe hé warti”
[Prenki na tapoe bladzijde 11]
Den lanki nanga franja na den krosi ben memre den djoe taki den ben moesoe bewijsi taki den de santa gi Jehovah. Na lostoe, foe ’de santa gi wi Gado’ moesoe meki wi loekoe boen na ini a meki gebroiki foe na grontapoe disi