Foe san-ede wi no moe de wan pisi foe a grontapoe disi?
„Den no de wan pisi foe a grontapoe, net soleki mi no de wan pisi foe a grontapoe.” — JOHANNES 17:16.
1. Leki fa Jezus taki den sortoe behandeling den bakaman foe en kan ferwakti?
NA GRONTAPOE disi ben trowe Jezus Kristus, den no wan si en na ai èn srefi ben ferfolgoe en. Soboen san den bakaman foe an kan ferwakti? We, a ben taigi den: „Efoe na grontapoe no wani si oen na ai, sabi dati a ben no wani si mi na ai fosi leki joe. Efoe joe ben sa de wan pisi foe na grontapoe, dan na grontapoe ben sa lobi srefsrefi san ben de foe en. Ma foe di oenoe no de wan pisi foe na grontapoe, ma mi ben teki oen poeroe foe na grontapoe, na foe dat’ede na grontapoe no wani si oenoe na ai. Prakseri na wortoe di mi ben taigi oenoe: Wan srafoe no de moro bigi leki en méstri. Efoe den ben ferfolgoe mi, den sa ferfolgoe oenoe toe; efoe den ben ori mi wortoe, den sa ori oenoe wortoe toe.” — Joh. 15:18-20.
2. (a) San na a „grontapoe” foe san Jezus bakaman e kenki so bigi foe en? (b) San Jehovah e doe foe a boen foe Kristus discipel prefoe foe teki den poeroe foe na grontapoe?
2 Ija, den troe bakaman foe Jezus ben de heri trafasi. leki na grontapoe disi — na sondoe libismamaatschappij di kon de vreemd na Gado. Disi de so kefarlek bigi dati na grontapoe disi no wani si den discipel foe Kristus na ai èn e ferfolgoe den. Ma den bakaman foe Jezus e ori densrefi na en toemsi moi eksempre foe di den no e go gersi a grontapoe, èn Jehovah e ori wakti tapoe den. Disi de ini akroederi nanga na begi foe Kristus: „Mi no e begi joe, foe teki den poeroe na grontapoe, ma foe ori wakti tapoe den foe na godlowsoewan ede. Den no de wan pisi foe na grontapoe, soleki mi no de wan pisi foe na grontapoe. Santa den nanga jepi foe na waarheid; joe wortoe de waarheid.” — Joh. 17:15-17.
3. Sortoe aksi di abi foe doe nanga a grontapoe disi e aksi wan piki?
3 San a wani taki „foe no de wan pisi foe na grontapoe”? Disi e sori a tapoe dati Jezus bakaman moe tan farewe foe ibri kontakti nanga sma di no de kristen?
Kristensma no kan poti densrefi aparti foe tra sma
4. Sortoe wroko Jezus ben gi en bakaman komando foe doe, so dati a ben sa de wan sani di no kan foe den poti densrefi aparti?
4 Jezus séker no ben ferwakti foe en bakaman dati den ben sa poti densrefi aparti na ini kerki gemeenschap di de foe densrefi. Na presi foe dati a ben gi den wan wroko di ben moe doe na heri grontapoe nanga wortoe di e kon now: „Oenoe sa kisi krakti te santa jeje kon na oen tapoe, èn oenoe sa de kotoigi foe mi na ini Jeruzalem èn na ini heri Judéa èn Samaria èn te na den moro farawe kontren foe na grontapoe” (Tori 1:8). A ben gi den ooktoe „na gebod: „Go foe dat’ede èn meki discipel foe sma foe ala naatsi, dopoe den na ini na nen foe a Tata èn foe na Manpikin èn foe na santa jeje, èn leri den foe ori ala san mi ben komanderi. Èn loekoe! mi de nanga oenoe ala den dé te na a bosroiti foe a seti foe sani” (Matt. 28:19, 20). Aladi „sma foe ala naatsi” ben sa tron discipel na a fasi disi, dan natuurlek a no de foe ferwakti dati naatsi na ini bosoe ben sa teki den leri foe Jezus Kristus.
5. Tapoe sortoe fasi foe a bijbel sma e bekeer kon teki na kristendom?
5 Ma kande son sma e taki: „Heri naatsi no ben bekeer kon teki na kristendom? Èn den dati no ben tron san den e kari now na kristenheid?” We, tiriman ben de di ben bepaal sortoe fasi den sma di ben saka a den ondro ben moe bribi èn den no ben draidrai foe teki a bosroiti dati nanga ogri-ati, takroe methode. Boiti foe dati, na frede foe skinati na ini wan mythisch helfaja ben de wan krakti sani na den sokari bekering kon teki na ini nen kristendom. (Teki gersi nanga Prékiman 9:5, 10.) Ma fa ala disi e kenki srefsrefi foe na wan enkri fasi tapoe san na troe kristen bribi moe panja akroederi den Boekoe! Na boen wroko dati moe doe nanga a faja foe gi kotoigi, foe leri na sma èn foe meki discipel. Kluizenaar ofoe monnik nanga non di noiti e komoto ini den klooster foe den, noiti „ben sa kan doe a wroko dati èn waka na baka a gebod foe Kristus foe ’meki a leti foe den skijn gi den sma’ (Matt. 5:14-16). Èn foe dwengi wan sma foe teki bribi” no abi noti foe doe nanga na gi foe kotoigi èn a préki èn leri foe sma, sodati opregti sma foe ala naatsi e kisi jepi foe wegi go wegi kon èn nanga den heri ati gi densrefi abra na Jehovah Gado.
Foe san-ede „no wan pisi foe a grontapoe”
6. Foe san-ede wi kan taki dati Jehovah Kotoigi e doro na marki di Jezus gi en bakaman na ini Johannes 13:35?
6 A nen „kristen” de nofotron wan falsi etiket. Fa sani leki wan gridifasi, na lostoe foe wini kondre, srakti sma na ini feti èn a kwinsi foe ipipi sma wi kan poti na tapoe nen foe sokari kristen folkoe nanga naatsi! Ma fa a de trafasi nanga den troe bakaman foe Kristus! „Nanga disi alasma sa sabi dati oenoe de mi discipel”, Jezus ben taki, „efoe oen abi lobi gi makandra” (Joh. 13:35). Na ini a ten disi sma de troetroe di e doro san skrifi dja — Jehovah Kotoigi. Lobi gi makandra wani taki dati, stré sondro foe abi sari-ati nanga a kari foe trawan foe kon feti no de a den mindri èn dati den no e pers makandra a tapoe wan gridifasi. A presi foe dati, lobi wani taki dati den e taki ini akroederi nanga makandra èn dati pratifasi no de a mindri den, dati den ’de ini wanfasi krosbé nanga makandra ini a wan jeje èn prakseri’ (1 Kon 1:10; 1 Kor. 13:4-8). Jehovah Kotoigi ben leri sabi na fasi foe denki foe Gado nanga Kristusèn e meki dati tjari den (Rom. 12:1; 1 Kor. 2:16). Wan toemsi prenspari pisi foe na denki dati de, dati kristensma no moe de „wan pisi foe na grontapoe”. — Teki gersi nanga Jakobus 1:27.
7. Fa den wortoe foe Paulus e sori na ini Tori foe den Apostel 17:30, 31, dati a no fiti gi kristensma foe de wan pisi foe a grontapoe disi?
7 Den bakaman foe Jezus abi boen rede ’foe no de wan pisi foe na grontapoe disi’. Sowan fo doesoen jari pasa kaba na moro bigi pisi foe na libisma-famiri ’no ben abi howpoe èn ben de sondro Gado ini grontapoe’ (Ef. 2:12). Ma na langa pisi ten foe de vreemd foe Gado foe na sondoe fasi foe den libisma no sa tan go doro foe alaten. Tin-na-négi hondro jari pasa kaba di apostel Paulus ben ferteri dati Gado ben taigi den sma dati ’den alamala èn no alepe ben moe abi berow’, foe di ’a ben poti wan dé di a ben abi na prakseri foe kroetoe na grontapoe pe libisma e libi na ini regtvaardikifasi nanga jepi foe wan man di a ben poti’, Jezus Kristus. Paulus ben taki moro fara taki Gado „ben gi ala sma wan djaranti, foe di a ben wiki [Jezus] foe dede” (Tori. 17:30, 31). Na „dé” disi, en Doesoen jari Tiri de boen krosbé. Na ogri foe grontapoe moesoe komoto na pasi. A sa kisi kroetoe, strafoe sa lési gi en èn sa figipoeroe foe tégo. A de wan sani di séker no fiti gi sma di e taki dati den de kristen foe dat’ede foe de wan pisi foe a grontapoe disi!
8. Sortoe wroko de wan marki foe en dati „a kaba” de krosbé, san e gi Jehovah pipel wan réde moro foe „no de wan pisi foe a grontapoe”?
8 Foe sensi na opobaka foe Jezus moro leki 1900 jari pasa kaba èn sondro degedege na tjari kon foe na kroetoe foe Gado tapoe na kristenheid di fadon komoto no bribi èn no tra pisi foe Satan grontapoe de na mofo doro (2 Petr. 3:10; 1 Joh. 5:19). Ma na ini na heri pisten disi Jehovah Kotoigi na alape na grontapoe e meki na boskopoe foe Gado bekenti èn sma di abi berow èn di de tangi e prisiri densrefi ini „ten foe kowroe ati” (Tori. 3:19-21). Ini akroederi nanga Jezus proféti wortoe foe wi ten meki now moro leki 2.842.000 kotoigi foe Jehovah e préki „a boen njoensoe disi foe na kownoekondre” ini 203 kondre. Te nanga jepi foe no wroko dati „wan kotoigi gi na ala naatsi” na ini na marki di Gado wani dati, „dan na kaba sa kon” (Matt. 24:14). Now di na kaba foe na ogri seti disi de so krobé, dan Jehovah pipel séker abi ala réde foe „no de wan pisi foe a grontapoe”.
9. (a) Fa wi moe si, now di Satan grontapoe de so fara foe kon na wan kaba, den kownoekondre-afersi nanga marki? (b) Sortoe aksi nanga reti wi ben sa kan go loekoe now?
9 Now di a grontapoe foe Satan de so fara foe kon na wan kaba, a de toemsi prenspari dati wi go ondrosoekoe foe si dati wi e soekoe troetroe a kownoekondre foe Gado! (Matt. 6:33) San ooktoe de a libimarki foe wi, a leri di wi kisi ofoe a positsi foe wi na ini a libi, „wi alamala sa tanapoe na fesi na kroetoestoeroe foe Gado” (Rom. 14:10). Soboen na aksi de: Wi ben seti wi libi akroederi den marki gi na Kownoekondre? Ofoe wi e feti troetroe ete foe gersi a grontapoe disi, di no wani si troe kristen na ai? Wi abi grontapoe ambisi nanga froewakti? Wi e waka na baka den njoen modomodo foe na grontapoe di no de akroederi na bijbel? Èn wi e bewondroe den kroektoe gado foe en? Hori na ini prakseri dati „matifasi nanga grontapoe de féantifasi nanga Gado (Jak 4:4). Foe kan komoto na a pasi foe de wan féanti foe Gado, fa wi kan doe foe dat’ede dati a no flaka wi? San na wan toe foe den sani ini a grontapoe di wi moe tan farawe foe den?
Tan farawe foe a lobi foe grontapoe
10. Foe sortoe dri sani na ini a grontapoe disi di Jehovah pipel no mag lobi, 1 Joh. 2:15, 16 e taki foe den?
10 Na apostel Johannes ben skrifi: „No lobi na grontapoe èn den sani na ini na grontapoe. Efoe wan sma lobi na grontapoe, na lobi foe na Tata no de na ini en; bika ala sani san de na ini na grontapoe — na lostoe foe na skin èn na lostoe foe den ai èn na meki bigi nanga den sani di wan sma abi foe tan na libi — no e kon foe na Tata, ma foe na grontapoe” (1 Joh. 2:15, 16). Djaso Johannes e kari dri fundamenti sani ini na grontapoe disi di Jehovah pipel no mag lobi.
11. Foe san-ede wan kristensma no mag broko kindi „gi na lostoe foe na skin”?
11 „Na lostoe foe na skin” ben sa kan tjari oenoe go na foeroe takroe èn dede wroko di de so gewoon na ini na ogri grontapoe disi di Satan e basi. Den „wroko” foe na sondoe skin de a mindri den sani dati — ”hoeroedoe, dotilibi, na loesoefasi foe libi, afkodré, a doe foe spiritisme, féantifasi, trobi, djaroesoe, kisi foe atibron, kesekese, pratifasi, sekte, a sori foe djaroesoe, dringi psa marki èn den sortoe sani dati”. Wi no kan loekoe psa na warskow di na apostel Paulus ben gi sondro foe kisi strafoe „dati soema doe den sani disi, no sa kisi Gado kownoekondre” (Gal. 5:19-21). Den sma, di sondro wan enkri berow e doe „den wroko foe na skin”, de séker wan pisi foe na grontapoe disi èn no sa abi wan prati na a pramisi kownoekondre nanga san Jehovah sa poti en nen kon reti èn kenki na grontapoe kon tron wan paradijs (Lukas 23:43). A de foe dat’ede krin dati kristen sma no moe broko kindi gi „na lostoe foe na skin”.
12. (a) San „na lostoe foe den ai”, èn fa na lostoe disi kan wroko tapoe wan sma na jejefasi? (b) San wi kan aksi wisrefi boenboen ini a tori foe „na angri foe den ai”?
12 „Na lostoe foe den ai” de ete wan marki foe den sma di de pisi foe na grontapoe disi. A gersi leki noiti den abi nofo, foe na kisi foe goedoe nanga sani. Ija, srefi foeroe sma di ben poti pikinso prakseri na a bijbel waarheid di Jehovah Kotoigi e panja, e broko kindi te foe kaba gi „na lostoe foe den ai” èn no e go dat’ede a fesi na jejefasi. Na lostoe foe den foe kisi njoen krosi, oto, oso, ala sortoe apparaat èn foeroe tra sani di de wan lostoe gi na ai, e de so tranga, so leki Jezus ben taki, dati ’na bidrigi krakti foe goedoe èn den lostoe na den tra sani e boro kon na ini èn e stek a wortoe, so dati a no e meki froktoe’ (Mark. 4:18, 19) A de wan moi sani foe si dati Satan ben kori Eva foe di a ben tjari en go so fara foe kisi lostoe foe wan sani di no ben mag èn di a ben kan si nanga en ai. Ma den moeiti foe Satan foe boewégi Jezus foe doe sondoe foe poti en prakseri nanga firi tapoe sani di a ben kan si nanga en ai no ben waka boen srefsrefi (Gen. 3:1-6; Luk. 4: 5-8). Ma fa a de nanga joe? Joe e waka na baka Jezus toemsi moi eksempre? Ofoe na prisiri foe na „lostoe foe den ai” ben teki joe ten, prakseri nanga krakti so foeroe dati den kownoekondre afersi e poti na wan sé? Efoe jeje afersi e poti go no baka, opo doe wan sani foe jepi a situwasi!
13. Den gridi „lostoe foe den ai” soleki Paulus èn ooktoe na ini bepaalde odo e sori, kan tjari wan sma go pe?
13 Na gridi „lostoe foe den ai” kan tjari wan sma go na bidrigifasi, djaroesoe, big’aifasi, èn tra sondoe nanga san wan sma nanga reti e tjari na atibron foe Gado kon na en tapoe. Soleki Paulus ben taki, dan „gridi fasi sma” no de a mindri den sma di ’sa kisi a kownoekondre foe Gado’ (1 Kor. 6:9, 10). Warskow di fiti e gi ooktoe na ini den odo di e kotoigi foe koni, soleki: „Wan man foe getrow doe sa kisi foeroe blesi, ma a sma di e hasti ensrefi foe kisi goedoe no sa tan sondro fowtoe. Wan man nanga wan djaroesoe ai e feti na baka warti sani, ma a no sabi dati na pina ensrefi sa fadon kon abra en” (Odo 28:20, 22). Srefi efoe son gridi, djaroesoe sma no kisi wantewante pina, den tokoe a sa de dati den sa dede dorosé foe na boen ati foe Gado ofoe sa kon na a kaba foe den na wan sari fasi na ini na bosroiti foe na seti foe sani. — Matt. 24:3; Luk. 12:13-21.
14. (a) Fa na „meki bigi nanga den sani di wan sma abi foe tan na libi” kan kon na fesi? (b) San de a fundamenti foe na „meki bigi” disi, na meki sjow èn na feti na baka positsi? (c) Foe san-ede wi moe kakafoetoe gi na feti foe prodo nanga wi goedoe èn nanga san wi ben doro zogenaamd?
14 „Na meki bigi nanga den sani di wan sma abi doe tan na libi.” Jehovah dienstknegti moe tan farewe foe den ooktoe. Fa a kan de wan sani foe kon ini a tesi foe go meki sjow nanga diri sani di wan sma ben bai! Sowan fowtoe lostoe nofotron no wawan e meki dati wan sma e proeberi foe abi den srefi sani leki tra sma, ma ooktoe dati wan sma e proeberi na tapoe a sé foe goedoe foe psa den. Krosbé foe disi de na meki bigi foe san wan sma e denki dati a doro. Na ini a howpoe foe kisi wan moro betre positsi ofoe status, wan sma sontron e soekoe srefi matifasi èn jepi foe prenspari sma. Ma den sma di e meki den gebroiki den na tapoe a fasi disi, de law èn na sma di abi foeroe ambisi pasamarki kan kontron leki den godlowsoe sma ini a ten foe Judas, di nanga ’den mofo ben e taki bigi memre sani, ala di foe na boen foe den égi wini e bewondroe persoonlekheid’ (Jud. 4, 16). Na a feti baka ala den sani disi foe kisi positsi èn a meki pranpran disi abi leki fundament na sondoe bigi memre fasi (Odo 8:13; 16:18; 21:4). Foe dat’ede meki séker joe moe kakafoetoe gi na tesi foe meki bigi nanga wi goedoe èn nanga san wi doro zogenaamd. Na odo di e kon now de boen tapoe en presi: „A njan foe toemsi foeroe oni no boen; èn te libisma e feti baka den ģi glori, na dati de glori?” (Odo 25:27). Èn foe di moro foeroe sma e waka tapoe na bradi pasi di e tjari sma go na pori, dan den wortoe foe Jezus de foe algemeen belang: „Heloe foe joe efoe ala sma e taki boen foe joe”! — Luk. 6:26.
’Na grontapoe e pasa gowe’
15. (a) Sortoe fundamenti réde foe no de „wan pisi foe na grontapoe”, na apostel Johannes e gi? (b) Tapoe san loyaal kristen moe poti moro foeroe den moeiti foe den?
15 Johannes e gi wi wan fundamenti réde foe „no de wan pisi foe na grontapoe” te a e taki morofara: „Boiti foe dati, grontapoe e pasa gwe èn ooktoe ala en lostoe, ma a sma di e doe a wani foe Gado, e tan foe tégo” (1 Joh. 2:17). „Na grontapoe”, na onregtvaardiki libisma maatschappij, e doro en kaba ini na „bigi benawtoe” di e kon krosbé (Matt. 24:14). Na ini na pisten dati bisnis nanga na falsi fasi foe anbegi elementi foe na grontapoe disi sa pori. Fa wan getrow kotoigi foe Jehovah kan gi dan ala en ten nanga krakti nanga jepi-sani di a abi na den elementi disi di heri esi sa na kon na wan kaba? Na a tra sé loyaal kristen sa poti den moeiti foe den moro foeroe na a go na fesi foe den kownoekondre-afersi èn den sani di de foe alaten, foe tégo. Boiti foe dati, Jehovah pipel nanga sowan loyaliteit èn bribi sa „wini na grontapoe” foe na onregtvaardiki libisma-maatschappij, net so leki Jezus Kristus ben doe disi (Joh. 16:33). Ija, èn den e tan na libi te na grontapoe disi e pasa gwe foe di foe a sé foe Gado a e kisi pori, precies so leki Noach nanga en osofamiri ben psa libilibi na Froedoe. — 2 Petr. 2:5.
16. Sortoe aksi wi moe go loekoe ete?
16 Foe di na grontapoe e pasa gwe, fa kristensma moe de dan nanga a de na ini maatschappelijk afersi foe en? Fa a fasi foe den moe de nanga a kisi foe wan grontapoe leri, na bisnislibi nanga ontspanning? Den sortoe aksi disi wi sa go loekoe na ini a tra artikel di e kon.
San joe ben sa taki?
◻ Foe sortoe grontapoe den troe bakaman foe Jezus no de wan pisi?
◻ Foe sortoe wroko ede di Kristus discipel ben kisi, den no kan poti densrefi aparti?
◻ San na wan toe réde foe san-ede Jehovah Kotoigi no de „wan pisi foe na grontapoe”?
◻ Sortoe dri fundementi sani na ini a grontapoe Jehovah Kotoigi no moe lobi efoe den wani waka na bbaka na rai di e gi na ini 1 Joh. 2:15-17
[Prenki na tapoe bladzijde 14]
Aladi Jehovah Kotoigi no de wan pisi foe grontapoe tokoe den e wroko tranga foe pristeri sma foe ala naatsi jeje jepi
[Prenki na tapoe bladzijde 16]
Efeo wi „no de wan pisi foe a grontapoe”, wi no sa broko kindi gi na lostoe foe na skin èn gi na lostoe foe den ai èn net so mendri toe gi na prodo nanga den fanowdoe sani foe tan a libi