De pasa marki na ini howpoe
„Meki na Gado di e gi howpoe, foeroe joe nanga ala prisiri nanga fri, foe di joe e bribi. sodati joe kan de pasa marki na ini howpoe nanga krakti foe santa jeje.” — ROMEINISMA 15:13.
1, 2. (a) Sortoe réde Paulus ben gi foe de pasa marki na ini howpoe? (b) Fa na profétitori foe Jesaja e sori a fesi na a howpoe disi?
DE PASA MARKI na ini howpoe? Sortoe réde de foe de ’pasa marki na ini howpoe’ na ini wan grontapoe di de so doengroe leki di foe oenoe, pe ogri-doe nanga hoeroedoe e meki den strati no de boen foe waka, pe moro leki wan miljard sma de nanga angribere, pe mankeri foe njanjan e kwinsi den, pe na tapoe-skreki foe kernfetisani de anga na tapoe na ede foe na heri libismafamiri leki na feti-owroe foe Damocles? Leti bifo na apostel Paulus be taki na begi di poti dja na tapoesé, a ben gi wan réde foe disi, di a ben taki den wortoe foe Jesaja taki: „Wan sma sa opo foe tiri den naatsi; tapoe en den naatsi sa poti den howpoe.” — Romeini 15:12.
2 Paulus ben taki dja wortoe di ben komoto na ini Jesaja 11:1-10. Na ini na profétitori disi ben taki na fesi taki soema foe den naatsi ben sa poti den howpoe na tapoe Jezus di kownoe David, na manpikin foe Isaï ben de wan prenki foe en. Di na evangeliumskrifiman Mattéus ben skrifi foe Jezus, a ben teki ooktoe wortoe foe Jesaja èn a ben taki: „Loekoe! Mi foetoeboi, di mi ben teki, mi lobiwan, di mi sili ben feni boen! Mi sa poti mi jeje na tapoe en, èn a sa meki den naatsi kon froestan san na geregtigheid . . . Foe troe, tapoe en nen den naatsi sa howpoe.” — Mattéus 12:18-21; Jesaja 42:1, 4.
3, 4. (a) Sortoe „nen” Jezus abi now, èn foe san-ede? (b) Fa wi moe ferstan Openbaring 19:10, 11?
3 Foe san-ede den naatsi moe bow toe na tapoe Jezus? Disi de foe ala den sani di en nen e teki a presi foe den. Di Jezus ben de dja na grontapoe leki libisma, a ben meki wan „nen” leki wan sma di ben hori sondro fowtoe na en soifrifasi. Ferfolgoe, sjen, skinati — noti ben kan tapoe en foe doe loyaal a wani foe Gado te na dede. „Joisti foe dat’ede”, so na apostel Paulus e tjari kon na krin, „Gado ben poti en na ini wan moro hé presi, ben gi en na wan switifasi na nen di de tapoe ibri tra nen, sodati na ini na nen foe Jezus ibri kindi ben sa boigi foe den di de na ini hemel, nanga di de na grontapoe nanga di de na ondro na gron, sodati ibri tongo ben sa erken na publiki taki Jezus Kristus na Masra, gi na glori foe Gado, na Tata.” — Filipisma 2:9-11.
4 A nen foe Jezus e teki a presi now foe na hé wroko di Jehovah ben poti en leki Hépriester nanga kownoe „na a reti anoe sé foe na troon foe na majesteiti ini hemel”. En de na sma di nen „Getrow nanga Troe”, na tapoe a kon foe soema na proféti wortoe ben e sori, „bika a de na gi kotoigi foe Jezus di e meki sma taki profétitori.” — Hebrewsma 8:1; Openbaring 19:10, 11.
5. Foe san-ede wi moe de now spesroetoe ’pasa marki na ini howpoe’?
5 Foe san-ede wi moe de na ini disi ten ’pasa marki na ini howpoe’? Foe di na proféti wortoe e sori taki a Jezus disi de so fara foe tjari wan kaba kon na ala ogri di a sondari Adam ben doe na a libisma-famiri. „Bika soleki nanga na trangajesi foe na wán libisma foeroe sma tron sondari na so toe nanga na gi jesi foe na wan sma foeroe sma sa meki kon tron regtvaardiki” (Romeini 5:19). Leki a Hépriester foe Gado na ini hemel Jezus sa gebroiki na boen foe en volmaakti libisma srakti-ofrandi foe tjari na heri libisma-lo di e gi jesi, makandra nanga den miljoenmiljoen sma di sa opo baka foe dede, kon na ini libisma volmaaktifasi nanga na ferwakti a den fesi foe tégo libi na ini kolokoe tapoe wan paradijsgrontapoe. Jezus sa tiri „leki kownoe te leki Gado poti ala féjanti na ondro en foetoe. Leki laatste féjanti dede e kon na wan kaba”. Dan ala sma sa prisiri pasa marki ini wan volmaakti libi na ini na vréde paradijs. — 1 Korintesma 15:25, 26; Psalm 72:3, 7; Jesaja 33:24.
Wan loekoe na ini na farawe ten di e kon
6. (a) Fa wawan wi kan kisi wan loekoe farawe na ini na ten di e kon tapoe a prakseri foe Gado? (b) Fa disi kan tjari wini gi wi?
6 Soso nanga na bijbel wi kan leri sabi na troetroe marki foe na libi. Soso Gado kan brokobroko gi wi nanga jepi foe en Wortoe pe wi komoto, san-ede wi de dja nanga san na ten di e kon sa tjari gi wi (Jesaja 46:9, 10; 2 Timotéus 3:16). Na bijbel e gi wi wan loekoe go fara na ini a ten di e kon tapoe na kontroe foe den prakseri foe na Soeverein Masra Jehovah. Drape a e ferteri wi fa oen kan abi wan span prati na ini na doe foe en wani, disi te foe ala ten tégo! — Psalm 37:31-34.
7. Fa a proféti „marki” foe Jezus e kon troe?
7 Na proféti „marki” di Jezus ben taki foe en na a kaba foe en grontapoe diniwroko, e kon troe now na tapoe wan spesroetoe fasi. Jezus sidon now na tapoe en glori hemel troon, pe a e kroetoe den naatsi foe grontapoe, e prati den sma foe makandra „soleki wan herder e prati den skapoe foe den bokoboko”. Disi e psa tapoe na gron foe na fasi fa den e teki na boskopoe foe na kownoekondre, soleki disi e meki bekenti nanga mofo foe Kristus „brada”, den salfoe kotoigi foe Jehovah di e dini Gado te now ete na grontapoe (Mattéus 24:3; 25:31-40, 46). Ma disi e meki Jezus de speri foe Jehovah Gado, ofoe srefi moro hé leki en?
8. (a) Foe san-ede meki Jehovah poti Jezus leki en kompe-kownoe? (b) Fa Jezus sa sori taki a e saka ensrefi na ondro na Tata?
8 Nono, bika ’na ede foe na Kristus na Gado’, di de èn sa de soeverein abra na heri mekisani foe en (1 Korintesma 11:3; 1 Timotéus 1:17; Openbaring 4:11). Pas di na ini na paradijs foe Eden wan takroe oproeroe ben opo ede kon, meki Jehovah ben taki, taki a ben sa meki wan kompe-kownoe kon — na „siri” foe na pramisi — „foe broko den wroko foe Didibri” (Genesis 3:15; 1 Johannes 3:8). Ma te Kristus meki Jehovah nen nanga soevereiniteit kon reti kaba, opo a libismafamiri go kisi volmaaktifasi, ’a e gi na kownoekondre abra na en Gado nanga Tata’, sodati na Manpikin toe e saka ensrefi ondro Gado. — 1 Korintesma 15:24-28.
9. (a) Fa Jesaja e skrifi foe Jehovah glori? (b) Leki fa den Boekoe foe bijbel sori dan san de na wrokosani foe kisi ferfolgoe?
9 Te na proféti Jesaja e taki foe „na Gloriwan, Jehovah,” a e erken: „Jehovah na wi Kroetoeman, Jehovah na a sma di e gi wi wet, Jehovah na wi Kownoe; ensrefi sa ferloesoe wi.” Ferloesoe kon foe Jehovah nanga jepi foe Kristus Jezus, wan waarheid di ala sma di e soekoe a libi moe teki (Jesaja 33:21, 22; 12:2; Tori foe den Apostel 2:21; 4:12; Romeinisma 10:13; Openbaring 7:10). Bakadi na proféti Jesaja ben taki foe Jehovah leki na gloriwan di de tapoe ala tra sma a e sori moro fara fa a e jepi den sma di lobi en, nanga sortoe prakseri a e doe disi.
A dé foe „refensi foe Jehovah”
10. Sortoe kroetoe wi e feni na ini Jesaja 34:1-4, foe san-ede?
10 Den grontapoenaatsi ben bow wan skreki bericht foe a tiri foe kondre na wan fowtoe fasi, den trowe na regtvaardiki kownoekondre foe Gado na ini anoe foe Kristus. Foe dat’ede meki na proféti Jesaja e taki nanga den na a fasi disi: „Kon krosbé, oen naatsi, foe jere; èn oen nationaal groepoe, oen poti prakseri. Na grontapoe nanga den sani di foeroe en, arki, na kondre nanga ala en froktoe. Bika Jehovah ben firi atibron nanga ala naatsi, faja atibron nanga heri a legre foe den. A moe gi den abra na pori; a moe gi den abra foe srakti. Èn den sma foe den di den kiri den sa trowe gwe; èn foe taki foe den dedeskin foe den na tingi foe den sa opo go na loktoe; èn den bergi smelter foe a broedoe foe den. Èn heri na legre foe hemel moe frot gwe. Hemel [den tiri foe libisma di no boen] moe lolo tapoe, neleki wan boekoelolo; èn heri en leger sa kon proi èn kon na wan kaba, neleki na wiwiri di e kon dré èn e fadon foe na droifibon, soleki wan proiproi figa e fadon foe na figabon.” — Jesaja 34:1-4.
11. (a) San Jehovah e taki na ini Jesaja 34:5-7 foe Edom? (b) San ben de Edom, foe san a de na model na ini disiten?
11 Den wortoe disi na krakti wortoe! Na a srefi fasi den kroetoe foe Jehovah abra den sma foe Sodom e go moro fara: „Bika na ini hemel mi feti-owroe séker sa kon nati. Loekoe! Tapoe Sodom a sa saka kon, tapoe a pipel di mi sa gi abra na pori na ini geregtigheid” (Jesaja 34:5-7). Edom — den bakapikin foe Esau, a brada foe Jakob, (Esau bénen na Edom) — ben de wan owroe féanti foe na naatsi Israël di komoto foe Jakob. Edom abi en disiten model. Foe san wi e taki dja? Soema na dati? We, soema ben teki fesi na ini a gi sjen èn ferfolgoe foe na jeje Israël na ini a jarhondro di e meki twenti? A no ben de na kristenheid di fadon komoto na bribi, foe na sé foe en bigimemre kerkifesiman? Den kerkifesiman ala toe sé no wawan ben gi den jepi krinkrin na den toe grontapoefeti foe wi jarhondro, ma den ben meki na broedoe paiman foe den kon moro bigi srefi foe di den tjari den grontapoe tiri foe kondre go so fara foe meki wet di de tége Jehovah Kotoigi di e teki presi gi na hemel Jeruzalem, ofoe Sion na grontapoe — ben wani kiri den srefi.
12. (a) Fa Jehovah e pai „Edom”? (b) Na sortoe fasi Jehovah Kotoigi poti densrefi aparti foe na kristenheid?
12 A proféti foe Gado e taki foe dat’ede: „Jehovah abi wan dé foe refensi, wan jari foe gi pai foe na kroetoe abra Sion” (Jesaja 34:8). Sortoe krakti disi abi na tapoe na disiten „Edom”? A e tjari wan porikon, soleki den vers na ini Jesaja 34:9-17 e sori. A de wan troe sani taki den kerki foe na kriistenheid sensi na jari 1919 baka na feti te joe loekoe en foe na sé foe na Soeverein Masra Jehovah ben tron wan dede sani na jejefasi, wan sabana pe sani no gro te joe loekoe en boen. Den de na moro prenspari pisi foe „Babylon na Bigiwan”, na grontapoe makti foe fasi bribi di foeroe nanga broedoe paiman, di baka na Fosi Grontapoefeti a jejefasi ben fadon bigi èn di Jehovah ben kroetoe. Jehovah Kotoigi ben poti densrefi aparti foe na disiten „Edom”, di de sondro libi na jejefasi. Den no e teki prati na den interbribi-boewégi, den politiek oproeroe ofoe den kefarlek bigi sektaris kampagne foe na „Edom” disi, na kristenheid. Heri esi, te Jehovah „dé foe refensi” doro abra na heri grontapoe, dan na heri seti disi di fadon komoto na bribi sa kisi pori. — Openbaring 14:8; 18:2, 4, 24; 19:11-21.
Kisi kibri na ini na paradijs
13. Fa Jesaja e taki foe a drai komoto foe na disiten „Babylon”?
13 Na ini moi poewema wortoe Jesaja 35 e skrifi moro fara foe na drai baka foe wan fika-pisi foe na jeje Israël komoto foe na katibo foe Babylon na bigiwan, nanga den wortoe di e kon now leki hémarki: „Den wan di Jehovah ben bai . . . sa drai kon baka èn sa kon séker na Sion . . . nanga prisiri èn prisiri te ten di no abi marki sa de tapoe den ede. Den sa kisi wan bigi prisiri èn brétifasi, sari nanga soktoe moe lon gwe.” Disi de troetroe wan jeje paradijs, di e memre wi na den wortoe foe Jesaja 51:3: „Jehovah séker sa trowstoe wi. Séker séker a sa trowstoe ala en presi di pori, èn a sa meki en gran sabana tron leki Eden, en lagi sabanapresi leki a djari [paradeison (paradijs), Septuaginta-vertaling] foe Jehovah.”
14. (a) Foe sortoe paradijs Paulus ben skrifi? (b) Na sortoe fasi Jesaja 35:1-7 e agersi na paradijs disi? Soema kan go na ini?
14 A salfoe pipel foe Jehovah na ini a ten disi ben go foe troe na ini wan jeje paradijs! O boen Jesaja 35:1-7 ben skrifi foe den! Joe kan teki en gersi nanga san na apostel Paulus e skrifi na ini 2 Korintesma 12:3, 4, pe a e sori tapoe en égi ondrofeni: „Ija, mi sabi so wan sortoe sma — a kande na ini skin ofoe aparti foe a skin, mi no sabi, Gado sabi — taki a ben hari poeroe go te na ini na paradijs èn ben jere wortoe di no wan sma tongo kan poeroe, di wan sma no abi pasi foe taki.” Na ini a ten disi sma abi pasi wel foe taki foe na jeje paradijs di de now a mindri a salfoe fikapisi foe Gado, pe wan ’bigi ipi foe ala naatsi’ de na ini ooktoe! Na mindri den, wan toemsi moi organisaatsi e go na fesi èn e gro, na grontapoe maatschappij foe Jehovah, bondroe kon na wan na ini na banti foe lobi, na ini wanfasi foe prakseri nanga doe. Troetroe wan jeje paradijs!
15. (a) San Psalm 91 e sori na ini a tori foe a jeje paradijs? (b) Sortoe aksi e kon na fesi na ini a tori foe na „bigi ipi”, foe san-ede?
15 Solanga Jehovah Kotoigi e go doro foe sorgoe gi na jeje paradijs, den no sa ondrofeni ogri foe den fetisani disi di Didibri e soetoe kon na tapoe den. (Psalm 91:1-11). Den toemsi bigi profétitori foe Jesaja di e go foe na kon boen baka foe sani e kon now troe na tapoe wan toemsoi moifasi na ini na salfoe fikapisi foe na jeje Israël. Ma na nomroe foe den salfoewan na grontapoe saka kon de moro mendri leki 10.000 — a no de srefi 0,4 procent foe ala Kotoigi. A moro bigi pisi foe den 45.000 gemeente foe Jehovah Kotoigi ini a ten disi no abi salfoewan a mindri den. Fa a de foe dat’ede nanga den miljoenmiljoen memre foe na „bigi ipi”? A de troe taki den e njan makandra nanga na fika pisi switi foe den prisiri foe na jeje paradijs. Ma wi no e si na toemsi boen howpoe foe den tapoe wan paradijs grontapoe na ini den srefi profétitori?
Na grontapoe sa meki kon tron wan moi presi
16. (a) Pe nanga oten Gado prakseri moe kon reti? (b) Fa wawan libisma kan kisi libi na ini wan paradijs? (c) Fa disi ben man foe de so baka?
16 Hori na ini prakseri taki na paradijs dja na grontapoe, na ini Eden, ben lasi gwe. Foe dat’ede meki Jehovah prakseri nanga na grontapoe, nanga libisma, moe kon reti dja na grontapoe. Ini kroederi nanga Jehovah fosi prakseri dan na grontapoe moe kenki kon ini wan grontapoe paradijs gi libisma (Genesis 1:27, 28). Na paradijs na ini Eden ben wani taki moro leki fri na mindri libisma nanga meti nanga na moi fasi foe wan moi djari di gersi wan park. Gado ben meki libisma na a prenki foe en, a ben de krin na moreel fasi, a ben moe tan de disi foe ben kan tan wan pisi foe Gado toemsi bigi organisaatsi. Foe ben kan de volmaakti, fri foe siki, èn dede nanga ibri firi foe doe ogri, a ben moe gi jesi na en Mekiman. Adam ben misi na ini disi. Te na grontapoe paradijs wani kon boen baka, dan na sondoe libisma moe opo go a hé agen foe kisi volmaaktifasi, wan sani di kan nanga jepi foe Jezus froeloesoe-ofrandi. — Romeinisma 5:12, 18.
17. (a) Fa na „bigi ipi” kan go na ini na jeje paradijs? (b) Fa den e kisi sreka foe kisi tégo libi — pe?
17 Na ini a ten disi a grontapoe de fara foe wan paradijs. Tokoe na „bigi ipi” tra skapoe de na ini wan jeje paradijs (Openbaring 7:9; Johannes 10:16). Fa so? Foe di den gi den libi abra na Jehovah, e fiti densrefi na den marki foe en, sroiti densrefi na a salfoe fikapisi, di sensi 1919 ben tjari kon na ini na jeje paradijs. (Teki gersi Ezechiël 38:8-16.) Drape den e sreka den boen na fesi foe kisi libi na ini wan grontapoe paradijs di sa kon baka na benawtoe na ini Armageddon. Na paradijs di sa kon baka na tapoe na grontapoe dja, sa tan foe alaten wan grani gi Gado. Kownoe David ben taki na fesi foe disi na a fasi disi: „Den safri-atiwan na a tra sé sa kisi grontapoe leki wan goedoe, den sa feni den switi prisiri na ini fri pasa marki.” Ja, so Jezus ben taki: „Kolokoe den safri-ati sma de, bika den sa kisi na grontapoe leki goedoe” — Psalm 37:11; Mattéus 5:5.
18. Fa na „glori foe Jehovah” sa de foe si na ini na grontapoe paradijs?
18 Na ini na grontapoe paradijs dati ala sma (nanga den sma toe di ben kisi wan opobaka na grontapoe), di e gebroiki Jezus ferloesoe-ofrandi foe a boen foe den, sa feni blesi leki di Jesaja nanga tra proféti ben skrifi foe den ini a tori foe na jeje Israël. Wi kan prisiri taki na pramisi di Jezus ben gi na a foefoeroeman na a postoe tapoe Calvariebergi, sa kon troe na tapoe wan toemsi moi fasi (Lukas 23:43). „A glori foe Jehovah, na moifasi foe wi Gado,” letterlek den sa si foe di a gran sabana nanga na légi presi sa gi bromki baka èn foe di breniwan, dofoewan, malengriwan nanga babaw-wan sa kon de gesontoe baka. Te na Eden paradijs dati sa panja ensrefi go na a heri grontapoe, dan „srefi na lew sa njan dré grasi neleki na kaw”, soleki a ben de na ini Eden èn na ini na ark foe Noach. No wan sma tapoe sortoe fasi dan sa doe „ogri ofoe pori sani”. — Genesis 1:29, 30; Jesaja 11:6-9; 35:1-7; 65:25.
19. (a) Fa Jesaja 25:6-8 e kon troe fosi? (b) Fa na profétitori disi e kon troe tapoe den sma di sa libi na grontapoe?
19 Dati na jeje paradijs ben sa de fosi na letterlek paradijs, Jesaja 25:6-8 ben sori dati. A profétitori disi e kon troe now na jejefasi ini na jeje paradijs pe Jehovah pipel tjari kon makandra foe njan boen foe wan boen „fesa njanjan”. (Teki gersi Ezechiël 37:1-6). Foe di den abi bribi, foeroe nanga prisiri nanga vréde nanga den de pasa marki na ini na howpoe tapoe kownoekondreblesi (Romeinisma 15:13). Jesaja ben taki a fesi: „Masra Jehovah sa figi séker watra na den ai.” A sani disi ben kon troe na wan spesroetoe fasi na tapoe na salfoe fika pisi di kon fri foe „Babylon a Bigiwan”. Na ini Openbaring 7:17 den srefi wortoe disi e tjari kon tapoe na blesi toestand foe den „bigi ipi” na ini disi ten. Moro fara den e gebroiki Jesaja wortoe na ini Openbaring 21:3, 4 na ini a tori foe a „njoen grontapoe”, bika wi e lési drape: „Loekoe! Na tenti foe Gado de na libisma . . . èn a sa figi poeroe ala watra na den ai.” Te na njoen grontapoe sa kon, dan na toemsi moi pramisi disi sa kon troe na ini na paradijs di sa kon baka na tapoe wan grontapoe di kon krin.
20. Foe san-ede ala den dienstknegti foe Gado abi now ibri réde foe de ’pasa marki na ini howpoe’?
20 Na salfoe fikapisi nanga na „bigi ipi” abi séker ala réde foe ’de pasa marki na ini howpoe’, now di den e si a den fesi den kontroe foe a proféti wortoe foe Gado. A howpoe foe den no sa kisi sjen, bikasi ala den toemsi bigi pramisi foe Jehovah te foe kaba sa kon troe. Meki foe dat’ede wi „abi wan krakti dek’ati . . . foe graboe na howpoe di poti na wi fesi”. — Romeinisma 15:13; Hebrewsma 6:18.
Joe kan memre disi?
◻ Wi kan de pasamarki na ini na howpoe na ini sortoe sani foe na nen foe Jezus?
◻ Fa wi kan teki na hé positsi foe Jezus gersi nanga na positsi foe Jehovah?
◻ San Jesaja kapitel 34 e sori na ini a tori foe a „dé foe refensi” foe Jehovah?
◻ San wi e leri foe Jesaja kapitel 35 nanga 25:6-8 foe a „paradijs”?
[Prenki na tapoe bladzijde 7]
Jehovah abi wan dé foe teki refensi
[Prenki na tapoe bladzijde 8]
Na jeje paradijs e gi kibri tége „den pestsiki” di e tanteri libisma now