De nanga prisiri now èn foe têgo
„Oen breiti pasa marki, èn oen de nanga prisiri foe den sani ede di mi e meki. Bika loekoe, mi e meki Jerusalem foe kon de wan reide foe abi prisiri, èn a pipel foe en wan reide foe breiti pasa marki. — JESAJA 65:18.
1. Fa a troe anbegi ben abi krakti na tapoe sma na ini ala den jarihondro?
NA INI ala den jarihondro, wan heri ipi sma prisiri troetroe foe dini a troe Gado, Jehovah. David ben de wan foe den sma di ben prisiri na ini a troe anbegi. Bijbel e froeteri taki di den ben tjari na ark foe a froebontoe go na Jerusalem, dan „David nanga a heri oso foe Israèl ben tjari na ark foe Jehovah, ala di den ben bari foe prisiri ede” (2 Samuèl 6:15). So wan prisiri foe dini Jehovah, a no soso wan sani di ben pasa fositen. Joe kan abi wan prati na dati. Èn heri esi joe kan kisi moro prisiri srefi!
2. Soema na ini a ten disi, abi foe doe nanga wan tra kontroe foe Jesaja kapitel 35, boiti a fosi kontroe di ben abi foe doe nanga den djoe di ben drai kon baka?
2 Na ini na artikel bifo a wan disi wi ben ondrosoekoe a fosi kontroe foe a profeititori di e tranga wi, èn di skrifi na ini Jesaja kapitel 35. A fiti taki wi e kari a profeititori disi wan profeititori pe sani seti kon boen baka, bika na dati a ben sori foe de gi den djoe foe fositen. Na ini wi ten a e kon troe na wan srefi fasi. Fa so? We, Jehovah handri nanga Israèlsma na jejefasi, èn a ben bigin doe disi nanga den apostel foe Jesus nanga trawan di ben de na a Pinksterfesa foe 33 G.T. Den na libisma di salfoe nanga Gado santa jeje èn den e tron wan pisi foe san na apostel Paulus e kari na „Israèl foe Gado” (Galasiasma 6:16; Romesma 8:15-17). Memre toe, taki na ini 1 Petrus 2:9, den e kari den kresten disi „wan geslakti di den froekisi, wan kownoe-priester famiri, wan santa nâsi, wan pipel di de wan spesroetoe goedoe”. Petrus e sori moro fara sortoe wroko na Israèl na jejefasi ben kisi, èn a e taki: „Na ala sei oenoe moesoe meki den moi sani bekènti’ foe a sma di ben kari oenoe poeroe foe doengroe kon na ini en toemoesi moi leti”.
Wan kontroe na ini wi ten
3, 4. Fa a situwâsi ben de di Jesaja kapitel 34 ben kon troe na ini a ten disi?
3 Na a bigin foe a jarihondro disi wan ten ben de, taki a fikapisi foe na Israèl na jejefasi na grontapoe no ben de fajafaja ala ten foe meki so wan boskopoe bekènti. Den no ben prisiri dorodoro foe a toemoesi moi leti foe Gado. Foe taki en leti, den ben de na bigi doengroe. O ten dati ben de so? Èn san Jehovah ben doe na a tori?
4 A ben de na ini a ten foe a Fosi Grontapoefeti, sjatoe baka di a Mesias Kownoekondre foe Gado ben opo na hemel na ini 1914. Den nâsi ben atibron srefisrefi nanga makandra, èn den relisi fesiman na difrenti kondre ben horibaka gi den (Openbaring 11:17, 18). A no de foe taki, dati Gado ben de teige a krestenhèit di ben fadon komoto na bribi, èn di ben abi den heihei kerki fesiman, neleki fa a ben de teige a heimemre nâsi Edom. Foe dati ede, a krestenhèit, na agersi Edom, moesoe ondrofeni a disiten kontroe foe Jesaja kapitel 34. A kontroe disi di sa de wan têgo pori, sa kon seiker, neleki a fosi kontroe gi Edom foe owroeten. — Openbaring 18:4-8, 19-21.
5. Sortoe kontroe Jesaja kapitel 35 abi na ini wi ten?
5 San wi kan taki foe kapitel 35 foe Jesaja en profeititori, di e poti krakti na tapoe prisiri? A profeititori dati kon troe toe na ini wi ten. Fa so? A kon troe di na Israèl na jejefasi ben komoto na wan sortoe katibo. Meki wi go ondrosoekoe den sani di, te joe loekoe en boen, no ben pasa so langa ete na ini a theokrasia historia, èn di ben feni presi na ini a ten foe foeroe sma di de na libi ete.
6. Foe san ede wi kan taki dati a fikapisi foe na Israèl na jejefasi ben go na ini wan sortoe katibo?
6 Wan sjatoe pisi ten na ini a Fosi Grontapoefeti, a fikapisi foe na Israèl na jejefasi no ben tan krin dorodoro èn den no ben doe soifri san Gado wani. Wan toe foe den ben kon doti nanga fowtoe leri èn di sma ben dwengi den foe horibaka gi den nâsi di ben feti, den no ben hori tranga na den gronprakseri foe Jehovah èn nanga dati den no ben sori krin taki den ben teki en sei. Na ini den jari dati foe feti, sma ben froefolgoe den na ala sortoe fasi, èn na foeroe presi den no ben abi pasi srefi foe gebroiki den boekoe foe den moro, di abi den gron na tapoe bijbel. Te foe kaba, wan toe foe den moro prenspari brada ben kisi strafoe èn den ben poti den na strafoe-oso tapoe a gron foe falsi kragi. Te wi e loekoe den sani disi di ben pasa, dan a no moeilek foe si taki na a wán noso tra fasi, a pipel foe Gado, ben de na ini katibo na presi taki den ben fri. (Teki gersi Johanes 8:31, 32.) Krinkrin a ben sori taki den no ben man si sani na jejefasi dorodoro (Efeisesma 1:16-18). Pikinmoro den ben tapoe foe prèise Gado, èn a bakapisi ben de taki a no ben go boen nanga den na jejefasi (Jesaja 32:3, 4; Romesma 14:11; Filipisma 2:11). Joe si fa disi e agersi a situwâsi foe den djoe foe owroeten di ben de na ini katibo na Babilon?
7, 8. Na sortoe fasi a disiten fikapisi ben kon boen baka?
7 Ma Gado ben sa libi den disiten foetoeboi foe en na a fasi dati? Nôno, a ben abi a fasti bosroiti foe poeroe den na ini a situwâsi dati, neleki san Jesaja ben taki na fesi. So boen, a srefi profeititori disi na ini kapitel 35 e kon troe na wan aparti fasi na ini wi ten, foe di a ben go boen baka nanga a fikapisi foe na Israèl na jejefasi èn den ben kisi a gosontoe foe den baka na ini wan paradijs na jejefasi. Na Hebrewsma 12:12, Paulus ben gebroiki Jesaja 35:3 na wan agersi fasi, èn disi e horibaka gi a soifri fasi fa wi gebroiki a pisi disi foe a profeititori foe Jesaja di abi wan kontroe na jejefasi.
8 Baka a feti, a salfoe fikapisi foe na Israèl na jejefasi ben kon fri, foe taki en so. Jehovah Gado ben gebroiki Jesus Krestes, a Moro Bigi Cirus, foe fri den. So boen, a fikapisi disi ben kan go doe a wroko foe bow baka, wan sani di joe kan agersi nanga a wroko foe a fikapisi foe den djoe foe owroeten, di ben go baka na a kondre foe den foe bow a troetroe tempel na Jerusalem baka. Moro fara, den disiten Israèlsma disi na jejefasi, ben kan bigin seti wan moi paradijs na jejefasi pe sani e go boen, wan agersi djari foe Eden.
9. Fa wan sani leki a wan di skrifi na ini Jesaja 35:1, 2, 5-7, e pasa na ini a ten foe wi?
9 Nanga disi na prakseri, meki wi go loekoe Jesaja kapitel 35 ete wan tron, èn kon wi teki vers 1 nanga 2 fosi. San ben gersi wan drei kontren, troetroe ben bigin gi bromki èn de wan presi pe sani ben gro boen neleki fa a ben de fositen nanga den plata, opo presi foe Saron. Loekoe vers 5 te nanga 7 now. A fikapisi, di wan toe foe den de na libi ete èn den de aktief na ini a diniwroko foe Jehovah, ben hori den ai opo na froestan sei. Den ben kan si moro krin san den sani di ben pasa na ini 1914 èn baka dati, ben wani taki. Dati ben abi krakti toe na tapoe foeroe foe wi di de wan pisi foe a „bigi ipi”, èn di e dini now sei nanga sei nanga a fikapisi. — Openbaring 7:9.
Joe de wan pisi foe a kontroe?
10, 11. (a) Fa joe ben abi foe doe nanga a fasi fa Jesaja 35:5-7 kon troe? (b) Fa joesrefi e firi foe den kenki disi?
10 Teki joesrefi foe eksempre. Bifo joe ben miti nanga Jehovah Kotoigi, joe ben leisi bijbel doronomo? Efoe joe ben doe dati, dan omeni joe ben froestan? Now joe sabi, foe eksempre, a waarheid di abi foe doe nanga san pasa nanga den dedewan. Kande joe ben kan sori wan sma di ben abi belangstelling gi a tori, tekst na ini Genesis kapitel 2, Preikiman kapitel 9, nanga Esekièl kapitel 18 di e taki foe a tori, èn so srefi someni tra bijbel tekst. Ija, kande joe e froestan san bijbel e leri foe foeroe tori noso afersi di sma no e agri nanga dati. Foe taki en so, bijbel wani taki wan sani gi joe, èn joe kan tjari foeroe foe en kon na krin gi tra sma, èn tweifri no de taki joe doe disi kaba.
11 Ma a ben sa boen efoe ibriwan foe wi ben sa aksi: ’Fa mi ben leri ala den sani di mi sabi foe a bijbel waarheid? Bifo mi ben studeri bijbel nanga a pipel foe Jehovah, mi ben man feni ala den tekst di den kari didjonsro? Mi ben froestan san den wani taki èn mi ben kon na den joisti bosroiti foe san den wani sori wi?’ A krin piki na tapoe den aksi disi kande na nôno. No wan sma abi foe mândi nanga san taki dja, ma wi kan taki dati pikinmoro joe ben breni gi den tekst disi èn san den wani taki. A no so a de? Den ben de na ini bijbel, ma joe no ben kan si den noso froestan san den ben wani taki. Ma fa joe ai ben kon opo na jejefasi, dan? A ben de nanga san Jehovah doe gi a salfoe fikapisi, leki wan kontroe foe Jesaja 35:5. Now joe ai kon opo. Joe no de na doengroe moro na jejefasi. Joe kan si. — Teki gersi Openbaring 3:17, 18.
12. (a) Foe san ede wi kan taki dati disi a no a ten taki den e meki sma kon betre nanga jepi foe wondroe? (b) Fa a tori foe brada F. W. Franz ben sori a fasi fa Jesaja 35:5 kon troe na ini wi ten?
12 Fajafaja studenti foe bijbel èn foe a fasi fa Gado ben handri na ini ala den jarihondro, sabi taki a ten disi a no a ten na ini a historia foe dresi sma nanga jepi foe wondroe (1 Korentesma 13:8-10). Foe dati ede wi no e froewakti taki Jesus Krestes sa opo den ai foe breniwan foe sori taki en na a Mesias, a Profeiti foe Gado (Johanes 9:1-7, 30-33). Èn a no de so toe, taki a e meki ala den dofoewan jere baka. Di Frederick W. Franz, wan foe den salfoewan di na a ten dati ben de presidenti foe a Waktitoren Genootschap, ben doro 100 jari, dan pikinmoro a ben breni èn a ben abi foe gebroiki wan jepisani gi en jesi foe kan jere moro boen. Wan toe jari a no ben man si moro foe man leisi; ma tokoe, soema ben sa denki foe en leki wan breniman noso wan dofoeman soleki fa den e taki foe dati na ini Jesaja 35:5? A ben man si heri boen na jejefasi èn dati ben de wan blesi gi a pipel foe Gado na heri grontapoe.
13. Na sortoe fasi Gado en pipel na ini a ten disi, ben kon kenki noso ben kon boen baka?
13 Noso san joe kan taki foe joe tongo? Kande den salfoewan foe Gado no ben man taki di den ben na ini katibo na jejefasi. Ma so esi leki Gado poeroe a situwâsi dati, a tongo foe den ben bigin bari foe di den ben prisiri foe san den ben sabi foe a Kownoekondre di Gado ben opo èn san a ben pramisi gi a tamara. Kande den jepi joe foe loesoe joe tongo toe. Omeni joe ben taki nanga trawan foe bijbel waarheid fosi? Kande wan ten ben de, taki joe ben denki: ’Mi lobi foe studeri, ma noiti mi o go foe taki nanga tra sma.’ Ma a no de so, taki „a tongo foe a babaw-wan” e ’bari now foe prisiri ede’? — Jesaja 35:6.
14, 15. Fa foeroe sma waka na tapoe „a Pasi foe Santafasi” na ini wi ten?
14 Den djoe foe fositen di ben kon fri foe Babilon, ben moesoe teki wan langa waka go na a kondre foe den baka. San dati abi foe doe nanga wi ten? We, loekoe Jesaja 35:8: „Foe troe wan bigi pasi sa kon drape, ija, wan pasi, èn den sa kari en a Pasi foe Santafasi. A Sma di no krin no sa waka na en tapoe.”
15 Sensi di a salfoe fikapisi, di abi miljoenmiljoen tra skapoe di e wroko makandra nanga den now, kon fri foe a katibo na jejefasi, den komoto na Babilon a Bigiwan foe kon na tapoe wan agersi bigi pasi, wan krin pasi foe santafasi di e meki wan sma kon na ini wan paradijs na jejefasi. Wi e doe ala moeiti foe de wan sma di warti foe de na tapoe a Bigi Pasi disi foe Santafasi èn tan na en tapoe. Prakseri joesrefi. Den markitiki nanga gronprakseri ini a tori foe boen gwenti nanga wet, di joe e hori joesrefi na dati, no hei moro leki di joe ben de na ini grontapoe? Joe no e doe moro moeiti foe denki soleki fa Gado e denki èn foe tjari joesrefi na a fasi fa en e tjari ensrefi? — Romesma 8:12, 13; Efeisesma 4:22-24.
16. Foe sortoe situwâsi wi kan njan boen te wi e waka na tapoe a Pasi foe Santafasi?
16 Te joe e tan waka na tapoe a Pasi disi foe Santafasi, dan joe kan taki dati joe no abi foe broko joe ede nanga sma di e tjari densrefi leki meti. A troe taki joe moesoe loekoe boen taki bigi-ai sma noso bita-ati sma na grontapoe no njan joe libilibi, te joe e teki disi na wan agersifasi. Boen foeroe sma e handri na wan gridifasi nanga trawan. A de heri tra fasi na Gado pipel! Drape joe e kisi kibri. A no de foe taki, dati den kompe kresten foe joe no de volmaakti; son tron wan foe den e meki wan fowtoe noso e meki sma naki foetoe. Ma joe sabi taki den brada foe joe no wani doe joe ogri foe espresi noso njan joe libilibi (Psalm 57:4; Esekièl 22:25; Lukas 20:45-47; Tori foe den Apostel 20:29; 2 Korentesma 11:19, 20; Galasiasma 5:15). Na presi foe dati, den abi belangstelling gi joe; den jepi joe; den wani foe dini makandra nanga joe.
17, 18. Na sortoe fasi wan paradijs de now, èn sortoe bakapisi disi abi gi wi?
17 Foe dati ede wi kan loekoe Jesaja kapitel 35, ala di wi abi a disiten kontroe foe vers 1 te nanga 8 na prakseri. A no de krin taki wi feni san fiti foe kari wan paradijs na jejefasi? Nôno, a no de volmaakti — no ete. Ma a de wan paradijs troetroe, bika dja wi kan „si a glori foe Jehovah, a moifasi foe wi Gado”, soleki fa vers 2 e taki. Èn san na a bakapisi? Vers 10 e taki: „Na den wan di Jehovah froeloesoe, sa drai kon baka èn foe troe den sa kon na Sion nanga wan babari foe prisiri ede, èn prisiri sa de na tapoe den ede te ten di no skotoe. Den sa breiti pasa marki èn den sa prisiri, èn sari nanga soktoe moesoe lon gowe.” Foe troe, a komoto di wi komoto na falsi relisi èn a moeiti di wi e doe foe hori wisrefi na a troe anbegi di Gado feni boen, e gi prisiri.
18 Joe e tan kisi moro prisiri di abi foe doe nanga a troe anbegi, a no so? Joe e si fa sma e kenki di no so langa ete kisi belangstelling, èn fa den e kisi leri di abi foe doe nanga bijbel waarheid. Joe e si fa jongoewan e gro èn e go na fesi na jejefasi na ini a gemeente. Dopoe de, pe joe kan si fa sma di joe sabi, e teki dopoe. Disi a no reide foe prisiri, foe prisiri boen foeroe, na ini a ten disi? Ija, a de troetroe wan prisiri taki trawan e moksi densrefi nanga wi foe kisi a fri di wi abi na jejefasi èn foe kon nanga wi na ini wi paradijs situwâsi!
Ete wan kontroe de!
19. Sortoe moi froewakti Jesaja kapitel 35 e gi wi?
19 Te nanga now wi loekoe Jesaja kapitel 35 ini a tori foe a fosi kontroe foe den djoe di ben drai kon baka èn ini a tori foe a kontroe na jejefasi na ini a ten disi. Ma disi a no ala. Moro de ete. A abi foe doe nanga a djaranti di bijbel e gi wi taki den troetroe paradijs situwâsi o kon baka na grontapoe. — Psalm 37:10, 11; Openbaring 21:4, 5.
20, 21. Foe san ede a de wan joisti denki èn wan sani di bijbel e taki foe en toe, foe bribi taki ete wan tra kontroe sa de foe Jesaja kapitel 35?
20 A no ben sa de akroederi a fasi fa Jehovah gwenti, dati a e taki na so wan krin fasi foe wan paradijs èn dati a e meki disi kon troe na jejefasi nomo. Ma wi no e taki dati den kontroe na jejefasi no de prenspari. Srefi efoe wan troetroe paradijs ben o de, dan wi no ben sa man njan boen foe en, efoe ala di a kontren moi èn meti ben libi ini vrede, kroektoe sma ben o de, noso libisma di e handri leki werdri meti. (Teki gersi Titus 1:12.) Ija, jeje sani moesoe kon fosi, bika dati de moro prenspari.
21 Ma tokoe a Paradijs di sa kon, no abi foe doe wawan nanga den jeje sani di wi e njan boen foe den now èn di wi sa njan boen foe den moro srefi na ini a ten di e kon. Wi abi boen reide foe froewakti wan troetroe kontroe foe den profeititori soleki di foe Jesaja kapitel 35. Foe san ede? We, na ini kapitel 65, Jesaja ben taki na fesi foe „njoen hemel nanga wan njoen grontapoe”. Na apostel Petrus ben gebroiki a tekst disi di a ben taki foe san e kon baka a dei foe Jehovah (Jesaja 65:17, 18; 2 Petrus 3:10-13). Petrus ben sori dati den sani di Jesaja ben taki, te joe loekoe en boen, ben sa de te a „njoen grontapoe” tron wan troetroe sani. Dati wani taki toe den sani di joe sabi kaba kande — a bow di sma e bow oso èn e libi na ini den; a prani di sma e prani droifidjari èn e njan foe den froktoe; sma di e njan boen wan langa ten foe a wroko foe den eigi anoe; wan wolfoe nanga wan pikin skapoe di e libi sei nanga sei makandra; èn no wan ogri di e doe na no wan presi foe grontapoe. Nanga tra wortoe, wan langa libi, oso pe joe kan libi na ini seikerfasi, njanjan pasa marki, wroko di e prisiri na ati, nanga vrede na mindri meti èn na mindri meti nanga libisma.
22, 23. Sortoe reide wi sa abi foe de nanga prisiri te Jesaja kapitel 35 e kon troe na ini a ten di de na wi fesi?
22 A froewakti dati no e meki joe prisiri troetroe? A moesoe de so, bika na so Gado ben meki wi foe wi libi (Genesis 2:7-9). So boen, san disi wani taki ini a tori foe a profeititori na ini Jesaja kapitel 35 di wi e loekoe now? A wani taki, dati wi abi moro reide foe bari foe prisiri ede. Den troetroe woestijngron nanga den drei kontren sa gi bromki, èn den sa meki taki wi e prisiri. Dan sma di abi blaw ai, noso broin ai, noso wan tra moi kloroe, ma di breni now, sa man si. Den kompe kresten foe wi di dofoe, noso srefi den wan di no man jere boen, sa man jere sani krin. A sa de wan troetroe prisiri foe gebroiki a krakti di den kisi foe jere fa sma e leisi Gado Wortoe èn tjari en kon na krin, so srefi foe arki fa winti e wai na ini den bon, fa wan pikin e lafoe, noso fa wan pikin fowroe e singi!
23 A sa wani taki toe dati den lanwan, so srefi den wan di artritis e meki den pina now, sa man waka sondro pen. A sa de wan troetroe froelekti! Dan troetroe a watra foe den bigi kriki sa lon na a woestijn. Èn wi sa si èn wi sa jere toe fa a watra e lon. Wi sa man waka drape èn fasi a groen grasi nanga a papirus prani. Foe troe a sa de wan Paradijs di kon boen baka. San wi kan taki foe a prisiri di sma sa abi foe de nanga wan lew noso den tra sortoe meti leki a dati, sondro taki wi frede? Wi no abi foe taki foe dati, bika wi alamala prakseri kaba foe a situwâsi dati èn prisiri foe en toe.
24. Foe san ede joe kan agri nanga san taki na ini Jesaja 35:10?
24 Jesaja e gi wi a djaranti: „Na den wan di Jehovah froeloesoe, sa drai kon baka èn foe troe, den sa kon na Sion nanga wan babari foe prisiri ede, èn prisiri sa de na tapoe den ede te ten di no skotoe.” Dati meki wi kan taki toe dati wi abi reide foe bari foe prisiri ede. Prisiri foe san Jehovah e doe kaba gi en pipel na ini wi jeje paradijs, èn prisiri foe san wi kan froewakti na ini a troetroe Paradijs di de krosibei. Foe den wan di de nanga prisiri — foe wi — Jesaja e skrifi: „Den sa breiti pasa marki èn den sa prisiri, èn sari nanga soktoe moesoe lon gowe.” — Jesaja 35:10.
Joe ben si disi?
◻ Sortoe di foe toe kontroe Jesaja kapitel 35 ben abi?
◻ Sortoe sani na jejefasi e kroederi nanga den wondroe di Jesaja ben taki na fesi foe den?
◻ Fa joe ben abi wan prati na wan kontroe foe a profeititori disi?
◻ Foe san ede wi kan taki dati Jesaja kapitel 35 e gi wi wan howpoe gi a tamara?
[Prenki na tapoe bladzijde 29]
A strafoe-oso na Raymond Street na Brooklyn, pe den ben sroto seibi prenspari brada na ini juni 1918
[Prenki na tapoe bladzijde 30]
Ala di brada Franz pikinmoro ben breni, tokoe a ben tan si heri boen na jejefasi
[Prenki na tapoe bladzijde 31]
Foe gro na jejefasi èn foe go na fesi, na reide foe de nanga prisiri