Taki na Wortoe foe Gado sondro frede na ini na atoomten
’Taki na Wortoe foe Gado sondro frede.’ — FILIPISMA 1:14.
1. San na mekiman foe na atoom nanga en atoomkern ben meki den meki bekenti sondro frede na ini den 49 jari di psa?
Wi E LIBI na ini na atoomten. Wan kernfeti de nownow tapoe na ede foe na heri grontatoe! Na Almakti Mekiman foe na atoom nanga en atoomkern sabi disi heri boen. San de gi wi ten a Wortoe foe en di moe préki na a heri grontapoe? Na ini wi ten a e meki wan agersi ’man na ini linnen nanga wan skrifiman pen na en sébere,’ doe wan marki wroko.
2. Sortoe markiwroko e go doro èn san de na prakseri foe en?
2 A „man” disi e poti wan marki na a fesi-ede foe den sma di e soktoe èn djeme foe ala den tegoe sani di e psa, moro spesroetoe na ini na kerki kondre foe na kristenheid — den sma di e taki taki den e anbegi Gado (Ezechiël kap. 9). Foe di den sma disi e memre sortoe fasi den kerkifesiman foe na kristenheid ben abi na a ten foe na fosi nanga di foe toe Grontapoefeti, meki den e sari srefsrefi na a prakseri na san den kerkifesiman disi, èn nanga leti den kan bribi dati, sa doe ini wan grontapoe kernfeti di kande sa kan kon. Foe di den ben ferwakti wan moro betre sani foe den sokari kristenfesiman meki den de na broeja srefsrefi foe na sani di den kerkifesiman e loekoe leki noti nownow na ini wan grontapoe di lai nanga hoeroedoe, tranga, èn di prati na kerkisé srefsrefi. Na ini wan seti foe sani di heri esi sa pori, dan reti-ati sma e kisi wan marki foe tan na libi èn go na ini wan njoen èn regtvaardiki seti foe sani.
3. Foe sortoe sani ret-ati sma moe abi sari moro foe en leki foe wan bigi pori na ini a ten di e kon, èn san de fanowdoe foe doe na markiwroko disi?
3 Wan kenki foe na situwasi na grontapoe no de foe ferwakti. San sa man foe poeroe na frede na boen foeroe reti-ati sma na inisé èn dorosé foe na kristenheid taki heri esi na ini bigi ipi den sa dede wan ogri dede? We, sondro degedege den e sari foe den toestand di de, ma san de moro prenspari, na disi efoe den de nanga sari bikasi na nen foe na Gado foe na bijbel de ini ala den sani disi èn e kon tron wan sani foe sjen na a fasi fa den sma di e taki dati den de en pipel e tjari densrefi? Ma soema na a agersi ’man na ini linnen krosi’, di e marki moro nanga moro den sma disi di e sari, èn fa a e doe disi? Den kerkifesiman foe na kristenheid no e feni na markiwroko disi boen èn e kakafoetoe gi den. Foe dat’ede meki a de fanowdoe foe abi a fasi foe de sondro frede foe doe a makriki wroko disi.
4. Soema na agersiman di e doe na markiwroko de wan prenki èn den sma di nownow e teki prti na a markiwroko moe hori densrefi na sortoe wet foe dat’ede?
4 Tokoe foe sensi 1935 a wroko disi go doro nanga moro bigi faja. Wan groepoe foe kristen e doe en. Den ben gi densrefi abra na Jehovah Gado nanga jepi foe Jezus Kristus èn na proféti Ezechiël, wan priester foe Israël na owroeten di ben kisi na visioen foe na ’man na ini linnen krosi nanga wan skrifiman pen na en sébere’ e agersi den. Den ben gi densrefi abra na a srefi Gado leki Ezechiël èn de foe dat’ede neleki en Kotoigi foe Jehovah. Na disiten Ezechiël foe 1984 de wan priesterklasse di de wan pisi foe na jeje Israël, di na apostel Petrus ben skrifi den wortoe gi den di wi e feni na ini 1 Petrus 2:9: „Ma oenoe na wan ’geslakti di den ben teki poeroe, wan kownoepriesterwroko, wan santa naatsi, wan pipel di de wan spesroetoe goedoe, sodati na ala presi den sa meki bekenti den toemsi moi wroko’ foe na sma di ben kari oenoe poeroe foe doengroe go na ini en wondroe leti.”
5. Omeni ondropriester sa doe dienst na ondro na sma di poti leki Hé-priester ini kroederi nanga Jehovah sweri?
5 A de foe dat’ede krin gi wi taki na disiten Ezechiëlklasse abi na ini en sma di na jejesé e doe dienst leki kownoe-priester na ondro na Hépriester, Jezus Kristus, di ben poti na ini na priesterwroko nanga na sweri foe Jehovah Gado „na a fasi foe Melchizedek”, na kownoe foe na owroe Salem èn „priester foe na Moro Hé Gado” (Psalm 110:4; Genesis 14:18; Hebrewsma 5:10-6:20; 7:10, 11, 15-17). Foe sensi na fosi jarhondro di na apostel Petrus ben skrifi en brifi, Jehovah Gado ben teki poeroe ensrefi den memre foe „na kownoepriesterwroko” disi. Na priesterwroko disi te foe kaba sa abi ini en 144.000 priester na ondro na Hé-priester Jezus Kristus. — Openbaring 7:1-8; 14:1-4.
6. Omeni sma foe na „kownoe-priesterwroko” dati de ete a libi na grontapoe, èn leki sortoe agersi sma den e doe dienst?
6 Leki fa a bericht na a heri grontapoe foe na fesa foe na Avondmaal foe Masra na 28 maart 1983 e sori, dan soso wan pikin fika pisi de ete foe den memre foe na „kownoe-priesterwroko” na skin dja na grontapoe. Alamala makandra e doe wroko leki na agersi man na ini linnen krosi di e marki den sma di de waarti na tapoe den fesi-ede.
7. Sortoe fertrow na ini a sani di Jehovah sa doe den sma di e libi now moe abi èn di na man na ini linnen nanga wan pen e agersi?
7 Na proféti Ezechiël foe owroeten moesoe ben abi foeroe dek’ati foe no abi frede gi den gensman foe Israël ini en ten. Ma na Almakti Gado ben pramisi taki a ben sa meki na fesi foe Ezechiël kon tranga leki na fesi foe en gensman, ija, srefi moro tranga. Ezechiël no ben frede gi soso libisma di ben de gensman (Ezechiël 2:4; 3:8; Jesaja 51:12). Na a srefi fasi na fikapisi foe kristen di kisi salfoe nanga jeje, na klasse di a man na ini linnen krosi nanga na pen na en sé e agersi — moe abi na fertrow taki na Gado foe Ezechiël sa meki den fesi kon tranga. sodati sondro frede den kan kakafoetoe gi na tranga jesi foe den gensman inisé nanga dorosé foe na kristenheid.
8. Sortoe komando di Jezus ben gi de now ini a tori?
8 Tin-na-négi hondro jari psa kaba Jehovah Moro Prenspari Boskopoeman, Jezus Kristus, ben seni en discipel go nanga na gebod foe préki na Wortoe foe Gado sondro frede na ini den égi kondre. Bifo a ben seni den go, a ben taki: „No frede den di e kiri na skin, ma no kan kiri na sili; ma frede moro foeroe en di kan pori sill nanga skin na ini Gehenna” (Mattéus 10:28). Na ini na laatste boekoe foe a bijbel a e taki boiti foe dati nanga na salfoe fikapisi foe wi ten: „No frede foe den sani di joe sa njan pina foe den. Loekoe! Didibri sa go doro foe trowe sonwan foe oenoe krinkrin na ini doengroe’oso, sodati oen kisi tesi dorodoro, èn sodati oen abi tin dé benawtoe. Sori taki oen de getrow srefi te na dede, èn mi sa gi oenoe na kroon foe libi” (Openbaring 2:10). Fa den wortoe dati e gi joe dek’ati!
9. (a) Fa na poti na straf’oso foe someni Kotoigi foe Jehovah na ini disiten e sori taki den e gi jesi na a komando foe Jezus di de na tapsé? (b) Sortoe sani di de kontrari wi e si na ini a geval foe Paulus?
9 Te wi e prakseri a wroko foe Jehovah Kotoigi no mag doe na ini moro leki fotenti kondre ofoe pe lanti poti wet di e skoto den — sodati now moro kristen e wroko na ondro wet di e skotoe den leki na ini na fosi nanga a di foe toe jarhondro Kristen di ben de ini doengroe’oso — dan Jehovah Kotoigi ini a ten disi e sori taki den no de nanga frede gi den sani di den moe njan pina foe den, pe joe abi na ini doengr’oso strafoe. Na poti foe kristen na ini doegr’oso kan woko tapoe kompe kristen wan fasi di de kontrari foe san na féjanti ben abi na prakseri. Na apostel Paulus di ben de na doengr’oso ben skrifi foe na presi pe den ben hori en: „Moro foeroe brada na ini Masra e sori moro dek’ati foe préki na Wortoe foe Gado sondro frede, foe di den kisi fertrow nanga mi doengr’oso-boei.” — Filippisma 1:14.
10. (a) Foe sortoe presi na boskopoe komoto di Jehovah Kotoigi moe meki bekenti now fri? (b) Sortoe sé leki di den apostel ben teki tinanégi hondro jari ps kaba den moe teki?
10 Neleki fa a ben de na ini a ten foe Paulus a so na boskopoe di Kotoigi foe Jehovah e meki bekenti now sondro frede, no de foe libisma. A de a boskopoe foe a ten disi di komoto foe a bijbel, a Wortoe foe a moro Hé Gado Jehovah, di santa jeje skrifi. Na ini a Wortoe disi Jehovah e komanderi en dopoe pipel di gi densrefi abra taki den moe de kotoigi foe en, taki den moe gi kotoigi taki en na Gado èn Kownoe (Jesaja 43:10, 12). Foe di a e gi den na gebod foe meki en sondro fowtoe Wortoe bekenti, meki no wan enkri mekisani — hé ofoe lagi — abi na makti foe komanderi ofoe dwengi den foe no taki moro langa? Wi moe teki na srefi bosroiti foe den kristen apostel foe 1900 jari psa kaba, di ben taki gi den héman: „Wi moe gi jesi moro na Gado leki tiriman leki na libisma.” — Tori foe den apostel 5:29.
11. Libisma ben meki densrefi kon tron Gado foe di den ben kon feni na atoombom, èn fa a de nanga na makti foe den foe gens na publiki bekenti foe na kownoekondre boskopoe?
11 Libisma no ben meki densrefi tron Gado foe di den ben kon feni na atoombon, èn ben moe gi frantiwortoe na a Moro Hé Gado foe na fasi fa den e gebroiki en (Loekoe san tanapoe na ini Psalm 82:6, 7). Nanga na meki foe na atoombon leki wan sani foe skreki sma, den tiri foe kondre e proeberi foe poti na tirimakti foe den na grontapoe kon stéfi na presi dati den meki den afersi foe na Kownoekondre foe Gado na ini anoe foe Jezus Kristus go na fesi. Den ati e bron nanga na préki foe na kownoekondre foe na sé foe troe bakaman foe Jezus Kristus di e gi jesi èn den e proeberi foe tapoe den. Na ini a atoomten disi a no de wan sani di no de wan owroe sani ofoe wan sani di no de praktis foe poti bribi na den proféti wortoe disi: „Nanga disi den ten foe benawtoe e bigin. Ma loekoe boen na joesrefi; den sa gi oenoe abra na kroetoebangi ini a presi pe joe de, èn den sa naki oenoe na ini snoga èn oen sa tanapoe na fesi foe tiriman nanga kownoe foe mi ede, leki wan kotoigi; sosrefi toe na boen njoensoe moesoe préki fosi na ini ala naatsi, ma te den tjari oenoe gwe èn gi oenoe abra, no broko joe ede a fesi foe san joe sa taki, ma taki a sani di joe sa kisi na a joeroe dati, bika a no oenoe di e taki, ma a santa jeje”. — Markus 13:8-11.
12. San ben moe préki fosi aladi hebi gens ben de, èn foe san disi ben sa de wan marki di e kon na fesi?
12 Den grontapoe pen foe benawtoe ben bigin na ini 1914. Bakadati na ferfolgoe di ben taki na fesi foe den getrow bakaman foe Jezus Kristus di ben gi en jesi ben kon èn a e go doro te na a dé disi. Ala sani e sori a tapoe taki wi e libi na ini na „bosroiti foe na seti foe sani”, ija, taki na ini a atoomten disi wi e waka go miti na moro hé marki foe en (Mattéus 24:3; Markus 13:3, 4). Ma bifo na troetroe kaba doro „na boen njoensoe moe préki fosi”. Dati na Wortoe foe Gado e préki now na a heri gronatpoe sondro frede foe na boen foe na kownoekondre, pe foe dat’ede wan foe den moro boen bewijsi di kon na fesi taki wi e libi na ini „na bosroiti foe na seti foe sani”. — Mattéus 24:14.
Njan a Wortoe foe Gado èn meki en bekenti na a heri grontapoe
13. Sortoe ondrofeni leki di tanapoe na ini Openbaring kapitel 10 na salfoe fikapisi ben ondrofeni baka na Fosi Grontapoefeti, èn sortoe gebod ben gi baka den ben njan na njan di e gi kowroe-ati?
13 Johannes na laatste discipel di ben de ete na libi di Jezus ben teki leki apostel, en grontapoe libi ben kon na wan kaba na a kaba foe na fosi jarhondro. Na ini „na bosroiti foe na seti foe sani” disi foe sensi 1914 wan fikapisi foe dopoe kristen di gi densrefi abra na Jehovah èn di kisi salfoe nanga santa jeje foe Jehovah de ete na libi. Johannes, na skrifiman foe na Openbaring, na laatste boekoe foe na bijbel kanon de wan agersifasi foe na fikapisi disi. Na ini na fosi jari, 1919, baka a feti, na fikapisi disi ben ondrofeni net so wan sani leki san Johannes na ini Openbaring kapitel 10 ben skrifi foe ensrefi. Na ondrofeni disi ben sa feni presi na a ten di „a kibritori foe Gado” ben sa kon na wan kaba (Openbaring 10:7, Petrus Canisiusvertaling, NW). Baka di den sma di na disiten-klasse di Johannes ben de wan agersi fasi foe den, ben kisi na jejefasi kowroe-ati foe di den ben njan, leki a ben de so troetroe a „pikin boekoelolo” di den ben hori a den fesi, den ben kisi te joe loekoe en boen na komando: „Oenoe moe taki profétitori baka na ini a tori foe folkoe nanga naatsi nanga tongo nanga foeroe kownoe.” — Openbaring 10:10, 11.
14. Soema e doe na wroko di ben gi na apostel Johannes tapoe Patmos?
14 Wi no abi wan bericht di skrifi e ori ofoe na grani apostel Johannes tapoe na eilanti Patmos ben kan doe en dienst di a ben kisi èn di e teki sowan bigi kontren. Ma fa a de nanga den salfoewan ini a ten disi di Johannes de wan agersifasi foe den? Na klasse disi abi na profétis status foe Johannes èn e loekoe a tapoe taki na gebod di ben gi na Johannes doe dorodoro. Den wortoe: „Joe moe taki profétitori baka” e sori a tapoe taki leki wan bakapisi foe a poti di den ben poti en na strafoe na Patmos a no ben kan doe en kotoigiwroko moro langa sondro skotoe. A de krin taki san ben taki dape gi en, foe troe ben de gi en disiten model. Foe di disi de so, meki na aksi e kon na wi: Na ini omeni kondre nanga tongo Jehovah Kotoigi e taki a Wortoe foe Gado sondro frede a ini a moeiti foe den „foe préki a boen njoensoe foe na kownoekondre . . . na a heri grontapoe pe libisma e libi . . . leki wan kotoigi”. — Mattéus 24:14.
15. Te o fara na préki e doe now?
15 Na ini na Jariboekoe foe Jehovah Kotoigi 1984 bericht foe 205 kondre ben tjari kon a doro, ala di boekoe di e go foe bijbeltori ben tjari kon na doro na ini sowan 190 tongo. Na ini den kondre disi sma e libi nanga wan blaka, weti, geri, redi, nanga broin kloroe èn den de foe difrenti lo, bere nanga sekte, nanga boen foeroe tongo. Sensi na grontapoefeti, na nomroe foe den kownoe di e tiri ben kon mendri, ma now foeroe tra politiek tiriman de e wroko. Na boskopoe foe Jehovah Kotoigi ini a ten disi abi foe doe nanga den ala, awinsi sortoe officieel nen ofoe politiek prakseri den abi. Dati a wroko foe Jehovah Kotoigi, na ini someni kondre no mag doe de wan bewijsi foe dati.
16. Foe sortoe sani grontapoe tiriman ben begi foe en, ma sortoe préki ben go doro sondro foe sma kan tapoe en?
16 Soboen awinsi fa na Volkoebontoe nanga na organisaatsi di waka na en baka den Verenigde Naatsi ben opo leki wrokosani foe meki wan grontapoe di bondroe kon na wan kon a fesi èn tan, tokoe na préki foe na Kownoekondre foe Gado na ini anoe foe Jezus Kristus leki na wan enkri howpoe foe na libismafamiri ben go doro sondro foe wan sani kan stop en. Na „boen njoensoe disi foe na kownoekondre” no ben de wan sani di loekoe ’boen’ gi den grontapoe tiriman foe di a ben kenki so bigi foe san den e si leki boen, leki san moro boen, gi na libisma di e kisi kwinsi. Den abi na prakseri taki den grontapoe-afersi de afersi foe den èn dati densrefi kan seti den. Efoe den abi fanowdoe foe krakti moro hé leki libisma, dan den e seni begi go te joe loekoe en boen, „na a gado foe na seti disi” èn no moro hé. Na skrifiman foe na „boen njoensoe disi foe na kownoekondre” now e feni ’a grontapoe’ disi di Satan Didibri de a gado foe en boen. — 2 Korintesma 4:4, PC.
17. (a) Foe san-ede meki gensman no ben man foe pori a wortoe foe Gado? (b) Soema spesroetoe foe sensi 1919 ben taki foe a Wortoe dati?
17 Na profétis bijbel e ferteri krin taki a Wortoe foe Gado sa tan foe tégo alaten (1 Petrus 1:23-25). Den wortoe disi te nanga a dé foe tide e sori taki den no de troe. Na bijbel, di de a Wortoe foe Gado di skrifi nanga santa jeje, no figi poeroe, awansi ala sortoe libisma moeiti ben doe foe pori en nanga jepi foe skotoe foe kerki nanga a bron foe en na publiki, Foe kan meki a skrifi Wortoe foe Gado préki, wan sma ben de fanowdoe foe taki foe en èn ben sa meki sma jere foe en. Na meki bekenti foe a Wortoe foe Gado sondro frede foe a mofo foe Jehovah Kotoigi e go doro sondro foe tapoe awinsi moeiti foe gensman di ati e bron e doe foe tapoe a mofo foe den takiman di no e frede, èn foe sensi na jari 1919, baka a feti, wan nomroe foe mofo di e kon moro foeroe e préki en.
18. Te oten Jehovah sa tan meki na fesi-ede foe den sortoe sma dati tranga?
18 Degedege kan de tapoe a tori taki na sma foe hemel di gi a Wortoe dati sa tan meki na fesi-ede foe en disiten Ezechiël-klasse nanga foe den dek’ati kompe foe den so tranga leki wan djamanti, sodati den kan kakafoetoe gi den trangajesi gensman foe den te leki na pori foe na gens foe den sa tapoe? Nono! A ben meki na pasi foe en Kotoigi te leki a dé foe tide waka boen. A pasi foe den sa abi winimarki te leki a ’taki foe profétitori baka ini a tori foe folkoe nanga naatsi nanga tongo nanga kownoe’ sondro frede kon klari. Wi kan ferwakti taki a sa doe disi, leki wan grani gi ensrefi èn foe poti en universele soevereiniteit reti.
Joe kan memre disi?
◻ San na man na ini linnen krosi nanga wan skrifi pen e agersi ini wi ten èn sortoe wroko a e doe now?
◻ Foe san-ede Jehovah Kotoigi moe de sondro frede?
◻ San na apostel Johannes ben moesoe doe baka di a ben „njan wan pikin boekoelolo”, èn nanga san na ini disiten a e kroederi?
[Prenki na tapoe bladzijde 2]
Na ini na nucleaire jarhondro disi wan agersi man na ini linnen krosi e doe wan wroko sondro frede. Joe de na ini a wroko dati?
[Prenki na tapoe bladzijde 3]
Neleki fa Johannes ben kisi wan agersi lolo èn wan gebod foe „taki proféti-tori baka”, na so kristensma na ini a ten disi e préki a boskopoe foe Gado sondro frede