Anbegiman foe na wan enkri troe Gado di tjari kon na wán
„O Jehovah, . . . joe na Gado, joe wawan.” — PSALM 86:9, 10.
1. (a) San Jehovah ben meki wroko foe tjari wánfasi foe anbegi kon? (b) San ben de heri esi kaba na bakapisi foe na „tiri” dati?
WANFASI foe anbegi — fa den wortoe dati e taki nanga wi! Na moro bigi pisi foe den libisma noiti ben sabi na wánfasi disi. Tokoe wánfasi foe anbegi no de soso wan dren: a de na ini a prakseri foe Gado. Tin na négihondro jari psa kaba Jehovah ben poti wan „tiri” di ben abi wanfasi leki marki — a wánfasi di wi kan teki gersi nanga na wánfasi di de na ini wan stéfi, lobi oso famiri. Na wánfasi di na „tiri” disi ben meki doe kon, ben meki eri esi taki djoe kristen ben hori den anbegi na wan lobi fasi makandra nanga Samaritaansma; moro fara heiden di no ben besnij ben kisi wan switikon na ini na gemeente. Ma san ben de moro prenspari ben de, taki den alamala ben tjari kon na ini wánfasi nanga Jehovah Gado tapoe na fundamenti foe na bribi foe den na ini na waarde foe na srakti-ofrandi foe Jezus di ben verzoen sondoe. Na matifasi di ben tanapoe nanga den ben de leki di foe manpikin nanga wan lobi Tata.
2. (a) San na a „tiri”, èn oten a ben bigin wroko? (b) San e bedoel nanga na tjari kon makandra „foe den sani di de na ini hemel”?
2 Efesesma 1:9, 10 e poti a prakseri na tapoe na „tiri” disi nanga den wortoe: „A ben de ini akroederi nanga en prisiri. taki a ben poti na prakseri, na a kaba foe den faste ten [foe sensi Pinksteren 33 G.T.] foe abi wan tiri [ofoe, wan fasi foe a tiri foe osi afersi] namkoe foe tjari ala sani kon baka na makandra na ini Kristus, den sani di de na ini hemel èn [bakaten] den sani di de na gronfapoe.” „Den sani di de na ini hemel”, dati wani taki den sma di ben sa de nanga Kristus na ini na hemel kownoekondre ben tjari kon fosi makandra foe den djoe, dan foe den Samaritaansma èn bakadati foe den heidensma.
3. San na tjari kon makandra foe „den sani di de na grontapoe” ben tjari kon?
3 Na ini wi ten, spesroetoe sensi 1935 wi e si dati „den sani di de na grontapoe” — dati wani taki sma di sa abi na boen-ede foe kisi libi tapoe wan paradijs grontapoe — e tjari kon na wan. Miljoen-miljoen sma ben teki kaba na wan boen fasi na di foe toe fase disi foe na lobi „tiri”. Den e kon foe ala naatsi nanga tongo groepoe. Na wánfasi pe den e kon na ini, no de soso letterlek tjari kon na wan foe sma di e tan hori na fosten overtoigi nanga gwenti. Na presi foe dati den e leri soleki Jesaja 2:3 ben taki na fesi, Jehovah pasi, sodati den ’kan waka en pasi’.
4. (a) Te o fara na wánfasi foe anbegi sa doro, èn fa a bijbel e skrifi foe en? (b) Volmaakti libisma sa kon na ini sortoe matifasi nanga Jehovah baka na laatste tesi?
4 San wi e si now, no de na heri marki pe na wánfasi sa moe doro. A prakseri foe Gado e gi na djaranti taki na heri mekiwroko di de nanga ferstan wan dé sa tjari kon na wan na ini a troe anbegi. Na apostel Johannes e gi wan prenki foe a ten di e kon foe na toemsi moi situwasi di sa de na a kaba foe Kristus doesoen jari tiri, èn na ini Openbaring 5:13 a e ferteri foe na situwasi disi: „Ibri mekisani di de na ini hemel èn na grontapoe èn ondro grontapoe èn tapoe se, èn ala sani di ben de na ini, mi ben jere e taki: ’En di sidon na tapoe na troon [Jehovah] èn na a Lam [Jezus Kristus] moe kisi na grani èn na glori èn na makti te na ini ala tégo ten.’” Johannes ben si fa ibri sma drape ben tjari kon na wan na ondro Jezus Kristus na ini na anbegi foe Jehovah. Te baka dati na laatste tesi psa, èn ala den sma di ben opo meki oproeroe kisi pori, dan Jehovah sa teki leki en manpikin na tapoe wan lobifasi ala den sma di e tjari kon ini volmaaktifasi èn di e sori taki den de loyaal nanga jepi foe Kristus. Den sa kon de wan pisi foe na universele osofamiri foe a wan Gado di tjari kon nawan, foe soema Jehovah sa de foe tégo na wan enkri Gado, na universele Soeverein nanga lobi Tata. Fa disi de wan ferwakti di e waran wi ati! A de na opregti winsi foe joe foe de wan pisi foe na kolokoe osofamiri foe anbegiman? — Romeini 8:20, 21.
„Joe na Gado, joe wawan”
5, 6. San David ben skrifi na ini Psalm 86 foe na Sma di wi e anbegi?
5 Te wi go loekoe Psalm 86 dan dati kan jepi wi foe si san wi moe foe kan kisi na blesi dati. David, na skrifiman foe na Psalm disi di skrifi nanga santa jeje, sma ben sabi kaba foe en dini nanga en heri ati ini na troe anbegi. Ma a ben ferstan dati persoonlek a ben moe tan go na fesi na jejefasi, èn disi e kon na fesi na ini san a ben skrifi.
6 Na ini den vers 8 te nanga 10 a e poti prakseri na tapoe na Sma di a ben anbegi. A e taki: „No wan sma de leki joe a mindri den gado, o Jehovah, ooktoe no wan wroko de leki di foe joe. Ala naatsi di joe ben meki, srefi sa kon, èn den sa boigi na joe fesi, o Jehovah, èn den sa gi joe nen glori. Bika joe de bigi èn joe e doe wondroe sani, joe na Gado, joe wawan.”
7. Foe san-ede a de so prenspari foe erken taki Jehovah wawan na Gado?
7 Na ini a ten foe David den naatsi ben abi foeroe gado, èn dati de na ini a ten disi ete so. Ma nanga foeroe opregti warderi David ben taki gi en Tata: „Joe na Gado joe wawan”. Jezus Kristus ben poti krakti na tapoe na srefi waarheid disi. Na a mofoneti foe en dede a ben begi na en Tata èn a ben taki nanga en leki „na wan enkri troe Gado” (Johannes 17:3). Ma na kristenheid e tan begi wan dri-wan gado, miljoenmiljoen sma e boigi na fesi kroektoe gado èn trawan baka ben meki barinen sma, moni, densrefi nanga seks leki den gado. Èn fa a de nanga joe? Joe abi persoonlek na overtoigi taki ’no wan sma de leki Jehovah’ taki en „de na wan enkri troe Gado”?
8. Soleki Psalm 86:11 e sori, dan san e aksi foe ibri sma di wani dini Jehovah?
8 Komoto foe na ten foe en di e loekoe go na en fesi, David ben taki na fesi taki sma foe ala naatsi ben sa kon dini Jehovah. David sondro degedege ben ferstan taki te den sma disi ben kon foe anbegi Jehovah, taki den ben sa moe leri foeroe sani ete. Den ben sa moe tjari kenki kon na ini den libi. Ma David ben man si a troe foe a tori so taki en erken taki en toe ben abi leri fanowdoe èn dati foe en sé moro kenki ben sa de fanowdoe. Na ini Psalm 86:11 a ben taki: „Leri mi o Jehovah, foe joe pasi. Mi sa waka na ini joe waarheid. Tjari mi ati kon na wan foe frede joe nen.” Na dati na na winsi foe wi toe?
9. Foe san-ede meki wi de wan pipel di tjari kon na wan, èn sortoe frantwortoe wi abi ini disi?
9 Na wánfasi di de kaba na mindri Jehovah Kotoigi de troetroe wan sani di ala sma e si. Disi e kon foe di wi, leki groepoe, na ini ala opregtifasi e denki net so leki David — wi e soekoe a tiri foe Jehovah èn wi e handri ini kroederi nanga dati. Wi moe abi na lostoe foe doe wan sani na a wánfasi dati nanga jepi foe wi fasi foe libi nanga waka. Na sé foe dati wi kan kibri wi wánfasi di e jepi trawan kon na ini, foe di wi kan proeberi foe kweki warderi na sma di kisi belangstelling gi den difrenti sani di e tjari wi kon na wan.
Krakti seti di tja sani kon a wán
10. San de na fosiwan foe den sani di e tjari wi kon na wan?
10 Na fosi sani de taki wi alamala e anbegi Jehovah èn e erken taki en abi a reti foe bepaal na markiti san na boen èn san na ogri (Openbaring 14:6, 7; Genesis 2:16, 17). Fa disi abi wan kefarlek krakti na a heri grontapoe tapoe na pipel foe Jehovah! Jehovah de, soleki a bijbel e taki, „na Héwan èn A wan a tapoe ala sani, di abi en tanpresi foe tégo èn di en nen de santa” (Jesaja 57:15). Te wi e anbegi en èn fiti wisrefi na den markitiki foe en, dan disi abi wan krakti di e opo wi go na hé. Èn foe di den markitiki dati de a srefi ini ala presi foe na grontapoe, meki wi ben kon na wan leki wan pipel foe di wi ben fiti wisrefi na den.
11. Fa wi kan jepi njoen sma foe kon na ini na wánfasi disi?
11 Ma son tron sma di tai densrefi na wi e doe bigi sondoe. Fa dati e doe kon? Te den aksi den fa a de nanga na matifasi foe den nanga Gado sowan e taki: ’Gado no ben de wan troetroe sani gi mi.’ Foe dat’ede meki den no ben teki den wet foe en so tranga na ati. Wi kan jepi den sma di wi e studeri nanga den, sodati Jehovah tron gi den wan troe troe sani? Wi moe meki den ferstan dati na troe anbegi disi no de soso wan afersi foe bribi na ini bepaalde leri, go na a kownoekondre-komakandrapresi èn kande ten a ten e de wan toe joeroe na ini na velddienst. Sma di wani dini Jehovah moesoe de na ini wan krosbé persoonlek matifasi nanga en. Den moe leri foe begi alaten persoonlek na en èn soekoe na tiri foe en na ini ala sani san den e doe (Filipisma 4:6; Odo 3:5, 6) Dan den sa njan boen foe na toemsi boen bigi wánfasi di wi abi.
12, 13. (a) Fa na di foe toe sani di kari dja e wroko tapoe wi foe tjari kon na wan? (b) San wan sma moe doe foe njan boen dorodoro foe disi?
12 Na di foe toe sani na disi: Wi tjari kon na wan foe di, awinsi pe wi de toe na a grontapoe disi, abi a Wortoe foe Gado leki tjariman. Wi e erken dati na bijbel skrifi nanga jepi foe santa jeje, èn dati wan foe den sani di hari wi tron wan kotoigi foe Jehovah ben de taki kotoigi e hori densrefi troetroe na a bijbel. — 2 Timotéus 3:16, 17.
13 Den sma nanga soema wi e studeri, kande e agri nanga wi te wi e taki dati na bijbel de a Wortoe foe Gado. Ma omeni foe a bijbel den ben lési? A ben sa de wan boen sani foe gi tranga na ibri sma foe lési na heri bijbel èn na so fasi moe si fa na bijbel moe wroko tapoe den bosroiti di den e teki na ini na aladé libi. Jezus ben sabl na wani foe en Tata so boen èn a wani dati ben de so dipi na ini en ferstan dati a ben kan taki: „Mi e [doe] alaten den sani di e plisi en” (Johannes 8:29). Fa disi de wan toemsi moi marki di de na wi alamala fesi!
14. Foe san-ede meki na di foe dri sani di kari dja de toemsi prenspari, èn san wi ben sa kan doe foe ben bow warderi na ini sma?
14 Wan di foe dri sani di e tjari wi kon na wan, de dati wi alamala e njan boen foe na srefi jeje njanjan programma. Wi e erken „na getrow èn koni srafoe” leki na wrokosani di Jehovah e gebroiki foe gi jeje njanjan na a reti ten (Mattéus 24:45). Degedege no de ini wi ferstan taki na „srafoe” disi de den erfgenaam foe na hemel kownoekondre di kisi salfoe nanga a jeje, èn na ini disi ten wi e feni den soso na mindri Jehovah Kotoigi. Wi abi warderi gi na sani di a „srafoe” dati nanga na Tiriskin foe na „srafoe” dati e doe foe sorgoe gi den jeje fanowdoe foe wi. Èn wi e taki Gado tangi foe na toemsi boen jeje sorgoe di wi abi psa marki (Jesaja 65:13, 14). Wi e teki nofo ten foe meki warderi foe den seti disi kon na ini na ati foe sma di tai densrefi pas nanga na gemeente?
15, 16. (a) Na soema wi e loekoe leki wi Tiriman? (b) Fa warderi gi Jezus rol ini wi anbegi abi krakti na tapoe na fasi fa wi de nanga makandra?
15 Wan di foe fo sani, èn dati de toemsi prenspari ini a tja foe wi kon a wan, de, dati Jezus Kristus, èn no wan libisma, de wi Tiriman èn na sma nanga jepi foe soema wi alamala e kon na ini anbegi na Jehovah. Na ini na laatste wiki foe en libi leki libisma Jezus ben poti krakti na tapoe na prensparifasi foe na punt disi. Na ini Mattéus 23:8, 10 a ben taki: „No meki sma kari oenoe ’tiriman’, bika wan de oenoe tiriman, na Kristus.” Efoe wan sma na ini a ten disi, awinsi pe a de na grontapoe, ben sa aksi wan sma foe Jehovah Kotoigi: ’Soema na oenoe tiriman?’ dan a ben sa kisi alaten leki piki: ’Dati na Masra Jezus Kristus.’
16 Soso nanga jepi foe Jezus wi kan kon na Jehovah na ini anbegi tapoe wan fasi di a e teki. Foe san-ede disi de so? Foe di wi alamala ben gebore na ini sondoe èn tanapoe na ondro na dede strafoe. No wan sma foe wi kenki foe wan tra sma na ini a tori disi. Ibriwan foe wi den ben teki leki dienstknegti foe Gado soso tapoe na fundamenti foe en bribi na ini en srakti-ofrandi foe Jezus Kristus, èn soso nanga jepi foe en ibriwan foe wi kan go now na ini begi na Jehovah. Opregti warderi foe na sani disi de wan fanowdoe sani na ini na troe anbegi. — Romeini 3:23; Johannes 14:6.
17. Fa na fasi foe wi fa wi de nanga na kownoekondre foe Gado e kenki foe na kristenheid aladi disi e tjari wi leki Kotoigi foe Jehovah kon joisti moro krosbé foe makandra?
17 Na di foe féfi sani di e tjari wi kon krosbé na makandra de taki awinsi pe wi e libi, wi e loekoe na a kownoekondre foe Gado leki na wan enkri howpoe foe na libismafamiri (Mattéus 6:9, 10; Daniël 2:44). Den kerkifesiman foe na kristenheid no e doe disi. A bakapisi de taki den de ini den politiek-afersi foe na grontapoe nanga den bigi feti foe den. Kontrari foe disi meki Jehovah Kotoigi na ini ala kondre ben teki na ati dati Jezus Kristus ben taki dati en discipel „no ben sa de wan pisi foe na grontapoe disi” (Johannes 17:15, 16). Ini akroederi nanga na Wortoe foe Gado wi ben naki wi feti-owroe tron ploegoe èn wi lansri tron kron-nefi. Wi no e teki hori fetisani na skinfasi tégen wi naaste èn ooktoe wi no ben leri feti moro (Micha 4:3). Wi abi na faste overtoigi dati Gado kownoekondre de na wan enkri loesoe gi den libisma problema. Na bakapisi de dati wi tjari kon na wan nanga kompe-kotoigi na ini na heri grontapoe ini na wan troe internationale bradafasi.
18. Fa na froktoe foe Gado jeje e tajri wi kon na wan? Gi eksempre.
18 Leki wan di foe siksi sani na ini wi wánfasi wi e sori na tapoe den froktoe di na santa jeje e tjari kon na ini na libi foe den anbegiman foe Jehovah. Èn fa wi kan sori na tapoe moi froktoe di e hari sma kon — a sortoe di e meki a de wan switi sani gi wi foe tan na makandra. Boiti den kontren pe wi persoonlek tjari kenki kon a de troe san Jezus ben taki: „Nanga disi ala sma sa sabi taki oenoe de mi discipel, efoe oenoe abi lobi gi makandra.” — Johannes 13:35; Galaciasma 5:22, 23.
19. Nanga soema wi e tjari kon na wan te wi e abi wan prati na a kristen diniwroko?
19 Tapoe ala san wi taki a fesi kaba a di foe sébi punt disi e kon ete: Na tapoe wi alamala leki Jehovah Kotoigi na frantwortoe de foe préki na boen njoensoe foe Gado kownoekondre. Disi no de wan frantwortoe wawan, ma ooktoe wan grani. Soleki na apostel Paulus ben tjari kon na krin, dan wi e tron Gado kompewrokoman te wi e teki prati na a kristen diniwroko. Aladi kande a wan e prani èn a trawan e nati sani, tokoe na Jehovah de na Sma di e meki sani gro. sodati njoen discipel e kon. — Mattéus 24:14; 1 Korintesma 3:6-9.
Krakti fesiman foe na troe anbegi
20. (a) Foe san-ede meki son sma di kande e kon na a kownoekondrekomakandrapresi no e prisiri dorodoro na ini den blesi foe so wan anbegi di e tjari wi kon na wan? (b) Foe san-ede a de tranga fanowdoe dati den teki positief na sé foe Jehovah?
20 Te den sma di tai densrefi pas na Jehovab Kotoigi, e teki den waarheid disi di e tjari wi so krosbé foe makandra èn e handri ini akroederi nanga den, dan densrefi kan ondrofeni a prisiri foe teki prati na a anbegi foe na wan enkri troe Gado di ben tjari den kon na wan. Ma sonwan e de tevréde nanga wan frafra sabi foe na waarheid te den leri foe na blesi foe Gado Kownoekondre, ma den no e meki na waarheid meki roetoe na ini den ati. Den wani de sote na wi, ma den no wani taki taki den sa doe den sani now alaten na a fasi foe Jehovah. Na son fasi joe kan teki den gersi nanga bepaalde sma na ini den dé foe a proféti Elia, di Elia ben taki sondro draidrai gi den: „O langa oenoe sa hengi ete na tapoe toe difrenti prakseri? Efoe Jehovah de na troe Gado, go waka na en baka; ma efoe a de Baäl go waka na en baka” (1 Koningen 18:21). Te Jehovah faste ten doro foe pori na disiten ogri seti, a no sa draidrai. A no sa poti a pisten dati na wan tra ten. Noso kenki en markitiki foe fiti ensrefi na den ma sma di wani tai densrefi hori na a grontapoe, den sma di de nanga toe ati na ini na leri sabi foe na wani foe Gado èn a doe foe en. O prenspari a de foe dat’ede dati ibri sma di e sori belangstelling foe na waarheid doe positief stap foe bow wan troetroe matifasi di e tan nanga Jehovah!
21. Sortoe jeje go na fesi wi moe jepi wi bijbelstudenti foe meki?
21 Wi no wani studeri elementi waarheid nanga den sma di go na fesi na a sé foe na dopoe, ma wi wani jepi den toe foe go doro na ini kristen lepifasi. Disi abi na ini en na kweki foe na lostoe gi tranga jeje njanjan. Den moe leri foe njan switi foe en, foe kisi krakti foe en èn foe si fa foe jepi den foe teki persoonlek bosroiti. — Hebrewsma 5:12-14.
22. Foe san-ede meki a diniwroko foe wi de troetroe wan bigi grani?
22 Fa a de wan toemsi bigi grani foe njan boen foe Jehovah seti foe tjari sma foe ala naatsi kon na wan nanga jepi foe Jezus Kristus, èn foe wroko na ini wánfasi nanga na seti disi! Na wan enkri Gado ben gi wi na bigi grani foe de kotoigi foe en santa nen Jehovah. En égi lobi manpikin di e tiri now leki kownoe, ben de èn de wi eksempre ini anbegi, sodati wi kan prisiri na ini wan waran krosbé matifasi nanga Jeovah èn kon na ini wánfasi nanga Jehovah. Meki wi abi foe dat’ede wan prati dorodoro na a gi grani na Jehovah nen èn jepi trawan foe si fa den toe kan prisiri na ini den blesi di de spesroetoe gi den sma di kon na wan na ini na anbegi foe na wan enkri troe Gado.
Leki foe loekoe sani baka
◻ Na ofara wánfasi foe anbegi sa kon, èn san dati sa kan wani taki gi joe?
◻ Fa wi kan sori taki wi e agri nanga den firi di tanapoe na ini Psalm 86:11?
◻ San de wantoe foe den krakti sani di e tjari wi kon na wan?
◻ Sortoe go na fesi moro fara wi moe jepi wi bijbelstudenti foe kisi, baka te den studeri fundamenti bijbelwaarheid?
[Prenki na tapoe bladzijde 3]
’O Jehovah, joe na Gado, joe wawan’