Pe wi kan feni wánfasi na ini na grontapoe disi di stré priti na pis’pisi?
„Na ini wánfasi mi sa poti den, leki skapoe ini na koi.” — MICHA 2:12.
1, 2. Foe san-ede meki a de wan sani di no de wan troetroe sani foe na sé foe den grontapoe tiriman dati den e ferwakti dati den sa man foe tjari na libismalo kon na wán?
NA LIBISMALO de doesoendoesoen jari kaba na ini wan onkolokoe toestand foe pratifasi. Politiek, economia nanga maatschappelek difrenti ben prati na libismalo na ini féjanti partij di e feti nanga makandra. Na di foe twenti jarhondro foe wi ben si den takroe bakapisi foe disi. Na so foe eksempre soso kaba na ini na di foe Toe Grontapoefeti 55 miljoen libisma libi ben lasi, nanga leki hémarki na pori foe Hirosjima nanga Nagasaki nanga jepi foe atoombom.
2 Na ini den tintin jari di no psa so langa ete dan tintin tra moro feti ben meki someni miljoenmiljoen libisma libi lasi gwe. Now den kernfetisani foe politiek sistema di e stré nanga makandra de wan tapoe-skreki gi noti mendri leki na libi na grontapoe. Èn soleki na ini na Ingrisi koranti The Guardian den ben taki, dan a no wawan den bigi ma sosrefi toe den pikin naatsi de druk bezig foe meki sreka foe feti, „kon moro foeroe ini a tori foe fetisani èn ooktoe na ini na jejefasi foe den”. Soboen, a no de wan sani di de wan troe tori foe a sé foe grontapoe tiriman foe ferwakti dati den sa tjari na libismafamiri kon na wan.
Na bericht di den grontapoe kerki ben bow
3, 4. San na historia e sori foe den fasi foe anbegi foe grontapoe leki wan potentiêel krakti foe tjari na libismafamiri kon na wan?
3 Ma wi kan ferwakti dati den kerki foe na grontapoe disi sa tjari den folkoe kon na wán? Na bericht di den bow e gi moro fertrow? Na historia e piki nono. Na ini wan redactioneel artikel na ini na Chicago Tribune den ben taki: „Ibri bigi kerki e préki vréde nanga bradafasi èn sari-ati, ma tokoe wantoe foe den moro ogri-ati geval foe kwinsi tra sma èn a no man foe ferdrage den na ini na historia, ben doe na ini a nen foe Gado.” Na koranti redacteur C.L. Sulzberger ben taki na a srefi fasi: „Awinsi fa a tori no switi kande toe, wi no go ferstan boen dati kerki na sé foe ala tra oorzaak — imperialisme, racisme, militarisme — de wan tranga-ede kefaar di e kon moro foeroe gi na libi foe libisma?”
4 Ija, na historia kon morsoe nanga na broedoe di ben trowe na ini feti di kerki ben gi faja foe den èn di den ben feni boen. Èn ooktoe na ini wi jarhondro wi de kotoigi foe na libifasi di e afrontoe Gado dati wan katholiek e kiri en mede-katholiek èn wan anitiri en mede-anitri èn dati wan moslim e kiri wan tra moslim èn wan djoe e srakti en égi bribi sma na ini nationalistis grontapoefeti nanga tra feti. Den troe tori foe na historia e sori troetroe krin dati den grontapoe kerki moro mendri de wan krakti di e tjari na libisma famiri kon na wan, ma na a tra sé taki den de frantwortoe taki na pratifasi e gro.
5. Pe den prati kerki foe na grontapoe disi e feni den bigin?
5 Na broeja èn prati toestand na ini pe den kerki foe na grontapoe disi de, e sori krin dati den no abi na jepi foe Gado. Dati de kande wan ferwondroe sani gi den di e méne dati ala kerki moesoe de boen so langa den e taki taki den e teki na presi foe Gado. Ma na ini Gado égi Wortoe di skrifi nanga santa jeje a de kon krin na fesi: „Gado no de wan Gado foe broeja, ma foe vréde” (1 Korintesma 14:33). A no de na santa jeje foe Gado ofoe a wroko krakti foe Gado, ma wan jeje ofoe krakti di e poesoe sma èn di no de santa e tjari ’féantifasi, trobi, stré, pratifasi, èn sekte’ kon (Galaciasma 5:19, 20). Na ini Jakobus 3:14, 15 na koni di abi foe doe nanga na takroe jejefasi e tjari kon na krin leki „foe den ogri jeje”, e sproiti komoto foe „na Gado foe na seti foe sani disi”, Satan Didibri. — 2 Korintesma 4:4.
Wan prati oso
6. Sortoe gronprakseri di Jezus ben taki wi kan tjari kon na tapoe na grontapoe disi?
6 Na pratifasi na mindri na libisma famiri e meki wi denki na den wortoe foe Jezus: „Ibri kownoekondre di prati tége ensrefi, e kon pori, èn ibri foto ofoe ibri oso, di prati tége ensrefi, no sa tan tanapoe” (Mattéus 12:25). Tapoe a fundament disi, dan na prati grontapoe disi moesoe fadon. Srefi den naatsi ben agri nanga den wortoe: „Te wi bondroe kon na wan wi e tan tanapoe, te wi prati wi e go na ondro.”
7. Leki fa son sma e denki dan san de fanowdoe, te den moeiti wani waka boen foe tapoe wan rampoe?
7 Na ini wan moeiti foe tapoe wan rampoe dati ala sani broko saka, meki son sma di de prenspari sma e bari foe wan bigi kenki moe kon na ini na denki foe libisma. Na atoomsabiman Harold Urey ben taki: „No wan constructieve loesoe gi den grontapoe problema de, boiti te kaba foe kaba wan grontapoe tiri kon di man foe poti wet gi na heri grontapoe.” Na so Albert Einstein toe ben taki „nanga krakti sten dati na vréde na mindri den naatsi na ini na atoomten ben sa kan tan soso te ala sma ben tjari kon makandra na ondro wan wet sistema ini na heri grontapoe.” Sosrefi toe a ben gi tranga na kraktifasi na a sani disi: „Wi moe wini den takroe wini foe nationaal grens.” Ja foeroe sma e si na fanowdoe foe wan grontapoe tiri.
8. Na prati grontapoe disi man foe komoto na a pasi foe go ini pori?
8 Ma a de wan sani di de séker dati den naatsi foe na grontapoe disi sa gi a soevereiniteit foe den abra? Efoe a de so, dan na soema? Séker no na a organisaatsi foe den V.N. Den naatsi e opo go feti nanga makandra foeroetron na presi dati den saka densrefi na ondro na bosroiti foe na V.N. Na grontapoe disi, nanga en prati politiek, bisnis, maatschappelek nanga kerki sistema, e go foe dat’ede na pori. — Zefanja 3:8; 1 Johannes 2:15-17.
Wan pipel di kon troetroe na wan
9. O séker a de dati wan libismafamiri di tjari kon na wan sa kon?
9 Disi wani taki dan dati wi no kan taki foe wan wánfasi na a heri grontapoe? Kwetkweti! Ma kontrari foe dati, bika wánfasi na a heri grontapoe no wawan kan, ma srefi de wan sani di joe no kan lon komoto na a pasi foe en! Na fundamenti foe disi ben poti kaba srefi! Wan pipel de kaba di e doe san Einstein ben taki, di ’e wini den hebi foe na nationalisme’. Wan pipel de kaba na a heri grontapoe di troetroe bondroe kon na wan! Wan superieur grontapoe tiri de kaba di miljoenmiljoen sma na ini ala naatsi e gi na en den getrowfasi na a fosi presi.
10. San de den marki foe wan troetroe tiri?
10 Foeroe sma kande sa abi na prakseri dati sowan fasi foe loekoe sani de psa marki. Den sa aksi kande: ’Joe e taki foe wan troetroe tiri, nanga troetroe wet èn troetroe borgroe? Pe wi e feni sowan sani? Soema de ini a tori?’ We, oten wan sma kan taki foe wan tiri? Difrenti sani de fanowdoe foe dati: (1) A moe abi troetroe tiriman di de na libi, (2) na presi pe den e tiri komoto moe de ooktoe troetroe, (3) na naatsi moe abi troetroe wet foe hori orde èn (4) a moe abi troetroe onderdaan — libisma. Na ini den Verenigde Staten foe eksempre wan moro hé tiriman de (na president) di abi en stoeroe foe tiri na ini Washington (D.C.). Wan makti de di e meki wet (na Congres). Wan kroetoe makti de (kroetoebangi) di e hori kroetoe na ini na kondre. Èn den abi moro leki 230 miljoen onderdaan. Wan sma ben sa wani taki ala disi no de troetroe?
11. Fa srefi den koranti foe grontapoe ben piki dati now troetroe wan pipel de di tjari troetroe kon na wan?
11 Net so toe wan troetroe pipel di bondroe kon na wan de now. Pe? Sortoe tiri den e dini? Foe san-ede wi kan taki taki den bondroe kon na wan dorodoro? Na ini na Brasjon koranti O Tempo prakseri ben poti na tapoe na aparti pipel disi na a fasi disi: „Ala di na ini ala pisi foe na grontapoe foeroe kefarlek moi kerki de nanga den propaganda foe den, tokoe joe abi na a ten disi no wan enkri kerki di e sori na srefi lobi nanga wánfasi leki na theocratis organisaatsi foe Jehovah Kotoigi.”
12. Sortoe denki na ini wan koranti foe België e kroederi nanga wan troetroe tori di Jehovah Kotoigi e erken?
12 Na ini België na koranti La Nouvelle Gazette ben kon nanga na ede prakseri di e kon now: „Amerkan sabiman ben feni wán loesoe nomo foe kan wai komoto foe na pasi foe wan atoomfeti na ini den 25 jari: di foe Jehovah Kotoigi!” Leki fa na artikel taki dan na wan enkri dresi ben sa de „wan bigi kenki na ini na fasi foe libi foe libisma foe na boen foe wan grontapoe tiri”. Na boekoe e taki dati na fasi disi foe si sani e kroederi soifri „nanga na prakseri di Jehovah Kotoigi e bribi na”. Èn sortoe „prakseri” dati de dan? A de di Jezus ben meki leki na edethema foe en leri: Gado njoen tiri gi wan heri grontapoe, en hemel kownoekondre tiri nanga Kristus leki tiriman. Na tiri dati de na dresi foe Gado, na wán enkri dresi tége den siki foe na heri libisma famiri nanga en pratifasi. Jezus ben leri sma foe begi foe na tiri dati na a fasi disi: „Joe kondre moe kon, joe wani moe go doro na grontapoe soleki na ini hemel” (Mattéus 6:10, katholiek Willibrordvertaling). Èn leki fa na srefi bijbelvertaling disi foe na profétitori na ini Daniël 2:44 e vertaal en, dan na tiri dati foe Gado heri esi „sa masi broko ala den kownoekondre dati [di ben de a fesi] . . . ma srefi a sa tan foe tégo”.
Sori troe lobi nanga wánfasi
13. San psa sensi 1914 ini a tori foe wan grontapoe tiri di sa tjari na libismafamiri kon na wan?
13 Den sani di e psa na grontapoe èn di de leki wan kontroe foe bijbel profétitori, e sori dati Gado hemel tiri ben kon na ini makti na ini 1914. Gado ben poti na a ten dati en kownoe, Jezus Kristus, di ben psa tesi leki tiriman (Mattéus 24:3; 2 Timotéus 3:1-5; Openbaring 12:10). A tiri dati abi hé wet nanga gronprakseri, di skrifi na ini den moro santa wan foe ala boekoe, a Wortoe foe Gado, na bijbel di skrifi ondro na krakti foe santa jeje (2 Timotéus 3:16, 17). Èn sensi 1914 na toemsi Boen Herder, Jezus Kristus, ben tjari den borgroe foe Gado njoen seti kon makandra. Soboen, now na fundamenti foe na njoen grontapoe maatschappij e poti! Ija, ala den sani disi de troetroe srefsrefi. A no de soso wan dren. — Mattéus 25:31-46; Johannes 10:14-16; 2 Petrus 3:13.
14. Sortoe sani di e tjari pratifasi kon Jehovah Kotoigi ben wini?
14 Leki borgroe foe na njoen seti Jehovah Kotoigi na ini ibri kondre e gi na trow foe den na a fosi presi na Gado hemel kownoekondre tiri. Te Jehovah Kotoigi e lési na komando foe Jezus dati ’den moe lobi makandra soleki en ben lobi den’, dan den e teki dati foe dat’ede letterlek èn den e tjari en kon na ini den libi na a heri grontapoe (Johannes 15:12). Na bakapisi de, dati den ben broko troetroe den banti foe nationalisme di ben skotoe den. Den man foe sori troe lobi gi na heri libisma famiri, awinsi foe sortoe ras, lo noso nationaliteit wan sma de.
15, 16. Tra sma e erken dati Jehovah Kotoigi ben wini na nationalisme?
15 Na ini na Italiaans kerki koranti Andare alle genti wan lomsoe katholiek non ben skrifi disi foe Jehovah Kotoigi: „Den ferdini foe wi ferwondroe gi den, foe na fasi fa den e poti ala fasi foe tranga na wan sé èn sondro foe den meki oproeroe e teki den foeroe tesi di den e kisi foe na bribi foe den ede . . . Fa na grontapoe ben sa de tra fasi efoe wi alamala na wan séker mamanten ben sa wiki nanga na faste bosroiti foe no teki no wan fetisani moro neleki Jehovah Kotoigi, awinsi san a sa kostoe toe èn foe sortoe réde toe”.
16 Na ini na Italiaanse kranti Il Corriere di Trieste den ben taki: „Den Jehovah Kotoigi e ferdini foe wi ferwondroe foe na stanfaste fasi èn na krosbé banti foe den. Kontrari nanga tra kerki, dan na wánfasi foe den leki pipel e tapoe den foe begi na a srefi Gado, na ini na nen foe na srefi Kristus efoe a wani blesi den toe partij di e stré na ini wan feti noso wani moksi politiek nanga kerki foe dini den afersi foe den edeman foe kondre ofoe politiek partij.”
17. Fa 1 Johannes 3:10-12 e sori sortoe difrenti de na mindri den pikin foe Gado nanga den pikin foe Satan?
17 Loekoe boen o soifri disi e kroederi nanga wan Johannes 3, den vers 10 te nanga 12. Drape tanapoe: „Nanga disi wi kan sabi den pikin foe Gado èn den pikin foe Didibri: Ibri wan sma di no e doe regtvaardikifasi no komoto foe Gado, sosrefi toe en di no lobi en brada. Bika disi de na boskopoe di joe ben jere foe na bigin taki wi moe abi lobi gi makandra no soleki Kaïn di ben komoto foe na ogriwan èn ben kiri en brada.” Nono, den pikin foe Gado no e kiri den brada a de den pikin foe Satan di e doe dati. — Johannes 13:35.
18. San e psa nanga sma mindri soema fosten pratifasi ben de te den tron Jehovah Kotoigi?
18 Te Arabiersma, djoe nanga nenkristen ini Libanon nanga Israël tron Jehovah Kotoigi, dan den e kon na wán foe dat’ede na ini wan banti foe lobi nanga wánfasi di no kan broko. So ooktoe sma di ben de lomsoe nanga anitri na ini noord Ierland. So ooktoe blaka sma nanga weti sma na ini den Verenigde Staten foe Amerkankondre. So ooktoe memre foe difrenti Afrikan lo di ben e feti nanga makandra fosten èn no ben man si makandra na ai. Na Ingrisi tijdschrift New Society ben skrifi foe disi: „Den kotoigi abi kande moro wini marki leki sortoe tra groepoe toe na ini na es’esi fasi di den e poeroe discriminatie foe den lo na mindri den égi njoen memre foe den.”
Fonten foe wánfasi
19. Na ini sortoe toemsi prenspari fasi Jehovah Kotoigi de aparti?
19 Foe san-ede meki Jehovah Kotoigi kan sori so wan lobi nanga wanfasi? Disi e kon foe na grontapoe leri foe den, den hé positsi ofoe goedoe ofoe foe di den de so boen nanga san e psa na ini a ten? Nono, den de kewoon libisma. Ma na ini toe prenspari sani den de aparti. Na ini na fosi presi Jehovah Kotoigi e teki na heri bijbel leki na Wortoe foe Gado di skrifi ondro krakti foe santa jeje èn den e doe ala moeiti foe doe san a e taki. Na apostel Paulus ben taki foe disi: „Di oenoe ben teki a Wortoe foe Gado oenoe no ben teki en leki na Wortoe foe libisma, ma leki san a de troetroe, leki a wortoe foe Gado di e wroko na ini oenoe, bribiwan” (1 Thessalonikasma 2:13). Na ini a di foe toe presi Jehovah Kotoigi e teki a srefi denki leki Jezus apostel, di ben taki gi den tiriman: „Wi moe gi jesi na Gado leki tiriman moro leki na libisma.” — Tori foe den Apostel 5:29.
20. San de na troetroe fonten foe wánfasi a mindri Jehovah Kotoigi?
20 San e psa nanga wan pipel di e teki na heri bijbel leki na Wortoe foe Gado èn di e libi leki fa a taki èn e gi jesi na Gado na ini ala sani leki a tiriman foe en? Na ini Tori foe den Apostel 5:32 wi e kisi foe jere taki Gado e gi en krakti santa jeje ofoe wroko krakti „na den di e gi jesi na en leki tiriman”. Dati de na fonten foe krakti di ben jepi Jehovah Kotoigi foe meki doe kon èn foe kibri na wánfasi di de na a heri grontapoe èn di de wan sani di tra sma no sa man kisi.
21, 22. (a) Soema foe dat’ede e meki na profétitori na ini Jesaja 2:2-4 kon troe? (b) Sortoe profétitori Jehovab Kotoigi e si now e kon troe na tapoe densrefi?
21 Soema foe dat’ede te joe loekoe na bewijs materiaal e meki na profétitori foe Jesaja kapitel 2, den vers 2 te nanga 4 kon troe? Na profétitori dati, te a e taki foe na ten, pe wi e libi na ini, dan a e taki dati na troe anbegi foe Jehovah sa poti stéfi èn dati foeroe sma ben sa taki: „Oen kon, èn meki wi go na a bergi foe Jehovah, . . . èn en sa leri wi foe en pasi, èn wi sa waka séker tapoe en pasi.” Sosrefi toe na profétitori e taki: „A sa kroetoe séker a mindri naatsi èn a sa poti afersi reti na mindri foeroe folkoe. Èn den sa smeti den feti-owroe foe den tron ploegoe foe den èn den lansri tron kron-nefi. Naatsi no sa opo owroe feti nanga naatsi, èn den no sa leri feti moro.”
22 Soema ben gi Gado nanga en Wortoe pasi foe ’poti afersi reti’ a mindri den? Soema ben arki troetroe a komando foe Gado foe no ’leri feti moro? Soema na ini a ten foe wi ben wani foe de ala nanga ala doesoendoesoen jari na ini doengr’oso nanga concentratiekampoe na presi foe ben kiri den sma di ben libi na en sé? Soema e sori respeki gi na bijbel leki na Wortoe foe Gado di skrifi na ondro na krakti foe santa jeje èn e gi jesi na Gado leki tiriman? Soema e sori wan internationaal bradafasi di de aparti na ini na grontapoe di stré priti na pis’pisi? Na piki no kan de tra fasi leki Jehovah Kotoigi. Èn now den „tra skapoe”, hondrohondro doesoendoesoen foe den, e tjari konmakandra leki kompe foe den wan di tan abra foe na salfoe „pikin ipi” (Johannes 10:16; Lukas 12:32). Den e njan boen ooktoe foe a kontroe foe wan profétitori di ben taki na ini Hoséa ten. Na ini disi ben taki na fesi taki ala den dienstknegti foe Jehovah ’ben sa tjari kon na wan wánfasi’ na ondro wán Ede, Jezus Kristus, na ini kownoekondremakti (Hoséa 1:11). Na wánfasi di de na mindri den den e si leki wan kontroe foe Jezus Wortoe di a ben begi na Gado ofoe en bakaman ’ben kan de wán neleki wi de wán’ (Johannes 17:20-22). Langa ten pasa kaba Gado ben hori ensrefi na a pramisi: „Na ini wánfasi mi sa poti den, leki skapoe na ini na koi.” — Micha 2:12.
Joe kan memre den punt di e kon now?
◻ Foe san-ede meki wi kon so fara foe taki dati den fasi foe anbegi foe na grontapoe na abi na jepi foe Gado?
◻ Fa na ini 1 Johannes 3:10-12 wi e kon sabi den sma di troetroe tjari kon na wan na ini na grontapoe di stré priti na pis’pisi?
◻ San de na troetroe fonten foe krakti di e jepi Jehovah dienstknegti foe hori wánfasi na a heri grontapoe, èn foe san-ede den abi na fonten dati foe krakti?
◻ Sortoe toemsi moi profétitori di e go foe na wánfasi foe den dienstknegti foe Gado wi e si now e kon troe?