Na „makti naatsi” foe Gado di tjari kon na wán sa foeroe na grontapoe
„Na pikinwan srefi sa tron doesoen, èn na mendriwan wan makti naatsi. Misrefi, Jehovah, sa meki a psa na en reti ten.” — JESAJA 60:22.
1, 2. (a) San psa nanga na wánfasi èn na orde na ini na grontapoe? (b) San e psa nanga Jehovah dienstknegti na mindri wan pori grontapoe?
SMA di sabi boen san e psa na grontapoe e agri taki na grontapoe disi moro nanga moro e prati èn e broeja. Na ini wan redactioneel artikel na ini The New York Times ben tanapoe: „Politiek ogridoe . . . e panja ensrefi na a heri grontapoe leki noiti a fesi . . . Now someni ogridoe de dati a de moeilek foe sabi den alamala.” Moro fara den ben taki: „A troe tori e sori taki no wan sma e tiri na grontapoe moro èn e hori wan skijn foe orde.” A broko saka disi foe sani e kroederi precies nanga san na Wortoe foe Gado ben taki a fesi foe na ten foe wi. — 2 Timotéus 3:1-5, 13; Mattéus 24:3-13.
2 Gi Jehovah dienstknegti di tjari kon na wan na broeja di moro nanga moro e kon bigi de wan krin marki dati wan owroe seti foe sani e doro en kaba, ala di wan njoen seti foe sani moro nanga moro de krin foe si (Lukas 21:28). Ma na mindri foe wan grontapoe di e waka moro nanga moro na baka en porifasi gado Satan Didibri, Jehovah en pipel e krin ensrefi èn a e tjari den go na wan toemsi moi njoen seti. A e tjari den kon na wán gi en soifri anbegi, di poti na hé neleki a ben de na tapoe wan bergi, di de tapoe ala tra fasi foe anbegi. Den sma di e teki na anbegi disi di e tjari sani kon na wan foe na troe Gado, e taki moro fara gi trawan: „Kon, èn meki wi opo go na na bergi foe Jehovah, na a oso foe na Gado foe Jakob, èn en sa leri wi foe en pasi, èn wi sa waka séker tapoe en pasi” (Jesaja 2:2, 3). Den sma di tjari kon na wan na ini na anbegi disi di e tjari sani kon na wán, nanga foeroe lostoe e loekoe na a ’njoen hemel èn wan njoen grontapoe pe regtvaardikifasi sa libi’. — 2 Petrus 3:13.
Prati den „skapoe” foe den „bokoboko”
3, 4. (a) Sortoe sani ben psa sensi 1914? (b) Fa sma di den e feni boen foe tan na libi ben poti densrefi aparti foe tra sma?
3 Leki fa a tenschema foe Gado di bijbelprofétitori e sori dan den „njoen hemel” (na hemel kownoekondre foe Gado ondro na tiri foe Kristus) ben opo na ini na moeilek jari 1914. Foe sensi na ten dati na teki poeroe foe den 144.000 kompe tiriman ini den „njoen hemel” ini algemeen ben tjari kon doro a marki (Openbaring 14:1-4). Now Jehovah e kari sma foe ala naatsi kon makandra foe de grontapoe onderdaan foe na kownoekondre. Den sa meki wan bigin nanga na bow baka foe wan njoen regtvaardiki ordening leki sma di komoto „foe na bigi benawtoe” na ondro na tiri foe na kownoekondre. — Openbaring 7:9, 14; Mattéus 24:21.
4 Jezus ben taki foe a tjari kon makandra disi foe sma na a fasi disi: „Te na Manpikin foe libisma [Kristus] sa kon na ini en glori [ini hemel kownoekondre makti], nanga ala engel makandra nanga en, dan a sa teki presi tapoe en glori troon. Èn ala naatsi sa tjari kon makandra na en fesi, èn a sa prati den sma foe makandra, soleki wan herder e prati den skapoe foe den bokoboko. Èn den skapoe a sa poti na en reti anoesé èn den bokoboko na en kroektoe anoesé.” Nanga sortoe bakapisi? Jezus ben taki: „Dan na kownoe sa taki gi den sma di de na en reti-anoesé [den sma di gersi skapoe]: ’Oen kon, oen na tapoe soema na blesi foe wi Tata de, oen kon teki na kownoekondre di foe sensi na poti foe na fundamenti foe na grontapoe ben sreka gi oenoe.’ . . . Ma gi den trawan na en kroektoe anoesé [den sma di gersi bokoboko] a sa taki dan: ’Komoto gwe foe mi, oen di ferfloektoe, go ini na tégo faja [tégo pori] di ben sreka gi Didibri nanga en engel.’ Èn den disi sa go na ini na tégo koti poeroe, ma den regtvaardikiwan na ini na tégo libi.” — Mattéus 25:31-46.
5. Fa na sari-atifasi foe Jehovah e kon now na krin?
5 Ma Jehovah de wan sari-ati, lobi-ati Gado. „A abi pasensi nanga oenoe, foe di a no wani dati wan sma go ini pori, ma a wani dati ala sma kon kisi beraw” (2 Petrus 3:9). Bifo Gado meki wan kaba kon na a grontapoe disi di prati èn di e feti, a de foe dat’ede en wani dati en dienstknegti meki na boskopoe foe howpoe tapoe tégo libi na ini wan regtvaardiki njoen ordening bekenti. En Manpikin ben taki foe dat’ede: „Na boen njoensoe disi foe na kownoekondre sa préki na a heri grontapoe leki wan kotoigi gi ala naatsi, èn dan na kaba sa kon.” — Mattéus 24:14.
6. Soema Jehovah e gebroiki foe na Kownoekondre prékiwroko?
6 Soema moe doe na préki foe na kownoekondre disi di e waka a fesi na kaba? A de krin dati Jehovah no sa gebroiki sma di no wani dini en. Den sma di a e gebroiki gi na kownoekondre prékiwroko, de den sma di de klarklari foe saka densrefi na den ondro. Na profétitori ben kon troe na tapoe na fika pisi foe na jeje Israël: „Na ini wánfasi mi sa poti den, leki skapoe na ini na koi” (Mattéus 2:12). Den „tra skapoe” de now nanga den na ini na wánfasi dati (Johannes 10:16). Den alamala de na wan internationaal groepoe foe Kotoigi foe Jehovah di tjari kon na wán. Na mindri den joe abi owroe nanga jongoe sma, man nanga oema, bika na ini den Psalm, di ben skrifi ondro krakti foe santa jeje e taki: „Prijse Jah! . . . Oen jongoeman èn ooktoe oen jongoe wenke, oen owroe man makandra nanga boi, dati den prijse na nen foe Jehovah.” „Den oema sma di e ferteri a boen njoensoe de wan bigi legre.” — Psalm 68:11; 148:1, 12, 13.
Préki na ini wánfasi
7. (a) Sortoe wánfasi de a mindri Jehovah Kotoigi? (b) Foe san-ede wi kan de séker dati na wánfasi disi sa tan?
7 Jehovah, Jezus Kristus, nanga den santa engel e loekoe dati na grontapoe organisaatsi foe kownoekondre prékiman meki na boskopoe foe Gado bekenti na ini wánfasi (Mattéus 28:19, 20; Johannes 14:26; Openbaring 14:6, 7). Jehovah Kotoigi e doe foe dat’ede na Wortoe foe Gado di skrifi ondro santa jeje krakti. Den „tjari kon na wán nanga soso wán prakseri èn wán marki”. ’Ini wánfasi èn nanga wan mofo den e gi Gado èn Tata foe den Masra Jezus Kristus grani.’ — 1 Korintesma 1:10, Today’s English Version; Romeini 15:6.
8. San de toemsi prenspari foe meki na wánfasi foe anbegi go na fesi?
8 Foe kan doro na wánfasi disi foe prakseri, marki nanga préki, meki Jehovah Kotoigi e studeri ala ten na Wortoe foe Gado foe na waarheid. Den e doe disi na ini na beslotenheid foe den égi oso, tapoe ala jari congres èn ooktoe tapoe féfi ala wiki gemeente komakandra. Na a fasi disi den e kisi jeje njanjan foe Jehovah tafra di e meki den kon na wán (Mattéus 24:45-47; Hebrewsma 10:24, 25). Na a bijbel leri disi den e si leki na sroto foe na wánfasi anbegi foe den. Disi e kon na fesi foe eksempre ini san na katholiek skrifiman William Whalen ben taki na ini na tijdschrift U.S. Catholic: „Ibri kownoekondrekonmakandrapresi [foe Jehovah Kotoigi] e gi leri na moro bigisma ini wan moen leki den moro foeroe katholiek parochie e gi na ini wan heri jari.” Ija, bijbelleri de na sroto foe de ’wán foe prakseri’ èn ’wán foe marki’ èn foe abi „wán mofo”.
9. Fa wi kan kon sabi soema Jehovah e gebroiki gi na prékiwroko foe na Kownoekondre boskopoe?
9 Efoe joe e degedege na ini a tori foe soema Jehovah e gebroiki foe préki na „boen njoensoe foe na Kownoekondre” aksi joesrefi dan: Efoe sma di naki a doro foe tra sma foe taki foe Jehovah nanga en kownoekondre, soema de den sma dati dan? Ala sma sabi dati disi de Jehovah Kotoigi. Omeni tron sma foe tra kerki e kon fisiti joe foe taki foe Jehovah nanga en kownoekondre? Omeni tron den sma disi e taki oiti, pe a kande toe, foe den sani disi? Den kerkiman foe den kerki di prati foe na grontapoe disi e tapoe den mofo foe taki foe Jehovah nanga en kownoekondre. Pikinso foe den sabi srefi soema na Jehovah ofoe san en kownoekondre wani taki gi na grontapoe disi. Tokoe a de so dati Jehovah nanga en kownoekondre de njoensoe di moe seki na grontapoe, bika Jehovah kownoekondre soleki ben taki na fesi na ini Daniël 2:44, heri esi ’sa masi broko ala tra tiri foe kondre èn tjari wan kaba kon a den’, èn baka dati soso na kownoekondre disi sa tiri foe tégo.
Es’esi gro baka wan pikin bigin
10. Omeni dienstknegti foe Jehovah ben de bifo 1914, ma fa wi moe si na sani di ben doe na a ten dati?
10 Na disiten kownoekondre prékiwroko ben abi wan pikin bigin. Foe sensi den jari 70 foe na jarhondro di psa te leki na toemsi prenspari jari 1914 dan na nomroe foe kownoekondre-prékiman ben de pikin. Ma den getrow wan dati ben poti na fundamenti foe san ben moe kon ete. Ala di na bigin dati ben pikin, tokoe a ben meki oen e denki na a tekst di ben taki na fesi ’dati na dé foe den pikin sani wi no moe ferakti’ (Zacharia 4:10). Gi Jehovah dienstknegti na pisiten bifo 1914 ben de wan „dé foe den pikin sani”, ma heri esi moro foeroe sani ben sa kon.
11, 12. (a) Sortoe bewijsi ben gi baka 1914 dati na santa jeje ben e wroko na wan krakti fasi? (b) Sortoe sani ben taki sowan dritenti jari psa kaba foe na kownoekondrewroko, èn san wi kan taki now foe en?
11 Nanga na bigin foe na Fosi Grontapoe feti na ini 1914 dan na owroe seti foe sani ben go na ini den „laatste dé” (2 Timotéus 3:1). Sosrefi toe na kownoekondre tirimakti ben bigin na ini 1914 (Openbaring 12:10-12). A ten dati Kristus ben kisi na makti foe bigin nanga na prati foe den „skapoe” èn den „bokoboko”. Gado santa jeje foe dat’ede ben bign ooktoe na wan krakti fasi foe wroko tapoe en getrow dienstknegti. (Teki gersi Tori foe den Apostel 2:16-21.) Na nomroe foe kownoekondre prékiman ben gro na ini wan pisiten foe soso dritenti jari foe sowan 4000 na ini 1918 go te moro leki 260.000 na ini 1948. Na ini a pisten dati V.S Braden, wan héleriman na ini na historia foe Gado tori, ben skrifi: „Jehovah Kotoigi ben wasi letterlek na grontapoe nanga na kotoigi foe den. . . . Na ini waarheid wi kan taki dati no wan enkri kerkigroepoe na ini grontapoe na ini na moeiti foe den foe panja na boen njoensoe foe na kownoekondre ben sori moro faja nanga hori doro leki Jehovah Kotoigi.”
12 Ma dati ben de so wan dritenti jari psa kaba! Now moro leki tin tron someni kownoekondre prékiman de na a heri grontapoe leki na ini a ten dati na ini 1948! San ben sa taki now dan foe na bigi foe na kownoekondrewroko, foe di Jehovah Kotoigi na a ten dati kaba, soleki Braden ben taki, „ben wasi a grontapoe nanga na kownoekondre-prékiwroko”? Nanga foeroe fertrow wi kan taki: Na ini na krosbé-krosbé ten di de na wi fesi foeroe, foeroe moro e kon ete!
13. Sortoe sani na alape na grontapoe e sori dati Jesaja 60:22 e kon troe?
13 Den bericht di kon foe moro leki 200 kondre e ferteri foe gro na ini a groepoe foe kownoekondreprékiman. Foe wi kan fanga na gro disi, meki njoen ofoe moro bigi Wachttoren-bijkantoro oso moe bow. Njoen masjien ben kon, njoen èn moro esi drukmethode, komputerising na wan bigi fasi èn wrokoman di de klarklari ini den Bethelfamiri di e kon moro bigi na a heri grontapoe. Ala na esi gro disi e sori wi krin dati leti na wi fesi wi e si na dek’ati pramisi e kon troe di langa ten psa kaba ben taki gi den getrow èn pasensi dienstknegti foe Gado: „Na pikinwan srefi sa tron doesoen èn na mendri wan wan makti naatsi. Misrefi, Jehovah sa meki a psa es’esi na en reti ten” (Jesaja 60:22). Degedege no de na ini na tori dati Jehovah Kotoigi de sreksreka na jejefasi èn na organisaatsi sé foe gi na moro bigi kotoigi foe Jehovah èn en kownoekondre na ini na heri grontapoe historia!
14. Foe san-ede wi kan taki dati Jehovah dienstknegti de moi a pasi srefsrefi foe tron „wan makti naatsi”?
14 Now moro leki toe nanga afoe miljoen actief kristen bedinari foe na boen njoensoe ben tai densrefi nanga moro leki 46.000 gemeente na a heri grontapoe. Di Jehovah Kotoigi na tapoe 29 maart 1983 ben memre na dede foe Kristus, joe ben abi 6.767.707 sma di ben kon makandra, èn di ben sori nanga dati belangstelling gi na kownoekondre foe Gado. Pikinmoro toe foe den dri foe ala naatsi na grontapoe no abi sowan bigi nomroe sma di e libi na ini! Jehovah dienstknegti di kon a wán de moi a pasi troetroe foe tron wan makti naatsi, aladi den de pikinso te joe sa teki den gersi nanga den sowan fo nanga afoe miljard sma di e libi na a heri grontapoe. — Mattéus 7:13, 14.
15. San ben psa na ini den wantoe jari di psa tapoe na kontren foe a tjari kon makandra foe sma di gersi skapoe?
15 Na laatste ten a tjari kon makandra foe sma di gersi skapoe e go moro esi. Reti-atisma e lon kon now na ini Jehovah organisaatsi foe anbegi en. Nanga dati den e abi wan prati na a span kontroe foe na pramisi foe Gado na ini Haggaï 2:7, pe Jehovah e taki: „Mi sa seki ala naatsi, èn den sani di sma angri sote foe abi foe ala naatsi moe tjari kon na ini; èn mi wani foeroe na oso disi nanga glori.” Den sakafasi sma disi di sma angri foe abi sote e taki gi Jehovah dienstknegti: „Wi wani go nanga oenoe bika wi ben jere taki Gado de nanga oenoe.” — Zacharia 8:23.
16, 17. Fa Jehovah sa gebroiki en pipel bifo a meki wan kaba kon na a ogri seti foe sani?
16 Gi a organisaatsi foe Jehovah di wi kan si nanga ai èn di e bradi e kon moro bigi a ten e doro dati a sa gebroiki en na tapoe wan tra kraktifasi: foe taki en laatste kroetoe boskopoe gi na seti foe sani. Disi wi ben sa kan teki gersi nanga na ten di den Israëlsma, di ben waka sowan siksi dé kaba baka makandra wantron wan dé lontoe Jericho, ben kisi na komando: „Na tapoe na dé di foe sébi oenoe moe hari lontoe na foto sébi tron èn den priester moe bro na tapoe den toetoe . . . Te oenoe jere na toetoebabari, dan na heri pipel [moe] opo wan tranga fetibabari; èn na skotoe foe na foto moe fadon na gron.” Na tapoe na laatste dé a wroko soboen ben doe sébi tron moro esi! Dan a babari ben de foe jere, a pipel ben opo wan fetibabari „èn drape na skotoe ben fadon na gron.” — Jozua 6:2-5, 20.
17 Na ini a ten disi den „safoe” waarheid watra e tjari go a den sma foe gi den dek’ati foe drai go na Jehovah. Ma heri esi a dé sa doro pe na boskopoe sa meki kon „tranga”. Na kaba e kon foe na heri seti foe sani foe Satan di sa meki bekenti. Den safoe waarheidwatra sa kon tron ijs èn tron tranga waarheid agra. Den laatste kroetoeboskopoe disi sa de so krakti dati den ben sa kan agersi nanga wan „bigi alen foe agra di ibri ston ben abi na hebi foe wan talent” èn dati wani taki kefarlek bigi. Foe dat’ede meki a tanapoe na ini Openbaring 16:21: „Na plaag foe en ben de aparti bigi.”
„Wan makti naatsi” e foeroe na grontapoe
18. (a) O troe a kownoekondre foe Gado de? (b) San na kownoekondre sa doe te foe kaba, soleki e kon na krin na ini Dan. 2:35?
18 Na kownoekondre foe Gado di Jehovah Kotoigi na a fosi presi de getrow na en, séker de wan troetroe tiri. Kristus nanga en 144.000 kompe de den hemel tiriman foe en. A abi troetroe wet èn wan „gronwet” — a Wortoe foe Gado. Na troetroe tiri disi abi ooktoe troetroe onderdaan di e tron wan naatsi di e gro dé foe dé, miljoenmiljoen onderdaan di tjari kon na wán leki wan pipel. Èn a bijbel e taki na fesi taki na messiaans kownoekondre disi, baka te a masi broko èn tjari kon na wan kaba ala grontapoe tiri, ’sa foeroe na heri grontapoe’ (Daniël 2:35). Fa disi sa doe kon?
19, 20. Fa Jehovah Kotoigi sa tron wan „makti naatsi” na wan moro bigi fasi?
19 Den sma di sa psa libilibi Armageddon sa bigin nanga na bow foe na paradijs di Jezus ben taki foe en na ini Lukas 23:43 (Openbaring 16:14, 16). Baka wan pisten „wan opobaka sa de dan foe den regtvaardikiwan èn den onregtvaardikiwan” (Tori foe den Apostel 24:15). Na ini na doesoen jari tiri foe Kristus na ini kownoekondre makti dan ala sma sa kisi na okasi foe sori taki den teki na sé foe na kownoekondre tiri. Den wan di no wani wan regtvaardiki tiri, sa poeroe na pasi (Openbaring 20:6, 11-15). Na a kaba foe na doesoen jari dan ibri wan sma di e libi na grontapoe soboen sa de wan anbegiman foe Jehovah di gi ensrefi abra foe dini Jehovah wawan! Dan wi kan taki dati Jesaja 11:9 sa kon reti troetroe: „Na grontapoe séker sa foeroe nanga na sabi foe Jehovah soleki den watra e tapoe na gron foe na se.”
20 Fa dati sa de wan toemsi moi ten! Iniwan sma di joe sa miti sa de wan anbegiman foe Jehovah nanga „wán prakseri”, „wan marki”, „wán mofo”. Miljardmiljard foe den sortoe anbegiman di tjari kon na wán èn di abi libisma volmaaktifasi sa foeroe na paradijsgrontapoe. Dan troetroe den sa de „wan makti naatsi”, na moro makti naatsi di sma ben sabi oiti na grontapoe. Nono, wan libismafamiri di tjari kon na wán no de soso wan dren, ma wan bigi pisi kaba tron wan troetroe sani! Joe de wan pisi foe en?
Aksi foe loekoe den sani ete wan tron
◻ San e psa nanga a pipel foe Jehovah now di na grontapoe e kon broeja moro nanga moro?
◻ Sortoe bigi pratiwroko e doe now?
◻ Foe san-ede wi kan abi na fertrow dati na wánfasi foe Jehovah dienstknegti sa tan?
◻ Fa Jehovah organisaatsi di wi kan si nanga wi ai e gro kon tron wan „makti naatsi”, èn disi sa waka go tron san?
[Prenki na tapoe bladzijde 7]
Soleki wan herder e prati den skapoe foe den bokoboko, na so Jezus Kristus di de nanga Kownoekondre makti e prati den libisma now
[Prenki na tapoe bladzijde 8]
Bethel-oso nanga fabriki soleki den disi den ben bow ofoe ben meki den kon moro bigi foe meki na prékiwroko foe na kownoekondre gro
Ebina, Japan
Abidjan, Ivoor Kust
Ingleburn, N.S.W., Australia
Enebakk, Noorwegen
Ajalvir, Spanjoro kondre