’Wánfasi foe jeje’ na ini wan ipi di e gro es’esi
1. (a) Sortoe rai di fiti èn di e go foe wánfasi Paulus ben skrifi na ini Efesesma 4:1-4? (b) Foe san-ede a rai dati fiti ooktoe a ten foe wi?
DI NA apostel Paulus ben skrifi gi den kristensma foe na gemeente ini Efese, a ben poti krakti na tapoe na wánfasi èn a ben gi den tranga foe de nanga sakafsi, foe ferdrage makandra na ini lobi èn foe feti na baka „na kibri foe na wánfasi foe na jeje na ini na banti foe vréde di e tjari kon na wan” (Efesesma 4:1-6). Paulus ben de na ini Efese moro leki toe jari èn a ben sabi den prakseri foe den brada drape di ben kenki foe makandra. A ben sabi toe dati den krakti di Jehovah ben meki e wroko a mindri en pipel foe tjari kon na wan, ben kan wini den difrenti disi, èn Paulus ben gi den dek’ati foe firi den krakti disi es’esi èn foe handri na ini akroederi nanga den. Na ini a ten foe wi a no de mendri prenspari foe doe disi. Fa so? Foe di sma „foe ala naatsi nanga lo èn pipel nanga tongo” e tjari kon na makandra na ini bigi nomroe na ini Jehovah organisaatsi. — Openbaring 7:9, 10.
2. Fa Jehovah e sorgoe taki na wánfasi foe en organisaatsi di wi e si e tan?
2 Na ini akroederi nanga en prakseri Jehovah ben tjari en dienstknegti kon na wan „leki skapoe ini a koi” (Micha 2:12). A ben gi den na fanowdoe tiri foe sorgoe taki na wánfasi dati tan. Fa? A ben poti persoonlek en égi Manpikin, Jezus Kristus leki ede foe na kristen gemeente. Ini a bijbel Jehovah meki den skrifi finifini foe en prakseri èn nanga jepi foe en organisaatsi di wi kan si a e tiri den moeiti foe en dienstknegti ini pasi di de ini akroederi nanga na prakseri dati. Na wan sani di e meki wi bribi kon tranga, foe loekoe bewijsi foe na tiri disi foe Gado na ini ten di no psa so langa ete foe sensi 1919.
Kon de srekasreka foe gi kotoigi na ini na heri grontapoe
3. Sortoe wroko foe na boen foe den kownoekondre erfgenaam a bijbel ben taki a fesi gi na bosroiti foe na seti foe sani?
3 Na ini wan profétitori di e go foe na bosroiti foe na seti foe sani, a bijbel ben taki a fesi taki den „wan di ben teki poeroe” èn di ben de panjapanja na alape ben sa tjari kon baka na ini wan organisatoris wánfasi èn dati den laatste memre foe na kownoekondreklasse ben sa koti kon na wan (Mattéus 24:31; 13:37-43, 47-50), Fa disi ben doe kon?
4. (a) Sortoe wrokosani di wi kan firi Kristus nanga den engel ben gebroiki foe meki na tjari kon makandra èn koti foe na fikapisi feni presi? (b) Sortoe toe fasi Jehovah ben gebroiki dja foe dat’ede foe tjari en dienstknegti kon na wan?
4 Leki fa na bijbel e taki dan Kristus ben sa seni en engel go doe disi. No wan sma na grontapoe kan si den jeje mekisani disi e wroko, ma a krakti foe den wroko foe den de krin foe si tapoe Jehovah organisaatsi di joe kan si nanga ai. Baka na ogri-ati ferfolgoe di Jehovah Kotoigi ben psa ini na ten foe na Fosi Grontapoe feti, den ben kisi njoen krakti nanga jepi foe Wachttoren-artikel (Ingrisitongo) di ben tjari kon na doro na ini 1919 èn di ben abi leki nen „Blesi foe den wan di no e frede”. Jehovah ben abi moro wroko gi den foe doe. Tapoe na congres di ben hori na ini a jari dati na Cedar Point (Ohio), Amerkankondre dan den ben taki foe wan njoen boekoe ini na lezing „Meki na kownoekondre bekenti”, namkoe na Gowtoe pisiten (di wi sabi now leki Ontwaakt!). A ben de a prakseri dati na tijdschrift disi ben sa panja na ala presi foe sori den sma tapoe na „Gowtoe pisiten foe na glori tiri foe na Messias”. Ala „den wan di ben teki poeroe” ben kisi dek’ati foe teki prati na a wroko disi. Na ini 1922 agen wan congres ben hori na Cedar Point, dan na krakti dek’ati ben gi: „Préki, préki, préki na kownoe nanga en kownoekondre.” Na ini 1925 a wroko ben kisi agen wan krakti poesoe, foe di now, na ini Openbaring kapitel 12, den ben kon ferstan san na wroko foe Jehovah dienstknegti baka a feti wani taki. Ini 1931 ini wan resolutie tapoe wan congres ini Columbus ini Ohio Amerkankondre a tapoe féfitenti congres di ben waka baka makandra na alape foe grontapoe, den ben teki morofara na nen Jehovah Kotoigi, sodati den kristen disi ben poti aparti foe ala sekte foe na kristenheid èn na krakti ben poti na tapoe a wroko di Gado ben gi den (Jesaja 43:10-12). A so wan fasi Jehovah ben tjari en dienstknegti kon na wán (1) foe di a ben gi den wan progressief ferstan foe na bijbel èn (2) foe poesoe den foe doe wroko faja leki en kotoigi.
5. San ben doe kon na ini 1935 leki wan bakapisi foe na wánfasi wroko foe den na ondro na tiri foe Jehovah?
5 Aladi den ben de pikin ete ini nomroe tokoe na wroko foe den na ondro na tiri foe Jehovah foe tjari sani kon na wan ben meki dati na kownoekondre boskopoe ben préki te na den kaba foe na grontapoe. Na mindri 1921 nanga 1935 den ben prati 205.217.917 boekoe nanga brochure ini wantoe tintin tongo. Ooktoe hondrohondro miljoen traktaat ben prati èn den ben meki gebroiki fajafaja foe radio. Disi ben abi leki bakapisi dati ini na laatste pisi foe na tjari komakandra foe na kownoekondre-klasse doesoendoesoen moro ben gi densrefi abra, ben teki dopoe èn ben kisi salfoe nanga santa jeje. Ma na publiki diniwroko foe den no ben kon na wan kaba. Jehovah ben sreka den safrisafri tapoe san ben de a den fesi ete e kon.
Kisi tranga nanga a gens di ben de a den fesi e kon
6. Tapoe san Jehovah ben sreka en salfoe dienstknegti na a ten dati moro ete?
6 Den féjanti ben panja den salfoewan na ini a ten foe na Fosi Grontapoefeti. Moro takroe ati moeiti ben doe foe broko na wroko foe den te na gron. Ma Jehovah ben tranga den sodati noiti moro den ben sa tron wan ipi di ben panja. Fa dati ben psa?
7. Na ini na ten foe na bow njoen foe na tempel, fa Jehovah ben meki en pipel ben man foe go na fesi na ini wánfasi na fesi foe gens?
7 Di gens ben hendri na bow njoen baka foe Jehovah tempel baka na drai baka foe den katiboman foe Babylon, Jehovah ben meki en pipel kisi tranga foe di a meki proféti kon — takiman di joe ben kan si èn ben meki den gi boskopoe di ben de na a joisti ten. Moro fara, Jehovah égi jeje ben poeroe den hendri di ben gersi bergi èn ben meki en dienstknegti man doe wroko leki wan wánfasi organisaatsi. — Haggaï 1:1-8; Zacharia 4:1-14.
8. Na sortoe fasi Jehovah ben tranga den brada na ini na fosi jarhondro?
8 Di den troe anbegiman na ini na fosi jarhondro ben kisi foe doe nanga gens, Jehovah ben meki den apostel skrifi brifi di ben gi tiri nanga dek’ati. Na ini den brifi disi na moro prenspari soetoe fajaman foe ala gens ben tjari krin kon na fesi leki Satan Didibri, di abi leki marki foe stop na préki foe na boen njoensoe foe meki wan kefarlek bigi ferfolgoe kon ofoe foe troeboe na wánfasi foe den gemeente nanga na krakti foe falsi brada. Na sofasi ala sma ben kon jepi foe si krin sortoe stré ben de ini na tori (Efesesma 6:10-13; 2 Korintesma 11:12-15; 1 Petrus 5:5-8). Na wan lobifasi den ben kisi dek’ati ’foe tanapoe na ini wan jeje, wan foe sili foe e stré sé na sé gi na bribi foe na boen njoensoe, sondro foe meki den gensman foe den skreki den na no wan fasi’. — Filipisma 1:27, 28.
9. (a) Fa Jehovah na ini ten di no psa so langa ete ben gi sowan sortoe jepi? (b) Gi wan toe eksempre foe disi.
9 Na ini den ten disi di no psa so langa ete Jehovah e tan gi en dienstknegti den fanowdoe jepi. A e doe disi nanga jepi foe na „getrow èn koni srafoe”, na fika pisi di de now na grontapoe èn di Jezus Kristus de na ede foe den, èn a jepi disi e kon na a reti ten (Mattéus 24:45-47). Den jepi den lésiman foe na Wachttoren (Ingrisi) foe si dati Gado kownoekondre ben e wroko kaba sensi 1914 na ini hemel èn dati te joe e loekoe en boen soso toe organisaatsi de, Jehovah organisaatsi nanga Satan organisaatsi. Krakti ben poti na ini 1929 na tapoe na ferprekti foe wan kristen foe poti a gi jesi na a wet foe Gado moro leki den wet foe libisma ala ten. Tapoe wan progressieffasi kenki ben tjari kon te leki na ini 1938, ala den opziener di ben poti na ini na gemeente ben poti na tapoe wan theocratisfasi, na presi dati den memre foe na gemeente ben tjari den sten foe sori soema moe tron opziener. Nanga ala den sani disi Jehovah dienstknegti ben tjari kon na wan èn ben kisi tranga èn fa ala den sani disi ben psa na precies na joisti ten!
10. (a) Fa na jepi ben de precies na a joisti ten? (b) Sortoe jepi Jehovah ben gi den moro fara di na ferfolgoe ben kon moro bigi?
10 Na ini den jari ’30 èn na ini a ten foe na heri di foe Toe Grontapoe feti Jehovah Kotoigi na ini foeroe kondre ben kisi hebi ferfolgoe foe psa. Doesoendoesoen foe den den ben tjari go na fesi kroetoe. Na ini tintin kondre lanti ben tapoe na wroko foe den. Foeroe foe den den ben sroto foe foeroe jari na ini totalitair concentratiekampoe. Di na ferfolgoe disi ben opo ede Jehovah ben tranga en dienstknegti moro ete. Na ini 1938 den ben taki makandra na ini den Wachttorenstudi foe den djoe na ini den dé foe koningin Esther no wawan ben moe stré foe den libi ede, ma ben moe opo go feti nanga den féjanti foe den, èn den ben moe loekoe fa den disi na ini a ten disi ben moe doe na ini na jeje feti. Na ini artikel di ben go foe „Na smelti-onfoe”, di ben kon na ini 1934 (na ini Bakratongo a ben de na kaba foe 1934 èn bigin 1935) den ben gebroiki na tori foe den dri Hebrewman na ini na faja onfoe foe gi Jehovah Kotoigi na faste bosroiti sodati nanga den heri fertrow na ini Jehovah den ben sa tanapoe faste (Daniël 3:17, 18, 28). Jehovah ben wani ete wan bigi wroko ben moe doe, èn a no ben sa gi pasi taki Satan gens a wroko disi.
Na tjari komakandra foe wan „bigi ipi” di sa psa libi „na bigi benawtoe”
11. (a) Jehovah ben sreka en dienstknegti nanga sortoe moro bigi prékiwroko? (b) Kari wantoe foe den stap ini a programma foe sreka sani di ben de na ondro na tiri foe Gado?
11 Di na tjari kon makandra foe na „pikin ipi” kownoekondre erfgenaam ben kon na en kaba, Jehovah ben poti en prakseri na tapoe wan moro bigi wroko, a leri foe wan moro „bigi ipi” di ben sa psa libilibi na „bigi benawtoe” foe libi na ini wan paradijs di sa kon baka na grontapoe. Na so na president foe na Wachttoren Genootschap na ini 1919 ben hori wan lezing na ini Los Angelos (California, Amerkankondre) di ben go foe na tori di bakaten hondrohondro takiman ben taki foe en wan pasi ete nanga a titel „Grontapoe kon na wan kaba, miljoenmiljoen sma di e libi now no sa dede noiti”. Na ini 1923 Na Wachttoren (abi foe Ingrisitongo) ben sori moro fara a tapoe taki den „tra skapoe” foe Johannes 10:16 ben de densrefi wan leki den „skapoe” na ini na agersitori foe Jezus foe den skapoe nanga den bokoboko, èn dati den ben bigin foe kon kaba na fesi. Na ini 1931 den tjari kon na krin dati na ini Ezechiël 9:1-11 den ben agersi den leki sma di ben kisi na tapoe den fesi-ede wan marki foe tan na libi. Na ini 1932 ben kon na krin taki na srefi klasse disi ben agersi nanga Jonadab di ben erken o prenspari a de foe gi Jehovah wawan anbegi. Na programma disi di Jehovah ben tiri foe sreka sma a fesi ben doro en hémarki na 1935 di tapoe wan congres na ini Washington D.C. ben sori taki ooktoe „bigi ipi” foe Openbaring 7:17-17 ben de na klasse dati foe grontapoe, èn baka dati hondrohondro foe den sma di ben de drape ben sori taki den ben de foe na groepoe dati. Na ondro na tiri foe Jehovah jeje na tjari komakandra foe na groepoe dati ben go now na fesi.
12. (a) Foe san-ede a no ben tjari pratifasi kon di sma nanga wan grontapoe howpoe ben kon moksi nanga den sma di abi wan hemel howpoe? (b) San ben de na bakapisi te leki now foe na wánfasi moeiti foe den nanga na blesi foe Jehovah?
12 Na tjari kon moksi foe wan grontapoe groepoe nanga den sma di abi wan hemel howpoe, ben meki pratifasi kon na ini na organisaatsi? Kwetkweti. Soleki Jezus ben taki na fesi, dan den ben tron „wan ipi”, nanga en leki den ’wan herder’ (Johannes 10:16). Den e ferstan taki na howpoe di den abi, awinsi sortoe groepoe den de na ini, de wan bewijsi foe na no-ferdini boenfasi foe Jehovah, dati den alamala abi na grani nanga frantwortoe foe de kotoigi foe Jehovah nen nanga kownoekondre èn dati na srefi kristen markitiki foe getrowfasi de gi den alamala. Den de troetroe wan pipel di tjari kon na wan. Makandra den ben poti den ede na wan foe gi kotoigi foe na kownoekondre na tapoe na heri grontapoe pe libisma e libi, nanga leki bakapisi wan bigi tjari konmakandra foe sma. Baka na fosi grontapoefeti soso wantoe doesoen prékiman ben teki prati na a publiki préki foe Jehovah kownoekondre. Pas na ini 1941 moro leki wan hondro doesoen prékiman na a heri grontapoe ben poti den skowroe na ondro na wroko disi. Now na nomroe foe publiki barwrokoman di tjari kon na wan foe na kownoekondre boskopoe de, ala nanga ala 2.652.323. A ben psa soleki Jehovah nanga jepi foe na proféti Jesaja ben taki na fesi: „Na pikinwan srefi sa tron doesoen, èn na mendriwan wan makti naatsi. Misrefi, Jehovah sa meki a psa es’esi na en reti ten”. — Jesaja 60:22.
Moeiti di e bondroe kon na wan foe sorgoe foe den fanowdoe sani
13. Sortoe krakti na gro disi ben abi na tapoe den wroko foe den drukkerij foe na Wachttoren Genootschap èn fa den ben sorgoe na ini san ben de fanowdoe?
13 Nanga na bigi gro foe na nomroe foe Kotoigi foe Jehovah, meki wan bigi fanowdoe ben kon foe moro bigi oso nanga sani foe wroko. Na ini den jari 1920 den boekoe di e go foe bijbel èn di Jehovah Kotoigi ben gebroiki ben e druk moro foeroe na ini Brooklyn (New York, Amerkankondre). Now den boekoe disi e meki toe na ini sowan dritenti tra kondre. Friwani bijdrage e sorgoe na ini den fanowdoe sani, èn te den no abi nofo moni na ini wan kondre, dan na mankeri disi e tapoe nanga jepi foe jepi foe tra kondre. — Teki gersi 2 Korintesma 8:14.
14. Fa sensi 1935 den ben sorgoe gi den fanowdoe njoen kownoekondre-komakandrapresi?
14 Na ini na srefi jari di den ben kon sabi na „bigi ipi” leki wan grontapoe klasse, dan J. F. Rutherford, na president foe na Wachttoren Genootschap na a ten dati ben kari wan komakandrapresi foe Jehovah Kotoigi na Hawaï Kownoekondre-komakandrapresi. Foe na ten dati Jehovah Kotoigi ben gebroiki geregeld a nen disi gi den komakandra-presi foe den. Foe 1940 te now na nomroe foe gemeente foe 5118 gro kon tron moro leki 46.000. Foe kan fanga na gro na a heri grontapoe doesoendoesoen njoen kownoekondre-komakandrapresi ben bow èn ooktoe bigi congreshal. Disi ben aksi moeiti di ben bondroe kon na wan, na ini a tori foe moni èn den bowwroko srefi. A pipel foe Jehovah di tjari kon na wan ben jepi foe doe a wroko disi nanga den heri ati!
15. Foe san-ede meki a de prenspari taki wi abi boen presi foe ori wi komakandra?
15 Na nomroe foe sma di lon go na den Kownoekondre-komakandrapresi foe Jehovah Kotoigi de now moro bigi leki oiti wan ten èn e gro es’esi. Alasma di wani kisi leri troetroe foe Jehovah pasi, foe kan waka troetroe na tapoe den wi e bari wan switikon (Jesaja 2:2, 3; Hebrewsma 10:23-25). Wi wani de séker ooktoe dati boen faciliteit de foe sorgoe gi den sma di e sori warderi gi na seti disi di Jehovah ben meki. Fa wi kan doe disi?
16. (a) Fa wi moesoe prakseri foe den wroko nanga moni, te wan njoen kownoekondre-komakandrapresi de fanowdoe gi na gemeente foe wi di e gro, awinsi wi o gebroiki ofoe no gebroiki na njoen komakandrapresi disi? (b) Fa na ini kontren nanga wan boen gro, pe ososani nanga gron diri, tog wi ben kan sorgoe foe njoen kownoekondrekomakandrapresi?
16 Aladi wi e hori komakandra ini foeroe gemeente di ben de na difrenti presi, tokoe wi de soso „wan ipi”, wán pipel di tjari kon na wan. Belangstelling gi na gro foe na soifri anbegi èn lobi gi wi brada nanga sisa sa tjari wi go so fara foe gi jepi na ala sortoe fasi, awinsi pe disi de fanowdoe. Na fanowdoe de foe bow wan njoen komakandrapresi foe di na nomroe foe gemeente gro di e gebroiki wan bepaalde kownoekondre-komakandrapresi? Fa a ben a de wan moi sani foe den sma di e tan gebroiki na owroe zaal nanga den sani na ini, gi ala sortoe jepi na a bow foe wan njoen komakandrapresi gi na gemeente di moe feni wan tra tanpresi! Na ini son kontren brada e de foe jepi na a bow foe tra komakandrapresi alaten te fanowdoe de foe sowan komakandrapresi. Nanga wan boen planning èn moeiti di bondroe kon na wan a de mogelek ini wan sjatoe pisiten soso toe dé ofoe moro mendri foe bow foeroe moro njoen komakandrapresi. Na ini son kondre den prijs di e fré go na loktoe foe oso na ini fotokontren ben meki a de wan sani di de onmogelek gi aparti gemeente foe abi moni gi den fanowdoe komakandrapresi. Ma san wan gemeente no kan doe kan doe kon nanga moeiti di bondroe kon na wan. Fa wi e doe te wi e kisi foe jere foe afersi foe gi jepi?
17. Sortoe bijbelgronprakseri abi foe doe nanga na fasi fa wi kan sorgoe foe den fanowdoe disi?
17 Di den Israëlsma ben de ini na okasi foe gi bijdrage foe na bow foe Jehovah santa tabernakel, na ati foe den di ben de klari ben poesoe den foe gi moro leki ben de fanowdoe (Exodus 35:5-9; 36:5-7). No wawan den bigi bijdrage foe jepi na ini a ten disi wi e feni wan moi sani. Jezus ben prijse na deklari foe gi sani di ben kon foe na pikin bijdrage foe wan póti weduwe (Lukas 21:1-4). Na apostel Paulus ben skrifi foe den sani di ben seti gi kompe dienstknegti foe Gado na skinfasi: „Efoe a de klari foe doe sani de fosi, dan a de wan switi sani akroederi san wan sma abi, no nanga san wan sma no abi . . . Nanga a tjari foe sani kon de a srefi dan a toemsi foeroe foe na a momenti disi ben sa tapoe na mankeri foe den . . . neleki fa skrifi: ’A sma di ben abi foeroe, no ben abi toemsi foeroe, èn en di ben abi pikinso, no ben abi toemsi pikinso’” (2 Korintesma 8:12-15). Wi ben kan meki a gronpraksei disi tjari wi te ai go foe a wroko makandra foe meki njoen nanga moro bigi Kownoekondre-komakandrapresi kon pe disi ooktoe sa sori taki a de fanowdoe, ofoe wi de persooniek ini a gebied dati e libi ofoe no e libi persoonlek drape.
18. (a) San ben de na bewégi foe ati foe wi Verklaring foe wánfasi tapoe den district congres di no ben hori solanga psa kaba? (b) San ben de na prakseri foe na fosi punt foe na verklaring dati? (c) Foe na tweede punt? (d) Foe na derde punt? (e) Nanga sortoe begi na verklaring dati ben tapoe nanga reti?
18 Na sani di e marki Jehovah organisaatsi nanga ’wánfasi foe jeje’, èn wi abi persoonlek na grani foe de wan libi kotoigi. Tapoe den congres foe wi di no psa solanga ete na ala presi na a grontapoe wi ben gi wan verklaring di ben de foe a ten disi, èn di druk na a tra bladzijde. Wi e gi joe tranga foe loekoe na Verklaring dati, sodati joe de ini na okasi agen foe loekoe na sortoe fasi joe kan tjari den punt di de na ini kon ini joe libi na ini den dé di de na wi fesi.
Fa a piki foe joe de?
◻ Fa Jehovah ben sorgoe taki na wánfasi foe en dienstknegti ben tan?
◻ Fa Jehovah ben tjari en afersi so taki ooktoe den laatste memre foe na kownoekondre-klasse ben sa tjari kon na wan?
◻ Fa Jehovah Kotoigi ben kisi tranga gi na hebi ferfolgoe di ben sori ensrefi na ini na di foe toe Grontapoe Feti?
◻ Fa Jehovah ben sreka en kotoigi na tapoe na tjari konmakandra di ben bigin na ini 1935?
◻ Fa wi kan jepi sodati sani seti taki tranga fanowdoe kownoekondrekomakandrapresi kan doe kon?
[Faki na tapoe bladzijde 10]
VERKLARING FOE WÁNFASI
Wi, Jehovah Kotoigi di kon makandra na tapoe „Wi kownoekondre wánfasi” districtcongres, wani tjari wi firi kon na fesi foe dipi warderi gi ala sani san Jehovah ben doe gi wi. Wi de grantangi srefsrefi gi na ofrandi foe en lobi Manpikin èn gi a teki di a teki wi leki wan pipel gi en nen.
Foe dat’ede wi e VERKLARI taki wi teki na faste bosroiti (1) foe hori na toemsi bigi wánfasi di Jehovah ben tjari wi kon na ini leki skapoe ini en koi, èn foe fertrow a tapoe en tiri sondro foe poti wan kondisi èn na tapoe na tiri foe en santa jeje, (2) èn foe feti alaten foe hori wan toemsi moi libi nanga waka na mindri naatsi èn foe préki fajafaja na kownoekondre boskopoe gi ala sma di wani arki (3) foe loekoe boen gi ibri fasi foe hari komoto foe na afersi foe Jehovah, awinsi soema de toe di o proberi foe wroko na tapoe wi na wan ogrifasi.
Èn WI E BEGI dati wi kan de waarti na lobi di Jehovah ben sori gi wi, èn kan warderi alaten a grani foe tjari en foe meki na boen njoensoe foe na kownoekondre na ondro Kristus bekenti.
[Prenki na tapoe bladzijde 8]
Kownoekondre-komakandrapresi kan kon, dan moeiti di bondroe kon na wan de fanowdoe, na a sé foe moni nanga bow-wroko