Gado Wortoe abi libi
O prenspari begi de gi joe?
Sowan 2500 jari psa kaba Darius, na kownoe foe den Meden, ben poti Daniël leki wan foe den moro prenspari héman foe en kownoekondre. Darius ben abi someni warderi gi na wroko foe Daniël, dati a bijbel e ferteri fa a „ben abi na prakseri foe poti en abra na heri kownoekondre”. Den tra héman ben kon djaroesoe èn ben meki wan plan foe tjari Daniël kon na ini moeilekheid. Na plan dati ben abi foe doe nanga begi, èn dati e meki na aksi e kon a fesi: O prenspari begi de now gi wi?
Den féjanti foe Daniël e go na kownoe Darius èn den aksi en foe poti en nen na ondro wan bosroiti, „dati ala sma na ini na pisten foe dritenti dé di begi na wan Gado ofoe libisma boiti joe, o kownoe, moe trowe go na ini na lew-olo”. Darius no e ferstan san de a baka na bosroiti èn a e poti en nen na ondro. Efoe joe ben de na ini na ten dati wan dienstknegti foe Jehovah Gado, joe ben sa stop dan foe begi na en? Sodra Daniël ben jere foe na bosroiti, a e go na ini en oso foe begi na Gado. Neleki den tra dé a e begi dri tron na wan dé. Dan en féjanti e go es’esi na Darius foe ferteri dati Daniël no e hori ensrefi na a wet.
Now Darius e sari dati a ben poti en nen na ondro na bosroiti èn a e prakseri sani foe loesoe Daniël. Ma a neti dati den féjanti foe Daniël e kon na Darius èn den taki: „Sabi, o kownoe, dati na wet na den Meden nanga Perzen, de dati sortoe verbod ofoe wet ooktoe di na kownoe srefi ben gi krakti, no kan kenki moro.” Soboen Darius moesoe foe gi na komando dati Daniël trowe go na ini na lew-olo.
Darius broeja so, dati a no kan sribi a neti dati. Na tra mamanten a e opo froekoe kaba èn a e hari go na a lew-olo. Efoe a kon na ini na birti, a e kari nanga wan sari sten: „O Daniël, knegti foe na libi Gado, na Gado foe joe di joe e dini nanga wan faste bosroiti, kan ferloesoe joe foe den lew?” Wantronwantron a Daniël e piki: „O kownoe, mi égi Gado ben seni en engel, èn ben tapoe den mofo foe den lew èn den no doe mi wan ogri.”
Fa Darius ben bréti! ’Poeroe Daniël foe na olo’, a e komanderi. Èn san na kownoe e doe bakadati nanga den sma di ben meki na plan foe den lew njan Daniël? Now a e meki den iti den ogri man dati na ini na lew-olo. Bifo den doro a gron ete foe na olo, den lew ben graboe den. Baka dati Darius e skrifi gi na heri pipel ini en kownoekondre foe taigi den taki den moe abi respeki gi na Gado foe Daniël, foe di En e doe bigi wondroe. Ja, Jehovah ben loesoe Daniël poeroe foe den lew. — Daniël 6:1-28.
Joe abi na srefi sortoe bribi ini Jehovah leki Daniël? Joe e bribi taki Gado te a meki wan kaba kon na a ogri seti foe sani disi, a sa loesoe jope efoe joe tan getrow na en? Dan no wan enkri wet ofoe tapoe-skreki di komoto foe libisma kan meki a psa dati joe tapoe foe dini en.