Darius — Wan kownoe di abi firi gi retidoe
WAN pôpi kownoe ben djaf wan leisi gi den bow-wroko di a ben doe: „Di mi ben meki wan skotoe lontoe Babilon, mi ben meki wan tranga skotoe na a owstoe sei. Mi ben diki wan bradi nanga dipi gotro . . . mi ben bow nanga asfalt èn nanga ston wan kefalek tranga skotoe di, neleki wan bergi, no wan sma kan poeroe na en presi.” Ija, Nebukadnesar, a kownoe foe Babilon, ben doe wan kefalek bigi bow wroko èn a ben wroko tranga foe meki na edefoto foe a gran tirimakti foe en kon moro tranga. Ma a foto foe Babilon no ben de wan foto di no wan sma kan wini, soleki fa a kownoe ben prakseri.
A boeweisi foe disi ben kon na tapoe 5 oktober 539 b.G.T. Makandra nanga a legre foe Media, di Cyrus II, a tiriman foe Persia, ben wini Babilon èn a ben kiri Bèlsasar, a tiriman foe den Kaldewsma. Soema ben sa tron a fosi tiriman now foe a foto disi di djonsrode den Mediasma nanga den Persiasma ben wini? A profeiti foe Gado, Danièl di ben de na ini a foto na a ten di a foto fadon, ben skrifi: „Darius a Mediasma srefi ben kisi a kownoekondre, di a ben abi so wan siksitenti na toe jari.” — Danièl 5:30, 31.
Soema ben de Darius? Sortoe tiriman a ben de te foe kaba? Fa a ben handri nanga a profeiti Danièl di ben de na ini katibo na Babilon moro leki 70 jari langa?
WAN KOWNOE DI HISTORIA NO SKRIFI FOEROE FOE EN
Pikinso historia bodoi de foe Darius a Mediasma. Te joe loekoe en boen, dan den Mediasma no libi no wan skrifi tori na baka. Boiti dati, den hondrohondro doesoendoesoen ston pe sani skrifi na tapoe èn di ben poeroe na gron foe a Mindri Owstoesei, no e gi wan krinkrin historia di lai nanga sani di sma no sabi ete. Tra grontapoe sani di skrifi èn di tan no de so foeroe èn den prati so wan wán hondro jari noso moro foe den sani di abi foe doe nanga Darius.
Ma tokoe, boeweisi e sori taki baka di a tiriman foe Persia, Cyrus II, ben wini Ekbatana, na edefoto foe den Mediasma, dan a kownoe ben man meki den Mediasma de loyaal na en. Baka dati, Media nanga Persia ben feti leki wán man na ondro a tirimakti foe Cyrus II. A skrifiman Robert Collins ben skrifi ini en boekoe The Medes and Persians foe a matifasi foe Media nanga Persia: „Te vrede ben de dan den Mediasma ben abi a srefi posisi leki den Persiasma. Foeroetron den Mediasma ben kisi hei posisi na lanti kantoro èn den ben tron tiriman na ini a legre foe Persia. Dorosei sma ben taki foe den Mediasma nanga den Persiasma, èn den doroseikondre no ben meki wan difrenti na mindri a wan di ben wini èn a wan di ben lasi.” Na so Media nanga Persia ben tron wán, foe meki a Gran Tirimakti Media-Persia. — Danièl 5:28; 8:3, 4, 20.
Den Mediasma seiker ben prei wan bigi ròl di den ben trowe Babilon. Den Boekoe foe bijbel e kari „Darius a manpikin foe Ahasveros foe a siri foe den Mediasma” leki a fosi kownoe foe a Media-Persia Gran Tirimakti, di ben tiri abra Babilon (Danièl 9:1). A kownoe makti foe en ben gi en pasi foe meki wet „soleki fa a wet foe den Mediasma nanga den Persiasma e taki, di sma no man poeroe moro” (Danièl 6:8). Den sani di bijbel e taki foe Darius e sori wi pikinso sortoe sma Darius ben de, èn so srefi foe san ede so pikinso bodoi foe en skrifi na ini grontapoe.
A E FENI DANIÈL BOEN
Sjatoe baka di Darius teki makti na Babilon, a ben seti „wán hondro nanga toetenti satraap di ben moesoe tiri a heri kownoekondre”, na so bijbel e taki, èn „na den tapoe a ben poti dri hei tiriman, foe soema Danièl ben de wán foe den” (Danièl 6:1, 2). Ma den tra tiriman no ben lobi a posisi foe Danièl kwetikweti. Sondro tweifri, a soifri retifasi foe Danièl ben meki taki sma no ben kan doe kroektoedoe, èn soleki fa a sori, dan dati ben meki den kisi atibron. Den hei tiriman ben moesoe abi bigi-ai toe, foe di a kownoe ben feni Danièl boen èn ben prakseri foe poti en leki a fosi minister.
Foe di den toe tiriman nanga den satraap ben howpoe foe tjari wan kaba kon na a tori disi, meki den ben seti wan trapoe di abi foe doe nanga wet. Den ben go na fesi a kownoe èn ben aksi en foe poti en nen na ondro wan ordroe di ben sa meki taki no wan sma ben sa mag „begi na iniwan gado noso libisma”, ma leki gi Darius wawan 30 dei langa. Den ben gi leki rai taki iniwan sma di no ben hori ensrefi na dati, ben moesoe trowe go na ini a lew-olo. Den ben kisi Darius foe meki a bribi taki ala en lanti tiriman ben sa feni so wan ordroe boen, èn den sani di ben gi leki rai ben gersi wan fasi foe sori loyaalfasi na a kownoe. — Danièl 6:1-3, 6-8.
Darius ben poti en nen na ondro a wet èn heri esi a ben brems nanga den bakapisi foe a wet disi. Danièl ben tron a fosiwan di no ben hori ensrefi na a ordroe disi, foe di a ben tan begi Jehovah Gado. (Teki gersi Tori foe den Apostel 5:29.) Getrow Danièl ben trowe go na ini a lew-olo, ala di a kownoe ben meki moeiti srefisrefi foe feni wan fasi foe broeja a wet di no man kenki moro. Darius ben taki dati a ben abi froetrow taki a Gado foe Danièl ben abi a makti foe kibri a libi foe En profeiti. — Danièl 6:9-17.
Baka wan neti pe Darius no ben man sribi èn baka di a ben e faste, a ben lon go na a lew-olo. A ben breiti troetroe foe si taki Danièl ben de na libi ete èn noti no ben pasa nanga en! Leki strafoe, wantewante a kownoe ben trowe den man di ben kragi Danièl makandra nanga den osofamiri foe den go na ini a lew-olo. A kownoe ben meki wan ordroe toe, taki ’na ini ala kontren foe a kownoekondre foe en, den sma moesoe beifi èn moesoe frede a Gado foe Danièl’. — Danièl 6:18-27.
A de krin taki Darius ben lespeki a Gado foe Danièl nanga a relisi foe en, èn taki Darius ben de fajafaja foe poti reti san ogri. Ma a strafoe di den man di ben kragi Danièl ben kisi, ben moesoe wiki a feantifasi foe den tra tiriman. Boiti dati, a sani di Darius ben meki bekènti taki ala sma ben moesoe ’frede a Gado foe Danièl’, ben moesoe meki den makti kerki tiriman foe Babilon atibron srefisrefi. Foe di den sani disi ben moesoe abi krakti tapoe den leriman foe Wet, meki a no moesoe froewondroe wi taki den grontapoe tori foe Darius ben kenki foe poeroe den bodoi di abi foe doe nanga Darius. Tokoe a sjatoe tori ini a boekoe Danièl e sori Darius leki wan tiriman di abi firi gi eerlijkfasi nanga retidoe.