Den ben doe a wani foe Jehovah

Danièl ben dini Gado ala ten

NA INI historia a no e pasa someni taki sani e kenki na ini wán neti. Tokoe na dati ben pasa na ini 539 b.G.T. di den Mediasma nanga den Persiasma ben trowe a Tirimakti foe Babilon na ini soso wan toe joeroe. A jari dati, Jehovah en profeiti Danièl ben libi pikinmoro 80 jari kaba leki wan djoe katibosma na Babilon. Kande Danièl ben de moro leki 90 jari, di a ben de foe ondrofeni wan foe den moro bigi tesi na tapoe en soifri retifasi na Gado.

Baka di Babilon fadon, dan ini a bigin sani ben sori foe go boen gi Danièl. A njoen kownoe ben de Darius a Mediasma, wan man foe 62 jari di ben abi foeroe lespeki gi Danièl. Wan foe den fosi sani di Darius ben doe, ben de foe poti 120 satraap na wroko èn foe meki dri man kisi a posisi foe hei tiriman.a Danièl ben de wan foe den dri sma disi di a ben feni boen. Foe di Darius ben si taki Danièl ben abi aparti sortoe bekwaamfasi, meki a ben abi na prakseri srefi foe gi en a posisi foe fosi minister! Ma na a momenti dati, wan sani ben pasa di wantronso ben kenki den sani di a kownoe ben abi na prakseri.

Wan bidrigi plan

Den hei kompe tiriman foe Danièl, makandra nanga wan bigi groepoe satraap, ben go na a kownoe nanga wan prakseri di ben wiki a belangstelling. Den ben aksi Darius foe meki wan wet di ben taki: „A sma di dritenti dei langa e begi na iniwan gado noso libisma, leki na joe wawan, o kownoe, den moesoe trowe en go na ini a lew-olo” (Danièl 6:7). Kande a gersi gi Darius taki den man disi ben froeklari taki den ben o tan loyaal na en. A kan prakseri toe taki a wet disi ben o jepi en, wan trakondresma, foe meki a posisi di a ben abi leki na edeman foe a kondre, kon moro tranga.

Ma den hei tiriman nanga den satraap no ben kon aksi foe doe na ordroe disi foe a boen foe kownoe. Den ben „soekoe foe feni wan sani na Danièl ini a tori foe a kownoekondre; ma no wan sani noso kroektoedoe den ben man feni na en kwetikweti, foe di a ben de getrow èn no wan mi-no-ke-fasi noso wan kroektoedoe den ben feni na en.” Dati meki den bidrigi man disi ben prakseri na densrefi: „Wi no sa feni no wan sani [na en] noso te wi abi foe feni dati na en na ini a wet foe en Gado” (Danièl 6:4, 5). Foe di den ben sabi taki Danièl ben begi na Jehovah ibri dei, meki den ben soekoe foe meki disi de wan ogri di wan sma e doe pe dedestrafoe ben de na tapoe.

Kande den hei tiriman nanga den satraap ben abi feantifasi gi Danièl foe di „doronomo [a] ben de moro boen leki den, bika wan toemoesi aparti jeje ben de na ini en; èn a kownoe ben abi na prakseri foe poti en na tapoe a heri kownoekondre” (Danièl 6:3). Kande na eerlijkfasi foe Danièl ben hendri sma foe doe kroektoedoe èn a soekoe di den ben soekoe wini gi densrefi na wan triki fasi. Awansi san ben de a situwâsi, den man disi ben overtoigi a kownoe foe poti en nen na ondro na ordroe, èn ben meki a tron wan pisi foe ’a wet foe den Mediasma nanga den Persiasma, di sma no man poeroe moro’. — Danièl 6:8, 9.

Danièl e tan tanapoe kánkan

Danièl ben tapoe foe begi na Jehovah, baka di a ben kon sabi foe a njoen wet bosroiti? Kwetikweti! A ben saka kindi na ini a dak-kamra foe en oso, èn ben begi Gado dri tron wan dei, „soleki fa a ben gwenti doe disi na fesi kaba” (Danièl 6:10). Ala di a ben e begi, den feanti foe en „ben kon na inisei na ipi-ipi èn ben feni Danièl, e begi èn aksi tranga foe kan kisi grani na fesi foe en Gado” (Danièl 6:11). Di den ben tjari na afersi kon na ondro a prakseri foe a kownoe, dan Darius ben sari taki a wet di a ben poti en nen na ondro ben o abi foe doe nanga Danièl. „Te di son dongo a ben proeberi foe froeloesoe en”, a tori e taigi wi. Ma srefi a kownoe no ben kan poeroe a wet baka di a ben meki. Foe dati ede den ben tjari Danièl go na a lew-olo, di soleki fa a sori ben de wan dipi olo noso wan presi na ondro gron. „A Gado foe joe, di joe e dini ala ten, ensrefi sa froeloesoe joe”, na so a kownoe ben gi Danièl a djaranti. — Danièl 6:12-16.

Baka di Darius no ben man sribi heri neti èn ben e faste, a ben lon go na a olo. Danièl ben de na libi èn noti no ben pasa nanga en! Wantronwantron a kownoe ben doe wan sani. A ben meki den trowe Danièl feanti nanga den osofamiri foe den go na ini a lew-olo leki wan strafoe. Darius ben meki bekènti toe na ini a heri kondre taki „na ini ala kontren foe a kownoekondre foe mi, den sma moesoe beifi èn moesoe frede a Gado foe Danièl”. — Danièl 6:17-27.

Wan sani di wi kan leri

Danièl ben de wan toemoesi boen eksempre foe wan sma di ben de getrow. Srefi a kownoe, di no ben anbegi Jehovah, ben si taki Danièl ben dini En „ala ten” (Danièl 6:16, 20). Na Arameisi gronwortoe di den ben vertaal nanga „ala ten” moro foeroe wani taki foe „drai na ini wan lontoe”. A wani taki foe doe wan sani doronomo. Fa disi e sori boen taki sma no ben man broko a tranga soifri retifasi di Danièl ben abi gi Jehovah!

Danièl ben kon kisi a gwenti foe doe sani ala ten, langaten bifo den ben trowe en go na ini a lew-olo. Di a ben de wan jongoe katibosma na Babilon, a ben weigri foe gebroiki njanjan noso dringi di a Wet foe Moses no ben gi pasi foe dati, noso di ben kon doti foe heiden gwenti ede (Danièl 1:8). Baka ten, a ben meki a boskopoe foe Gado bekènti gi a Babilon kownoe Nebukadnesar na wan deki-ati fasi (Danièl 4:19-25). Soso wan toe joeroe bifo Babilon ben fadon, Danièl ben meki a kroetoe foe Gado bekènti gi kownoe Bèlsasar, sondro foe frede (Danièl 5:22-28). So boen, di Danièl ben kisi foe doe nanga a lew-olo, a ben go doro foe abi a getrow waka nanga libi di a ben abi kaba.

Joe so srefi kan dini Jehovah ala ten toe. Joe na wan jongoe sma? Dan doe wan sani now foe kweki wan gwenti foe doe sani ala ten, foe di joe e drai joe baka gi a takroe demakandra èn a kroektoe waka nanga libi foe a grontapoe disi. Efoe joe e dini Gado wan pisi ten kaba, dan tan horidoro na wan getrow fasi. No lasi-ati, bika ibri tesi di wi e kisi foe doe nanga dati e gi wi wan okasi foe sori Jehovah taki wi abi a fasti bosroiti foe dini en ala ten. — Filipisma 4:11-13.

[Foetoewortoe]