Kolokoe, aladi wi de ini wan kroektoedoe grontapoe di no abi lobi
„Kolokoe den sma de, di de sondro fowtoe tapoe a pasi foe den, den sma di e waka ini na wet foe Jehovah.” — PSALM 119:1.
1, 2. (a) Foe soema soifri kolokoe e komoto, èn foe o langa wan sma kan foe ondrofeni en? (b) Presi foe „sargi préki”, fa na bigin pisi foe na Bergipréki ben sa moe kari èn foe san-ede so?
KOLOKOE e kon foe na Mekiman foe libisma. Na en na a „kolokoe Gado” di abi boen njoensoe gi wi (1 Timotéus 1:11). A kibri tégo kolokoe gi en libisma mekisani djaso na grontapoe. Nownow kaba den kan njan boen foe en efoe den e poti densrefi ini lin nanga den order foe en. — Psalm 119:26, 33.
2 Tinanégi jarhondro psa kaba Jezus Kristus, a Manpikin foe na „kolokoe Gado”, ben hori wan taki di sma e kari na Bergi-préki. Soleki fa Mattéus 5:1-12 e sori dan a préki disi ben bigin nanga san den e kari den „sargipréki” san wani taki den „blesipréki”. Ma, akroederi nanga na Griki tongo, na ini san na tori foe Mattéus foe na grontapoe libi foe Jezus Kristus ben vertaal, dan den moe kari den moro foeroe „den kolokoe ferklari”. Srefi na tori foe Mattéus ini na Hebrewtongo e gebroiki na Hebrew wortoe di wani taki „kolokoe”.
3. (a) Na skrifiman foe Psalm 119 ben kisi na okasi foe njan boen foe na spesroetoe kolokoe, di Jezus Kristus ben taki foe en? Ferklaar disi? (b) Ferklari den firi foe na psalmsingiman gi na Wetferbontoe foe san Mozes ben de na mindriman?
3 Wan man na ini owroeten di ben kon ini aanmerking foe njan boen foe so wan kolokoe leki san Jezus Kristus, na djoe Messias, ben taki foe en, ben de a djoe skrifiman di ben de ondro na krakti foe santa jeje èn di ben skrifi Psalm 119, na moro langa psalm foe na Bijbel. Ini akroederi nanga den réde di Jezus ben gi foe de kolokoe, na psalmsingiman ben abi en jeje fanowdoe. Ooktoe a ben de wan sma di ben de nanga sari èn nanga safri-ati; a ben angri èn drwatra foe retidoe, a ben abi sari-ati, a ben de wan sma di ben kisi porinen èn di den ben ferfolgoe, èn di sma ben lé ala sortoe takroe sani gi en. A ben skrifi den psalm hondrohondro jari bifo wi gewoon teri, di na naatsi Israël ben de ete ondro na Wetferbontoe, di ben abi leki mindriman a proféti Mozes di ben de a mindri Jehovah èn na naatsi ini 1513 Bifo G.T. na a bergi Sinaï. Nanga reti na psalmsingiman no ben abi wan fowtoe foe feni na ini na Wet dati foe na ferbontoe, bikasi a ben kon foe Gado. A ben sabi heri boen taki den heiden naatsi di ben lontoe na kondre foe Israël no ben abi wan sani di ben kan gersi nanga na wet disi foe Gado. A ben loekoe na Wet disi leki wan sani di ben meki wan krin leti skijn, soleki a ben taki na ini vers 105 nanga 130: „Joe wortoe na wan lampoe gi mi foetoe, èn wan leti tapoe mi pasi. Ija, na tjari kon na krin foe joe wortoe e gi leti, den e meki den di de sondro ondrofeni kon kisi ferstan”.
4. (a) Na ini sortoe volgorde Psalm 119 ben skrifi, èn fa disi de wan jepi? (b) Gi soema Jezus nanga en discipel ben de wan eksempre foe di den ben e sori tapoe na „boekoe Psalm” èn nanga sortoe marki?
4 Dati a ben kan de leki wan jepi foe memre, na psalmsingiman meki a tron wan alfabetise psalm, sodati ini den 22 couplet ibriwan foe den 8 Hebrew regel e bigin nanga na srefi Hebrew letter ini alfabetise volgorde. Soboen ibri regel foe na fosi couplet ondro na Hebrew letter Alef di de leki wan edemarki e bigin nanga na fosi letter dati Alef. Ibriwan regel foe na di foe toe couplet e bigin nanga na di foe toe Hebrew letter Bet. Èn so a e go moro fara nanga ala den 22 couplet foe na Psalm, akroederi den 22 letters foe na Hebrew alfabet. Nanga 8 Hebrew regel ini ibri wan foe den 22 couplet, meki a psalm abi 176 vers. Te Jezus Kristus ben e leri sma a ben e sori tapoe a „boekoe foe den Psalm” (Lukas 20:42; 24:44). Na ini disi a ben poti wan eksempre gi en discipel. — Tori. 1:20; 13:33; 1 Korintesma 14:26; Efesesma 5:19; Kolossesma 3:16; Hebrewsma 4:7; Jakobus 5:13.
5. Di a ben bigin Psalm 119, soema ondrofeni na skrifiman ben abi kande na ini prakseri?
5 Na psalmsingiman ben skrifi foe en égi persooniek ondrofeni di a ben bigin Psalm 119, nanga den wortoe: „Kolokoe den sma de di de sondro fowtoe tapoe a pasi foe den den di e waka ini a wet foe Jehovah. Kolokoe den de di e poti prakseri na tapoe en fermane . . . Ini en pasi den ben waka. Joesrefi ben gi joe order na wan komanderifasi foe den hori den soifri. O meki a de so taki mi pasi de stéfi foe hori joe gebod! Na a fasi dati, mi no ben sa kisi sjen, te mi e loekoe ala joe komando. Mi sa prijse joe nanga wan opregti ati, te mi e leri joe regtvaardiki kroetoe bosroiti. Mi e tan hori joe gebod. O no libi mi krinkrin.” — Psalm 119:1-8.
6. (a) Fa prakseri e poti tapoe sroto-wortoe na ini na Psalm disi? (b) San na psalmsingiman ben e studeri, èn sortoe bewijsi joe abi foe dati?
6 Ini na bigin-couplet foe 8 Hebrew regel wi e feni den sroto wortoe wet, fermane, order, gebod, komando, kroetoe bosroiti. Ini ala den 176 Hebrew vers, na psalmsingiman e meki den wortoe kon na fesi. Leki wan eksempre, a e gebroiki na wortoe „wet” 25 tron, „fermane” 22 tron, „order” 21 tron, „gebod” 21 tron, „komando” 20 tron, „kroetoe bosroiti” 21 tron, ala di a wortoe „komando” di e akroederi nango den trawande 2 tron ini a psalm. Nanga aladi na psalmsingiman ben gebroiki den wortoe disi ibritron baka, di kande te joe e jere den dan a e sori wettis, noti no e sori taki a ben e doe afkati noso juristwroko noso kande srefi taki a ben de wan kroetoebakra. Na a fosi presi a ben de wan studenti foe na Wortoe foe Jehovah di ben skrifi, wan sani di wi kan si ini na gebroiki di a e gebroiki na wortoe „joe wortoe” tinaféfi tron. Efoe a ben de na kownoe foe a naatsi foe Israël, dan a ben de ondro na wet foe Gado foe den skrifi na Wet foe Jehovah ferbontoe nanga Israël abra gi en persoonlek, sodati a ben kan studeri na ini dati èn a ben kan gebroiki en (Deuteronomium 17:14-18). Na psalmsingiman no ben feni a dipi studie foe Gado Wortoe ala di a ben tan hori den égifasi disi na ini prakseri, wan froeferi sani noso wan sani di e weri sma. A ben abi wan tranga lostoe gi na sani san ben sa jepi en foe hori den wet foe Gado (Psalm 119:40, 131, 174). Wi de leki en?
7. (a) Fa a sabi foe èn a waka ini Gado wet de foe wi égi boen? (b) Na tapoe san na „Thora” e sori, ma na ondro sortoe regeling kristensma de?
7 Te wi e teki den internationale èn nationale wet foe den kondre di de ondro na onzichtbare tiri foe „na tata foe na lé”, Satan Didibri, gersi nanga Jehovah wet, wi kan taki makandra nanga na psalmsingiman: „Joe wet na waarheid. Joe de krosbé, o Jehovah, èn ala joe komando na waarheid” (Joh. 8:44; Psalm 119:142, 151). Soboen te wi e „waka ini den wet foe Jehovah”, dan neleki na psalmsingiman wi kan kisi kibri foe no waka na tapoe na pasi foe grontapoe lawfasi, wan sani san kan doe wi ogri na skin- èn na jejefasi. Disi e meki. wi kon kolokoe (Psalm 119:1). A e meki wi kisi blesi foe Gado èn a e feni wi boen. Disi e wroko tapoe wi ati soleki Psalm 119:97, 126, 127 e sori. A psalmsingiman ben de ondro na wetferbontoe foe Mozes di ben abi na „Thora”, dati na a seti foe wet foe Gado di ben abi na ini en hondrohondro difrenti wet. Den salfoe kotoigi foe Jehovah ini a ten disi de ondro na njoen ferbontoe (foe san Jezus Kristus de na Mindriman) nanga wan „wet” di skrifi, leki „na tapoe den ati”(Jeremia 31:31-34). Foe di den e studeri den kristen Griki Boekoe, den e kon sabi na njoen ferbontoe „wet” nanga en komando.
8. (a) A kroektoedoe grontapoe disi abi wan kolokoe ten na en fesi? (b) Fa na psalmsingiman ben taki foe na sarifasi broko-ede di a ben abi foe na misi di den djoe ben misi foe hori na wet foe Gado? (c) Fa Jezus profétitori abra Jeruzalem di no ben de getrow ben kon troe, èn san disi e sori na fesi gi kristenheid?
8 Na faste ten e kon moro krosbé gi na regtvaardiki Giman foe wet, Jehovah, foe opo handri tége na grontapoe disi foe kroektoedoe, A wan sari sani san de na wi fesi. Ini en égi dé na psalmsingiman leki wan sma di ben lobi Gado wet, ben kré foe na situwasi a ten dati (Psalm 119:136). Wantoe dé bifo a ben dede wan martelaar dede, Jezus Kristus ben kré abra na foto foe Jeruzalem di ben e hori gwenti ma ben e broko Gado wet (Lukas 19:41). Dritentinasébi jari na baka di den djoe ben doro a hémarki foe a broko di den broko a wet aladi den ben gi na sondro fowtoe Messias, Jezus Kristus, na ini anoe foe den naatsi foe den kiri en, dan Jehovah ben opo doe wan sani (Psalm 119:126). Den sani di e meki sma kré gi san Jezus ben taki a fesi, ben kon abra na foto ini 70 G.T. Ini a ten disi san Jeruzalem ben de leki wan prenki gi, èn na djoe pipel abra soema a ben e tiri, abi foe doe nanga dati foeroe tron moro bigi. Na kristenheid, na disiten kontraprenki foe en di e broko Gado wet, bigi tintron moro leki na owroe Jeruzalem èn na naatsi Israël. Na en égi fasi Jehovah sa poti ini na ati foe den politiki elementi foe a grontapoe disi foe drai densrefi tége ala georganiseerde kerki foe grontapoe, pe na kristenheid de na ini toe, na namaak kownoekondre foe Kristus. — Openbaring kapiter 17.
9. Poti den trobi foe na kristenheid, pe foeroe broedoe ben lon, abra sé foe na fasi foe prakseri èn foe tjari densrefi foe Jehovah Kotoigi. (b) Nanga sortoe model wi fasi foe doe e kroederi? (c) Foe sortoe réde Kristus e trowe na kristenheid foe a ten disi?
9 A no de so taki, toe grontapoe feti ben broko loesoe na ini kristenheid, nanga en kerkifesiman di ben ori baka gi den sortoe trobi dati pe foeroe broedoe ben lon? Na wan bigi kontrari foe dati namkoe den sortoe sma dati di e broko Gado wet foe en njoen ferbontoe, san e komanderi bradafasi lobi, na psalmsingiman ben taki leki wan model gi Jehovah Kotoigi ini a ten disi: „Falsifasi mi ben abi bita-ati gi, èn mi e tan hori taki a no boen. Mi ben lobi joe wet” (Psalm 119:163). A ben abi na winsi foe de nanga en heri ati ini na hori foe na wet foe Gado. A ben taki foe na fasi di a no ben lobi foe wan toe-ati, brokokowroe fasi foe doe: „Den sma di de nanga toe-ati mi ben abi bita-ati gi den, ma joe wet mi ben lobi en” (Psalm 119:113). Na so Jezus e prakseri foe na disiten kristenheid bikasi a gersi na gemeente ini a owroeten Laodicéa. A kan taki nanga reti gi na kristenheid: „Bikasi joe brokokowroe èn joe no faja èn no kowroe, mi e go braak joe poeroe foe mi mofo” (Openbaring 3:16). Wi no kan lobi na kroektoedoe grontapoe di no abi lobi èn lobi Kristus na a srefi ten. Wi no kan abi wan fasi di e hori na ala toe sé. Troetroe lobi moesoe de na krakti di de foe na baka na gi jesi na Gado. Jehovah noiti ben sa kan inspireer wan opregti dienstknegti foe en foe wan sani di de moro pikinso krakti leki disi: „Mi sa sori wan bigi prisiri ini joe gebod di mi ben lobi!” — Psalm 119:47.
10. (a) San wi abi foe feni prisiri na ini neleki na psalmsingiman? (b) Nanga sortoe marki gensman ben tjari pina kon tapoe na psalmsingiman, ma na sortoe fasi foe doe a ben tan hori ensrefi, èn fa disi e wroko na tapoe wi?
10 Dati wi abi prisiri ini a wet foe Jehovah e tjari wi foe kisi jepi. Na psalmsingiman ben erken disi di a ben taki: „Efoe joe wet no ben de wan sani san mi ben feni prisiri na ini, dan mi ben o pori gwe ini mi pina” (Psalm 119:92). En pina no ben de na wan noso tra siki di ben kan kiri en. A ben de ondro na pina foe den di no ben bisi (nanga Gado), di ben abi bita-ati gi en èn di ben ferfolgoe en. Ondro na kwinsi a ben kan broko kindi gi na marki di den sortoe Israëlsma dati ben marki en èn a ben kan go doe kontrari na wan foe Jehovah efoe a no ben lobi na wet foe Gado so te. Fa na psalmsingiman de wan heri moi eksempre gi wi ini a ten disi di e libi ondro na kwinsi foe wan grontapoe pe kroektoedoe de so foeroe dati na lobi foe a moro bigi pisi foe libisma kon kowroe ini a ten disi foe na bosroiti foe na seti foe sani! — Mattéus 24:3, 12.
11. Foe sortoe sé wi jepi e kon, èn fa wi e si libisma plan?
11 Nomo te wi e hori Gado wet wi abi na basis foe kan ferwakti taki wi sa kisi jepi foe tégo. Wi abi na winsi foe kisi jepi èn go ini Gado njoen seti foe sani foe njoen hemel èn wan njoen grontapoe. Pikinso moro foe go miti a kaba foe Psalm 119, ini vers 174 a psalmsingiman e taki en gi wi nanga den wortoe disi: „Mi ben winsi foe kisi joe jepi, O Jehovah, èn joe wet de mi lostoe.” Foe dat’ede wi e trowe den regeling èn plan foe jepi na grontapoe disi di foeroe nanga kroektoedoe èn di de sondro lobi.
Tan hori wisrefi na a wet foe Gado ondro ferfolgoe
12. (a) Na soema de na baka na ferfolgoe foe na „oema” èn en „siri” èn soema e doe en èn foe san-ede? (b) Fa den ferfolgoeman ben kisi pir’ai?
12 Ferfolgoe foe Jehovah Kotoigi na ini na heri grontapoe ben de wan sani di ben taki a fesi foe den laatste dé foe na owroe seti foe sani di e dede gwe, di de ondro na tiri foe na agersi tranga-ede draak, Satan na Didibri. Openbaring 12:17 e sori san de na marki foe en foe val aan, te a e taki: „Na kaiman ati ben bron nanga na oema [Jehovah organisaatsi di kan teki gersi nanga wan oema] èn a ben go feti nanga den wan foe en siri di ben tan abra [no na kownoe kondre di ben gebore paspas] di e hori den komando foe Gado èn di abi na wroko di de ini na gi kotoigi foe Jezus.” Na ferfolgoe e kon moro foeroe foe na sé foe den sma di e prefoeroe foe komoto foe a pasi foe san Gado e komanderi foe den laatste dé foe na seti foe sani di ai kan si èn di de foe na bigi kaiman. Nanga jepi foe na préki foe na kownoekondre na a heri grontapoe san Jehovah Kotoigi e doe, Jehovah ben e pir’ai gi den ferfloektoe sma disi, neleki fa Psalm 119:21 e taki: „Joe ben pir’ai gi den ferfloektoe prefoeroe sma, di e libi joe komando.” Krinkrin tra fasi a de nanga den getrowwan di den prefoeroe ferfolgoeman e skempi den èn e gi den sjen, neleki fa a ben de nanga na psalmsingiman: „Den prefoeroewan ben spotoe mi te foe psa marki. Mi no ben wai komoto foe joe wet.” — Psalm 119:51.
13. (a) Nanga aladi den ferfolgoeman abi takroe marki na ini den ati foe doe, sortoe bakapisi de ini na hori foe Gado wet? (b) Fa disi ben kon na krin ini den modern ten disi?
13 Di den e si taki Jehovah Kotoigi e wroko kroederi na wet foe Jehovah gi na ten disi, den prefoeroe ferfolgoeman e meki moeiti foe den Kotoigi di e tan hori densrefi na a wet foe Gado fadon — neleki fa a ben prenki na ini na afersi foe na psalmsingiman, di ben taki: „Den prefoeroewan diki wan olo foe kisi mi, den di no de ini lin nanga joe wet” (Psalm 119:85). Foe di den prefoeroe sma di e abi triki e kisi sjen no wani taki wawan taki den kori pasi e poeroe kon na doro, ma moro foeroea e sori tapoe na krin foe Jehovah nen leki na troe Gado. Foe dat’ede sondro ogri-ati-fasi na psalmsingiman ben kan begi: „Meki den prefoeroewan kisi sjen, bikasi sondro réde den ben kori mi. Ma foe mi sé, mi e tan hori misrefi bezig nanga joe komando troetroe” (Psalm 119:78). Jehovah e sorgoe taki srefi na ferfolgoe abi wan boen wroko e doe èn dati den ferfolgoeman no e wini wan sani troetroe nanga den bedrigifasi. A e piki tapoe na begi foe Psalm 119:122: „Tron wan djaranti gi joe dienstknegti foe na sani san de boen. Meki a de so taki den prefoeroewan no meki mi lasi mi porsi”. Dede ipi-ipi ben de wan sani di ben o miti Jehovah Kotoigi na ondro na dictatorfasi tiri foe Benito Mussolini nanga Adolf Hitler, ma foe di den no ben e frigiti den wet nanga gebod foe den Gado, den tan stanfaste èn foeroe foe den ben psa na pina libilibi. Nanga den wortoe foe Psalm 119:60, 61 den sma di tan a libi kan taki: „Mi ben doe es’esi, èn mi no ben draidrai foe hori joe komando. Ija, den banti foe den godlosoewan ben tai lontlontoe. Mi no ben frigiti joe wet”. Na Almakti Gado kan koti noso broko den banti di e dwengi sma di den féjanti ben tai lontoe en dienstknegti èn na so wan fasi na a faste ten a kan fri den foe doe a wroko di a ben wani den foe doe ini a ten disi foe na besroiti foe na seti foe sani.
14. (a) San Jehovah Kotoigi ben ondrofeni neleki na psalmsingiman èn fa a ben waka nanga den moeiti di den féjanti ben meki? (b) Soema kan prisiri abra den pina foe den, èn foe san-ede?
14 Soleki fa en wortoe ini Psalm 119:84, 86, 161 e sori, dan na psalmsingiman ben ondrofeni foeroe ferfolgoe srefi foe na sé foe en égi kondreman. Te now Jehovah Kotoigi e ondrofeni ferfolgoe na ini èn na dorosé foe den kondre foe na kristenheid pe den de ondro verbod. Ma na féjanti no ben man kisi na marki di a ben abi na ini en ati foe doro nanga en takroe, no regtvaardiki ferfolgoe! San e ferwondroe na féjanti foe Jehovah Kotoigi, di e waka „ini na wet foe Jehovah” èn „e poti prakseri tapoe den fermane foe en” de taki den e prisiri abra na pina di den e ondrofeni foe Jehovah Gado èn Kristus ede. Den e kon memre san Jezus Kristus ben taki ini en lijst foe sani di e meki kolokoe: „Kolokoe oenoe pótiwan de, bikasi na kownoekondre foe Gado de foe oenoe. Kolokoe oen de te sma abi bita-ati gi oen, èn te den trowe oen na doro èn e poti sjen a joe tapoe èn e trowe joe nen leki wan ogri sani foe na Manpikin foe libisma ede. Prisiri na dé dati èn djompo na loktoe, bika, loekoe! joe paiman bigi na ini hemel, bikasi den sani dati ben de den srefi wan di den fosten tata foe den ben gwenti foe doe nanga den proféti [Na psalmsingiman de na ini toe]” (Psalm 119:1, 2; Lukas 6:20, 22-23). Makandra nanga Jehovah, den Kotoigi di e ondrofeni ferfolgoe, e prisiri troetroe èn den e go doro foe „meki a wet kon moro grani èn majestieus”. — Jesaja 42:21.
Den winimarki foe Psalm 119
◻ Fa den ben prati Psalm 119 èn foe san-ede?
◻ Sortoe spesroetoe wortoe na psalmsingiman ben gebroiki foeroetron?
◻ Fa wi, kontrari na kristenheid, e firi foe Gado wet?
◻ San wi moesoe lobi, awasi kristensma e ondrofeni ferfolgoe?
[Prenki na tapoe bladzijde 3]
A psalmsingiman ben warderi srefsrefi taki a sabi foe a Wortoe foe Gado èn a doe en kan tjari bigi prisiri kon?
[Prenki na tapoe bladzijde 4]
Foeroe Kotoigi foe Jehovah ben tan stanfaste èn den ben tan libi psa a ferfolgoe foe den Nazi. Den ben kan taki nanga prisiri: „Mi no ben frigiti joe wet”