„A no de wan stré foe oenoe ma foe Gado”
„Poti bribi na ini Jehovah . . . èn sori na a fasi disi dati sani sa waka boen.” — 2 KRONIEKEN 20:20.
1. A sortoe fasi Josafat e agersi na Jezus di poti tapoe na troon?
JOSAFAT foe Juda ben de wan boen kownoe. „A no ben drifi komoto foe doe san de reti na ini Jehovah ai” (2 Kronieken 20:32). En nen wani taki „Jehovah de Kroetoeman”. A ben gi grani na Jehovah nen èn a ben loekoe na en foe tiri en na tapoe na pasi foe regtvaardikifasi èn foe kisi jepi na ini a tjari foe en pipel. A ben loekoe a tapoe dati den ben kisi leri na ini na wet foe Jehovah. Ensrefi ben go a mindri den sma foe Juda foe gi den dek’ati foe drai kon baka na a troe anbegi foe Jehovah. A ben orga a kownoekondre foe abi theocratis anbegi. Na ini ala den sani disi a ben de wan boen prenki di fiti foe na kownoe Jezus Kristus di ben poti na ini 1914 tapoe na troon na hemel, èn di e tjari now Jehovah pipel kon makandra foe psa libilibi na laatste stré, aladi den ogri jeje sroedati makti e tjari den naatsi kon makandra gi na feti foe Armageddon te wan bosroiti sa fadon. — Mattéus 25:31-34; Openbaring 16:13, 14, 16.
2. (a) Sortoe bigi moeilekheid ben kon gi den Judasma? (b) Jehovah Kotoigi e si densrefi a fesi sortoe srefi situwasi na ini a ten disi? (c) Sortoe elementi foe Satan grontapoe e akroederi nanga Ammon, Moab, nanga na bergi Seïr?
2 Baka di Josafat ben poti prakseri na a kon boen baka foe na theocratis orde ini Juda, dan wan bigi moeilekheid ben sori ensrefi. Komoto foe den kontren foe Ammon, Moab nanga na bergi Seïr wan makti féjanti, „wan bigi ipi”, hari kon, di ben de wan kefar gi a pipel foe Gado foe pori den (2 Kronieken 20:1, 2, 22). Nownow net sowan srefi situwasi de. Foe di Jehovah Kotoigi „no de wan pisi foe a grontapoe” meki na grontapoe foe Satan no wani si den na ai èn nofotron den féjanti foe den e ferfolgoe den nanga ogri-ati (Johannes 15:19; 1 Johannes 5:19). Na ini a ten foe Josafat a ben go foe basi Juda (san wani taki „prijse”), na kondre foe na pipel foe Jehovah. Ma net soleki ini den agersiprenki foe den, dati na Ammon èn Moab foe owroeten, na so den disiten politiekmakti nanga na bigi bisnisgrontapoe (makandra nanga den fabrikant foe „poridé”-wapen) e stré now foe kisi na makti tapoe grontapoe. Nanga disi den e fadon go ooktoe na ini na kontren di sensi 1914 nanga reti de foe na kownoekondre foe a Messias foe Gado (Openbaring 11:15, 18). Na bergi Seïr foe owroeten ben tron na kontren foe na Edom di fadon komoto foe bribi, den bakapikin foe na tweelengi brada foe Jakob, Esau. Den sma di ben libi na a bergi Seïr ben de ooktoe nanga reti wan agersi prenki foe den memre sma foe na kristenheid na ini disiten di fadon komoto na bribi. — Genesis 32:3.
3. Fa na libifasi foe Josafat nanga den Judasma e kroederi nanga na libifasi foe loyaal kotoigi na ini a ten disi?
3 San kownoe Josafat ben kan doe, now di den hipi disi di ben kon feti nanga en ben de leki wan kefar gi en? We, san loyaal dienstknegti foe Gado alaten e doe na ini geval foe nowtoe-situwasi, ferfolgoe noso kefar foe den libi? Josafat „ben poti en fesi a tapoe foe soekoe Jehovah”. Èn foe ala foto foe Juda den sma ben kon na a oso foe Jehovah foe troe anbegi „foe soekoe rai na Jehovah”. — 2 Kronieken 20:3-5.
4. (a) Sortoe situwasi Jehovah pipel kan ferwakti? (b) Pe wan „bigi ipi” di e kon moro foeroe e soekoe jepi?
4 Fa disi de wan toemsi moi eksempre foe a pipel foe Gado ini a ten disi! Na ten disi foe tranga de boen a pasi foe go na wan hémarki na Har-mágedon. Den toestand na ini na grontapoe foe Satan no e kon moro mendri ogri (2 Timotéus 3:1, 13). Foeroetron srefi a de so dati a libi foe Jehovah dienstknegti kan kon ini kefar. Pe den sa soekoe foe feni kibri? Dati de foe feni na ini wi wánfasi foe anbegi. Na ini wi Kownoekondre-komakandrapresi nanga tra bijbelstudie centra wi e kon makandra foe gebroiki jeje njanjan di e gi wi tranga èn orga wisrefi foe doe na publiki dienst foe wi, di de foe prijse Jehovah. A wan kolokoe sani foe si dati wan „bigi ipi” e tan kon a fesi foe ala naatsi foe sroiti densrefi na a pipel foe Jehovah na ini na „santa dienst” foe den. Den njoen-wan disi e kon na ini bigi ipi na a ’bergi foe Jehovah oso foe anbegi’. Disi wani taki ooktoe a jepi foe den — Openbaring 7:9, 15; Jesaja 2:3.
5. Na „njoen fesidjari” foe Josafat e meki wi prakseri na san na ini na tori foe Jehovah organisaatsi na ini a ten disi?
5 Josafat ben go „na ini na oso foe Jehovah go tanapoe na a fesisé foe a njoen fesdjari”. A de krin dati na kownoe na ini en bowprogramma ben meki den faciliteit foe anbegi na ini na tempel foe Jeruzalem kon moro bigi. Na so ooktoe ini na ten disi na ondro na tiri foe na kownoe di e tiri now, Jezus Kristus. wan boen bigi jeje bowprogramma e waka, sodati na ini na grontapoe fesidjari foe Jehovah tempel nofo presi de foe miljoenmiljoen sma di no de foe na no-priester „bigi ipi”. Fa a de wan switi sani foe de drape! — Psalm 27:1-5.
Drai go na Jehovah
6. (a) Sortoe afersi ben kon na ini a begi foe Josafat? (b) Fa wi kan kisi krakti na ini ten foe tesi?
6 Na heri afersi Josafat ben poti na ini begi na Gado fesi na ini na oso foe Jehovah. A ben erken na kownoe wroko foe Jehovah, en krakti nanga makti èn a ben loekoe baka na den wroko foe Jehovah foe na boen foe en pipel. A ben ferteri foe na faja begi foe Salomo na a ten foe na inwijding foe na tempel èn a ben bosroiti nanga sakafasi: „Wi no sabi san wi moe doe, ma wi ai de na tapoe joe” (2 Kronieken 20:5-12; 6:12-14, 34, 35). Joe ben de oiti na ini so wan sortoe situwasi pe joe no ben kan go moro na no wan sé? Na ini den ten foe den apostel dan Paulus nofotron ben de ini wan srefi sortoe moeilek situwasi. A ben moesoe anga hebi tapoe Jehovah, ma a ben kan taki alaten: „Te mi de swaki, dan mi de krakti.” Bikasi efoe a ben firi na ini égi krakti taki a no ben man doe noti, dan en heri fertrow tapoe Jehovah ben de wan fonten foe krakti di no wan sma kan wini. Ooktoe joe kan de tranga! — 2 Korintesma 12:10; Odo 18:10.
7. Sortoe rai foe Mozes den Judasma ben waka na en baka?
7 Proberi efoe joe kan, foe tjari kon na joe fesi a tafereel di ben de drape na tapoe na bigi tempeldjari foe Jeruzalem: „Ala a ten dati ala den sma ben tanapoe na fesi foe Jehovah, srefi den bigiwan, den oema èn den manpikin” (2 Kronieken 13:14). Sondro degedege den ben e memre den krin order foe Mozes na ini a tori foe na marki foe den sortoe komakandra dati soleki tanapoe na ini Deuteronomium 31:12. Soso presi foe tanapoe ben de foe na bigi ipi disi foe osofamiri di ben de nanga bigi respeki ben wakti tapoe moro order foe Jehovah, èn di de na ai, klarklari foe doe en komando.
Na kanaal foe Jehovah
8. Sori soema na Jehovah communicatiekanaal (a) na ini Josafat ten (b) na ini wi ten?
8 Fa na Soeverein Masra Jehovah ben sa kan jere na begi foe Josafat? Jehovah ben gi wan communicatiekanaal na ini na sma foe Jahaziël, foe na lo foe Levi. Ala di Jahaziël no ben de wan priester, tokoe Jehovah ben teki en foe ferteri wan foe den moro moi boskopoe di e gi dek’ati èn e waran na ati foe a eri bijbel. A prenspari punt ben de dati ’na jeje foe Jehovah ben kon tapoe en na ini na mindri foe na gemeente’ (2 Kronieken 20:14). Jehovah na ini a ten disi e sorgoe na mindri a pipel foe en na ini wan srefi sortoe kanaal? Ija, dati a sorgoe séker! Jezus ben taki foe disi na ini en profétitori di ben go foe „na bosroiti foe na seti foe sani” di a ben taki foe na „getrow èn koni srafoe” klasse na soema na meester ben gi ala en goedoe dja na grontapoe. — Mattéus 24:3, 45-47.
9. (a) Foe san-ede meki a nen foe Jahaziël ben fiti? (b) Fa na boskopoe foe Jehovah ben de, èn fa wi e kisi dek’ati foe disi now?
9 Jahaziël nen wani taki „Gado e si”. Gado foe troe ben kon si ala sani di ben de a ini a moeilekheid disi. A ben kan sabi na fesi sortoe libifasi en pipel ben moe waka a baka. A ben kan si na baka pisi di ben sa kon te foe kaba. Sortoe boskopoe Jehovah foe dat’ede ben meki bekenti nanga mofo foe Jahaziël? Arki now: „Oen poti prakseri, heri Juda nanga den sma di e libi na ini Jeruzalem èn kownoe Josafat! Na disi Jehovah ben taki gi oenoe: ’Oen no frede, noso skreki foe na bigi ipi disi ede; bikasi a no de wan feti foe oenoe, ma foe Gado’” (2 Kronieken 20:15). Fa na wánfasi ipi foe sma dati ben sa moe bréti! Èn fa wi now e bréti foe sabi dati awinsi fa Satan nanga den bakaman foe en mag foe kon na wi tapoe foe feti — awinsi fa wi bribi nanga wi retifasi e kon a tapoe tesi — wi kan fertrow dorodoro tapoe Jehovah leki wan wanfasi pipel na ini na fertrow dati a sa feti gi wi! — Exodus 15:2, 3; Psalm 37:3-7; Zacharia 14:3.
Wan wánfasi wroko de fanowdoe!
10. (a) Den Judasma ben kon tanapoe na fesi sortoe tesi foe a retifasi foe den? (b) Sortoe wroko e waka a fesi na freemde doe foe Jehovah?
10 Ma den Judasma dati no ben mag sidon e loekoe nanga den anoe fow abra makandra, e wakti na tapoe na fri di Jehovah ben sa tjari kon. Den ben moe opo doe wan sani! Efoe den ben wani tan a libi, dan den ben moe sori Jehovah dati den ben gi jesi èn den ben e doe den sani tapoe en fasi. Sondro degedege a de so dati foeroe foe den ben abi na prakseri dati den instruktie di ben kon foe Jehovah ben de pikinso ongewoon. A reti-fasi foe den ben kon nanga dati na tapoe tesi. Bifo Jehovah doe en ’freemde doe, en ongewoon wroko’ foe di a e pori na kristenheid na a bigin foe na „bigi benawtoe”, dan a e ferwakti ooktoe foe en kotoigi dati leki wan man den e teki prati na wan wroko di foeroe sma e si leki ongewoon. A de na santa dienst di den e doe foe di den e go na den oso foe den sma alaten baka foe warskow den gi na pori di e poesoe ede kon. — Jesaja 28:21; Mattéus 24:14, 21.
11, 12. (a) Sortoe ongewoon komando Jahaziël ben gi, ma fa den Judasma ben teki en? (b) Fa wisrefi kan sori dati wi e fertrow tapoe Jehovah?
11 Disi e prenki nanga den komando di Jahaziël ben gi na a pipel foe Juda. A ben taki foe den féjanti ipi sma: „Saka go tamara mamanten na den. Ini a geval disi joe no a foe feti. Poti joesrefi na ini lin, tan tanapoe èn si na jepi foe Jehovah foe na boen foe joe. O juda nanga Jeruzalem no frede noso skreki. Hari go tamara mamanten tége den, èn Jehovah sa de nanga joe” (2 Kronieken 20:16, 17). Na ipi dati foe man, oema nanga pikinnengre di no ben abi fetisani ben kisi na komando foe hari go feti nanga den legre foe den féjanti di ben bondroe kon na wan! — Teki gersi Psalm 148:12, 13.
12 Josafat nanga den Judasma ben abi bigi warderi gi na tiri di Jehovah ben gi via Jahaziël. „Wantewante Josafat ben boigi ensrefi dipi nanga en fesi na doti, èn heri Juda nanga den sma di e libi na Jeruzalem srefi fadon na fesi foe Jehovah foe tjari glori gi en” (2 Kronieken 20:18). Na Moro Bigi Josafat, Jezus Kristus, ben sori di a ben de na grontapoe foe fertrow na tapoe Jehovah nanga sakafasi, èn wi kan de séker dati a sa wakti den feti komando foe Jehovah te ’Jehovah sa masi broko kownoe na en reti-anoesé na a dé foe en atibron’ (Psalm 110:5, 6). A so srefi toe Jehovah Kotoigi na ini a ten disi „e tjari glori” gi a Gado di den e poti fertrow a tapoe èn di den e dini na ini den fesidjari foe en. — Psalm 84:10-12; 122:1-4.
13. Soema na ini a ten disi e prijse Jehovah „nanga wan toemsi tranga sten” èn nanga sortoe bakapisi?
13 Leki fa 2 Kronieken 20:19 e taki dan tempelsingiman ben opo tanapoe „foe prijse Jehovah na Gado foe Israël nanga wan toemsi tranga sten”. Èn soema na ini a ten disi na ondro a tiri foe na salfoe „fika pisi”, e prijse Jehovah „nanga wan toemsi tranga sten” na fesi foe en féjanti? Na den fes’sé foe na pipel foe Jehovah joe abi a groepoe pionierbedinari di alaten e kon moro foeroe. Den jepi- nanga gewoon pionier, den speciaal pionier nanga zendeling, den sma di e teki fesi na ini na prijse na ini na velddienst — ben prisiri na ini 1984 nanga wan gro foe 19 procent. Na ’singi’ foe den na wan toemsi kefarlek fasi den meki na ferwondroe totaal foe 436.720.991 joeroe kon — wan gro foe 13.5 procent — di ben gi na jari di psa na a kristen diniwroko.
14. Fa foeroe sma now e sori foe di den e waka na baka na eksempre foe den Judasma a bribi foe den nanga jepi foe wroko?
14 Na a ten dati na ini Jeruzalem wan sma no ben kan gi ensrefi pasi foe didon sribi langa. Gehoorzaam den Israëlsma ben „opo froekoe mamanten na a sabana foe Tekóa” (2 Kronieken 20:20). Nanga ala prisiri den ben wani foe sori den bribi nanga jepi foe wroko (Teki gersi Jakobus 2:14.) Na so Gado dinari ini a ten disi moe bigin froekoe nanga den wroko. Oema di de na oso èn di e pionier èn trawan moe opo froekoe mamanten foe doe den osowroko, sodati na heri mamanten den kan de na ini Jehovah dienst. Joe abi drape na ini na grontapoe foe Satan sma di e „soktoe èn e djeme” èn di moe kisi wan marki foe ferloesoe sodati den kan psa libilibi na „bigi benawtoe”. Jehovah Kotoigi teki a faste bosroiti foe feni den. — Teki gersi Ezechiël 9:4.
15. (a) Na ini soema den Judasma ben poti bribi? (b) Fa now wi kan sori dati „sani sa waka boen”?
15 Na tori na ini 2 Kronieken 20:20 e go moro fara nanga den wortoe: „Ala di den ben hari gwe, Josafat go tanapoe èn a ben taki: ’Jere mi o Judah èn den sma di e libi na ini Jeruzalem! Poti bribi na ini Jehovah oen Gado sodati kan kon na krin taki oenoe e tan libi langa. Poti bribi na ini en proféti èn sori nanga dati taki ala sani sa waka boen.’” Na a srefi fasi na edeman foe na kristen gemeente, na kownoe di e tiri now, ben gi en pipel alaten baka dek’ati foe abi bribi. Wi kan si disi na ini den pisi na ini Mattéus 10:27, 28; 24:9-13 èn Johannes 16:33. Ija, bribi na ini Jehovah, bribi na ini den sma di a e gebroiki leki takiman, bribi na ini en organisaatsi! Fa a de wan prenspari sani te wi e hari go na ini Jehovah dienst na ini a ten disi, foe sori sowan bribi! Dati na a fasi di foe troe sa waka boen, succes di de foe kisi gi ala dopoe kotoigi di gi densrefi abra èn di e sori bribi ini Jehovah nanga en seti. Na ini disi joe abi ooktoe den toemsi moi seti foe tégo libi di kon de mogelek, nanga na ofrandi foe en Manpikin. — Johannes 3:16; 17:3.
16. (a) Sortoe „singiman” e teki fesi nofotron na ini na dienst? (b) Fa alamala e prijse Jehovah „na ini santa fesakrosi”?
16 Moro fara „Josafat ben loekoe sani makandra nanga na pipel èn ben poti singiman gi Jehovah èn den sma di ben tjari prijse na ini santa fesakrosi, ala di den ben e waka na fesi foe den man di ben abi fetisani èn ben taki: ’Prijse Jehovah, bikasi en lobi boenfasi e tan te ten di no abi marki’” (2 Kronieken 20:21). Djaso den tempelsingiman ben teki fesi di den ben hari go na feti. Ooktoe na so toe na ondro na tiri foe na salfoe fikapisi den pionier, zendeling, den opziener di e waka lontoe nanga den oema foe den, den sma di e wroko na ini Betheloso èn ooktoe den gemeente owroeman nanga den dinari na ini na diniwroko nofotron de na fes’sé ini a doe foe santa dienst, aladi den e gi dek’ati na ala sma di de wan pisi foe na gemeente. Den alamala e prijse Jehovah „na ini santa fesakrosi” èn e waka go na fesi na ini theocratis orde. Na jeje moifasi foe den abi na ini en ooktoe ’na njoen kristen sma di den de, di abi leki marki troe regtvaardikifasi nanga loyaliteit’ (Efesesma 4:24; Galaciasma 5:22, 23). Fa a de now wan grani foe de wan pisi foe na organisaatsi disi di de na ini na heri grontapoe e waka go na fesi èn e gi grani na Jehovah nen nanga lobi boenfasi! — Psalm 144:1, 2; 136:1-26.
17. (a) Foe san-ede meki ’a pipel foe Gado no abi foe feti’? (b) Sortoe „prakseri” foe Jehovah wani tai na pori foe na falsi fasi foe anbegi?
17 Jehovah ben taigi en pipel: „Na ini na geval disi joe no abi foe feti.” Èn so a ben de ooktoe. „Tapoe na momenti di den ben bigin nanga na prisiri babari èn prijse singi”, dan Jehovah ben pori den ipi sma di ben lon go ini wan trapoe, sodati „den manpikin foe Amon nanga Moab . . . ben [opo tanapoe] tégen den sma foe na bergi kondre Seïr foe gi den abra na pori èn figi den poeroe” (2 Kronieken 20:17, 22, 23). Fa disi na tapoe wan fasi di de a libi e kon a fesi san ibri momenti kan psa nanga a grontapoe foe Satan! Openbaring 17:16, 17 e sori, dan Jehovah abi wan „prakseri” abra Babylon na Bigiwan di na kristenheid de na pisi di moro fowtoe de foe feni na en. En sa sorgoe dati den sroedati kondre di de wan pisi foe na VN abi na srefi prakseri disi foe di den o drai densrefi tége na falsi fasi foe dini èn pori èn wai en poeroe. Na bigi sistema foe a kristenheid di fadon komopo a bribi neleki den Edomietsma foe na bergi Seïr sa masi broko!
18. Fa wan kaba sa kon na ini Harmageddon nanga na disiten Amon nanga Moab?
18 Ma disi no de ala sani ete! Na disiten Amon nanga Moab de ete! (Teki gersi Openbaring 18:9, 10, 15-17.) Den de te now ete foe meki moeiti foe pori den prijseman foe Jehovah, den Judasma foe a ten disi. Ma Jehovah ten doro foe tjari na kroetoe kon soleki na ini Openbaring 19:11-16 skrifi, dan na kownoe, Jezus Kristus sa hari go foe masi „na winpersbaki foe na atibron foe na faja-ati foe Gado na Almaktiwan” èn na so fasi pori den krakti foe Satan grontapoe di tan abra. Na tapoe na hé marki foe na bigi feti disi dan den tra pisi foe den politiek naatsi nanga den sroedati ipi di tan abra èn di kon de leki den flaw sa bigin feti nanga makandra nanga den fetisani foe den foe pori makandra. A so a ben go nanga Amon nanga Moab di „den ben jepi makandra go na ini pori”, ma Jehovah noiti sa gi den pasi foe meki gebroiki na so fasi foe den maksin foe atoombom dati den sa pori a pipel foe Gado of a wroko foe en anoe. — Openbaring 11:18; Jesaja 45:12, 18; Psalm 115:16.
19. (a) Fa den disiten Judasma sa doe dan te den sa loekoe na gron pe dedeskin de a tapoe? (b) San de agersi nanga ’a kon makandra na ini den lagipresi foe Beraka’?
19 „Foe na sé foe Juda, a ben kon na a Wachttoren foe na gran sabana. Di den drai den fesi go na a ipi foe sma, loekoe, drape den ben de, den dedeskin ben fadon na gron sondro dati wan sma ben kan lon gwe.” Te den disiten „Judasma” makandra nanga den anbegiman foe den, loekoe den bakapisi foe na feti na Har-magedon, dan den sa prijse Jehovah foe na toemsi bigi wini foe dati. Den no abi foe teki tjari gwe letterlek sani di den wini foe na feti, ma den sa prisiri dati den kon makandra na ini na agersi „lagi presi foe Beraka” — Beraka wani taki „blesi”. — Na ondro na kownoekondre tiri den no-priester „bigi ipi” sa go nanga prisiri na ini wan krin grontapoe, nanga foeroe ferwakti e loekoe na a grani di e wakti den foe kenki na grontapoe kon ini wan paradijs djari. Doesoen jari langa na kownoekondre foe na Moro Bigi Josafat, Jezus Kristus no sa ondrofeni moeilekheid, èn en Gado Jehovah, alaten sa gi rostoe a lontoe. — 2 Kronieken 20:24-30.
Wan loekoe baka foe 2 Kronieken 20
◻ San na ini na ten disi e kroederi nanga den ipi foe Ammon, Moab nanga na bergi Seïr?
◻ Soema Josafat, Jahaziël nanga den Judasma e agersi?
◻ Fa den disiten Judasma na tapoe wan moifasi ben doe wan sani?
◻ San e gi oenoe fertrow na ini na kabapisi foe na „bigi benawtoe”?
[Prenki na tapoe bladzijde 8]
Neleki Josafat, na so na Jezus di Gado poti tapoe na troon e jepi Gado pipel ini a ten disi foe „a waka boen gi den” te den e prijse Jehovah