Kroetoestrafoe na a lagipresi foe bosroiti
„Meki den nâsi opo kon na a lagipresi foe Josafat; bika drape mi sa sidon foe kroetoe ala den nâsi.” — JOÈL 3:12.
1. Foe san ede Joèl e si ipi-ipi sma kon makandra na „a lagipresi foe a bosroiti”?
„IPI-IPI sma, ipi-ipi sma de na a lagipresi foe a bosroiti”! Wi e leisi den krakti wortoe disi na ini Joèl 3:14. Foe san ede den ipi-ipi sma disi kon makandra? Joèl e piki: „A dei foe Jehovah de krosibei.” A de a bigi dei foe a regtfardiki di Jehovah sa regtfardiki ensrefi — a dei te a sa tjari kroetoestrafoe kon na tapoe den bigi ipi sma di weigri foe teki a Kownoekondre foe Gado di seti kaba na ondro Krestes Jesus. Te foe kaba, den „fo engel” foe Openbaring kapitel 7 sa moesoe loesoe a hori di den hori „den fo winti foe grontapoe” steifi, èn dan a bakapisi o de taki wan „bigi banawtoe sa de, soleki foe sensi a bigin foe grontapoe te now no kon ete, nôno, èn no sa kon moro toe”. — Openbaring 7:1; Mateus 24:21.
2. (a) Foe san ede a e fiti foe kari a presi pe Jehovah sa tjari en kroetoestrafoe kon „a lagipresi foe Josafat”? (b) Fa Josafat ben handri na wan joisti fasi di den ben kon feti teige en?
2 Na ini Joèl 3:12, den e kari a presi pe a kroetoestrafoe disi sa tjari kon, „a lagipresi foe Josafat”. A fiti taki, na ini wan djoegoedjoegoe pisi ten ini a historia foe Juda, Jehovah ben tjari kroetoestrafoe kon drape foe a boen foe kownoe Josafat, èn a nen foe Josafat wani taki „Jehovah na Kroetoeman”. Te wi e go loekoe san ben pasa na ini a ten dati, dan dati sa jepi wi foe froestan moro boen san o pasa djonsro na ini a ten foe wi. A tori de foe feni na ini 2 Kroniki kapitel 20. Na ini vers 1 foe a kapitel dati wi e leisi taki „den manpikin foe Moab nanga den manpikin foe Ammon èn makandra nanga den wan toe foe den Amonietsma, ben feti teige Josafat na ini orlokoe”. San Josafat ben doe? A ben doe san getrow foetoeboi foe Jehovah e doe ala ten na ini moeilek situwâsi. A ben go na Jehovah foe kisi tiri, èn a ben e begi fajafaja: „O wi Gado, joe no sa tjari kroetoe kon na den tapoe? Bika na wi ini, krakti no de na fesi a bigi ipi disi di e kon na wi tapoe; èn wisrefi no sabi san wi moesoe doe, ma den ai foe wi e loekoe go na joe.” — 2 Kroniki 20:12.
Jehovah e piki wan begi
3. Sortoe bodoi Jehovah ben gi Juda di den birti kondre ben feti serjoesoe nanga den?
3 A pisi ten di „ala den sma foe Juda ben tanapoe na fesi Jehovah, srefi den pikinwan foe den, den wefi foe den nanga den manpikin foe den”, dan Jehovah ben gi a piki foe en (2 Kroniki 20:13). Neleki fa a e gebroiki en „getrow èn koni srafoe” na ini a ten disi, na so a bigi Arkiman foe begi ben tranga a Leifi profeiti Jahasièl foe gi a piki foe En na den sma di ben kon makandra (Mateus 24:45). Wi e leisi: „Disi na san Jehovah taigi oenoe: ’No frede, èn no skreki foe a bigi ipi disi; bika a no oen feti, ma foe Gado. . . . Na a okasi disi oenoe no sa abi foe feti. Teki a posisi foe oenoe, tan tanapoe èn si a froeloesoe foe Jehovah foe a boen foe oenoe ede. . . . No frede, èn no skreki. Opo go na den tamara, èn Jehovah sa de nanga oenoe.’ ” — 2 Kroniki 20:15-17.
4. Na sortoe fasi Jehovah ben aksi foe en pipel taki den moesoe doe wan sani, no wakti wawan, di den ben miti nanga a tjalensi foe den feanti?
4 Jehovah ben aksi moro foe kownoe Josafat nanga en pipel leki soso foe sidon e doe noti, èn e wakti foe wan froeloesoe kon nanga jepi foe wan wondroe. Den ben moesoe doe wan sani fosi foe kakafoetoe gi a tjalensi foe a feanti. A kownoe nanga ’ala den sma foe Juda, srefi den pikinwan foe den, den wefi foe den nanga den manpikin foe den’, ben sori wan tranga bribi di den ben gi jesi foe opo froekoefroekoe mamanten èn ben waka go foe miti den legre di ben broko kon na ini den kondre. Di den ben de na pasi, dan a kownoe ben go doro foe gi theokrâsia bodoi èn deki-ati, di a ben gi den a tranga: „Sori bribi na ini Jehovah, oen Gado, so taki a kan kon na krin taki oenoe e libi langa. Sori bribi na ini den profeiti foe en èn kisi boen bakapisi na a fasi disi” (2 Kroniki 20:20). Bribi na ini Jehovah! Bribi na ini den profeiti foe en! Dati na a sroto foe abi boen bakapisi. A de a srefi na ini a ten disi, ala di wi e tan de aktief na ini a diniwroko foe Jehovah, meki wi no tweifri noiti taki a sa meki a bribi foe wi wini a strei!
5. Fa Jehovah Kotoigi na ini a ten disi de aktief ala di den e prèise Jehovah?
5 Neleki den sma foe Juda na ini den dei foe Josafat, na so wi moesoe „gi Jehovah prèise, bika a lobi boen-atifasi foe en, de te ten di no skotoe.” Èn fa wi e gi a prèise disi? Foe di wi e doe a Kownoekondre preikiwroko fajafaja! Neleki fa den sma foe Juda „ben bigin nanga a prisiri babari èn nanga prèise”, na so wi e poti wroko na a bribi foe wi (2 Kroniki 20:21, 22). Ija, meki wi sori a srefi tranga bribi ala di Jehovah e sreka sani foe doe wan sani teige den feanti foe en! Ala di a kan gersi taki a pasi langa, tokoe meki wi abi a fasti bosroiti foe horidoro, foe de aktief na ini a bribi, neleki fa a pipel foe en di e wini a strei e doe na ini kontren na grontapoe na ini a ten disi pe problema de. Na ini son kondre pe serjoesoe froefolgoe, ogri di e doe nanga tranga, angriten, nanga moeilek situwâsi na ekonomia sei de, den getrow foetoeboi foe Gado e ondrofeni kefalek moi bakapisi, soleki fa a Jaarboek van Jehovah’s Getuigen 1998 e froeteri.
Jehovah e froeloesoe en pipel
6. Fa tranga bribi e jepi wi foe de loyaal na ini a ten disi?
6 Den godelowsoe nâsi di ben de lontoe Juda ben proeberi foe teki a pipel foe Gado abra, ma nanga bribi di de wan eksempre, den foetoeboi foe Jehovah ben handri foe di den ben singi prèisesingi gi Jehovah. Wi kan sori a srefi sortoe bribi na ini a ten disi. Te wi e foeroe a libi foe wi nanga wroko di e prèise Jehovah, dan wi e tranga den jeje fetisani foe wi, èn no e gi den koni triki foe Satan okasi foe boro kon na inisei (Efeisesma 6:11). Wan tranga bribi sa tapoe a tesi di kan poeroe a prakseri foe wi nanga jepi foe takroe ontspanning, lobi gi materia goedoe, èn a mi-no-kefasi, sani di de wan marki foe a grontapoe na wi lontoe di e dede gowe. A tranga bribi disi sa meki taki wi e dini loyaal nanga „a getrow èn koni srafoe”, foe di doronomo wi e kisi jeje njanjan di gi „na a reti ten”. — Mateus 24:45.
7. Fa Jehovah Kotoigi handri na tapoe den difrenti feti di ben feti teige den?
7 A bribi foe wi di abi en fondamenti tapoe bijbel sa tranga wi foe kakafoetoe teige den feanti doe di den sma, di e sori a maniri foe a „takroe srafoe” foe Mateus 24:48-51, e meki kon. Sma di fadon komoto na bribi e meki a profeititori disi kon troe na wan toemoesi aparti fasi, foe di den e wroko tranga foe panja lei nanga propaganda materiaal na ini foeroe kondre na ini a ten disi, èn den e wroko makandra srefi na wan kibrifasi nanga son sma di abi makti na ini den kondre. Pe disi fiti, Jehovah Kotoigi gi piki, soleki fa disi skrifi na ini Filipisma 1:7, foe di den ’e opo taki gi a boen njoensoe èn e poti disi steifi na wet’. Foe eksempre, na tapoe 26 september 1996, na ini wan kroetoe afersi na Grikikondre, ala den neigi kroetoeman foe na Europa Kroetoebangi foe den Reti foe Libisma, na Strassburg, ben sori ete wan tron taki „Jehovah Kotoigi de san sma e kari wan ’relisi di sma sabi’ ”, èn taki den ben abi a reti foe abi a fri foe denki, konsensi nanga bribi, èn a reti foe meki a bribi foe den bekènti. Gi den sma di fadon komoto na bribi, a kroetoe foe Gado e taki: „A wortoe foe a troe odo pasa nanga den: ’A dagoe drai go baka na en eigi pio, èn na agoe di ben wasi kaba, go lolo baka na ini tokotoko.’ ” — 2 Petrus 2:22.
8. Fa Jehovah ben tjari kroetoestrafoe kon na den feanti foe En pipel, na ini den dei foe Josafat?
8 Na ini den dei foe Josafat, Jehovah ben tjari kroetoestrafoe gi den sma di ben wani doe En pipel ogri. Wi e leisi: „Jehovah ben poti man foe loeroe den manpikin foe Amon, Moab, èn a bergi kontren Se-ir di ben hari kon na ini Juda, èn den ben bigin feti nanga makandra. Èn den manpikin foe Amon nanga Moab ben bigin opo go feti nanga den sma di ben libi na ini a bergi kontren foe Se-ir foe gi den abra na pori èn foe kiri den; èn so esi leki den ben kaba nanga den sma di ben libi na Se-ir, den ben jepi foe gi makandra pori” (2 Kroniki 20:22, 23). Den sma foe Juda ben kari a presi dati a Lagipresi foe Beraka, èn Beraka wani taki „Blesi”. So srefi na ini a ten disi, a kroetoestrafoe di Jehovah sa tjari na tapoe den feanti foe en, sa abi leki bakapisi taki en eigi pipel sa kisi bigi blesi.
9, 10. Soema sori taki den warti foe kisi a takroe strafoe foe Jehovah?
9 Wi kan aksi: Soema na ini a ten disi moesoe kisi wan takroe kroetoe foe Jehovah? Foe kisi a piki na tapoe na aksi dati, wi moesoe go baka na a profeititori foe Joèl. Joèl 3:3 e taki foe feanti foe en pipel di „ben e gi a manpikin leki wan hoeroe-oema, èn na oemapikin den ben seri foe win”. Ija, den e si den foetoeboi foe Gado leki sma di lagi krinkrin moro den, den pikin foe den no warti moro leki a moni foe wan hoeroe-oema noso no moro leki den kostoe foe wan batra win. Den sa abi foe gi frantiwortoe foe dati.
10 Den sma di de warti toe foe kisi kroetoe, na den sma di e doe hoeroedoe na jejefasi (Openbaring 17:3-6). Den sma di fowtoe spesroetoe, na den wan di e poesoe den politik makti foe froefolgoe den Jehovah Kotoigi èn foe tapoe a wroko foe den, soleki fa wan toe relisi fesiman ben doe na ini Owstoe-Europa no so langa pasa ete. Jehovah e taki foe a fasti bosroiti di a abi foe doe wan sani teige den sortoe godelowsoe wrokoman disi. — Joèl 3:4-8.
„Santa na orlokoe!”
11. Fa Jehovah e tjalensi den feanti foe en foe go na feti?
11 Baka dati, Jehovah e kari a pipel foe en foe meki wan tjalensi bekènti na mindri den nâsi: „Santa na orlokoe! Gi den tranga man deki-ati! Meki den kon krosibei! Meki den opo kon, ala den fetiman!” (Joèl 3:9) Disi na wan froeklari foe wan toemoesi aparti sortoe orlokoe — wan regtfardiki orlokoe. Den loyaal Kotoigi foe Jehovah e froetrow na tapoe den jeje fetisani te den e doe wan sani teige den leitori, èn te den e feti nanga jepi foe waarheid teige lei tori (2 Korentesma 10:4; Efeisesma 6:17). Heri esi Gado sa santa „na orlokoe foe a bigi dei foe Gado na Almaktiwan”. A sa krin grontapoe foe ala gensman foe a soevereiniteit foe Gado. A pipel foe en na grontapoe no sa abi wan troetroe prati na dati. Troetroe èn na wan agersifasi den ’naki den feti-owroe kon tron proegoe èn den lansri kon tron grasi-nefi’ (Jesaja 2:4). Kontrari foe dati, Jehovah e tjalensi den nâsi di e gens en foe doe wan heri tra sani: „Naki oen proegoe kon tron feti-owroe èn oen grasi-nefi kon tron lansri” (Joèl 3:10). A e gi den wan kari foe gebroiki a heri maksin foe feti masjin nanga disiten fetisani na ini a feti. Ma den nâsi no kan abi boen bakapisi, bika a feti nanga a wini de foe Jehovah!
12, 13. (a) Ala di a Kowroe Orlokoe kon na wan kaba, fa foeroe nâsi sori taki den de ini a situwâsi foe feti ete? (b) Gi san den nâsi no sori taki de klariklari foe feti ete?
12 Na ini den jari di ben kon sjatoe baka 1990, den nâsi ben meki bekènti taki a Kowroe Orlokoe ben kaba. Ma nanga dati na prakseri, a ben de so taki den Verenigde Nâsi doro a moro prenspari marki foe tjari vrede nanga seikerfasi kon? Kwetikweti! San den sani di pasa no so langa ete na ini Boeroendi, a Democratische Republiek Congo, Irak, Liberia, Rwanda, Somalia, den kondre di ben de Joegoslafia fosi, e froeteri wi? Nanga den wortoe foe Jeremia 6:14, den e taki: „ ’Vrede de! Vrede de!’ ala di vrede no de.”
13 Ala di troetroe orlokoe tapoe na ini wan toe presi, tokoe den memre foe den VN e strei nanga makandra foe meki moro dangra fetisani. Wan toe foe den e tan hori den nucleair fetisani di den abi. Trawan e meki chemische nanga bacteriologische fetisani foe kiri sma na ipi-ipi. Te den nâsi dati e tjari kon na wan simbôlis presi di nen Armagedon, dan a e tjalensi den: „Foe a sei foe a swakiwan, meki a taki: „Mi na wan tranga man.” Oen gi jepi èn kon, ala oen nâsi na lontoe, èn tjari oensrefi kon na wán.” Dan Joèl e kon na mindri nanga en eigi serjoesoe begi: „Meki den tranga man foe joe, o Jehovah, saka kon na a presi dati.” — Joèl 3:10, 11.
Jehovah e kibri den eigi sma foe en
14. Soema na den tranga man foe Jehovah?
14 Soema na den tranga man foe Jehovah? So wan 280 leisi na ini bijbel, den e kari a troe Gado „Jehovah foe den legre” (2 Kownoe 3:14). Den legre disi na den engel legre foe hemel di de srekasreka foe doe san Jehovah taigi den foe doe. Di den Siriasma ben proeberi foe kisi Elisa, dan te foe kaba Jehovah ben opo den ai foe a foetoeboi foe Elisa so taki a ben kan si foe san ede den no ben sa man kisi en: „Loekoe! a bergi kontren ben foeroe nanga asi èn nanga fetiwagi foe faja di ben lontoe Elisa” (2 Kownoe 6:17). Jesus ben taki dati a ben kan begi en Tata foe seni „moro leki twarfoe legioen engel” (Mateus 26:53). Openbaring e froeteri foe a rèi di Jesus e rèi go foe tjari kroetoestrafoe kon na Armagedon: „Den legre di ben de na hemel, ben kon na en baka na tapoe weti asi, èn den ben weri weti, krin, fini linnen. Èn wan langa srapoe feti-owroe e komopo na en mofo, foe naki den nâsi nanga en, èn a sa tiri den nanga wan isri tiki. A e trapoe a win-persbaki toe foe na atibron foe Gado, na Almaktiwan” (Openbaring 19:14, 15). Den e taki krin foe na agersi win-persbaki dati leki „a bigi win-persbaki foe na atibron foe Gado”. — Openbaring 14:17-20.
15. Fa Joèl e taki foe na orlokoe foe Jehovah teige den nâsi?
15 Dan fa Jehovah e piki na aksi foe Joèl foe Gado saka en eigi tranga man kon? A de na ini den moi wortoe disi: „Meki den nâsi opo kon na a lagipresi foe Josafat; bika drape mi sa sidon foe kroetoe ala den nâsi di de na en lontoe. Poti wan grasi-nefi go na ini, bika a njanjan di moesoe koti, lepi kaba. Kon, saka kon, bika a win-persbaki kon foeroe kaba. Den persbaki troetroe foeroe pasa marki; bika a takroedoe foe den kon foeroe pasa marki. Ipi-ipi sma, ipi-ipi sma de na a lagipresi foe a bosroiti, bika a dei foe Jehovah de krosibei na a lagipresi foe a bosroiti. Son nanga moenkenki srefi troetroe sa kon doengroe, èn den stari srefi troetroe sa poeroe a krin leti foe den. Èn komoto na ini Sion Jehovah srefi sa bari, èn komoto na ini Jerusalem a sa meki sma jere en sten. Èn hemel nanga grontapoe troetroe sa seki.” — Joèl 3:12-16.
16. Soema sa de toe na mindri den sma na tapoe soema Jehovah sa gi kroetoestrafoe?
16 Neleki fa a nen foe Josafat seiker wani taki „Jehovah na Kroetoeman”, na so wi Gado, Jehovah, seiker sa regtfardiki ensrefi dorodoro te a sa tjari kroetoestrafoe. A profeititori e taki foe den sma di e kisi wan takroe kroetoe leki ’ipi-ipi sma, ipi-ipi sma di de na a lagipresi foe a bosroiti’. Iniwan sma di e horibaka gi falsi relisi èn di de ete, sa de na mindri den ipi-ipi sma dati. Den sma di sa de na ini toe, na den sma di den e taki foe den na ini a di foe toe Psalm — den nâsi, nationaal groepoe, kownoe foe grontapoe, nanga den heihei man — di wani a kroeka sistema foe a grontapoe disi na presi foe ’dini Jehovah nanga frede’. Den sma disi e weigri foe „bosi a manpikin” (Psalm 2:1, 2, 11, 12). Den no e erken Jesus leki a kompe Kownoe foe Jehovah. Moro fara, den ipi-ipi sma di sa kisi pori, na ala den sma toe di a glori Kownoe dati sa kroetoe leki sma di de leki „bokoboko” (Mateus 25:33, 41). Te a de a reti ten foe Jehovah foe bari na ini a hemel Jerusalem, dan a Kownoe foe den kownoe di En poti, sa rèi go foe tjari a kroetoestrafoe dati kon. Hemel nanga grontapoe seiker sa seki! Ma wi e kisi a djaranti taki: „Jehovah sa de wan kibripresi gi en pipel, èn wan fortresi gi den manpikin foe Israèl.” — Joèl 3:16.
17, 18. Soema na den sma di pasa a bigi banawtoe libilibi, èn foe sortoe situwâsi den sa njan boen?
17 Openbaring 7:9-17 e kari den wan di pasa a bigi banawtoe libilibi „wan bigi ipi” di de den wan di poti bribi na ini a krakti foe a loesoe-ofrandi foe Jesus en broedoe. Den disi e feni kibri na a dei foe Jehovah, ala di den ipi-ipi sma foe a profeititori foe Joèl sa kisi wan takroe kroetoe. Joèl e taigi den sma di tan na libi: „Oenoe sa moesoe sabi taki mi na Jehovah, oen Gado, di e tan na tapoe Sion, mi santa bergi”, Jehovah en hemel tanpresi. — Joèl 3:17a.
18 Dan a profeititori e froeteri wi taki a kontren foe a hemel Kownoekondre foe Gado „moesoe tron wan santa presi; èn ini a tori foe freimdesma, den no sa pasa na ini en moro” (Joèl 3:17b). Na ini hemel èn na ini a grontapoe kontren foe a hemel Kownoekondre dati, freimdesma no sa de, bika ala sma sa tjari kon na wán na ini soifri anbegi.
19. Fa Joèl e taki foe a paradijs kolokoe di a pipel foe Gado abi na ini a ten disi?
19 Srefi na ini a ten disi, vrede de pasa marki na mindri a pipel foe Jehovah djaso na grontapoe. Leki wán man, den e meki den kroetoe foe en bekènti na ini moro leki 230 kondre èn na ini moro leki 300 difrenti tongo. Joèl e taki na wan moifasi foe a gro di den abi: „A moesoe pasa na a dei dati taki switi win sa droipi kon foe den bergi, èn srefi merki sa lon foe den pikin bergi, èn srefi den presi foe Juda pe watra ben e lon, na ini alamala watra sa lon” (Joèl 3:18). Ija, na tapoe den prèiseman foe en na grontapoe, Jehovah sa tan kanti switi blesi nanga gro pasa marki èn moro nanga moro warti waarheid di e lon kon. A soevereiniteit foe Jehovah sa kon regtfardiki dorodoro na a lagipresi foe bosroiti, èn prisiri sa de pasa marki te a e tan foe têgo na mindri a pipel foe en di kisi froeloesoe. — Openbaring 21:3, 4.
Joe e memre disi ete?
◻ Fa Jehovah ben froeloesoe en pipel na ini den dei foe Josafat?
◻ Soema Jehovah ben feni warti foe kisi pori na „a lagipresi foe a bosroiti”?
◻ Soema na den tranga man foe Gado èn sortoe ròl den sa plèi na ini a lasti feti?
◻ Foe sortoe kolokoe den getrow anbegiman e njan boen?
[Prenki na tapoe bladzijde 21]
Gado ben taigi Juda: ’No frede, bika a feti no de foe oenoe, ma foe Gado’
[Prenki na tapoe bladzijde 23]
Jehovah e tjalensi den feanti foe en foe ’naki den proegoe tron feti-owroe’
[Prenki na tapoe bladzijde 24]
Bijbel e sori soema na a bigi ipi di sa pasa a bigi banawtoe libilibi