Teki a bun eksempre fu den profeiti—Yoèl
1. Fa wi kan sori taki wi abi sakafasi neleki Yoèl te wi e preiki?
1 Suma ben de a profeiti Yoèl? A wan-enkri sani di a e taki fu ensrefi na taki en na „a manpikin fu Petuwel” (Yoèl 1:1). A profeiti disi di ben abi sakafasi, ben poti moro prakseri na a boskopu fu Yehovah èn a no ben poti prakseri na a wroko di a ben abi leki boskopuman. Na so a de tu taki na presi taki wi wani meki sma prèise wi, wi e poti prakseri na Yehovah èn na a Bijbel te wi de na ini a diniwroko (1 Kor. 9:16; 2 Kor. 3:5). Sosrefi, te wi e meki a boskopu bekènti, dan wi e kisi krakti. Sortu pisi fu den profeititori fu Yoèl kan yepi wi fu de fayafaya na ini a diniwroko èn meki wi abi howpu na ini a ten disi?
2. Te wi e si o krosibei a dei fu Yehovah de, dan san dati musu meki wi du?
2 „A dei fu Yehovah de krosibei” (Yoèl 1:15): A sani disi skrifi wan tu dusun yari pasa, ma wi e libi na ini a ten te den o kon tru. Fu di a grontapu disi e pori moro nanga moro èn fu di sma no wani arki èn den e spotu wi te wi e preiki na ini a kontren fu wi, meki dati e sori krin taki den lasti dei fu na ogri grontapu disi bigin kaba (2 Tim. 3:1-5; 2 Petr. 3:3, 4). Te wi e prakseri o krosibei a kaba de fu a grontapu disi, dan dati musu meki taki wi e poti a diniwroko na a fosi presi na ini wi libi.—2 Petr. 3:11, 12.
3. Fu san ede a de tumusi prenspari fu du wi diniwroko fosi a bigi banawtu bigin?
3 „Yehovah o de wan kibripresi gi en pipel” (Yoèl 3:16): A vers disi e taki dati hemel nanga grontapu o seki. Disi kan abi fu du nomo nanga a strafu di Yehovah o tyari kon na a ten fu a bigi banawtu. A e gi wi trowstu fu sabi taki na a ten dati Yehovah o frulusu den futuboi fu en di e tan du a wani fu en (Openb. 7:9, 14). Te wi e du a preikiwroko èn e si fa Yehovah e yepi wi èn e gi wi krakti, dan dati e meki wi bribi kon moro tranga èn a e meki wi man horidoro. Den sani disi o yepi wi na a ten fu a bigi banawtu.
4. Fu san ede wi kan de nanga prisiri èn wi no abi fu frede den sani di o pasa na ini a ten di e kon?
4 Aladi son sma feni taki a boskopu fu Yoèl na wan boskopu di e meki sma frede, toku a e gi a pipel fu Gado a moi howpu taki den o kisi frulusu (Yoèl 2:32). Fu dati ede, no meki wi frede gi den sani di o pasa na ini a ten di e kon, ma meki wi preiki a bun nyunsu fu Gado Kownukondre fayafaya èn poti prakseri na san skrifi na ini Yoèl 2:23: „Un musu breiti èn prisiri nanga Yehovah un Gado.”