Tan hori a dei foe Jehovah boen ini prakseri

„A dei foe Jehovah de krosibei ini a lagi presi foe bosroiti.” — JOÈL 3:14.

1. Foe san ede a santa orlokoe di e kon èn di Jehovah ben meki bekènti sa de tra fasi leki den „santa” orlokoe foe libisma?

„MEKI disi bekènti na mindri den nâsi: ’Santa na orlokoe!’” (Joèl 3:9) Disi wani taki wan santa orlokoe? Te wi e loekoe san pasa na den kruistochten, den orlokoe foe relisi èn den toe grontapoe feti — di a krestenhèit ben plèi wan bigi ròl na ini — wi skin e gro kande te wi e prakseri foe wan „santa” orlokoe. Ma, na santa orlokoe foe a profeititori foe Joèl no de wan orlokoe a mindri den nâsi. A no de wan feti di foeroe nanga bita-ati, foe kisi gron noso goedoe, ala di den e gebroiki relisi foe krin densrefi. A de wan regtfardiki orlokoe. A de na orlokoe foe Gado foe figi gridifasi poeroe na grontapoe, a feti di sma e feti baka sani, kroektoedoe, nanga kwinsi. A sa meki Jehovah soevereiniteit, di a abi reti na tapoe kon regtfardiki na a sei foe ala sani di a meki. Na orlokoe dati sa krin a pasi gi a Kownoekondre foe Krestes foe tjari a libisma famiri go na ini a doesoen jari tiri foe vrede, boen ten èn kolokoe na a heri grontapoe, di den profeiti foe Gado ben taki na fesi foe dati. — Psalm 37:9-11; Jesaja 65:17, 18; Openbaring 20:6.

2, 3. (a) San na „a dei foe Jehovah” di den ben taki a fesi foe en na Joèl 3:14? (b) Foe san ede den nâsi e froedini san den sa miti na a dei dati?

² San dan, na „a dei foe Jehovah” di Joèl 3:14 ben taki foe en na fesi? „Ke a dei”, Jehovah ensrefi e bari, „foe di a dei foe Jehovah de krosibei, èn leki wan ogri-ati ròs foe a sei foe na Almaktiwan, a sa kon!” Fa disi na wan ogri-ati ròs? Baka ten a profeiti e froeklari: „Ipi sma, ipi sma de ini a lagi presi foe bosroiti, bika a dei foe Jehovah de krosibei ini a lagi presi foe bosroiti” (Joèl 1:15; 3:14). Disi na a dei di Jehovah e tjari en kroetoe bosroiti tapoe den ipi libisma di gadolowsoe èn di e trowe a soevereiniteit foe en, di a abi reti na tapoe, ini hemel nanga grontapoe. A de a bosroiti foe Jehovah foe ròs a seti foe sani foe Satan, di so langa kaba e graboe a libisma famiri hori na ini den langa anoe foe en. — Jeremia 17:5-7; 25:31-33.

³ A kroektoe seti foe sani na grontapoe moesoe ondrofeni a bosroiti dati. Ma a grontapoe seti foe sani troetroe takroe so? Wan loekoe na san skrifi foe en moesoe de nofo! Na Mateus 7:16, Jesus ben taki foe wan gronprakseri: „Na den froktoe oen sa kon sabi den.” A no de so, taki den moro bigi foto foe grontapoe kon tron koemakoisi foe drugs, ogridoe, takroedoe, hoeroedoe èn a doti di den e doti grontapoe? Na foeroe kondre den fri di sma ben kisi no so langa pasa, no man kisi okasi foe tan, foe politiek broeja, mankeri foe njanjan èn pôtifasi ede. Moro leki wan miljard sma pikinmoro e dede foe angri, foe di lanti no e prati nofo njanjan. Moro fara, a panja di AIDS (SIDA) e panja ensrefi esi-esi go na ala sei, èn drugs nanga a fasi foe libi wan hoeroedoe libi e jepi foe disi go moro esi, e tjari gi wan bigi pisi foe grontapoe wan takroe froewakti gi a dei foe tamara. Spesroetoe sensi a Fosi Grontapoefeti ben broko na ini 1914, dan wan go na baka ben de na heri grontapoe ini ibri pisi foe a libi. — Teki gersi 2 Timoteus 3:1-5.

4. Sortoe tjalensi Jehovah e trowe gi den nâsi?

⁴ Ma Jehovah ben tjari wan pipel komoto na ala nâsi kon makandra, èn di nanga prisiri e teki bodoi foe den pasi foe en èn di e waka ini den foetoepasi foe en. A pipel disi di de na heri grontapoe, ben naki feti-owroe kon tron proegoe, foe di den e tan farawe foe den ogri-ati fasi foe grontapoe (Jesaja 2:2-4). Ija, feti-owroe kon tron proegoe! Ma disi no de tra fasi foe na kari di Jehovah e meki bekènti na Joèl 3:9, 10? Drape wi e leisi: „Meki disi bekènti na mindri den nâsi: ’Santa na orlokoe!’ Wiki den tranga man! Meki den kon krosibei! Meki den opo, ala den fetiman! Smeti den proegoe foe oenoe kon tron feti-owroe èn meki den kotinefi foe oenoe tron lansri.’” Ai, dja Jehovah e tjalensi den tiriman foe grontapoe foe tjari den legremakti foe den di bondroe kon na wán, kon makandra foe feti nanga en na Armagedon. Ma den no man abi boen bakapisi! Den moesoe kisi pori krinkrin! — Openbaring 16:16.

5. San sa de a bakapisi te Jesus sa koti „a windroifidjari foe grontapoe”?

⁵ Foe di den makti tiriman e wisiwasi a Soeverein Masra Jehovah, dan den ben bow maksin di foeroe nanga fetisani di e frede sma — ma a de foe soso! Jehovah e gi a komando na Joèl 3:13: „Poti wan kron-nefi na ini, bika njanjan de foe koti. Kon, saka go, bika [a] winpersbaki kon foeroe. Den persbaki foeroe troetroe pasa marki; bika na ogridoe foe den kon foeroe pasa marki.” Den wortoe de a srefi leki Openbaring 14:18-20, pe a wan engel di e tjari wan srapoe kron-nefi, kisi a komando foe „tjari den bosoe foe a windroifitaki foe grontapoe kon makandra, foe di den droifi foe disi kon lepi”. Na engel e poti wan srapoe kron-nefi na ini èn e trowe den nâsi di de nanga heimemre „na ini a bigi winpersbaki foe na atibron foe Gado”. Na agersifasi, broedoe e komoto na den winpersbaki, so hei leki den ton foe den asi, na wan pasi foe 1600 stadiën fara — wan sani foe 300 km! Fa disi na wan froewakti di e gi den nâsi, di no e gi Jehovah grani frede!

Borgroe di e lespeki wet

6. Fa Jehovah Kotoigi e si den nâsi nanga den tiriman foe den?

⁶ Disi wani taki, dati Jehovah Kotoigi no abi lespeki gi den kondre èn gi den tiriman foe den kondre? Kwetikweti! Den e sari nomo foe a kroektoedoe di ala sma kan si krin, èn den e warskow gi Jehovah dei, di e kon krosibei esi-esi, foe tjari en kroetoe bosroiti kon. Na a srefi ten den e gi jesi na wan sakafasi na a komando foe Paulus na Romesma 13:1: „Meki ibri sili saka ensrefi ondro den hei tirimakti.” Den e gi den libisma tiriman disi grani di fiti, ma den no e anbegi den. Leki borgroe di e lespeki wet, den e waka baka den bijbel markitiki foe eerlijkfasi, troefasi èn krinfasi èn den e meki boen fasi foe libi tron wan pisi foe den eigi osofamiri. Den e jepi trawan foe leri fa den man doe disi toe. Den e libi na wan vredefasi nanga ala sma èn den no abi foe doe nanga demonstrâsi foe gens lanti noso nanga politiek revo. Jehovah Kotoigi e meki moeiti foe de wan eksempel ini a gi di sma moesoe gi jesi na den wet foe libisma hei tirimakti, ala di den e wakti na tapoe a Moro Hei Tirimakti, a Soeverein Masra Jehovah, foe poti volmaakti vrede èn regtfardiki tiri baka na a grontapoe disi.

A e doe a bosroiti foe en

7, 8. (a) Na sortoe fasi den sa seki den nâsi èn na sortoe fasi doengroe sa trowe na den tapoe? (b) Soema Joèl e prenki ini a ten disi èn fa den disi kisi blesi tra fasi leki grontapoe ini algemeen?

⁷ Na wan fasi foe taki sani krin na agersi fasi, Jehovah e gi a froeklari disi moro fara, foe a doe di a o doe a bosroiti foe en: „Son nanga moenkenki srefi seiker sa kon doengroe èn srefi den stari sa hari a brenki foe den poeroe troetroe. En komoto na Sion Jehovah srefi sa bari tranga èn komoto na Jerusalem a sa meki den jere en sten. Èn hemel nanga grontapoe seiker sa seki; ma Jehovah sa de wan kibripresi gi en pipel èn wan fortresi gi den manpikin foe Israèl” (Joèl 3:15, 16). A kondisi foe libisma di ben sori foe de so moi fosi èn taki ala sani e go boen, sa kon de sondro howpoe, e warskow foe takroe froewakti èn a seti foe a grontapoe disi di e fadon na pisipisi sa seki te leki a no de moro, neleki na wan bigi gronseki ben pori en! — Hagai 2:20-22.

⁸ Loekoe a kolokoe djaranti, taki Jehovah sa de wan kibripresi èn wan fortresi gi a pipel foe en! Foe san ede disi de so? Foe di den de a wan enkri pipel — wan internationaal pipel — di ben doe wan sani tapoe den wortoe foe Jehovah: „Oen pipel sa moesoe sabi taki mi na Jehovah, oen Gado” (Joèl 3:17). Foe di a nen foe Joèl wani taki „Jehovah na Gado”, meki na wan fasi di fiti a e prenki Jehovah en salfoe Kotoigi, foe a ten disi, di e wroko na wan deki-ati fasi foe meki a soevereiniteit foe Jehovah bekènti. (Teki gersi Maleaki 1:11.) Te wi e go baka na den fosi wortoe foe a profeititori foe Joèl, dan wi sa si fa a e taki na fesi, na wan fasi di sma kan si so libilibi na den fesi, foe a wroko foe a pipel foe Gado ini a ten disi.

Wan bigi ipi sprenka

9, 10. (a) Foe sortoe plaag Joèl ben froeteri a fesi? (b) Fa Openbaring e taki baka foe a profeititori foe Joèl foe wan plaag èn sortoe krakti a plaag disi abi tapoe a krestenhèit?

⁹ Arki now „a wortoe foe Jehovah di ben kon na Joèl”: „Jere disi, oen owroe man, èn gi jesi, ala oen sma di e libi ini a kondre. Disi ben pasa ini den dei foe oenoe noso srefi ini den dei foe oen afo? Go froeteri disi na oen eigi manpikin èn den manpikin foe oenoe na den manpikin foe den èn den manpikin foe den na a geslakti di e kon a baka. San a woron ben libi, a sprenka njan; èn san a sprenka ben libi, a sprenka sondro frei di e kroipi njan; èn san a sprenka sondro frei di e kroipi ben libi, a kakalaka njan.”— Joèl 1:1-4.

¹⁰ Disi na wan toemoesi aparti wroko, wan di sma sa memre ala ten. Skwala baka skwala foe insekti, moro foeroe sprenka, e pori a kondre. San disi wani taki? Openbaring 9:1-12 e taki toe foe a plaag foe den sprenka, di Jehovah ben seni kon na ondro „wan kownoe, na engel foe a dipi peti” di a no wan tra sma moro leki Krestes Jesus. Den nen foe en Abadon (Hebrewtongo) èn Apolion (Grikitongo) wani taki „Pori” èn „Na Sma di e pori”. Den sprenka disi e prenki a salfoe fikapisi foe den kresten di, now ini a dei foe Masra, e go doro foe pori den wei foe a krestenhèit, foe di den e poeroe ala a bere foe falsi relisi kon na doro èn e meki a refensi foe Jehovah na tapoe en, bekènti.

11. Fa den disi ten sprenka e kisi krakti èn soema spesroetoe na den sani di den e fadon na den tapoe?

¹¹ So leki fa Openbaring 9:13-21 e sori, dan na baka a sprenka plaag wan kefarlek bigi plaag foe asirei-man e kon. Fa disi de troe ini a ten disi, foe di wan toe doesoen salfoe kresten di tan abra èn di moro leki fo miljoen „tra skapoe” e horibaka gi, makandra de den asirei-man di sma no man hori! (Johanes 10:16) Den de wán ini a meki bekènti foe Jehovah en kroetoe di e djoekoe èn di o kon tapoe den sma foe a krestenhèit di e anbegi falsi gado èn tapoe den wan di ’no abi berow foe a kiri di den ben kiri sma, no foe den afkodreiwroko foe den, no foe a hoeroedoe foe den èn no foe den foefoeroe foe den’. Kerki fesiman — foe den lomsoe èn den anitri — di horibaka na wan aktief fasi gi orlokoe, foe a jarihondro disi, di kiri sma èn so srefi priester di lobi foe abi seks nanga pikin-nengre èn kroektoe TV domri, de na mindri den wan kontrari soema den seni den kroetoe boskopoe disi.

12. Foe san ede den tiriman foe a krestenhèit e froedini foe kisi kroetoe boskopoe èn san sa pasa heri esi nanga den, makandra nanga ala memre foe Babilon a Bigiwan?

¹² Gi den sortoe takroe „masra” foe den kerki fesiman, a kari foe Jehovah e piki tranga: „Oen opo, oen droengoeman èn krei; èn bari krei, ala oen win dringiman, foe na switi win ede, bika a koti poeroe foe oen mofo” (Joèl 1:5). Ini a di foe twenti jarihondro disi, relisi foe a krestenhèit poti a fri fasi foe denki foe grontapoe, na a presi foe den krin moreel gronprakseri foe Gado Wortoe. A sori switi gi falsi relisi nanga den gemeente memre foe en foe teki den pasi foe grontapoe abra, ma fa den ben koti soso siki na skin fasi èn na jeje fasi! Heri esi, so leki fa skrifi na Openbaring 17:16, 17, a sa de a „prakseri” foe Gado foe meki den politiek makti fadon onfroewakti na tapoe a heri grontapoe tirimakti foe falsi relisi, Babilon a Bigiwan, èn pori en. Soso dan, te a e si taki den e doe san Jehovah bosroiti kontrari en, ne a sa „wiki baka” foe a droengoe situwâsi foe en.

„Wan bigi èn makti pipel”

13. Na sortoe fasi den legre foe den sprenka sori foe de „bigi èn makti” te joe sa gersi den nanga a krestenhèit?

¹³ A profeiti foe Jehovah e go doro foe taki foe a legre foe sprenka leki „wan bigi èn makti pipel” èn na so a e sori toe gi Babilon a Bigiwan (Joèl 2:2). Den kerkifesiman foe en, foe eksempel, e sari foe di den relisi foe a krestenhèit ben misi foe meki boedistsma na Japan kon tron kresten. Tokoe, ini a ten disi, moro leki 160.000 Japansi Kotoigi foe Jehovah go na ala sei ini a kondre dati èn den e gi persoonlijk bijbel studie na moro leki 200.000 oso foe den sma. Na Italiakondre den e erken den 180.000 Kotoigi foe Jehovah now leki a di foe toe groepoe ini nomroe baka den lomsoe. Foe soso wan lomsoe monsigneur (biskopoe) na Italiakondre e sari taki den Kotoigi foe Jehovah e teki foe a kerki ’no moro mendri leki 10.000 getrow lomsoe’ ibri jari.a Den Kotoigi breiti foe bari den wan disi wan switikon. — Jesaja 60:8, 22.

14, 15. Fa Joèl e skrifi foe a legre foe den sprenka èn na sortoe fasi disi ben kon troe ini a ten disi?

¹⁴ Te Joèl e taki, foe a legre foe sprenka foe salfoe Kotoigi a e froeklari ini Joèl 2:7-9: „Leki tranga man den e lon. Leki fetiman den e kren wan skotoe. Èn ibriwan foe den e go den eigi pasi èn den no e kenki a foetoepasi foe den. Èn den no e poesoepoesoe makandra. Leki wan man di tranga na skin fasi na tapoe a pasi foe en, den e tan go; èn te sonwan ben sa fadon srefi ondro den lansri, den trawan no e koti na pasi. Den e fadon go ini a foto. Na tapoe den skotoe den e lon. Na tapoe den oso den e kren. Na den fensre den e pasa go inisei leki a foefoeroeman.”

¹⁵ Disi na foetroe wan prenki, di e meki sma si sani libilibi, foe a legre foe salfoe „sprenka”, di abi now moro leki fo miljoen kompe, den tra skapoe, makandra nanga den! No wan „skotoe” foe relisi feantifasi kan tapoe den disi. Na wan deki-atifasi „den e tan waka na wan òrdefasi ini a srefi routine disi” foe gi kotoigi na poebliki èn foe doe tra kresten wroko. (Teki gersi Filipisma 3:16.) Na presi foe meki skeki, den ben de klariklari foe tanapoe fesi a fesi nanga dede, so leki doesoendoesoen Kotoigi ben doe di ben ’fadon na ondro den lansri’ foe di den ben weigri foe bari heil gi a lomsoe Hitler foe Nazi Doisrikondre. A legre foe sprenka gi wan finifini kotoigi ini „a foto” foe a krestenhèit, foe di den ben kren abra ala sani di ben hendri den, èn ben go dipi, foe taki en so, neleki wan foefoeroeman, na ini den oso foe di den prati miljardmiljard bijbel boekoe nanga jepi foe na oso-foe-osowroko foe den. A de a wani foe Jehovah taki a kotoigi disi ben gi, èn no wan krakti na hemel noso na grontapoe kan tapoe disi. — Jesaja 55:11.

„Foeroe nanga santa jeje”

16, 17. (a) Oten den wortoe disi foe Joèl 2:28, 29 ben abi wan toemoesi aparti kontroe? (b) Sortoe profeitiwortoe foe Joèl no ben kon troe dorodoro ini a fosi jarihondro?

¹⁶ Jehovah e froeteri den Kotoigi foe en: „Oen pipel sa moesoe sabi taki mi de na a mindri foe Israèl [na jeje fasi] èn taki mi na Jehovah, oen Gado èn no wan trawan de” (Joèl 2:27). A pipel foe en ben kon kisi a froestan foe sani disi, di abi waarde, di Jehovah ben bigin meki den wortoe foe en na Joèl 2:28, 29 kon troe: „A sa moesoe pasa taki mi sa kanti a jeje foe mi go tapoe ala sortoe foe skin, èn oen manpikin èn oen oemapikin seiker sa taki profeititori.” Disi ben pasa na a Pinksterfesa foe 33 G.T., di den disipel foe Jesus, di ben kon makandra, ben kisi salfoe „èn den alamala ben kon foeroe nanga santa jeje.” Ini a krakti foe santa jeje, den ben preiki èn na a wan dei dati, „so wan dridoesoen sili ben kon moro”. — Tori foe den Apostel 2:4, 16, 17, 41.

¹⁷ Na a kolokoe okasi dati, Petrus ben teki so srefi Joèl 2:30-32 taki: „Mi wani gi wondroemarki, na hemel èn na grontapoe, broedoe èn faja èn postoe foe soso smoko. Son srefi sa kenki tron doengroe èn moenkenki ini broedoe, bifo a kon foe Jehovah en bigi dei di e gi frede. Èn a moesoe pasa, taki ibri wan sma di e kari a nen foe Jehovah sa lon komoto boen.” Den wortoe disi ben kontroe foe wan pisi di Jerusalem ben pori na ini 70 G.T.

18. Oten a moro bigi kontroe foe Joèl 2:28, 29 ben bigin foe feni presi?

¹⁸ Ma Joèl 2:28-32 ben o fiti na wan tra fasi ete. Ija, a profeititori disi ben abi wan spesroetoe kontroe foe sensi september 1919. Na a ten dati a pipel foe Jehovah ben hori wan kongres di sma no sa frigiti, na Cedar Point, Ohio, Amerikankondre. A ben de krin, taki a jeje foe Gado ben de drape èn den salfoe foetoeboi foe en ben boeweigi foe bigin nanga a kotoigiwroko na a heri grontapoe èn a e go doro te na a dei foe tide. Fa disi ben meki wan bigi gro kon! Den moro leki 7000 sma di ben de na a kongres dati na Cedar Point gro kon tron ala nanga ala 10.650.158 sma di ben de na a Memrefesa foe a dede foe Jesus tapoe 30 maart 1991. Foe den wan disi, soso 8850 sma ben sori taki den na salfoe kresten. Fa a prisiri foe ala den sma disi bigi, te den e si den froktoe na a heri grontapoe di e kon foe a jeje foe Jehovah di e gi krakti! — Jesaja 40:29, 31.

19. San moesoe de a fasi foe ibriwan foe wi e doe èn e prakseri nanga a dei foe Jehovah di de krosibei a prakseri?

¹⁹ Leti na wi fesi „Jehovah en bigi dei di e gi frede èn di de foe kon” de èn di sa pori a seti foe sani foe Satan (Joèl 2:31). Kolokoe taki „ibriwan sma di e kari a nen foe Jehovah sa kisi kibri” (Tori foe den Apostel 2:21). Fa so? Na apostel Petrus e froeteri wi taki „a dei foe Jehovah sa kon leki wan foefoeroeman” èn a e taki moro fara: „Foe di ala den sani disi sa poeroe a pasi na a fasi disi, dan sortoe sma oenoe moesoe de dan ini santa waka nanga libi èn doe, foe a gi di wi e gi wisrefi ini a dini foe Gado, e froewakti èn e hori boen na ini prakseri a denoja foe a dei foe Jehovah.” Te wi e hori a prakseri taki a dei dati foe Jehovah de krosibei, wi sa prisiri toe foe si a kontroe foe a pramisi foe Jehovah foe wan regtfardiki „njoen hemel nanga njoen grontapoe”. — 2 Petrus 3:10-13.

[Foetoewortoe]

Joe kan froeklari disi?

◻ San na „a dei foe Jehovah”?

◻ Fa Jesus sa koti ’a windroifidjari foe grontapoe’, èn foe san ede?

◻ Na sortoe fasi wan plaag foe sprenka ben kwinsi a krestenhèit sensi 1919?

◻ Fa a jeje foe Jehovah ben kanti tapoe a pipel foe en ini 33 G.T. èn agen ini 1919?