A dei foe Jehovah de krosibei
„Jere disi, oen owroeman, èn poti jesi arki, ala oen sma di e libi na ini a kondre.” — JOÈL 1:2.
1, 2. Foe sortoe situwâsi ede di ben de na ini Juda, Jehovah ben meki Joèl taki en krakti profeititori nanga jepi foe En santa jeje?
„KE FOE a dei; bika a dei foe Jehovah de krosibei, èn leki na ogri pori di e kon foe na Almaktiwan, a sa kon!” Dati na wan toemoesi span sani di meki bekènti! A ben de a boskopoe foe Gado di en profeiti Joèl ben meki bekènti gi En pipel.
2 Den wortoe dati foe Joèl 1:15 ben skrifi na ini Juda, kande na ini a jari 820 b.G.T. Pikin bergi di ben tapoe nanga groengroen prani ben moi a kondre na a ten dati. Froktoe nanga siri-njanjan ben de bogobogo. Den wei ben bigi èn groen. Ma tokoe wan sani no ben boen srefisrefi. Foeroe sma na ini Jerusalem èn na ini a kondre Juda ben anbegi Bâ-al. Na fesi foe a falsi gado disi, a pipel ben teki prati na bradjari fesa pe sma ben e kon droengoe. (Teki gersi 2 Kroniki 21:4-6, 11.) Jehovah ben sa meki ala den sani disi go doro?
3. Gi san Jehovah ben gi wan warskow, èn gi sortoe sani den nâsi moesoe sreka densrefi?
3 A bijbelboekoe Joèl de krinkrin nanga a piki. Jehovah Gado ben o regtfardiki en soevereiniteit èn A ben o meki en santa nen kon santa. A bigi dei foe Jehovah ben de krosibei. Dan Gado ben o tjari kroetoestrafoe kon na tapoe ala den nâsi na ini „a lagi presi foe Josafat” (Joèl 3:12). Meki den sreka densrefi foe go feti nanga na Almaktiwan, Jehovah. Wi toe e tanapoe na fesi a bigi dei foe Jehovah. So boen, meki wi ondrosoekoe moro fini san den profeitiwortoe foe Joèl wani taki na ini a ten foe wi èn na ini a ten di pasa.
Insekt e broko kon na inisei
4. O bigi a sani di ben sa pasa ben o de, di Joèl ben warskow gi?
4 Jehovah e meki a profeiti foe en taki: „Jere disi, oen owroeman, èn poti jesi arki, ala oen sma di e libi na ini a kondre. Disi pasa na ini den dei foe oenoe, noso srefi na ini den dei foe den fositen tata foe oenoe? Froeteri oen eigi manpikin foe disi, èn den manpikin foe oenoe na den manpikin foe den, èn den manpikin foe den na a tra geslakti” (Joèl 1:2, 3). Den owroeman nanga a heri pipel ben kan froewakti wan srefi sortoe sani di no ben pasa na ini a libi foe den noso na ini den dei foe den fositen tata foe den. So aparti a ben o de, taki den ben o froeteri foe en te na ini a di foe dri geslakti! San ben de a toemoesi aparti sani disi di ben o pasa? Efoe wi wani sabi san na a sani di ben o pasa, dan meki wi prakseri taki wi de baka na ini a ten foe Joèl.
5, 6. (a) Taki foe a plaag foe san Joèl e taki na fesi. (b) Soema ben de a Sma di tjari a plaag dati kon?
5 Arki! Foe farawe, Joèl e jere wan babari. A loktoe e kon doengroe, èn a babari dati di e gi groskin e kon moro tranga ala di a loktoe e kon moro doengroe. Dan wan wolkoe di gersi smoko e saka kon. A de wan legre foe miljoenmiljoen insekt. Èn den e tjari wan bigi pori kon! Now, loekoe Joèl 1:4. Den insekt disi di e broko kon na ini a kondre a no soso den sprenka di abi frei èn di e hari foe a wan presi go na a trawan. Kwetikweti! San e kon toe, na den bigi ipi angribere sprenka di e kroipi èn di no abi frei. Den sprenka, di a winti tjari kon, doro wantewante so, èn a babari foe den de leki di foe asiwagi (Joèl 2:5). Foe di den abi bigi angri, meki miljoenmiljoen foe den esi-esi kan kenki wan presi di de leki wan paradijs kon tron wan drei sabana.
6 San e hari kon toe, na woron — te motoe noso kaperka de woron ete. Den bigi legre foe angribere woron kan njan den wiwiri foe prani, pisi foe pisi, wiwiri foe wiwiri, te leki den prani pikinmoro lasi ala den wiwiri foe den. Èn den foeroe sani di den libi abra, den sprenka e njan. Èn awansi san den sprenka libi abra, kakalaka di e kon esi-esi, sa njan dati poeroe krinkrin. Ma loekoe a sani disi: Na Joèl kapitel 2, vers 11, Gado e kari a legre foe sprenka „en sroedati legre”. Ija, en ben de a Sma di ben tjari a sprenka plaag kon di ben o pori a kondre èn ben o tjari hebi angriten kon. O ten? Leti bifo „a dei foe Jehovah”.
„Oen wiki, oen droengoeman”!
7. (a) San ben de a situwâsi foe den relisi fesiman na ini Juda? (b) Fa den tiriman foe krestenhèit na ini a ten disi de na ini wan srefi sortoe situwâsi leki di foe den relisi fesiman na ini Juda?
7 Den e poti wan bigi ipi sma di abi wan takroe-nen aparti, den relisi fesiman foe Juda, te a komando e taki: „Oen wiki, oen droengoeman, èn krei; bari krei, ala oen dringiman foe win, foe a switi win ede, bika a koti poeroe foe oen mofo” (Joèl 1:5). Ija, den droengoeman na jejefasi foe Juda, ben kisi foe jere taki den ben moesoe „wiki”, taki den ben moesoe kisi densrefi baka. Ma no denki taki disi de soso fositen historia. Nownowde, bifo a bigi dei foe Jehovah, den kerki tiriman foe krestenhèit foeroe so nanga „switi win” na agersifasi, taki pikinmoro den no sabi noti foe a komando disi di e kon foe a Moro Heiwan. Den sa froewondroe troetroe te Jehovah en bigi dei di e gi frede, e wiki den foe a droengoe fasi pe den de na ini!
8, 9. (a) Fa Joèl e taki foe den sprenka èn foe a bakapisi foe a plaag foe den? (b) Soema den sprenka e prenki na ini a ten disi?
8 Loekoe a bigi sprenka legre dati! „Wan nâsi de di kon na ini mi kondre, a tranga èn joe no man teri en. Den tifi foe en na den tifi foe wan lew, èn a abi den kakoembe foe wan lew. A meki a droifibon foe mi tron wan sani foe skreki èn mi figabon leki wan tompoe. A piri en boeba troetroe èn a trowe en gowe. Den taki foe en kon weti. Bari krei, neleki fa wan njoenwenke di tai en mindri nanga krosi saka e bari krei foe na eiginari foe en jongoe jari ede.” — Joèl 1:6-8.
9 Disi na soso wan profeititori foe „wan nâsi” foe sprenka, wan sprenka legre, di e broko kon na ini Juda? Nôno, a wani taki moro leki dati wawan. Na ini Joèl 1:6 èn so srefi na ini Openbaring 9:7, sprenka e prenki a pipel foe Gado. A disiten sprenka legre a no wan tra sani leki a „sroedati legre” foe Jehovah en salfoe „sprenka”, nanga so wan 5.600.000 foe den „tra skapoe” foe Jesus di moksi densrefi na den (Johanes 10:16). Joe no breiti taki joe de wan pisi foe a bigi ipi disi foe Jehovah en anbegiman?
10. San ben de a bakapisi foe a sprenka plaag gi Juda?
10 Na Joèl 1:9-12, wi e leisi foe den bakapisi di a sprenka plaag ben abi. A wan ipi baka a trawan e tjari krinkrin pori kon na ini a kondre. Den priester di no getrow no ben abi siri-njanjan, win nanga oli moro, èn foe dati ede den no kan go doro nanga a wroko foe den. Srefi a gron e sari, bika den sprenka ben pori a siri-njanjan foe en, èn den froktoebon ben tan sondro froktoe. Foe di den droifi-djari ben pori, meki no wan win de moro gi den win sopiman disi foe Bâ-al di ben de so srefi droengoeman na jejefasi.
„Naki oensrefi na tapoe oen borsoe, oen priester”
11, 12. (a) Soema e froeklari taki den na priester foe Gado na ini a ten disi? (b) Fa a disiten sprenka plaag abi krakti na tapoe den relisi fesiman foe krestenhèit?
11 Arki a boskopoe foe Gado gi den tranga-ede priester dati: „Tai oen mindri, èn naki oensrefi na tapoe oen borsoe, oen priester. Bari sari krei, oen bedinari foe na altari” (Joèl 1:13). Na ini a fosi kontroe foe a profeititori foe Joèl, den Leifi priester ben dini na a altari. Ma fa a de nanga a lasti kontroe? Na ini a ten disi, den kerki tiriman foe krestenhèit teki a makti foe dini na a altari foe Gado, ala di den e taki dati den na en bedinari, den „priester” foe en. Ma san e pasa nownow te den disiten sprenka foe Gado de na wroko?
12 Te den „priester” foe krestenhèit e si san a pipel foe Jehovah e doe èn e jere a warskow di den e gi taki Gado o tjari kroetoe kon, dan den e broeja. Den e naki densrefi na tapoe den borsoe foe broeja nanga atibron bika foe den takroe bakapisi foe a Kownoekondre boskopoe. Èn den e bari krei foe di den ipi foe den e gowe libi den. Now di den wei foe den no abi noti moro, meki den e tan a heri neti na ini krosi saka, èn e sari foe a lasi di den lasi a moni di den e kisi. Fosi joe denki, den sa lasi a wroko foe den toe! Foe taki en leti, Gado e froeteri den foe sari heri neti, foe di a kaba foe den kon krosibei.
13. A heri krestenhèit leki wan groepoe sa handri boen na tapoe a warskow foe Jehovah?
13 Soleki fa Joèl 1:14 e taki, dan a wan-enkri howpoe foe den de te den abi berow èn e bari kari „Jehovah foe kisi jepi”. Ma wi kan froewakti taki a heri groepoe foe kerki tiriman foe krestenhèit sa drai go na Jehovah? Kwetikweti! Wanwan sma na den mindri ben sa kan doe wan sani na tapoe a warskow foe Jehovah. Ma na angri na jejefasi foe den relisi fesiman disi nanga den kerkisma foe den leki wan groepoe, sa tan go doro. A profeiti Amos ben taki na fesi: „’Loekoe! Dei e kon’, na so a Soeverein Masra Jehovah taki, ’èn mi sa seni wan angriten kon na ini a kondre, a no wan angriten foe brede, èn a no wan dreiwatra foe watra, ma foe sma jere a wortoe foe Jehovah” (Amos 8:11). Na a tra sei, fa wi de nanga tangi taki Gado e gi wi a bigi fesa na jejefasi na wan lobi-ati fasi nanga jepi foe „a getrow èn koni srafoe”! — Mateus 24:45-47.
14. Foe sortoe sani a sprenka plaag de wan marki na fesi?
14 Na ini a ten di pasa èn na ini a ten disi, a plaag foe den sprenka na wan marki di e sori wan sani na fesi. Sortoe sani? Joèl e taigi wi krinkrin, taki: „Ke foe a dei; bika a dei foe Jehovah de krosibei, èn leki na ogri pori di e kon foe na Almaktiwan, a sa kon!” (Joèl 1:15) A broko di Gado en legre foe sprenka na heri grontapoe e broko kon na inisei foe feti na ini a ten disi, e sori krin taki Jehovah en bigi dei di e gi frede de krosibei. Foe troe, ala sma di abi wan reti-ati e angri foe a spesroetoe dei dati te sma sa moesoe gi frantiwortoe, te Gado sa strafoe den godelowsoe sma èn te Jehovah sa wini a strei leki na Universeel Soeverein.
15. Te wi e prakseri a sari situwâsi foe a kondre, dan fa den sma di e poti prakseri na tapoe warskow foe Gado e handri?
15 Soleki fa Joèl 1:16-20 e sori, dan njanjan no ben de moro na ini Juda foe owroeten. Na so a ben de toe nanga a prisiri. Den maksin ben kon leigi, èn den ben moesoe broko den maksin foe den siri-njanjan. Foe di weigron no ben de bika den sprenka ben njan ala prani na ini a kondre, meki den meti ben wakawaka lontoe ini broeja èn ipi-ipi skapoe ben dede. Dati ben de wan bigi rampoe! Fa a ben de nanga Joèl, na ini den situwâsi dati? Soleki fa vers 19 e taki, dan a ben taki: „Na joe, o Jehovah, mi sa kari.” Na ini a ten disi a de so toe, taki foeroe sma e poti prakseri na tapoe den warskow foe Gado èn e bari kari Jehovah Gado na ini bribi.
„A dei foe Jehovah e kon”
16. Foe san ede „den sma di e libi na ini a kondre” ben sa broeja?
16 Arki a komando disi foe Gado: „Oen blo wan toetoe na Sion, èn bari wan feti babari na ini mi santa bergi. Tjari broeja kon na mindri ala den sma di e libi na ini a kondre” (Joèl 2:1). Foe san ede sma ben moesoe handri na a fasi dati? A profeititori e piki: „Bika a dei foe Jehovah e kon, bika a de krosibei! Na wan dei foe doengroe èn foe doistri, wan dei foe wolkoe èn foe deki doistri, leki a leti foe moesoedei di a panja na tapoe den bergi” (Joèl 2:1, 2). A bigi dei foe Jehovah e sori taki a de tranga fanowdoe foe handri wantewante.
17. Fa a sprenka plaag ben abi krakti na tapoe a kondre èn a pipel foe Juda?
17 Prakseri a bigi krakti di a fisjoen foe a profeiti abi te den sprenka di sma no man stòp, e meki wan moi presi di de leki a djari foe Eden kon tron wan drei sabana. Loekoe fa den e taki foe a legre foe sprenka: „Den loekoe neleki asi, èn leki lon-asi, na so den e tan lon. Neleki nanga babari foe wagi na tapoe den ede foe den bergi, den e tan djompodjompo nomo, neleki a babari foe wan faja flam di e bron drei wiwiri poeroe. Den de leki wan tranga pipel, di e tanapoe leki wan feti-legre. Foe den ede, pipel sa abi hebi skin-ati. Èn foe a sei foe ala den fesi, foe troe wan brenki sa kon na den tapoe foe prisiri ede” (Joèl 2:4-6). Na a ten foe a sprenka plaag na ini den dei foe Joèl, a pen foe den anbegiman foe Bâ-al ben kon moro hebi, èn joe ben kan si a frede na tapoe den fesi.
18, 19. Fa den aktiviteit foe a pipel foe Gado na ini a ten disi gersi wan sprenka plaag?
18 Noti no ben tapoe den sprenka, di ben waka na wan orde fasi èn di no ben e weri. Den ben lon „leki tranga man” èn den ben kren skotoe srefi. Efoe ’son wan foe den ben fadon na ondro den lansri di sma ben iti, dan den trawan no ben tapoe foe waka a pasi’ (Joèl 2:7, 8). Fa disi na wan krakti profeitis fasi fa den e taki foe Gado en disiten legre foe simbôlis sprenka! Na ini a ten disi so srefi, Jehovah en legre foe sprenka e tan waka go langalanga. No wan „skotoe” foe gens kan skreki den. Den no e meki a soifri retifasi foe den na Gado kon swaki, ma den de klariklari foe ondrofeni dede, soleki fa a ben de nanga doesoendoesoen Kotoigi di ’ben fadon na ondro den lansri’, foe di den ben weigri foe gi glori na Hitler na ini a pisiten foe a Nazi tirimakti foe Doisrikondre.
19 Gado en disiten legre foe sprenka gi finifini kotoigi na ini „a foto” foe krestenhèit (Joèl 2:9). Den doe disi na heri grontapoe. Te now ete den e kren abra ala sani di e hendri den èn den e go na ini miljoenmiljoen oso, e go miti sma na tapoe strati, e taki nanga den na telefon, èn e meki kontakti nanga den na tapoe ibri fasi di den man te den e meki a boskopoe foe Jehovah bekènti. Ija, den prati miljardmiljard bijbel poeblikâsi èn den sa tan prati foeroe, foeroe moro na ini a diniwroko di den e doe sondro foe stòp — na poebliki èn oso foe oso. — Tori foe den Apostel 20:20, 21.
20. Soema e hori baka gi den disiten sprenka, èn sortoe bakapisi disi abi?
20 Joèl 2:10 e sori taki wan toemoesi bigi ipi sprenka de leki wan wolkoe di kan tapoe a son, moenkenki, nanga den stari. (Teki gersi Jesaja 60:8.) Tweifri de soema de na baka a sroedati legre disi? Boiti a babari di den sprenka e meki, wi e jere den wortoe disi foe Joèl 2:11: „Jehovah srefi sa opo en sten foe troe na fesi en sroedati legre, bika a kampoe foe en foeroe srefisrefi. Bika a sma di e doe a wortoe foe en, a sma dati tranga; bika a dei foe Jehovah bigi èn a e gi sma frede troetroe, èn soema kan kakafoetoe na en ondro?” Ija, now Jehovah Gado e seni en sroedati legre foe sprenka go — bifo a bigi dei foe en.
„Jehovah no e draidrai”
21. San sa de a bakapisi te ’a dei foe Jehovah e kon leki wan foefoeroeman’?
21 Neleki Joèl, na so na apostel Petrus ben taki foe a bigi dei foe Jehovah. A ben skrifi: „A dei foe Jehovah sa kon leki wan foefoeroeman, pe den hemel sa pasa gowe nanga wan bigi babari, ma den elementi di faja srefisrefi, sa smèlter, èn grontapoe nanga den wroko foe en sa bron krinkrin” (2 Petrus 3:10). Na ondro a krakti foe Satan Didibri, den godelowsoe „hemel” e tiri „grontapoe”, dati wani taki, den libisma di no sabi Gado (Efeisesma 6:12; 1 Johanes 5:19). Na ini a ten foe a bigi dei foe Jehovah, den simbôlis hemel nanga a simbôlis grontapoe disi no sa tan na libi na ondro a faja foe na atibron foe Gado. Na presi foe dati, den sa meki presi gi wan „njoen hemel nanga wan njoen grontapoe . . . di wi e froewakti akroederi en pramisi, èn na ini den disi, regtfardikifasi sa de”. — 2 Petrus 3:13.
22, 23. (a) Fa wi moesoe handri na tapoe a sari-atifasi fa Jehovah e sori pasensi? (b) Fa wi moesoe handri ala di a dei foe Jehovah de krosibei?
22 Nanga ala den sani na ini a ten disi di e poeroe sma prakseri èn di e tesi a bribi, wi ben sa kan lasi na prakseri taki a ten foe wi de toemoesi prenspari. Ma te den simbôlis sprenka e tan go doro, dan foeroe sma e arki a Kownoekondre boskopoe. Ala di Gado gi ten foe disi, tokoe wi no moesoe denki taki a e draidrai foe di a e sori pasensi. „Jehovah no e draidrai nanga a pramisi foe en, soleki fa son sma e denki taki a e draidrai, ma a abi pasensi nanga oenoe foe di a no wani taki wan sma e kisi pori, ma a wani taki ala sma moesoe abi berow.” — 2 Petrus 3:9.
23 Ala di wi e wakti a bigi dei foe Jehovah, meki wi poti prakseri na tapoe den wortoe foe na apostel di skrifi na ini 2 Petrus 3:11, 12: „Now di ala den sani disi sa smèlter, sortoe sma oenoe moesoe de foe tjari oensrefi na wan santa fasi èn foe doe sani di e sori taki oenoe gi oensrefi na ini a dini foe Gado, e froewakti èn e hori boen na prakseri a denoja foe a dei foe Jehovah di nanga jepi foe dati, den hemel sa smèlter nanga faja èn den elementi di faja srefisrefi, sa smèlter!” Den sani disi di e doe, seiker wani taki toe dati wi moesoe waka skinskin nanga Jehovah en legre foe sprenka ala di wi abi wan doronomo èn prenspari prati na ini a preikiwroko foe a boen njoensoe foe a Kownoekondre, bifo a kaba e kon. — Markus 13:10.
24, 25. (a) Fa joe e handri nanga a grani di joe abi foe abi wan prati na ini a wroko foe a sprenka legre foe Jehovah? (b) Sortoe prenspari aksi Joèl e aksi?
24 A wroko foe Gado en legre foe sprenka no sa stòp teleki Jehovah en bigi dei di e gi frede broko kon. Taki a legre disi foe sprenka di no wan sma no man stòp, de, na wan moi boeweisi taki a dei foe Jehovah de krosibei. Joe no breiti foe dini makandra nanga den salfoe sprenka foe Gado nanga den kompe foe den na ini a lasti hari di den e hari go na feti, bifo Jehovah en bigi dei di e gi frede, doro?
25 A dei foe Jehovah sa bigi troetroe! A no wan froewondroe taki na aksi e poti: „Soema kan tan tanapoe na en ondro?” (Joèl 2:11). Na ini den toe artikel di e kon, wi sa taki foe na aksi disi èn foe foeroe tra aksi toe.
Joe kan tjari disi kon na krin?
◻ Foe san ede Jehovah ben warskow gi wan insekt plaag di ben kon na tapoe Juda?
◻ Soema na den sprenka foe Jehovah, na ini a disiten kontroe foe a profeititori foe Joèl?
◻ Fa den fesiman foe krestenhèit e handri na tapoe a sprenka plaag, èn fa wan toe foe den kan lowe gi den bakapisi foe a plaag?
◻ O bigi a sprenka plaag de na ini a di foe 20 jarihondro, èn te o ten a sa go doro?
[Prenki na tapoe bladzijde 9]
Na insekt plaag ben de wan marki gi wan sani di moro takroe srefi
[Sma di abi a reti foe a prenki]
Drei bon: FAO photo/G. Singh
[Prenki na tapoe bladzijde 10]
Jehovah Gado de na baka a disiten sprenka plaag
[Sma di abi a reti foe a prenki na tapoe bladzijde 8]
Sprenka: FAO photo/G. Tortoli; Wan bigi ipi sprenka: FAO photo/Desert Locust Survey