Tanapoe stéfi tegen den triki foe Satan
„Weri na fetisani foe Gado, foe kan tanapoe tegen den triki foe Didibri.” — EFESE 6:11.
1. Na ini sortoe situwasi kristensma de di e teki den grani foe den dorodoro?
Kotoigi foe Jehovah di gi densrefi abra èn di e gebroiki den grani di den kisi dorodoro, e prisiri na ini wan jeje paradijs. Di na proféti foe Gado Jesaja ben skrifi na profétifasi foe na disiten situwasi foe den a ben taki: „Na ini na gran sabana séker geregtigheid sa libi, èn ini na froktoe djarl soso regtvaardikifasi sa libi. Èn na wroko foe na troe regtvaardikifasi moe tron vrede, èn na dienst foe na troe regtvaardikifasi, korostoefasi èn sékerfasi te ten di no abi marki.” — Jes. 32:16, 17.
2. Foe san-ede meki Satan ati e bron nanga den dienstknegti foe Jehovah?
2 Foe kan hori na kolokoe situwasi disi so, dan wi moe de nanga ai alaten, bikasi Satan Didibri e djaroesoe na tapoe a kolokoe èn boen jeje fasi foe wi. Leki Gog foe Magog heri esi a sa bigin wan hebi aanval tegen Jehovah pipel (Ezech. 38:8-12). Ma ooktoe tapoe a momenti disi séker a no e loekoe sondro doe wan sani. Te joe e loekoe en boen, a abi moro atibron nanga Jehovah dienstknegti leki oiti, foe di a sabi dati a abi wan sjatoe ten ete. — Openb. 12:12, 17.
3. Foe san-ede meki Satan ati e bron nanga den dienstknegti foe Jehovah?
3 Satan de na tiriman foe na grontapoe di de foe onregtvaardiki sma (Ef. 2:1, 2; 1 Joh. 5:19). Den ala tanapoe na inisé foe na bigi stréaksi di e go foe na universele soevereiniteit. Den e gi wan positief piki foe hori baka gi na tjalansi foe Satan, di wani taki dati ai tjari kon ini degedege ofoe sma ben sa kan de di ben kan hori den soifri-reti-fasi na fesi foe Jehovah (Odo 27:11). Ma dati wan toe kristen e bewijsi dati Didibri de wan soso njan-mofo-man èn wan takroe léman, e meki en ati kon bron srefsrefi. Foe dat’ede a e gebroiki ibri triki, ibri taktik di a abi foe wini den getrow dienstknegti foe Jehovah. Foe dat’ede ’den abi wan stré tegen den goddelowsoe jeje krakti ini den hemel kontren’. — Ef. 6:12.
4. Foe san-ede wi moe wroko tranga foe wini oen swakifasi?
4 A ben sa de ooktoe dan boen foe aksi joesrefisan e kon now: ’Fa mi kan tanapoe stéfi tegen na makti gensman disi?’ Soleki fa wi ben si, a e wroko tapoe den swakifasi foe na fadon skin foe kori kristensma go ini wan trapoe. Kande lesi no de na swaki punt na wi, ma wi abi hé-memre. Kande wi no e firi foe gi wi srefi abra na prisiri foe den senwe, ma wi de nanga gridifasi tapoe wini foe goedoe. Soboen wi moe wroko tranga foe wini den swaki fasi disi èn foe kakafoetoe gi Didibri, so dati a kan lon gowe foe wi. — Jak. 4:7.
Wi jeje fetisani
5. Foe sortoe réde meki wi moe weri na heri fetisani foe Gado?
5 Wi gensman e gebroiki ala ten baka den srefi triki. Te wi e studeri a Wortoe foe Gado wi prakseri kan poti foe dat’ede tapoe den triki di Satan ben gebroiki foe sensi den ten foe na bijbel èn wi e kon sabi fa wi kan tanapoe stéfi tegen den. Na apostel Paulus ben skrifi: „Weri na heri fetisani foe Gado, sodati joe kan tanapoe stéfi tegen den triki foe Didibri.” A ben gi na dek’ati ooktoe: „Teki na heri fetisani foe Gado, so dati joe kan kakafoetoe na a ogri dé èn, baka te joe doe ala sani finfini, kan tanapoe stéfi.” Loekoe dja dati Paulus e poti krakti na tapoe a weri „foe na heri feti sani foe Gado”. A ben sa de kefarlek efoe soso wan pisi foe na fetisani disi di Gado ben gi ben misi, bikasi Satan ben sa si disi èn ben sa kan go heri boen na tapoe na presi disi di swaki. Disi ben sa kan de takroe gi wi na jeje fasi. — Ef 6:11, 13.
6. San ben e aksi foe wi efoe wi wani ’tai wi mindri nanga waarheid’?
6 Na apostel e bigin nanga a dek’ati: „Tanapoe foe dat’ede stéfi, tai oen mindri nanga waarheid” (Ef. 6:14). Na sroedati leerbanti foe owroeten ben de wan leerbanti di wi e tai na a mindri èn nofotron ben abi metaal plaat na tapoe, san ben e sorgoe foe ekstra kibri. Na ini a leerbanti na fet’owroe ofoe dolk foe na fetiman ben de toe. San a wani taki gi wan kristen, foe tai en mindri nanga waarheid? Dati a waarheid foe a wortoe foe Gado tai wi mindri, wani taki dati wi abi wan faste hori a tapoe sodati wi man foe gebroiki den boekoe foe loesoe piki. So leki na sroedati leerboeba ben de leki wan kibri, na so na waarheid sa jepi wi foe tjari den lai foe wi nanga fertrow èn foe kibri wi. Te wi e hori wi jeje bezig nanga den waarheid foe Gado, dan disi séker sa jepi wi foe tanapoe stéfi tegen Satan.
7. San a wani taki foe weri „na borsoe wapen foe regtvaardikifasi”?
7 Moro fara na apostel e taki gi wi taki: „wi moe abi na borsoe wapen foe regtvaardikifasi” (Ef. 6:14). Na ini den ten foe a bijbel wan borsoe wapen ben abi sani leki fisi boebba, maliën ofoe metaal linga ofoe wán pisi metaal, èn a ben e dini spesroetoe foe kibri na ati. Foe abi na borsoe wapen disi foe regtvaardikifasi, wi moe ’kibri wi ati’ moro ala sani (Odo 4:24). Wi kan tanapoe stéfi tegen Satan wawan, te wi abi réde foe dini Jehovah èn foe libi wan krin libi, sodati wi e meki dati wi no tron wan pori krakti na moreel fasi a mindri Jehovah pipel. — 1 Petr. 1:14-16.
8. San de ini a tori foe a „weri foe soesoe na wi foetoe nanga a de klari foe na boen njoensoe foe vréde”?
8 Moro fara Paulus e ferteri dati wi moe abi „soesoe na wi foetoe nanga na de klari nanga na boen njoensoe foe vréde” (Ef. 6:15). San disi wani taki? Dati wi moe wroko tranga foe tan préki na kownoekondreboskopoe tapoe wan vréde fasi, soleki Jezus ben gi komando na den sébitenti evangélium prékiman: „Pe joe sa go ooktoe na ini wan oso, taki fosi: ’Vréde moe kon tapoe na oso disi’”(Luk. 10:5). Wi no e kon na sma foe tjari bewijsi kon nomo. Moro foeroe wi e kon foe tjari trowstoe, prisiri, vréde foe jeje nanga howpoe kon gi den. Satan sa proberi foe poti faja gi son arkiman foe djens wi èn foe de nanga a fasi foe feti, soso foe tjari wi so fara foe doe a srefi. Foe dat’ede wi moe de tactvol èn nanga pasensi èn tron „ala sani gi ala sortoe foe sma”, foe tanapoe stéfi tegen den triki foe Satan. — 1 Kor. 9:19-23.
9. Fa den skilt èn péri di abi faja ben tan fosten?
9 Na apostel e go moro fara nanga en takmakandra nanga na rai: „Teki . . . na bigi skilt foe bribi, nanga san joe kan kiri ala den péri di abi faja foe na goddelowsoewan” (Ef. 6:16). Na Griki wortoe di vertaal dja nanga „bigi skilt”, e sori tapoe wan skilt di ben bigi nofo foe kibri pikinmoro na heri skin. Foe a sé foe den „péri di abi faja”, den Romeinsma ben meki sontron péri foe kentiki di ben abi wan olo na ini èn pe na inisé pikin bus ben de nanga nafta di ben abi faja (wan sortoe oli di e teki faja es’esi) A kan de dati Paulus ben e taki foe den sortoe péri dati.
10. Sortoe „péri di abi faja” Satan e gebroiki?
10 Satan e soetoe difrenti sortoe, „péri di abi faja” kon tapoe kristensma. Spotoe, sjen nanga lé foe pori wan sma nen de na mindri den „péri” disi, di den féanti foe a pipel foe Gado e soetoe kon tapoe den. Den „péri” disi kan de ooktoe den moeiti di son sma e doe foe meki kristen fetiman las’ati, foe di den e sori a tapoe leki fa a gersi, pikinso boen bakapisi foe na prékiwroko ofoe foe meki kon na fesi dati den no e go foeroe a fesi na ini a wini foe swakifasi na skinfasi. Ooktoe bita wortoe, srapoe spotoe wortoe èn wan sori foe sani na wan kroetoefasi de na mindri den sani dati toe. Wawantron Satan ben gi kristensma mankeri foe di a wiki na gridi foe den foe kisi grontapoe koni na ini a tori foe occultisme (a sabi foe kibri jeje tori) ofoe filosofeer foe na bigin nanga na presi pe libisma e go. Joe moe tan farawe foe den „dipi sani disi foe Satan”. Joe e doe dati? — Openb. 2:24.
11. Foe san na bigi nanga na wroko boen foe wi jeje skilt e anga?
11 Foe kibri wi ati tegen den „péri di abi faja” foe Satan, dan wi abi wan bigi skilt foe bribi fanowdoe. O bigi èn o tranga a sa de precies e anga moro foeroe foe wisrefi. Wi sa ondrofeni na fanowdoe kibri na ini a marki te wi e bai na joisti ten foe abi persoonlek bijbelstudie, go prakseri dipi foe a Wortoe foe Gado èn abi demakandra nanga kompe kotoigi foe Jehovah. A no de foe taki dati wi moe poti san wi leri ini wi libi, bika „bribi sondro wroko de wan dede sani” (Jak. 2:26). Wan foe den moro boen fasi foe meki a bribi foe wi kon moro bigi èn moro tranga, sodati wi kan tanapoe stéfi, de foe dat’ede ini a doe foe opregti moeiti foe spikri bribi go na ini tra sma.
12. San de a jeje helm, èn sortoe waarde dati abi gi wi?
12 Paulus e go moro fara nanga den wortoe: „Teki ooktoe na helm foe ferloesoe” (Ef. 6:17). Na ini owroeten son helm ben meki foe walimbo, trawan foe linnen di ben foeroe nanga katoen ofoe leer èn trawan baka foe metaal (1 Sam. 17:38). Ma foe sortoe materiaal wi jeje helm meki? Paulus ben taki gi den kristensma ini Thessalonika: „Meki wi hori wi prakseri na wán èn . . . leki helm abi na howpoe foe ferloesoe” (1 Thes. 5:8). Ija, howpoe kan kibri wi foetroe tegen den klap nanga naki foe Satan nanga en wroko-sani. Wan krakti „howpoe” di abi en fundamenti tapoe na bijbel „no e tjari sjen kon” (Rom. 5:5). Na howpoe dati sa kibri wi tegen den propaganda ini a tori foe goedoe, bikasi a e gi wi réde foe soekoe fosi a kownoekondre foe Gado. — Matt. 6:33; Luk. 12:31.
13. San na „na fet’owroe foe na jeje”, èn san na a waarde foe en?
13 Te foe kaba wi e kon na a wan enkri pisi foe wi fetisani nanga san wi e go val aan, „na fet’owroe foe na jeje, dati na a wortoe foe Gado” (Ef. 6:17). Na Griki wortoe di vertaal dja nanga „fet’owroe”, e sori na tapoe wan sjatoe fet’owroe di ben gersi wan dolk èn disi e sori na tapoe wan feti foe man nanga man. Nanga wan soifri sabi foe a Wortoe foe Gado wi kan soetoe falsi leri èn koti den trowe, tjari den kon na doro leki sani di no de logis èn spesroetoe bewijsi dati den de kontrari nanga den Santa Boekoe (2 Kor. 10:4). Wi no e doe disi foe bigi memre ede, ma foe di wi abi sakafasi èn lobi gi Gado, gi na waarheid èn gi tra sma. Kolokoe dati wi kan ’graboe na wortoe foe libi stéfi’ nanga jepi foe waarheid getrow kristen boekoe. — Fil. 2:16.
Kristen égifasi leki jepisani
14. (a) Foe san-ede wi no abi réde foe abi bigi memre? (b) Foe san-ede wi moe de nanga sakafasi foe tanapoe stéfi tegen Satan?
14 Na sé foe wi jeje fetisani dan kristen égifasi sa jepi wi ooktoe foe tanapoe stéfi tegen Didibri. Foe di Satan e wroko tapoe a bigi memre foe wi, dan wi sa kisi jepi na ini a feti foe wi tegen en te wi de nanga sakafasi èn abi na jeje foe wan gosontoe ferstan, Te joe loekoe en boen dan nowan enkri kristen „moe denki moro foe ensrefi leki de fanowdoe”. Te wi ben doe alasani san wi ben kisi foe doe, dan wi moe kan taki: „Wi de srafoe di no warti noti. Wi ben doe san wi ben moesoe foe doe”. Boiti foe dati, wi abi a no-ferdini-boenfasi foe Gado fanowdoe foe tanapoe stéfi tegen Satan, èn efi wi wani prisiri wisrefi na ini dati dan wi moe de nanga sakafasi, bika „Gado e kakaf oetoe gi den hé-memrewan, ma a e gi no-ferdini-boenfasi na den sakafasiwan”. — Rom. 12:3; Luk. 17:10; Jak. 4:6.
15. Sortoe waarde dwengi wisrefi abi na ini a feti foe wi foe tanapoe stéfi?
15 Dwengi joesrefi na ete wan kristen égifasi di sa jepi wi foe tanapoe stéfi tegen Satan. Efoe wi no man foe dwengi wi firi, wi atibron foe eksempre, ofoe efoe wi e njan èn dringi pasa marki, ofoe wi e gi wisrefi abra na seks, dan wi tanapoe opo-opo gi den aanval nanga triki foe Didibri. Di wi ’ben tjari wisrefi ini akroederi nanga den lostoe foe wi skin’ dan wi ben e waka troetroe „ini akroederi nanga na seti foe sani foe disi grontapoe ini akroederl nanga na tiriman [Satan Didibri] foe na makti foe loktoe, na jeje di e wroko now na ini den manpikin foe tranga jesi” (Ef. 2:1-3). Te wi e meki gridi, doti prakseri nanga firi teki wi abra, dan wi de ini kefar foe kon na ini a trapoe foe Didibri, sodati wi e go doe en wani (2 Tim. 2:26). Foe kan tanapoe stéfi tegen en, wi moe ori wi prakseri nanga firi, èn ooktoe wi wortoe nanga doe, krakti ondro dwengi. Wi moe dwengi wi ferstan foe denki foe sani di de boen, regtvaardiki, krin nanga switi. — Fil. 4:8.
16. Foe san-ede meki no gridi lobi kan jepi wi foe tanapoe stéfi?
16 Spesroetoe no gridi lobi sa jepi wi foe tanapoe stéfi tegen Satan Didibri. Satan de es’esi foe wroko tapoe ibri gridifasi di a kan si na ini wi. Ini na marki di no gridi lobi e meki wi abi foeroe foe doe na ini a dienst nanga anbegi foe Jehovah, na ini a marki dati Satan aanval sa naki poeroe foe wi. Sortoe kans a abi tapoe wi efoe wi lobi Jehovah nanga wi heri ati nanga ferstan nanga wi heri sili nanga tranga? Lobi e meki wi broko-ede gi na ferloesoe foe trawan, èn dati sa jepi wi meki wi ègi ferloesoe kon de séker (Mark. 12:30, 31; 1 Tim. 4:16). Solanga wi e sori lobi na tapoe ala den fasi dati, dan no Satan, no en wrokosani, efi den de now foe si ofoe den no de foe si, sa kan swaki wi krakti tegen den. — 1 Kor. 13:4-8.
17. Foe san-ede meki na begi de so prenspari foe tapoe stéfi?
17 Foe kan tanapoe stéfi tegen den triki foe Satan, dan wi moe gebroiki ooktoe dorodoro begi. Foe san-ede? Foe di eenvoudig wi no kan w dini na ini égi krakti. Wi abi jepi foe tapsé fanowdoe. Baka di Paulus ben taki foe na jeje fetisani, a ben gi tranga na kompe-bribiman foe gebroiki ibri vorm foe begi nanga tranga begi èn foe tan begi na ibri okasi na ini jeje. Na ini dati den ben moesoe „tan nanga ai nanga ala stanfaste fasi èn nanga smeking foe na boen foe ala santawan”, èn foe na apostel toe. — Ef. 6:18, 19.
18, 19. (a) Fa prijsesingi nanga taki tangi kan jepi wi? (b) San na a waarde foe tranga begi nanga smeking?
18 San „ibri vorm foe begi” wani taki? Wan vorm foe begi de prijsesingi. Te wi loekoe soema Jehovah de, en égifasi nanga en positsi na ini a universum, dan a e ferdini séker na prljsesingi foe wi (Ps. 33:1). Ete wan vorm foe begi na foe gi tangi. Èn fa wi abi réde foe gi tangi na a Giman foe „ibri boen presenti nanga ibri boen kado”! Jak. 1:17) Nanga leti wi e kisi na rai „foe taki Jehovah tangi foe en lobi boenatifasi èn foe en wondroewroko gi den libismapikin” (Ps. 107:31). Efoe wi ati nanga wi ferstan foeroe nanga waarderi, dan dati sa jepi wi troetroe foe tanapoe stéfi tegen Satan.
19 Tranga begi de ooktoe wan vorm foe begi. Nanga leti wi kan aksi foe afersi leki koni (Jak. 1:5), santa jeje (Luk. 11:13), pardon foe sondoe (1 Joh. 1:9; 2:1, 2), èn a blesi foe Gado tapoe den moeiti foe wi (Ps. 90:17). Èn ooktoe joe abi smeking, san wani taki dati wi e seni wan faja, tranga fanowdoe begi gi Jehovah Gado, na ini ten foe hebi druk ofoe bigi kefar foe eksempre. Di Paulus ben kon na ini strafoe-oso, a ben aksi foe dat’ede foe seni smeking foe na boen foe en (Ef. 6:18-20). Den vorm disi foe begi sa jepi wi séker foe tanapoe stéfi tegen Satan.
Teki na faste bosroiti foe tanapoe stéfi
20, 21. Fa wi kan kon na doro leki winiman foe na stré?
20 Ini a ten disi Jehovah pipel e prisiri leki groepoe na ini den blesi foe na jeje paradijs. Ma efoe wi wani tan njan boen wisrefi na ini den blesi disi, dan wi no kan si en leki wan sani di e kon foe den srefi. Wi moe loekoe boen ala ten èn tanapoe stéfi tegen wi gensman Satan Didibri. — 1 Petr. 5:8, 9.
21 Soleki wi ben si, Didibri abi foeroe triki, èn a poti ini en ede foe broko wi soifri-retifasi èn foe sorgoe dati wi tapoe foe dini Jehovah Gado. Ma efoe wi hori na wi jeje fetisani di komoto foe Gado, tan kweki froktoe foe en jeje soleki lobi nanga dwengi joesrefi èn foe hori doro ini begi, dan Satan no sa man wini wi. Na so fasi wi sa de srekasreka dorodoro foe tanapoe stéfi tegen den triki foe Satan nanga na lobi jepi foe wi Gado Jehovah.
Joe kan memre disi ete?
◻ Foe san-ede meki Satan ati e bron nanga Jehovah dienstknegti?
◻ San na den sani foe na jeje feti-sani foe wan kristen?
◻ San na wan toe „péri di abi faja” foe Satan, ma sortoe kibri joe abi tegen dati?
◻ Foe san-ede joe moe de nanga sakafasi foe tanapoe stéfi tegen Didibri?
◻ Foe san-ede begi de so prenspari foe tanapoe stéfi?
[Prenki na tapoe bladzijde 16]
Begi alaten leki wan osofamiri sa jepi foe naki den aanval foe Satan trowe