Kownoekondre prékiman e ferteri

Foe na mofo foe pikinnengre

JEZUS ben taki: „Foe na mofo foe pikinnengre èn njoenjoe pikin joe ben seti prijse gi joesrefi” (Matt. 21:16). Disi ben sori taki a de troe na ini a geval foe wan meisje foe dri jari na Guadeloupe foe soema a mama de wan Kotoigi foe Jehovah. Na meisje nofotron ben tan na oso na en granmama te en mama ben go na en wroko èn a pikin ben gi kotoigi na owma dan.

Na mama ben ferteri: „Mi pikin oemapikin alaten ben waka baka owma foe taki na en jesi dati owma moesoe studeri na boekoe Mi boekoe nanga bijbeltori nanga en.” Na piki nofotron ben de: „Tje ba, ma joe sabi dati mi abi hasti èn no abi ten foe dati, bika mi moe doe wroko gi joe mama.” Ma wan dé na pikin foe wi foe dri jari ben tanapoe a tapoe dati en granmama ben studeri nanga èn a naki a boekoe opo èn a bigin foe tjari den bijbelprenki kon na krin gi en granmama. Nanga ferwondroe foe na sabi foe en granpikin na oema teki a boekoe èn bigin lési na ini. Heri esi a bigin ferstan taki san a meisje ben e ferteri en ben de joisti. A belangstelling foe en ben wiki èn moro nanga moro a ben go lési.

Baka wan pisten a granmama ben taki gi a mama foe a pikin: „Fosten noiti mi ben poti someni prakseri na san joe ben ferteri mi foe na Wortoe f oe Gado. Ma dati mi no kan taki now moro, bika now mi e lési wel na ini den Santa Boekoe.”

A pikin ben e tanapoe a tapoe dati en granmama go na den komakandra foe Jehovah Kotoigi èn foe prisiri en na owma ben doe dati. A ben kon na ondro na indruk foe san a ben jere drape. Now a granmama de wan dopoe kotoigi foe Jehovah di gi ensrefi abra.

Jehovah foetroe ben gi prijse na ensrefi foe na mofo foe pikinnegre. Fa a ben de wan bigi prisiri gi den dri sma disi foe dini Jehovah now makandra!

* Wan tra ondrofenitori foe wan pikin e kon foe Nigeria. Wan bijbelstudie ben hori na wan osofamiri di ben de foe wan papa, mama èn toe oemapikin. Na papa ben dede èn na mama ben lasi en belangstelling èn a ben e go baka na en fosten kerki. A ben e dwengi den oemapikin, di ben de sébi nanga twarfoe jari, foe go nanga en. Den oemapikin ben e feti wan hebi feti gi na bribi èn ben tak-go-tak-go srefi nanga den kerki tiriman, na mindri soema na prékiman ben de. Foe di a no ben man tége na bijbelwaarheid, meki a no ben e kon makriki moro na den oso. Efi na oemapikin foe sébi jari no ben go nanga en mama na kerki, a frow no ben e gi na pikin noti foe njan.

Wan dé a pikin go na a Kownoekondrezaal foe Jehovah Kotoigi, ma drape nowan sma ben de foe di den Kotoigi ben go na wan congres. Ma ete a pikin ben e singi, ben e begi èn ben e studeri netleki a ben de a tapoe wan gewoon komakandra.

Na neti dati a pikin no ben asranti en mama na oso. Ma a libifasi disi ben abi krakti na tapoe a mama èn ben meki taki a belangstelling foe en foe na waarheid ben kon na libi baka. A ben bigin a bijbelstudie baka nanga Jehovah Kotoigi, ben go na komakandra èn ben tan gro na ini bijbel sabi. Now a mama de wan dopoe dienstknegti foe Jehovah di gi ensrefi abra èn a e go ooktoe boen nanga a meisje foe sébi jari foe wi na ini a waarheid.

Jehovah ben blesi foe troe na standfaste soifri-retifasi foe na meisje disi foe sébi jari. Fa a ben de wan switi sani gi en dati a mama foe en now de wan dopoe kotoigi! Èn fa a mama de nanga tangi na ati dati a pikin foe en ben kibri en soifri-retifasi na fesi Jehovah!