Panja leti na mindri na doengroe na grontapoe
„Loekoe! doengroe srefi sa tapoe na grontapoe, èn deki doengroe den nationaal groepoe; ma tapoe joe Jehovah sa go skijn èn tapoe joe sma sa si en glori.” — JESAJA 60:2.
1. Sortoe positief piki kan gi tapoe den aksi di e kon dja a fesi?
DISI de foe troe wan toemsi moi ten foe libi na ini! ’Wan toemsi moi ten,’ wan sma ben sa kan taki, ’fa joe kan taki dati, now di na heri grontapoe nanga moeiti e bewégi ensrefi na ini politiek, ekonomia nanga kerki broejafasi èn den naatsi de na ini na deki doengroe foe na atoomten?’ Tokoe a de so dati a ten disi de wan toemsi moi ten — foe na boen njoensoe ede di e préki now na a heri grontapoe èn nanga san den sma di e angri foe waarheid e kisi bodoi foe san a ten foe wi wani taki èn wan moro moi ten srefi ete di den kan si!
2. (a) Sortoe dek’ati Jehovah e gi ini Jesaja 45 nanga 60? (b) Soema na a „oema” foe Gado?
2 Na Fonten foe wi toemsi moi howpoe de no wan tra sma moro leki na Soeverein Masra Jehovah, na Gran Mekiman foe hemel nanga grontapoe (Jes. 45:12, 18). Na en na a sma di e gi na komando di skrifi na ini Jesaja kapitel 60 vers 1: „Opo tanapoe, o oema, panja joe leti, bika joe leti ben kon èn tapoe joe na glori srefi foe Jehovah ben go skijn.” Soema na a „oema” disi? A no de wan Popki foe Fri di no abi libi, ooktoe a no de wan letterlek oema di e gi ensrefi foe den bewégi foe kon fri foe oemasma. Nono, a de na dynamis, go na fesi, hemel organisaatsi foe Jehovah Gado, a ’jepi’ foe en di e gi ensrefi, di de den mirjard-mirjard engel, èn di abi na ini en ooktoe now den „santawan” di opo baka foe dede — den wan di ben sori taki den de getrow te na dede dja na grontapoe leki salfoe kristen — Openb. 11:18.
3. (a) Fa na oema foe Gado ben ’opo tanapoe’? (b) Fa a ben ’panja leti’?
3 „Opo tanapoe, o oema,” na komando foe Jehovah de. Ini gehoorzaamheid na a komando disi meki na hemel organisaatsi foe Gado ben opo tanapoe foe wan brokobroko toestand pe a no ben e meki pikin èn di ben tan hondrohondro jari langa èn now a de na ini wan toestand foe meki pikin foeroe. Na ini 1914 a ben meki na Messiaans Kownoekondre (Openb. 12:1-5). Foe sensi 1919 a ben tjari na fika pisi foe en salfoe Manpikin kon na ini wan „kondre”, ofoe toestand, foe toemsi moi jeje tanboen (Jes. 66:8). Boiti foe dati, a hemel organisaatsi foe Gado ’ben panja leti’ foe den wondroe kownoekondre profétitori. Den boen foeroe manpikin foe en ben „kisi leri foe Jehovah”. — Jes. 54:1, 13.
Leti a mindri foe deki doengroe
4. Sortoe kontrari Jehovah e taki foe en a mindri a pipel foe Gado nanga den naatsi foe grontapoe?
4 „Joe leti ben kon”, Jehovah e ferklari. Ija, „srefi na glori foe Jehovah” ben go „skijn” abra en hemel organisaatsi èn disi ben sori ensrefi tapoe wan kefarlek bigi fasi ini Jehovah pipel di kon boen baka a grontapoe. Ma Jehovah e ferteri moro fara wan kontrari sani nanga den wortoe: „Loekoe! doengroe srefi sa tapoe na grontapoe, èn deki doengroe den nationaal groepoe” (Jes. 60:2). Disi no de wan toemsi moi fasi foe taki foe den grontapoe toestand foe sensi 1914?
5. Foe san-ede na falsi fasi foe anbegi no kan feni wan loesoe gi den problema foe na atoomten?
5 Na kristenheid spesroetoe ben trowe na proféti ’marki’ foe Jezus’ denoja èn foe na bosroiti foe na seti foe sani. Foe dat’ede meki a e tingatinga lontoe na ini wan jeje doengroe di e kon moro deki dé foe dé. Den kerki foe na kristenheid ben sori taki den de wan troetroe pisi foe na grontapoemakti foe falsi fasi foe bribi, Babylon a Bigiwan — di de boen farawe, boen farawe foe na leti foe na waarheid (Matt. 24:3-14; Openb. 17:3-6). Na grontapoe fasi foe anbegi no ben tjari wan loesoe kon gi den problema foe a atoomten disi èn a no man toe foe poeroe a hebi doengroe — na broejafasi di e meki sma siki — di saka kon tapoe na libismafamiri. Na bemoei foe na falsi fasi foe anbegi na ini den afersi foe den politiek naatsi te foe kaba sa tjari en égi pori kon. — Openb. 17:16, 17.
6, 7. (a) Fa na glori foe Jehovah ben go „skijn” na ini den jari 1919-1931? (b) Sortoe hémarki ben doro na ini 1931?
6 Kontrari nanga dati, Jehovah e taki morofara foe en hemel organisaatsi: „Tapoe joe Jehovah sa skijn èn tapoe joe sma sa si en glori” (Jes. 60:2), Na glori disi ben sori ensrefi dja na grontapoe na ini den salfoe kristen, sodati den foe den sé ’ben kan meki den leti ben skijn gi den sma’ (Matt. 5:16). Den jari 1919 te go miti 1931 ben de toemsi moi jari ini na tori foe skijn foe a kownoekondre leti; a pipel foe Gado ben meki ensrefi kon fri krinkrin foe den boei di ben tan ete foe na leri, denki, nanga gwenti foe Babylon. Na ini den jari dati na pikin fika pisi foe troe kristen ben bigin gi wan positief piki tapoe a aksi „SOEMA SA GI GRANI NA JEHOVAH?” Disi ben de na titel foe na studie-artikel ini na Ingrisi uitgave foe Na Wachttoren foe 1 januari 1926.
7 Na ini a ten dati, ini 1931, Jehovah glori ben de foe si moro foeroe tapoe en „knegti”, foe di den ben teki na nen di ensrefi ben gi den — JEHOVAH KOTOIGI (Jes. 43:10, 12). Ini den twarfoe jari foe meki froktoe èn foe activiteit te go doro 1931 na nomroe foe Kownoekondre prékiman ben gro foe wan pikinso go miti tin-doesoendoesoen faja kotoigi.
Fa Jehovah glori e go skijn moro bigi
8, 9. (a) Tapoe sortoe tra groepoe Na Wachttoren ben poti prakseri na ini 1931? (b) Fa den sma disi leki fa na bijbel e taki „ben kisi wan marki”?
8 Ma Jehovah ben sa „skijn” soso foe na boen foe den salfoewan foe na ’pikin ipi Kownoekondreërfgenaam’? (Luk. 12:32). Nono, bika den jari 1931 te go miti 1933 ben sori taki den ben de wan toemsi moi pisiten foe moro leti, foe di na Wachttoren ben bigin poti na prakseri krin na tapoe wan tra groepoe. Na studie-artikel na ini Na Wachttoren foe 1931 ben abi leki nen „NA MAN NANGA NA SKRIFIMAN ENKIKOKRO” èn ben abi leki fundamenti Ezechiël 9:1-11. Bakadi Na Wachttoren ben meki wi kon sabi na „skrifiman”, leki na salfoe fikapisi, den ben taki a sani disi:
9 „A komando ben gi foe ’poti wan marki tapoe den fesi-ede foe den sma di e soktoe èn e bari foe ala den ogri di e doe na a mindri’ foe na kristendom. . . . Masra e taki foe wan klasse foe sma di a ’sa fri ini wan ten foe benawtoe èn sa hori den na libi èn sa blesi den na grontapoe’ (Psalm 41:2, 3). Disi moe de na klasse foe sma di nofotron den ben skrifi foe den leki den ’miljoenmiljoen sma di e libi now èn di noiti sa dede.’” Na ini a ten disi a de wan span tori foe si dati miljoenmiljoen foe den sma disi troetroe ben kisi wan marki foe ferloesoe, foe di den e weri na troe kristensma di den moe de èn e gi den libi abra na Jehovah nanga jepi foe Kristus Jezus. — Gen. 24:5-18; Zef. 2:1-3; Ef. 4:24.
10, 11. (a) Fa Jehu ben de wan prenki foe Jezus? (b) Sori fa foe kon sabi na disiten Jonadab?
10 Spesroetoe aparti den studie-artikel foe den Wachttoren uitgave foe september nanga oktober 1932 ben de. Den ben sori na tapoe toe Kownoe kapitel 9 nanga 10 èn ben sori na ini fa kownoe Jehu ben de wan prenki foe Jehovah kroetoeman, na Kownoe Jezus Kristus, di na salfoe fikapisi a grontapoe e teki presi foe en, èn di e warskow tra sma gi na kroetoe foe Jehovah di e kon. Ma soema na kompe foe Jehu, Jonadab e prenki? Na Wachttoren ben piki:
11 Jonadab ben teki a presi ofoe ben prenki na klasse dati foe sma di de now na grontapoe na ini a ten di na prékiwroko e doe èn. . . no de ini wanfasi nanga Satan organisaatsi, di e teki a stand foe den na a sé foe geregtigheid, èn di de den sma di masra sa kibri na ini a ten foe Armageddon, psa na benawtoe disi èn sa gi den tégo libi na grontapoe. Na Wachttoren ben sori moro fara dati den ben prenki na ini Jezus agersitori foe den ’skapoe nanga den bokoboko’ tapoe soema na blesi foe na Tata e rostoe’ (Matt. 25:31-46). Na artikel e taki: „Na klasse gersi dati a e akroederi soifri nanga den ’skapoe’-klasse di Masra e taki foe den, wan klasse di e gi jepi, trowstoe nanga steun na den salfoe kotoigi foe Gado, foe di den e doe a dienst foe Masra.
12. Sortoe span Openbaring foe waarheid foe Gado ben kon na ini 1935?
12 Den proféti faja disi di koti ben gi na fundamenti foe na historia lezing foe „na bigi ipi” di na president foe na Wachttoren Genootschap J.F. Rutherford ben hori tapoe 31 mei 1935 tapoe na congres foe Jehovah Kotoigi ini Washington D.C. Fa disi ben de wan toemsi moi openbaring foe waarheid foe Gado! Na a okasi dati na overtoigi bewijsi ben gi, dati „na bigi ipi” foe Openbaring 7:9 ben de a srefi leki den „tra skapoe” foe Masra ini Johannes 10:16, leki na Jonadab-klasse. leki den sma di kisi wan marki na den fesi-ede, leki den miljoenmiljoen sma di e libi now èn di noiti sa dede, èn leki „den skapoe di den e prati foe den „bokoboko” èn di sa kisi tégo libi tapoe a grontapoe grondgebied foe a kownoekondre foe Gado. Ala den sani disi ben behandel ini Na Wachttoren foe november nanga december 1935.
13. Sortoe prakseri moro fara ben kon a fesi ini 1938?
13 Ini den jari di ben waka a baka dati, dan Jehovah organisaatsi ben poti foeroe prakseri na tapoe na „bigi ipi” èn a toemsi moi howpoe foe den foe tan na libi èn foe kisi wan presi ini wan paradijs di sa kon boen baka na grontapoe. Foe 9 te 11 september 1938 Jehovah Kotoigi ben kon makandra tapoe wan congres ini Londen. Toe foe den moro prenspari lezing ben de foe jere na tra congres na tra presi na grontapoe nanga jepi foe wan rechtstreekse telefoonverbinding. Ini wan foe den lezing disi di ben nen: „Foeroe na grontapoe”, na prakseri ben tjari kon na fesi dati tapoe na fundamenti foe komando di ben gi fosten a libisma, dati den „Jonadab” di ben sa psa na bigi benawtoe libilibi, ini na njoen ordening baka Armageddon foe wan pisten ben sa trow èn ben sa meki pikin. — Gen. 1:28; 9:1,7; loekoe na Wachttoren foe januari 1939.
14. Fa Jehovah ben meki sani waka boen gi na pipel foe en ini den jari dati?
14 Na ini den jari dati na méstri, Jezus Kristus ben go abra foe tjari moro wrokoman kon makandra èn foe seni den go. Na sofasi na nomroe foe prékiman ini na veld ben gro go te sowan 50.000 ini 1938. — Matt. 9:37, 38.
„Kownoe” èn „naatsi”
15, 16. Fa „kownoe” ben abi wan prati na a kontroe foe Jesaja 60:3-10 (a) ini owroeten, èn (b) ini disi ten? (c) Fa „dorosésma” e dini now na a sé foe den „kownoe”?
15 Na tjari-kon-makandra-wroko disi e kon moi a fesi na ini den vers 3 te 10 foe Jesaja kapitel 60. Drape Jehovah e taki foe a „skijn” foe Sion dati „kownoe” e kon di e dini na organisaatsi di wi kan teki gersi nanga wan oema. Di a pipel foe Gado foe owroeten ben drai kon baka foe a katibo foe Babylon dan kownoe Darius na Mediasma èn kownoe Cyrus foe Persiakondre ben teki fesi na ini a seti foe sani foe a kon boen baka foe Jehovah anbegi na ini Jeruzalem (Dan. 5:30, 31; 9:1; Ezra 1:1-3). Na ini disi den ben de wan prenki di e fiti foe na Almakti Kownoe, Jehovah nanga en medekownoe Jezus, di ben tjari na konboen baka foe na troe anbegi a mindri Jehovah disiten pipel kon (Openb. 11:15, 17). Boiti foe dati, wan salfoe fikapisi foe troe anbegiman — den „kownoe” foe a ten di e kon, „mede-erfgenaam” foe na kownoe Jezus Kristus — ben teki fesi ini na disiten kotoigiwroko. Na den sé e wroko „dorosé sma” — den di no de foe na jeje Israèl, ma sa tron grontapoe onderdaan foe na kownoekondre, èn now kaba ooktoe abi wan prati na alape na grontapoe na a opbow foe theocratis activiteit. — Rom. 8:17; teki gersi nanga Jesaja 61:5, 6.
16 Jehovah srefi e kari wi foe ’opo wi ai na loktoe èn foe loekoe’! Den kownoekondre-erfgenaam di tjari konmakandra e si na den sé na „bigi ipi” dati foe ala naatsi”! (Openb. 7:9; Zach. 8:23; Jes. 2:2, 3) Nanga na faja diniwroko foe den ’den e ferteri foe den prijse foe Jehovah’. Den e gi densrefi ooktoe foe den projekt soleki na bow foe kownoekondrezaal foe na anbegi foe san sonwan e bow na ini soso toe dé. Nanga na „dienst di den e doe” den e jepi nanga den heri ati na grontapoe gro foe den kownoekondre-afersi. — Jes. 60:4-7.
17, 18. (a) Sortoe prisiri sani e feni now presi? (b) Fa disi e agersi moi nanga wan sani san de foe si ini bepaalde ten foe a jari ini Palestina?
17 Jehovah moro fara e poti na aksi disi di fiti: „Soema na den disi di e fré kon netleki wolkoe, èn leki doifi na den olo foe a koi foe den?” Den fosiwan di e kon na a organisaatsi foe Gado, de en „manpikin foe farawe”, di e loesoe densrefi krinkrin foe ala fasi foe anbegi foe Babylon. Den salfoewan disi e tjari nanga den dirisani, foe di den e gi densrefi abra nanga ala san den abi na a nen foe Jehovah”, a Gado foe den. Leki „na Santawan foe Israël” a ben gi den en nen èn foe di a gi den a grani foe dini en leki en kotoigi. Den e teki fesi na ini na hé foe na nen foe a Soeverein Masra foe den, Jehovah, leki a moro bigi, na moro brenki èn na moro glori nen ini heri na universum. — Jes. 60:8, 9.
18 Ma kolokoe taki na salfoe fikapisi no ben tanapoe den wawan ini a tori disi. Dati ben sa de ooktoe moeilek! A groepoe disi di e kon moro owroe e kon moro pikin, foe di a wan baka na trawan e tjari na grontapoe waka foe den kon na wan kaba na ini reti soifrifasi. Sowan 9000 foe den de ete a libi. Ma trawan, di a nomroe foe den e go ini miljoenmiljoen, e fré leki doifi go na „a olo foe na koi foe den” èn den e feni wan kibripresi na ini na organisaatsi foe Gado. Den de leki den bigi ipi doifi di na ini bepaalde ten foe a jari de foe si na ini Palestina — di e fré kon leki wan wolkoe, so foeroe dati na hemel letterlek e kon doengroe.
’Doro di bradi opo’
19. Foe san-ede meki den „doro” foe Jehovah organisaatsi e tan opo, èn fa den „kownoe” nanga „dorosé sma” e doe nanga dati?
19 Nanga sari-ati Jehovah ben opo den doro foe en organisaatsi bradi opo. A e taki foe dat’ede: „Oen doro troetroe sa tan opo doro nomo; srefi na dé ofoe na neti den no sa sroto foe kan tjari na goedoe foe den naatsi kon na ini.” Na so na situwasi de na ini a ten disi, now di na „bigi ipi” di lobi vréde e kon moro bigi dé foe dé ini nomroe. Nanga prisiri den „dorosé sma” disi e gi a „goedoe” foe den na ini na vorm foe ten, krakti nanga moni, nanga „santa dienst di den e doe dé nanga neti”. Den e meki gebroiki foe na „bigi doro di e tjari sma go na diniwroko” èn makandra nanga den toekomstige kownoe den e poti prijse nanga glori na a nen foe Jehovah. — Jes. 60:10, 11; Openb. 7:4, 9, 15; 1 Kor. 16:9.
20. (a) Soema sa „kon ini pori”? (b) Sortoe kolokoe kontrari wi e si dja?
20 Moro fara Jehovah e taki den wortoe disi gi en organisaatsi: „Ibri naatsi nanga ibri kownoekondre di no sa dini joe, sa lasi gwe; èn den naatsi srefi sondro mankeri sa kon na ini pori.” Ala hémemre grontapoe naatsi nanga tra gensman sa poti go na ondro na ini Armageddon. Kontrari nanga dati Jehovah ben poti grani na en égi santa presi foe anbegi. ’Na presi foe en foetoe’, den grontapoe djari foe en bigi jeje tempel foe anbegi, ’a e meki kon switi’ foe di a e tjari kon drape na makandra na bigi ipi foe sma di e gro nomonomo ini nomroe. Nanga mofo foe wan tra proféti Jehovah e ferklari: „Mi wani seki ala naatsi, èn den sani foe ala naatsi di sma ben sa wani sote moesoe kon na ini; èn mi wani foeroe na oso disi nanga glori” (Hag. 2:7). Ma ferfolgoeman, sma di fadon komoto na bribi èn tra gensman di e broko ai gi den, den sa dwengi den ’foe boigi’; den sa moesoe erken nanga sari dati Jehovah Kotoigi troetroe e teki a presi foe na organisaatsi foe Gado, „na foto foe Jehovah na Sion foe na Santa Israël”. — Jes. 60:12-14.
21, 22. (a) Sortoe djaranti Jehovah gi dja? (b) Fa en pipel ’e soigi’ na agersifasi na „merki foe naatsi”? (c) Na a studie foe sortoe tra moi sani wi e loekoe?
21 Jehovah no sa libi a jepiman foe en di gersi wan oema, aladi den gensman e poti ooktoe foeroe sjen a tapoe en ’manpikin nanga oemapikin’ dja na grontapoe. Na presi foe dati ai taki gi en loyaal organisaatsi: „Srefi mi wani poti oenoe leki wan sani foe meki bigi foe ten di no abi marki, wan prisiri psa marki foe geslagti go miti geslagti. Èn joe sa soigi foe troe na merki foe den naatsi.” Na wan agersifasi den sma di e teki presi na grontapoe dja gi Gado organisaatsi e doe disi foe di den e gebroiki ala den goedoe di den abi foe meki a troe anbegi go na fesi. Foe na boen foe na préki foe na boen njoensoe den e meki gebroiki na wan praktisfasi foe modern faciliteit tapoe na kontren foe communicatie, transport nanga druktechniek. Jehovah Kotoigi ben ondrofeni na a wroko disi na sorgoe nanga tiri foe Jehovah, èn ala di den e dini foe na boen foe Jehovah hemel organisaatsi, den e prisiri toe foe na kontroe foe en pramisi. „Oenoe séker sa sabi dati, Mi, Jehovah, de oenoe Jepiman èn dati na maktiwan foe Jakob de oen Ferloesoeman.” — Jes. 60:15, 16.
22 Sortoe tra dek’ati moro fara Jehovah e gi wi ini Jesaja 60:17-22? Dati wi sa go loekoe na ini na toemsi span tori foe a tra studie.
Aksi foe loekoe san wi ben leri
◻ Sortoe kontrari a mindri leti nanga doengroe ben de krin foe si na ini a ten disi?
◻ Sortoe progressief ’leti’ ben kon na ini na pisten foe 1919-1938?
◻ Fa Jesaja 60:8 e kontroe na ini a ten disi?
◻ Fa „kownoe” nanga „dorosé sma” e ’go na ini doro di bradi opo’?