Na boenfasi foe Jehovah na ini „na lasti pisi foe den dé”
„Oen kon, èn meki wi opo go na a bergi foe Jehovah.” — JESAJA 2:3.
1, 2. (a) Sortoe serjoesoe gevaar de leki wan skreki-sani now gi na libismafamiri? (b) San grontapoe tiriman e taki foe Armageddon?
„NA LASTI PISI FOE DEN DÉ.” Foe san-ede meki den wortoe disi alaten baka e gebroiki na ini bijbelprofétitori? Den e bedoel nanga disi dati den teri den dé foe na libismafamiri èn dati na grontapoe foe wi nanga ala libi di de na tapoe te foe kaba sa go na ondro na ini wan rampoe di sa de na a heri grontapoe? Tiriman foe a grontapoe foeroetron e taki foe a frede foe den foe na mogelekheid dati. Na so Andrei Gromyko, na minister foe dorosé afersi foe Moskou, ben warskow den sma foe na Sowjet Unie (Russiakondre na ini wan t.v.-takmakandra tapoe 13 januari 1985 dati „wan serjoesoe kefar, wan serjoesoe srekisani anga tapoe na heri libismafamiri”. A ben taki moro fara: „Ala sani moesoe doe foe poeroe na tapoeskreki disi, sodati na Armageddon nanga san den e frede libisma someni jarhondro kaba, no sa feni presi.”
2 Ooktoe president Ronald Reagan foe den Verenigde Staten foe Amerkankondre ben taki foe Armageddon na wantoe okasi. Na ini na New York Daily News foe 30 oktober 1985 den wortoe di e kon now foe en ben skrifi: „Oen sabi, efoe mi e denki baka a den proféti foe oenoe na ini fosten na ini na Owroe Testament, èn den marki di e taki a fesi foe Armageddon, dan mi e kisi misrefi a tapoe na aksi ofoe wi de na geslakti di troetroe sa si dati.” Moro sjatoe pasa kaba tapoe 8 februari 1985 ben tanapoe na ini The Wall Street Journal: „President Reagan e taki dati a e denki èn e taki foe Armageddon . . . ma no e meki plan foe dati.”
3. (a) San Armageddon de troetroe? (b) San den e bedoel nanga „na lasti pisi foe den dé”?
3 Ija, grontapoe tiriman e taki foe Armageddon. Ma den e ferstan san a bijbel wortoe dati wani taki? A de krin foe no, bika Armageddon no de wan rampoe di libisma o tjari kon. A de na universele feti foe Gado na ini pe en nanga en kompe kownoe Jezus Kristus sa tjari na kroetoe kon tapoe godelowsoe naatsi nanga godelowsoe sma. Armageddon e kon leki wan hémarki foe na „lasti pisi foe den dé” (Daniël 10:14; Openbaring 16:14, 16). San wi moe ferstan na ondro „na lasti pisi foe den dé”? Tra vertaling e vertaal den wortoe disi nanga „na kaba foe den dé” ofoe „na kaba foe den ten” (Professorenbijbel, Willibrordvertaling). Den Hebrew wortoe di vertaal na fasi disi de ’a-charith’ ’haj-ja-mim’. Leki fa na Theological Dictionary of the Old Testament e taki dan den wani taki nofotron „na kabaten èn den no e sori soso tapoe na ten di e kon ma na tapoe „na fasi fa na historia sa doro en hémarki, soboen na kaba foe en”.
4. Fa den sani di e pasa na ini na „kaba ten” e boewégi densrefi go na a hémarki foe den, èn san sa de na bakapisi?
4 Na libismafamiri e libi sowan sébitenti jari kaba na ini na „Bosroiti foe na seti foe sani” di Jezus ben taki a fesi foe en na ini Mattéüs 24:3-25:46. Na pisiten disi, di ben bigin na ini 1914, de na „kabaten” na ini pe sani di e pasa sa boewégi densrefi go a fesi go doro na hémarki foe den. Na hémarki dati sa doro na ini na „bigi benawtoe” na ini pe Satan godelowsoe organisaatsi sa kisi pori (Mattéüs 24:21, 22). Na moro bigi kabapisi sa de dati ’Jehovah santa nen sa poti reti.’ — Ezechiël 38:16, 23.
A boenfasi foe Jehovah
5. Sortoe dek’ati wortoe tanapoe na ini Hosea 3:5?
5 Jehovah de wan Gado di e gi dek’ati. Fa a e gebroiki taki na ini alape foe en Wortoe, na bijbel, di e gi tranga! Wan foe den taki dati tanapoe na ini Hosea 3:5: „Baka dati den manpikin foe Israël sa drai kon baka èn soekoe séker Jehovah, den Gado, èn David, den kownoe, èn séker den sa kon béfibéfi na Jehovah èn na en boenfasi, na ini den lasti pisi foe den dé.”
6. Fa na jeje Israël kenki foe den sekte foe na kristenheid?
6 Na ini 537 b.G.T. wan fikapisi foe Israël ben drai go baka komoto foe katibo na ini Babylon, foe bigin nanga na anbegi foe Jehovah baka na ini Jerusalem. Na so ooktoe na ini Satan organisaatsi, ’e loekoe serjoesoe Jehovah, den Gado’. Fa disi de wan difrenti nanga den sekte foe na kristenheid di fadon komoto foe bribi! No wan foe den sekte disi no wani erken Jehovah leki „den Gado”. Na presi foe ’soekoe Jehovah’, den e tan farawe foe gebroiki den nen.
7. Fa Jehovah pipel ben gi grani na en nen?
7 Na ini a bigin foe „na lasti pisi foe den dé” na artikel di ben kari sma kon ben tjari kon na doro na ini The Watch Tower foe 1 januari 1926: „Soema sa gi grani na Jehovah?” Na fikapisi foe na jeje Israël di ben tjari kon makandra ben gi jesi loyaal na a kari dati, èn na 1931 nanga prisiri den ben teki na nen Jehovah Kotoigi (Jesaja 43:10, 12). Te nanga a dé foe tide den e tan poti na wan apartifasi na prakseri foe den na grontapoe na tapoe Jehovah nen. Ija, na ini 1984 den ben tjari kon na ini foeroe tongo ini totaal miljoenmiljoen eksemplaar foe na toemsi moi kloroe brochure Na Gado nen di sa tan foe tégo.
8, 9. (a) San den e bedoel nanga „e soekoe David, den kownoe”? (b) Pe èn oten den ben poti na kownoe? (c) Fa Jehovah pipel ben kisi wan ferstan foe den sani disi?
8 Hosea ben taki a fesi ooktoe dati den jejee manpikin disi ’ben sa drai kon baka’ èn séker ben sa soekoe ’David den kownoe’. Na Israël na skinfasi no ben kisi wan kownoe sensi na trowe na gron foe na lo foe kownoe ini na famirilin foe David na ini 607 b. G.T. Dati ben de a bigin foe 2520 jari godelowsoe tiri, di na bijbel e kari „den faste ten foe den naatsi” ofoe den „ten foe den heiden” (Lukas 21:24; Daniël 4:16). Ma di na ini l914 „na lasti pisi foe den dé ben bigin Jehovah ben poti na sma foe soema David ben de wan agersifasi — Jezus Kristus — leki Kownoe na ini Sion, na „hemel Jeruzalem”. — Hebrewsma 12:22; Psalm 2:6.
9 A pipel foe Jehovah na grontapoe ben ferstan ala disi no wantronwantron. Ma a soekoe foe den foe ’David wi kownoe,’ ben doro wan hémarki di na ini The Watch Tower foe 1 maart 1925 na artikel ben tjari kon na doro di nen „na Gebortoe foe na naatsi”. A in a artikel disi, di ben abi en fundamenti na tapoe Openbaring kapitel 12, nofo bewijsi ben tjari kon a fesi dati Jehovah Messias kownoekondre ben gebore na ini 1914 na ini hemel èn dati Kristus e tiri now ’na a mindri foe en féjanti’. — Psalm 110:1, 2, Statenvertaling; 2:1-6.
10. (a) Soema ’e kon béfibéfi na Jehovah’ èn fa? (b) Foe san-ede na „frede foe Jehovah” de so prenspari na ini a ten disi?
10 Den memre foe na salfoe fikapisi, èn ooktoe ala sma di ben gi densrefi abra na Jehovah, e ferstan boenboen den sondoe di den ben doe na ini a ten di pasa. Nanga sakafasi den ’ben kon béfibéfi na Jehovah’ foe aksi pardon foe den fosten sondoe foe den. Èn now di „na lasti pisi toe den dé” e hari go na en hémarki, dan den sma di lobi Jehovah e loekoe moro boen a tapoe, dati den no doe sondoe tége Gado èn en regtvaardiki Wet. Wi moe ’tan go béfibéfi na Jehovah’ èn ’de tranga gi wi skin’, efoe wi wani kisi ferloesoe go na ini Gado Njoen Seti (1 Korinte 9:27). Ala ten wi moe abi na ini prakseri ’dati na frede foe Jehovah de na bigin foe koni’. — Psalm 111:10.
11. (a) Na ini sortoe fasi Jehovah boen? (b) Foe san-ede wi moe ’kon béfibéfi na Jehovah boenfasi’?
11 Ma fa wi kan „kon béfibéfi na en boenfasi”? Jehovah na ala fasi a boen. A de moro boen moro ala sani na moreelsé. A e sorgoe dorodoro na ini ala wi fanowdoe. Foe dat’ede netleki David wi kan taki nanga foeroe fertrow: „Jehovah na mi Herder. Noti sa mankeri mi. . . . Troe. soso boenfasi nanga lobi boen-atifasi sa waka na mi baka ala den dé foe mi libi (Psalm 23:1-6). Now, èn te na a kaba foe na lasti pisi foe den dé”, wi moe ’kon béfibéfi na Jehovah boenfasi’, na ini na fertrow dati a sa tapoe den sondoe foe wi nanga na diri offer foe en Manpikin, Jezus (1 Johannes 2:1, 2). Nanga foeroe tangi na ati wi e bari taki: „O Jehovah .. o fa joe boenfasi de pasa marki di joe ben poti leki wan goedoe gi den di e frede joe!” — Psalm 31:17, 19.
12. (a) Fa wi kan waka a baka na boenfasi foe Jehovah? (b) Foe san-ede a de prenspari dati wi doe disi?
12 O moro Satan grontapoe e go moro dipi na ini na swampoe foe takroedoe, meki wi waka na baka Jehovah boenfasi foe di wi e meki na boen njoensoe foe na kownoekondre bekenti na wi naaste èn foe di wi e poti na ini wi libi den égifasi foe Gado. Meki wi kweki den froktoe foe na jeje èn ooktoe foe boenfasi troetroe na ini ala kontakti di wi abi nanga trawan na ini wi osofamiri, na ini wi gemeente èn na ini wi kontakti nanga sma foe na grontapoe (Galacia 5:22, 23; Psalm 119:65-68). Disi de toemsi prenspari, efoe wi wani pasa libilibi „na lasti pisi foe den dé”.
Rai foe famiri-edeman
13. (a) Wi kan njan boen ini a ten disi foe a loekoe foe a dedebedi profétitori foe Jakob? (b) Sortoe rai na profétitori dati abi?
13 Sowan 3700 jari pasa kaba na famiri-edeman Jakob (di den ben kari ooktoe Israël) ben taki wan dedebedi profétitori. A ben taki nanga en twarfoe manpikin, den edeman foe den lo foe Israël nanga den wortoe: „Oen kon makandra, sodati mi kan ferteri oenoe san sa pasa nanga oenoe na ini na lasti pisi den dé.” Den wortoe foe en abi foe doe na ini a ten disi nanga den wan foe na jeje Israël di tan abra èn te joe sa bradi en go moro fara ooktoe tapoe den mati foe den, den „tra skapoe”. Nowan foe den, sondro foe kisi strafoe, kan poti Jehovah moreel markitiki na wan sé, soleki Ruben ben doe. Ooktoe den no kan gi densrefi abra na a firi foe doe ogri na tra sma nanga tranga soleki Simeon nanga Levi. Na presi foe dati den moe kweki den égifasi soleki dek’ati, fertrow na ini Jehovah, foe meki froktoe — égifasi di tra manpikin foe Israël ben sori. — Genesis 49:1, 3-7, 9, 18, 22; Johannes 10:16; teki gersi 2 Petrus 1:8-11.a
14. Sortoe toe profétitori di abi te make nanga makandra e go foe a „kabaten” abi spesroetoe rai gi den „tra skapoe”?
14 Ma den „tra skapoe”, di abi na ferwakti foe pasa libilibi na „kabaten”, e kisi spesroetoe rai. Wi e feni a rai disi, leki wan sani foe poti krakti na tapoe na ini toe profétitori di de krosbé foe makandra, namkoe Jesaja 2:2-5 èn Micha 4:1-5.
Den e lon go na a oso foe Gado
15. (a) Fa Jesaja 2:2 kontroe? (b) Sortoe difrenti safri-ati sma e si now, èn fa den e doe?
15 Na ini Jesaja 2:2 tanapoe: „Èn a moe pasa na ini na lasti pisi foe den dé dati na bergi foe na oso foe Jehovah sa poti stéfi na tapoe na ede foe den bergi, èn a sa poti séker hé tapoe den plkin bergi; èn a drape ala naatsi moe lon go.” A de moro leki féfi tenti jari kaba foe sensi 1935, dati „den sani disi foe ala naatsi di sma ben sa wani sote” e kon makandra na ini Jehovah oso foe anbegi èn „e foeroe na a fasi dati na oso nanga glori”. O moro na hé marki foe „na lasti pisi foe den dé” e doro, o moro na ’lon’ disi go e kon moro krakti. Na agersi bergi foe Jehovah krin anbegi moro nanga moro e kon a fesi, sodati safri-ati sma kan si sortoe kontrari de a mindri a bergi disi nanga den „pikin bergi” foe den sekte èn „bergi” foe na grontapoe foe Satan di e gi pasi a sma foe doe ala san den wani. Den ’e komoto gwe libi’ na falsi fasi foe anbegi èn na ini moro bigi groepoe den e lon go na Jehovah bergi foe anbegi. — Haggaï 2:7; Openbaring 18:2, 4, 5; Psalm 37:10, 11.
16. (a) Safri-ati sma e gi jesi na sortoe kari? (b) Fa Jehovah e meki en pramisi foe „a pasa es’esi” kontroe?
16 Den safri-ati sma disi e gi jesi na a kari na ini Jesaja 2:3: ’Oen kon, èn meki wi go na a bergi foe Jehovah, na a oso foe na Gado foe Jakob èn en sa leri wi foe en pasi, èn wi séker sa waka na en pasi.’ Bika foe Sion na Wet sa komoto èn a wortoe foe Jehovah foe Jeruzalem.” Jehovah e meki en pramisi foe „meki a pasa es’esi na en reti ten” kontroe kaba (Jesaja 60:22). Wan „bigi ipi foe ala naatsi” di dé foe dé e kon moro foeroe e lon go na Jehovah anbegi. 138.540 foe den ben teki dopoe na ini 1982, 161.896 na ini 1983, èn 179.421 na ini 1984. Den wani pasa heri boen „na lasti pisi foe den dé”. — Openbaring 7:9, 14.
17. (a) Fa njoen Kotoigi kan sori warderi gi na boenfasi foe Jehovah? (b) Sortoe positief gebod wi alamala moe gi jesi na den?
17 Den njoen kotoigi disi abi warderi gi na boen pasi di Jehovah ben sori den foe di a ben tjari den go na a leti foe na waarheid, èn den abi na opregti winsi foe sori boenfasi gi tra sma. Den e teki na leri di Jehovah e gi via en wortoe nanga en organisaatsi na wan boenfasi. Na ini a Wet foe Mozes wan lo tron ben tanapoe „joe no mag”, èn Israël ben moe hori ensrefi na dati. (Loekoe Exodus 20:3-17.) Ma den toe bigi gebod gi kristensma, foe san Jezus ben taki foe den, de positief gebod, da foe taki foe ’lobi Jehovah, wi Gado, nanga heri wi ati, heri wi sili, heri wi ferstan èn heri wi krakti èn wi naaste leki wisrefi’ (Markus 12:29-31). Na ini wanfasi Jehovah Kotoigi e gi jesi now na a „Wet” di Gado e seni komoto foe na „hemel Jeruzalem”, èn den e poti den regtvaardiki gronprakseri foe en na ini den libi.
18. (a) Sortoe regels wi moe hori na prakseri? (b) Sortoe boen a abi, foe gi jesi na boen regels?
18 Ma disi no wani taki dati Jehovah pipel no e hori densrefi kwetkweti na regels. Na apostel Paulus e tjari kon na ini memre: „Meki ala sani pasa boen èn na wan ordefasi” (1 Korinte 14:40, Leidse Vertaling). Wantoe regel kande de fanowdoe na ini wi Kownoekondre zaal, foe eksempre foe de zuinig nanga electriciteit ofoe foe loekoe dati pikinnengre no gebroiki na oso foe Gado foe anbegi baka na komakandra leki wan presi foe pré. Osofamiri-edeman kande moe meki wantoe ordelek regeling, foe eksempre gi na geregelde osoramiri takmakandra foe na détekst. Na ini Bethelfamiri regels de, soleki a marki dati den memre foe na famiri moe moi na boen njoensoe nanga bescheiden krosi èn a fasi fa wan sma e sorgoe ensrefi na dorosé (1 Timóteüs 2:9). Den „boekoelolo ”di sa opo na a ten foe Jezus doesoen jari tiri, sondro degedege sa abi regels di sa de foe a boen foe na libismafamiri. A de boen now foe gwenti foe gi jesi na boen regels di meki gi boen orde èn foe na boen foe trawan. — Openbaring 20:12; 1 Korinte 10:24; Filipi 2:3, 4
Na ini a grontapoe disi di foeroe nanga ogridoe di e doe nanga tranga
19, 20. (a) Fa Jehovah pipel ben doe tapoe na gronprakseri na ini Micha 4:3? (b) Fa disi e tjari winimarki gi den na ini „na lasti pisi foe den dé”?
19 Wi e waka go es’esi na a ten pe ’ibri wan sma anoe sa opo tége na anoe foe en mati’ (Zacharia 14:13). Fa Jehovah pipel e doe, now di na grontapoe e kon de moro nanga moro nanga kroektoe èn a doe foe ogri nanga tranga? Den e handri na ini akroederi nanga Micha 4:3 pe tanapoe: „Den sa moe naki na feti-owroe foe den tron ploegoe èn den lansri tron grasnefi.” Jehovah Kotoigi e poti ibri vorm foe doe ogri nanga tranga na wan sé.- „Den no sa leri feti moro.” Sondro degedege disi sa tjari wini kon gi den na ini na lasti pisi foe den dé”. Disi sori ensrefi kaba.
20 Di foe eksempre na ini na Wachttoren foe 15 oktober 1983 ben tjari kon na krin dati wapen no de wan sani gi kristensma, dan den Kotoigi foe Jehovah na ini Njoen-Caledonië ben kon fri foe den wapen foe den. Sjatoe ten a baka wan politiek groepoe na a presi drape ben bigin nanga a soekoe foe wapen na ini wan bepaalde foto, èn ibri oso den ben soetoe faja gi efoe den ben feni wapen na ini. Ma foe den Kotoigi foe Jehovah no wan enkri oso den bron. Dati sma sabi dati wi de neutraal, de nofotron a moro boen verdediging, soleki ben sori taki a de troe na ini Noord-Ierland, Libanon, Zimbabwe nanga tra kondre.
21. (a) Wi moe gi jesi na sortoe kari, èn sortoe fasti bosroiti wi moe teki efoe wi wani de troetroe kolokoe? (b) Fa wi kan de séker dati wi sa abi wan prati na ini Jehovah boenfasi?
21 Kolokoe wi de te wi e gi jesi na a kari na ini Jesaja 2:5: „Kon èn meki wi waka na ini na leti foe Jehovah”! Ma kolokoe ibriwan foe wi de di teki na faste besroiti di na proféti Jesaja e tjari kon na ondro wortoe, di baka a ben skrifi foe na sékerheid nanga vréde foe na paradijs di ben sa de a mindri Gado égi pipel e taki moro fara: „Ala pipel, foe den sé, sa waka na ini na nen foe den gado, ma wi foe wi sé, sa waka na ini na nen foe Jehovah, wi Gado, te ten di no abi marki, ija, foe tégo.” Jehovah boenfasi séker sa kon de foe si gi ala sma di e tan doe na troe anbegi na ini vréde èn na ini wanfasi nanga na ini prakseri na pasa libilibi foe „na lasti pisi foe den dé”.
[Foetoewortoe]
a Loekoe foe wan moro finifini takmakandra foe na profétitori foe Jakob Na Wachttoren foe 1 nanga 15 september 1962.
Aksi foe loekoe san wi ben leri
◻ San joe e ferstan na ondro „na lasti pisi foe den dé”?
◻ Fa wi kan kon ’béfibéfi na Jehovah èn na en boenfasi’?
◻ A dedebedi profétitori foe Jakob e sorgoe foe sortoe tiri?
◻ Sortoe positief stap wi kan doe na ini akroederi nanga Jesaja 2:2-5 èn Micha 4:1-5?
[Prenki na tapoe bladzijde 3]
Hosea e gi wi dek’ati foe waka baka na boenatifasi foe Gado.
[Prenki na tapoe bladzijde 4]
Jakob e ferteri foe égifasi di sma e winsi èn no e winsi.
[Prenki na tapoe bladzijde 4]
Jesaja e gi wi wan kari foe ’waka na ini a leti foe Jehovah’
[Prenki na tapoe bladzijde 5]
Micha e gi wi dek’ati foe waka foe tego na ini Jehovah nen.