’Waka so taki joe mag kisi na prijs’
„Joe no sabi dati den stré lonman na ini wan strélon alamala e lon tranga, ma dati soso wán e kisi na prijs? Waka so dati joe mag kisi en.” — 1 KORINTE 9:24.
1, 2. (a) San ben sa kan de gi wan kristen na ini a ten disi wan bigi sari sani? (b) Sortoe rai Paulus ben gi na ini 1 Korinte 9:24, èn fa na rai dati ben abi foe doe nanga den kristen na ini Korinte?
A BEN moesoe tron a moro bigi hémarki, na baka twarfoe jari di a ben sreka ensrefi boen srefsrefi. Ma a ben de net afoe pasi na ini a stré ofoe na jongoe strélon oema saka ini makandra sodati wan kaba ben kon wantronwantron na ini a dren foe en foe wini wan gowtoe Olympis medaille. Den koranti ben kari na fadon foe en „wan sari sani”.
2 Ma a ben sa de wan moro sari sani efoe wan kotoigi foe Jehovah no ben sa waka te na a kaba na strélon foe na libi, spesroetoe now di na pramisi njoen seti de so krosbé na mofo doro! (2 Petr. 3:13) Na apostel Paulus ben taki foe dati ede nanga leti ooktoe: „Joe no sabi dati den strélonman na ini wan strélon alamala e lon tranga ma dati soso wán e kisi na prijs? Lon so dati joe mag kisi en” (1 Korinte 9:24). Son sma na na ini na owroe Korinte ben de na ini gevaar foe lasi a stré, foe di den ben doe na wan gridifasi san den ben abi prisiri na ini, srefi efoe nanga dati den ben sa ’ati tra sma konsensi’ (1 Korinte 8:1-4, 10-12). Ma na wini foe na strélon ben aksi offer, bika Paulus ben taki: „Alasma di e teki prati na wan stré, e oefen a dwengi foe ensrefi . . . mi de tranga gi mi skin èn mi e tjari en leki wan srafoe, foe mi no ben poti na wan sé tapoe wan ofoe tra fasi, te mi ben préki gi trawan.” — 1 Korinte 9:25-27.
3. (a) Sortoe situwasi di ben de na ini Kolosse ben sa kan tapoe den kristen di ben libi drape foe waka na strélon go te na a kaba? (b) A ben de wan boen sani gi den kristen na ini Kolosse foe go studeri na ini na filosofie èn na mystiek?
3 Di Paulus bakaten ben skrifi gi den Kolossesma, a ben warskow gi ete wan gevaar di ben kan sori ensrefi — ma di ben sa kan ’foefoeroe na prijs’ foe libi na den anoe (Kolosse 2:18). Soboen san kristen ben moe doe foe ’waka so dati den ben kisi en’? Na apostel ben gi den rai foe go poti densrefi na ini na ondrosoekoe foe na filosofie nanga mystiek foe tak-go-tak-kon nanga falsi leriman sodati a waka boen? Nono, bika kristen ’ben dede ini a tori foe den elementairi sani foe na grontapoe,’ èn den no ben moe wani abi noti foe doe nanga den filosofoe èn overlevering foe na grontapoe. — Kolosse 2:20.
4. Fa na pisi foe „soifri sabi” ben sa jepi den kristen na ini Kolosse?
4 Foe dat’ede meki Paulus e gi en kompe-prékiman foe span ala den krakti foe „kon foeroe nanga soifri sabi foe [Gado] wani èn jeje koni foe gi sani”. Ija, nanga „soifri sabi” èn no nanga soso bespiegeling — den ben kan kisi jepi foe „waka tapoe wan fasi di warti Jehovah, foe plisi en dorodoro” (Kolosse 1:9, 10; loekoe ooktoe Kolosse 3:10). Séker, moro foeroe kristensma na ini Kolosse ben sa kan ferteri san den fundamenti leri foe den Boekoe ben de. Ma nanga studi èn go prakseri dipi foe sani den ben moe bow go doro tapoe na fundamenti dati èn kon de „bow stéfi tapoe na fundamenti”, namkoe Kristus (Kolosse 1:23; 1 Korinte 3:11). Efoe den ben doro na dipi dati kaba dan ’nowan sma ben sa kan kori den nanga argument foe hari den kon abra’ (Kolosse 2:4). Foe di den ben sa gebroiki na Wortoe foe Gado na wan koni fasi, dan den ben sa kan fo sori taki den sani di kande engel anbegiman ofoe Judaïsme ben e taki no de troe. — Deuteronomium 6:13; Jeremia 31:31-34.
5. (a) Gi wan toe eksempre foe „dipi sani” di wan lepi kristen moe sabi èn ferstan. (b) Fa na ondrofeni foe wan sisa e sori dati a de gevaarlek foe no teki na ini joe „soifri sabi”?
5 Ma joe ben go moro fara leki „na gronleri” èn joe ben loekoe go doro na ini „den dipi sani foe Gado”? (Hebrewsma 6:1; 1 Korinte 2:10) Joe man foe eksempre sabi san na den meti foe Openbaring, ofoe leg uit san na a jeje tempel? (Openbaring 13; Hebrewsma 9:11) Joe man foe tjari kon na krin san de na bijbel fundamenti foe na disi ten organisaatsi foe Jehovah Kotoigi? Joe sabi boenboen na bijbel leri? Wan kristen sisa ben taki omeni moeiti a ben abi foe opo taki gi den bribi overtoigi foe en di a ben e taki nanga wan oema foe na dri wan gado leri. Bakaten na oema ben gi na sisa foe wi boekoe pe den ben e soso na organisaatsi foe Jehovah. „Na jejefasi mi ben kon dipi na ini wan toestand foe lasi-ati”, na kotoigi disi e ferteri. Kolokoe dati wan owroeman ben kan sori taki den lé sani foe den gensman no ben de troe èn a sisa foe wi en bribi ben bow baka kon tranga (Judas 22, 23). „Now mi e ferstan” a sisa e taki, „san-ede a genootschap alaten e taki, taki wi moe begi, studeri èn go prakseri dipi.”
„Na béfi gi sma
6. (a) San de gi son dienstknegti foe Gado wan naki foetoe? Gi wan toe bijbel eksempre. (b) San nofotron e meki wan sma kisi frede foe libisma?
6 „Na béfi gi sma, dati e span wan krafana”, na koniman ben warskow (Odo 29:25). Èn sontron wan sma kan kon na ini na krafana disi foe di a abi wan bigi „frede gi dede” ofoe wan bigi lostoe foe tra sma feni en boen (Hebrewsma 2:14, 15). Elia foe eksempre sondro foe frede ben tanapoe tégen den Baäl anbegiman. Ma di koningin Izébel ben gi komando foe kiri en, „a ben kon frede . . . èn a ben lon gwe foe en sili ede èn a ben kon na Berseba” (1 Konoe 19:1-3). Ooktoe na apostel Petrus ben gi ensrefi abra na frede foe libisma na ini a neti di den ben kisi Jezus. Petrus ben djaf taki: „Masra, mi de klari foe go nanga joe na ini strafoe-oso èn na ini dede”, ma di den sma ben gi en nen dati a ben de wan foe den discipel foe Jezus, „a ben bigin floekoe èn sweri taki: ’Mi no sabi a sma’” — Lukas 22:33; Mattéus 26:74.
7. (a) San ben de kan de na troetroe réden foe san-ede son sma na ini Kolosse ben proberi foe moksi na kristendom nanga na Judaïsme? (b) Sortoe sma na ini a ten disi gersi taki den abi net so wan sortoe réde di e bewégi den?
7 A kan de dati na frede di kon foe na lostoe foe sma feni wan sma boen, ben de na troetroe réde foe san-ede son sma ben proeberi moksi na kristendom nanga na Judaïsme. Di na ini Galatia Judaïstsma ben bigin bewégi densrefi, Paulus ben poeroe na hoigrifasi foe den kon na doro nanga den wortoe: „Ala sma di wani sori wan moi fasi foe ensrefi na skinfasi, e proeberi foe dwengi joe dati joe moe meki den besnij joe, soso foe den no ferfolgoe joe” (Galatia 6:12). A kan de dati net so wan lostoe foe tra sma feni joe boen e meki dati sonwan no langa psa kaba go sofara foe libi Jehovah organisaatsi?
8, 9. (a) Fa wan kristen ben sa kan sori na ini a ten disi frede foe libisma? (b) Fa wi kan wini na frede disi?
8 Kristensma moe wroko foe wini den sortoe firi disi foe frede. Efoe joe e draidrai ini joe égi birti foe préki, ofoe joe e ori joesrefi na baka efoe a e go foe gi kotoigi na famiri, sma na joe wrokope ofoe tra skoro mati, prakseri dan pikinso na a aksi foe Jehovah na ini Jesaja 51:12: „Soema joe de dati joe ben sa frede foe wan libisma di sa dede, èn foe wan libisma manpikin di kan meki tron soso groen grasi?”(Teki gersi nanga Mattéus 10:28.) Memre joesrefi, „dati a sma di e fertrow tapoe Jehovah, . . . sa kisi kibri” (Odo 29:25). Petrus ben wini a frede foe en foe libisma èn te foe kaba a ben dede foe en bribi ede (Johannes 21:18, 19). Èn foeroe brada na ini a ten disi e sori na srefi dek’ati.
9 Wan sisa di ben de wan zendeling èn di ben dini na ini wan kondre pe den ben tapoe a prékiwroko ben taki: „Bribi de fanowdoe foe go na komakandra ofoe na ini na dienst, aladi joe sabi dati na kans de dati skowtoe kisi joe.” Ma netleki na psalmsingiman den brada ben taki drape: „Jehovah tanapoe na mi sé; mi no sa frede. San wan sma foe grontapoe kan doe mi?” (Psalm 118:6) Èn na wroko na ini a kondre dati e go boen na fesi èn no so langa psa kaba don ben erken en na lanti boekoe. Teki prati dorodoro na a velddienst sa jepi joe séker toe foe kweki na srefi fertrow na ini Jehovah.
Osofamiri banti
10. (a) Sortoe fanowdoe foe wan sma firi de universeel, èn fa gewoonlek sani e sorgoe foe disi? (b) Gi wan toe bijbel eksempre foe man di ben meki na banti foe den nanga den oema ben wegi moro hebi leki a matifasi foe den nanga Jehovah.
10 Na ini wan boekoe di nen The Individual, Marriage, and the Family, den e taki: „Wan universele fanowdoe foe aparti sma na ibri libimakandra èn na ini ibri pisi foe na libimakandra de na fanowdoe ’foe firi taki a de wan pisi foe wan groepoe’ èn foe abi wan sma di wani taki foeroe gi en èn di te fiti na en’.” Na osofamiri seti di Jehovah ben poti e sorgoe gewoonlek foe na fanowdoe disi (Efese 3:14, 15). Ma nofotron Satan e gebroiki na wan fowtoe fasi na banti disi foe tai wi na wi osofamiriman. Den tranga firi di Adam ben abi gi en oema, a de krin, ben poesoe en foe krin ensrefi na ini na opo di a opo ensrefi sondro foe broko en ede foe den bakapisi (1 Timotéus 2:14). Èn san Salomo ben doe? Aladi a ben abi wan barinen koni „a ben psa taki di Salomo ben kon owroe, taki den ègi oema foe en ben beni en ati go waka baka tra gado; èn en ati no ben sori taki a ben de soso gi Jehovah, en Gado . . . èn Salomo ben go doe san takroe ini a ai foe Jehovah”. — 1 Kownoe 11:4-6.
11. Fa ’Eli ben gi en manpikin moro grani leki Jehovah’?
11 Joe e memre na grani Eli, wan hé priester foe Israël? En manpikin Hofni nanga Pinéas ben de „man di no ben warti noti”, di ’no ben e èrken Jehovah’. Den ben sori dati den ben ferakti den srakti-ofrandi di ben tjari gi Jehovah èn den ben doe seks hoeroedoe ’nanga den oema di ben doe dienst na a mofo doro foe na tenti foe komakandra’. Tokoe Eli a wan boen swakifasi ben opo taki („Foe san-ede oenoe e tan doe den sortoe sani disi”) èn a no ben doe nowan moeiti foe poeroe den na ini na grani wroko foe den. A ben de so taki ’a ben gi den manpikin moro grani leki Jehovah’, èn disi ben kostoe en — nanga den — a libi! — 1 Samuël 2:12-17, 22, 23, 29-34; 4:18.
12. (a) Sortoe warskow Jezus ben gi ini a tori foe banti foe na oso-famiri? (b) Sortoe grontapoe reden wan sma ben kan waka na en baka te a e go foe famiriman, ma disi de joisti leki fa a bijbel e taki?
12 Firi foe loyaliteit di fowtoe foe dat’ede ben sa kan tapoe joe na ini na strélon foe joe foe kisi a libi. Jezus ben taigi en discipel: „A sma di abi moro bigi lobi gi tata ofoe mama leki gi mi, no warti gi mi; èn a sma di abi moro bigi lobi gi manpikin ofoe oemapikin leki gi mi, no warti gi mi” (Mattéus 10:37; Lukas 14:26). Ma efoe wan foe den lobiwan foe joe komoto now wan dé na ini a waarheid ofoe den sluit en uit? Joe sa agri dan nanga a grontapoe prakseri dati „a broedoe e kroipi pe a no kan go” èn makandra nanga na famiriman dati go na ini pori? Ofoe joe ben sa poti bribi na ini den wortoe foe Psalm 27:10: „Efoe mi égi tata èn mi égi mama troetroe ben sa libi mi — ija, Jehovah srefi ben sa teki mi”?
13. Fa den manpikin foe Korach ben bewési na loyaliteit foe den na Jehovah, èn fa den ben kisi blesi foe disi?
13 Na sowan bribi den manpikin foe Korach ben abi. Na papa foe den ben de fesiman foe wan opo di den ben opo densrefi tegen na makti foe Mozes nanga Aäron. Ma Jehovah ben bewijsi na tapoe wan dramatis fasi dati a ben tanapoe na baka Mozes èn Aäron foe di a ben kiri Korach nanga den sma di ben meki barki makandra nanga en. „Ma den manpikin foe Korach no ben dede” (Numeri 16:1-3, 28-32; 26:9-11). A de krin dati den ben wégri foe waka na baka den tata na ini na opo di en ben opo ensrefi èn Jehovah ben blesi na loyaliteit foe den foe di a ben libi den na libi. Bakapikin foe den bakaten ben kisi na grani foe skrifi pisi foe na bijbel! — Loekoe den ede foe Psalm 42, 44-49, 85, 87, 88.
14. Sortoe ondrofeni e sori fa a de wan sani di foeroe nanga blesi foe poti loyaliteit na Jehovah moro hé leki loyaliteit na famiriman?
14 Ooktoe na ini a ten disi loyaliteit e tjari blesi kon. Wan jongoe kotoigi e ferteri sortoe sé en nanga en brada ben teki di a mama foe den, di leki wan kristen boen langa kaba ben de inactief ben go ini wan hoeroedoetrow. „Wi ben ferteri den owroeman foe na afersi” so a e ferteri, „èn foe di a no ben e libi na wi oso, wi ben teki a bosroiti foe skotoe a demakandra foe wi nanga en te leki den owroeman ben kan behandel na afersi. A ben de na moro moeilek sani di wi ben moe doe oiti.” Na mama ben opo taki: „A tégo libi foe oenoe wani taki moro gi oenoe leki mi”? Tapoe disi den ben piki: „A matifasi foe wi nanga Jehovah de gi wi moro hé leki alasani.” A sani disi ben seki na oema so kefarlek dati a ben kisi opregti berow, ben wini en jejefasi baka èn de now wan actief prékiman foe na boen njoensoe.
15. (a) Fa son papa nanga mama ben gi pasi dati den égi pikin ben tron wan naki foetoe? (b) Fa wan papa nanga mama kan jepi den srefi èn den pikin foe den foe kisi libi?
15 Son sma ben gi pasi dati den égi pikin ben tron wan naki foetoe gi den. A ben psa dati papa nanga mama di no ben ferstan dati ’lawfasi tai na a ati’ foe jongoewan, ben gi pasi dati den pikin foe den ben abi krosbé demakandra nanga grontapoesma, den e go na prisiri komakandra di no ben de so boen èn srefi den meki mofo, aladi den ben de toemsi jongoe foe trow (Odo 22:15). San ben de foeroetron na sari bakapisi foe sowan fasi foe libi foe kan doe san den wani? Na soengoe foe na boto na jejefasi (1 Timotéus 1:19). Sowan e meki na ogri srefi kon moro takroe foe di den e tapoe den sondoe foe den pikin foe den na wan fini fasi! (Odo 3:32; 28:13) Ma te wan papa ofoe mama ori loyaal na den bijbelgronprakseri, a e jepi no wawan ensrefi ma ooktoe en pikin foe kisi na prijs foe libi.
Den mati foe joe — ’Koni’ ofoe ’sondro ferstan’?
16. (a) Fa den mati foe wi kan wroko tranga na tapoe wi? (b) Soema kan firi es’esi na krakti di mati abi na tapoe den, èn fa disi doe kon?
16 Na boekoe Sociology: Human Society e taki: „Na lostoe foe kisi na respeki foe en moro boen mati e poti wan sma na ondro hebi druk foe fiti ensrefi na den markitiki foe den.” Na boekoe Adolescence e sori dati jongoewan spesroetoe e firi esesi na druk dati. A e taki: „[Disi e kon] nanga nakenki di e feni presi ini den skin foe den, na ini na zelfbeleving foe den èn na ini a matifasi foe den nanga a osofamiri. A bakapisi de dati den e psa moro ten nanga den mati foe den èn moro mendri na ini a osofamiri”.
17. Sori nanga wan eksempre o troe den wortoe foe Odo 13:20 de. (b) Sortoe mati wi ben sa kan si leki „koni”? (c) Fa jongoe sma na ini a ten disi kan waka na baka na eksempre foe na jongoe Samuël?
17 Wan sani di wi no moesoe lasi na prakseri de san tanapoe na ini Odo 13:20: „A sma di e waka nanga koniwan sa kon koni, ma a sma di e bemoei nanga sma sondro ferstan a sa waka takroe nanga en.” Wan kristen oemapikin ben ferteri: „Mi e bigin foe kisi problema troetroe foe ala takroe demakandra foe skoro. Tide mi kisi misrefi dati na skoro mi ben wani gebrolki wan floekoe .. a ben didon kaba na tapoe mi tongo, ma mi ben kan hori en net na inisé ete.” A wan sari sani dati wantoe kristen jongoewan ben meki sokari mati kori den go na ini spesroetoe serjoesoe takroe fasi foe doe. Ma efoe joe de wan jongoewan èn joe wani kisi na prijs, soekoe dan koni mati — mati di abi jejefasi, di e tjari densrefi na wan respekifasi èn di e bow joe na ini den taki foe den. Prakseri dati na jongoe Samuël no ben e soekoe mati nanga den takroemanpikin foe Eli. A ben tan abi foeroe foe doe nanga na ’dini foe Jehovah’ èn na so fasi a no ben kon doti nanga na porifasi foe den. — 1 Samuël 3:1.
Kisi na prijs
18. (a) Fa son brada, sondro foe espresi kande, ben kan tapoe wi na ini a strélon foe wi foe a libi? (b) San sa kibri wi tégen den sortoe krakti disi di no de gosontoe?
18 Soboen loekoe boen foe alasma sma di ben sa kan foefoeroe na prijs foe libi foe joe. A no de foe taki dati disi no wani taki dati joe moe loekoe joe brada nanga takroe prakseri. Ma sontron bepaalde brada, kande no foe espresi, kan taki sani di kan meki joe lasi ati. (’Foe san-ede joe moesoe wroko alaten so tranga? Joe e denki dati joe de na wan enkriwan di djonsro e kisi libi?’). Kande den de so sosrefi sondro nanga sari-ati foe kroetoe joe foe den opregti moeiti foe joe. (’Mi no kan ferstan fa joe e kisi en ini joe ede foe go pionier efoe joe abi tog wan osofamiri. A no de eerlek na fesi foe joe pikin’.) Ma prakseri dati Jezus ben poti na dek’ati foe Petrus foe ’doe en safrisafri’ na wan sé (Mattéus 16:22, 23). Gebroiki na jesi foe joe di a bijbel oefen foe ’tesi wortoe’, èn no meki wortoe di no abi na sten foe na waarheid wroko tapoe joe (Job 12:11). Prakseri dati Paulus ben taki: „Efoe wan sma e stré feti, srefi na ini den pré, a no e kisi wan kroon efoe a no feti akroederi den regel” (2 Timotéus 2:5). Ija, joe moe meki den „regels” foe Gedo tjari joe denki — no nanga jepi foe prakseri di no de foe na bijbel. — Teki gersi nanga 1 Korinte 4:3, 4.
19, 20. (a) Fa den brada foe Jozef ben proberi foe doe en ogri, èn fa Jozef ben doe tapoe na sondro-ati-fasi foe den? (b) Fa wi kan sorgoe dati onvolmaakti libisma no tjari wi so fara foe naki foetoe? (c) Sortoe fasti bosroiti ini a tori foe na prijs wi moe abi, èn foe san-ede?
19 A de troe dati wan kompe-kristen sontron kan „sotoe” joe nanga wan wortoe di a taki sondro foe prakseri (Odo 12:18). No meki dati hari joe poeroe foe na strèlon foe na libi! Prakseri Jozef. En égi brada ben go prakseri foe kiri en, èn aladi den ben meki dati no go doro, den ben seri en te foe kaba go ini ogri-ati katibo. Ma Jozef no ben gi pasi dati a ben kisi bita ati foe disi ofoe ’ben kon atibron tapoe Jehovah’ (Odo 19:3). Na presi foe go teki refensi, bakaten a ben gi den na okasi foe sori taki den ben kenki den fasi. Èn di a ben si den berow „a ben bosi ala en brada èn a ben kré a den neki”. A ben de so leki Jakob ben taki bakaten: „Den bosoetoemen [den djaroesoe brada foe Jozef] ben tan soetoe en èn ben sotoe en èn ben tan abi wan féantifasi nanga en.” Tokoe Jozef ben pai na takrpe ati foe den nanga boenfasi. Na presi foe a ben meki na ondrofeni dati drai en prakseri, ’na tranga foe en anoe ben de soepel’. — Genesis 37:18-28; 44:15-45:15; 49:23, 24.
20 Soboen no meki onvolmaaktisma meki joe naki foetoe fadon, ma ten ’waka so dati joe kisi a prijs’. Netleki Jozef, meki ondrofeni di de wan tesi meki joe kon moro tranga na presi foe joe kon moro swaki. (Teki gersi nanga Jakobus 1:2, 3.) Meki a lobi foe joe gi Gado sori taki a de so tranga dati nowan sma kan de wan naki foetoe gi joe (Psalm 119:165). Prakseri alaten dati Jehoveh e poti na prijs foe tégo libi a joe fesi — wan prijs di e go psa ala sani di wan sma kan skrifi foe en ofoe kan ferstan. No meki no wan sma foefoeroe dati foe joe!
Joe kan memre disi?
◻ Foe san-ede soifri sabi de so prenspari gi kristensma?
◻ Fa wi kan wini na frede foe libisma di son sma ben meki tapoe den foe kisi libi?
◻ Fa wan sma égi oso-famiri ben kan de wan naki foetoe gi en?
◻ Fa wan kristen kan doe tapoe wortoe foe kompe-kristen di kan meki a lasi-ati ofoe di srefi kan hati en firi?
[Prenki na tapoe bladzijde 9]
Te wi foeroe wi ati nanga wi jeje nanga soifri sabi, dan wi e sreka wisrefi foe poti falsi denki a wan sé
[Prenki na tapoe bladzijde 11]
Petrus ben taki dati a no ben sabi Jezns foe di a ben abi frede foe libisma. Bakaten a ben wini na frede disi èn dati de wan sani di ala troe kristen moe doe