Na moifasi foe na kristensma di wi moe de
„Joe moe weri na njoen sma di joe moe de, di e kon de akroederi na wani foe Gado na ini troe regtvaardikifasi nanga loyaliteit.” — EFESE 4:24.
1. Tapoe sortoe moifasi wi wani foe go taki moro fara dja?
WAN odo de di taki: „Na moifasi foe na oema di e fréri didon na ini na ai foe a man di e fréri”, san wani taki dati moifasi de relatief. Na ini san na moifasi foe wan kristen man ofoe wan kristen oema didon? Na a tori dati wi wani go taki now foe en.
Na moifasi di e marki wan kristen man
2. Foe san-ede marki na skinfasi no nofo wawan foe meki wan sma de wan man foe Gado?
2 Meki na a fosi presi wi go loekoe den égifasi di e gi wan kristen man na switi doroséfasi sodati tra sma nanga ala prisiri wani de na ini en kompani. Dorosé égifasi wawan no e meki wan sma de wan „man foe Gado” (1 Timóteus 6:11, Luther-vertaling). Wan man kan de so moi leki a kan èn e hari a prakseri foe tra sma, ma efoe a e tak-go-tak-kon sondro ferstan, a moi dorosé fasi foe en wani taki pikinso. Efoe a abi bigimemre, a grofoe, a no abi maniri èn no sabi sani nofo, dan a no e hari tra sma, ma ai troesoe trawan gwe. Efoe en fasi e sori taki a no de nanga tangi, dan a kan de séker gi tra sma wan nakifoetoe. Efoe a e broko en ede nanga ensrefi nomo èn foe en doroséfasi ofoe na indruk di a e meki tapoe trawan, dan a no sa de a sortoe sma di trawan wani foe de nanga en makandra.
3, 4. (a) San de wantoe égifasi foe wan man foe Gado, soleki e kon na krin na ini na eksempre foe Jezus Kristus? (b) Fa joe ben kan taki foe wantoe égifasi foe wan man foe Gado?
3 Wan man foe Gado, wan man di abi frede foe Gado na a tra sé sa kweki den égifasi foe geregtigheid, sar’ati, lobi nanga switifasi. Sma no ben sabi Jezus Kristus foe a volmaakti skin foe en, ma foe en loyaliteit gi gronprakseri èn gi waarheid. Na fasi fa a ben leri sma, ben meki sma sabi en leki wan sma di e taki nanga makti di ben kon foe Gado (Mattéus 7:28, 29; Johannes 7:46). Wan man di abi frede foe Gado no sa meki den pori en foe di a e angri foe kisi makti ofoe bigi nen. A no sa meki den bai en nanga tjoekoe foe den winimarki ede di wan bepaalde positsi e gi. A de wan man di abi wan tranga wani. A lobi sakafasi, èn a no sa lé. A e sori wan gesontoe frede gi Jehovah (Odo 22:4). Disi de wantoe égifasi di de foe feni na ini wan man di abi frede gi Gado.
4 Wan man foe Gado abi wan boen konsensi èn wan boen ati èn joisti boewégi foe ati (1 Timóteus 1:5; Odo 4:23). A no sa doe sani di e trobi en konsensi foe di ai poti regtvaardiki gronprakseri a wan sé. Foe di a abi wan boen ati nanga joisti boewégi foe ati, meki a no sa gebroiki na ini en kontakti nanga tra sma triki (Hebrewsma 13:18). A no sa meki wan fisti libi nanga doe njan en boen boewégi foe ati na ondro (Hoséa 4:11). A e gi ensrefi tranga leri doronomo foe tapoe en ati foe kon de ferraderlek. Na ini wortoe èn na ini doe a e meki sma sabi en leki wan man foe gronprakseri. — Psalm 15:1, 2.
5. Sortoe rol sar’ati e pré na ini na libi foe wan man foe Gado?
5 Wan man di abi frede foe Gado abi sar’ati nanga tra sma, èn e gi pardon èn abi switifasi. Wan sar’atiman de wan sma di abi firi gi tra sma. A kan sori dati a kan poti ensrefi na ini a presi toe wan tra sma èn ferstan tra sma te trawan de nanga moeilek problema di no man loesoe èn di e broko den ede. Moro leki dati a kan gi pardon na wan sma di e doe en ogri. A man foe poti ensrefi tapoe na lostoe foe pai kroektoe doe foe kroektoe èn skempi foe skempi. Den wortoe na ini 1 Petrus 3:8, 9 e fiti en troetroe. Foe di a e blesi na presi foe a floekoe, meki a e sori taki a abi switifasi èn a e sori dati a e dwengi den moro lagi lostoe, lostoe di de wan marki foe wan man di no e denki bradi, wan man di no man foe sori sar’ati, nanga switifasi gi trawan ofoe gi den pardon. — Efese 4:31, 32.
6. (a) Sortoe égifasi de e kon moro a fesi wan man di abi frede foe Gado abi moro ete, èn san den wani taki? (b) Fa en frow nanga pikin sa si sowan man?
6 Ete wan aparti marki di e kon a fesi foe wan man foe Gado de a lobi di a lobi foe gi sani. Efoe a trow, a e sori dati a de wan getrow trowman èn wan boen papa. Wan man di abi frede foe Gado abi leki wan trowman wan bigi okasi foe de wan krakti èn eksempre foe na boen gi en oema èn gi en pikin (Kolosse 3:19, 21). Foe taki foe a lobi di a lobi foe gi sani, meki so wan man e waka baka na toemsi moi rai foe Masra Jezus Kristus, di ben taki: „Oefen foe gi sani, èn den sa gi joe sani. Wan foeroe, stampoe marki di seki èn di e pasa, den sa trowe go ini joe bere. Bika nanga na marki di joe e marki den sa marki joe ooktoe” (Lukas 6:38). Sowan man séker sa sorgoe gi den famirman di de gi en osofamiri. Ma a sa gi jesi ooktoe na a toemsi moi dek’ati na ini Efese 4:28 foe „doe boen wroko, sodati a kan gi na den mofinawan wan sani.” Leki loyaal trowman wan man di abi frede foe Gado sa tan getrow na a seti foe na trowlibi. En oema sa kan poti fertrow dorodoro na ini en leki wan man di na ini na trowbanti de troetroe wán nanga en (Odo 5:18, 19). Efoe pikin de, dan boiti foe dati a sa sori dati a de wan opregti tata, no wan bedrigi man ofoe wan sma di e handri nanga tra sma na wan oneerlek fasi. Na so fasi a sa srapoe go na ini en pikin den gronprakseri foe eerlekheid (Odo 4:1-5). Fa sowan man de wan moi eksempre gi na jeje foe en pikin di e leri sani gaw! Den sa kan loekoe na en leki wan loyaal man, wan sma di e kibri en soifri-reti-fasi. — Odo 11:3, 4.
7. Sortoe balans loekoe tapoe paiman wan man foe Gado sa abi?
7 Wan man foe Gado ini disi sa loekoe ooktoe a tapoe dati en nanga en osofamiri no e tjari wan hebi paiman lai kon tapoe en neki, foe di a sabi dati disi kan tjari bigi problema kon. A no de foe taki, dati disi wani taki dati a no sa gi pasi dati en nanga en osofamiri go libi bigi. A de wan sma di e bereken den kostoe bifo a doe wan sani (Lukas 14:28-30). A man foe no ke foe ensrefi now foe a ten di e kon èn neleki a ben de so, foe libi san de foe si gi san no de foe si. (Teki gersi nanga Hebrewsma 11:8-10). Foe di a e libi na a fasi disi, meki wan man di abi frede gi Gado sa kisi jepi na ini en aladé libi foe handri ini akroederi nanga en kristen konsensi.
8. Fa so wan man sa si omstandigheden di no de so switi na ini na libi?
8 Na ini a libi foe ala sma foe sondoe nanga onvolmaaktifasi ede meki sontron a de fanowdoe foe kon tanapoe na fesi foe omstandigheden di no de switi. Ma wan man foe Gado na ini den sortoe situwasi disi nanga dek’ati sa hori faste na gronprakseri, ala di ai loekoe na eksempre di Jezus ben gi (Johannes 16:33). Na ini na krakti foe en Gado, Jehovah a sa kakafoetoe nanga dek’ati gi den moeilek problema èn loekoe na ini disi foe kisi jepi nanga tiri foe Jehovah. — Odo 18:10.
9. Fa joe ben sa taki foe a moreel libi foe wan man di e proeberi foe plisi Jehovah?
9 Wan man di troetroe abi frede foe Gado, e hori en skin na ondro dwengi. Nanga tra wortoe a e dwengi en lostoe nanga firi, nanga a ferstan dati en skin de wan boen dinari, ma wan aparti takroe meester. A e denki alaten nomo na den wortoe foe na apostel Paulus di skrifi na ondro krakti foe santa jeje: „Mi de tranga gi mi skin èn mi e tjari en leki wan srafoe” (1 Korinte 9:27). Foe dat’ede meki ai proeberi alaten foe kweki dwengi ensrefi, wan „froktoe foe na jeje”, foe di ai tan farawe foe ala sani di ben sa kan pori en (Galacia 5:22, 23). A e ferstan boen dati gi joesrefi abra na hoeroedoe prakseri kan tjari wan sma go doe hoeroedoe. Ooktoe na ini disi ala fertrow tapoe en Gado, Jehovah èn na tranga di a e gi. — Filipi 4:13.
10, 11. (a) Sortoe égifasi di e meki safoe fasi foe doe kon na trawan, wan man di abi frede foe Gado e sori te a kroetoe sani tapoe wan fowtoe fasi? (b) Na baka sortoe eksempre edeman foe oso sa waka na ini a tori foe osofamiri studi?
10 Èn leki laatste punt, wan man di abi frede foe Gado, man foe piki taki a fowtoe. Foe piki dati a e spijti en èn foe ferteri en trowpatna nanga trawan dati a e spijti en efoe foe en onvolmaaktifasi ede kande tapoe wan ofoe tra fasi a hati na firi foe den. A kan go na Jehovah èn nanga wan krin ati aksi pardon foe en sondoe foe di a ben aksi en oema, tra sma ofoe en pikin foe gi en pardon. Foe kan taki: „A e spijti mi, mi fowtoe”, de séker wan marki foe wan troe man spesroetoe foe wan man di abi frede gi Gado. — Mattéus 18:21, 22; Markus 11:25.
11 Joe no ben sa taki dati wan man, wan trowmasra ofoe wan papa foe a sortoe dati Jehovah ben sa jepi? (Psalm 54:4) Ija, a sa de srekasreka foe kaka foetoe gi den problema di na disiten grontapoe e tjari kon tapoe wi alamala leki wan plan foe na marki foe Satan foe pori ala san boen, èn ooktoe a trowlibi èn kolokoe osofamiri. A sa poti prakseri na a jejefasi foe den osofamirman èn akroederi na eksempre foe getrow, dienstknegti foe Gado na ini bijbelten a sa abi geregeld studie foe a Wortoe foe Gado èn begi nanga den. — Deuteronomium 11:18-21; Odo 7:1-3.
12. Sortoe prenspari rol wi sa go loekoe moro fara?
12 Ma moro sani moesoe doe ete. Ooktoe na oema e pré wan rol ini na wini foe moeilekheid ini na osofamiri. Meki wi poti wi prakseri now tapoe den égifasi di na wefi sa wani foe kweki na ini en libi. — Odo 19:14.
Na moifasi di e marki wan kristen oema
13, 14. Sortoe stap wan oema kan doe foe kisi na boen-ati foe Jehovah, èn efoe a trow foe en osofamiri, èn sortoe rai na apostel Petrus ben gi na oemasma na ini 1 Petrus 3:1-6?
13 Na ini a boekoe Odo den e ferteri wi wan sani foe wan oema di abi frede gi Gado: „Charme kan de wan bedrigi sani èn moifasi wan soso sani; ma na oema di e frede Jehovah, en dati e kisi prijse” (Odo 31:30). We, fa wan oema e kisi den égifasi di e meki en man nanga pikin ofoe tra sma, efoe a no trow, lobi en, èn di e meki a de wan sma nanga soema tra sma wani de nanga ala prisiri? Foe bigin a de so dati wan oema di e frede Gado ati bigi, san wani taki dati a lobi gi sani èn e jepi trawan nanga ala prisiri tapoe ala fasi di a kan, na ini sani na skinfasi èn na ini jejefasi. Efoe mofinawan de, dan en de den fosiwan di wani jepi, bikasi a e sori opregti belangstelling na ini den fanowdoe foe trawan. Ma a no de foe taki dati a e tjari sowan belangstelling kon na ini balans nanga na sorgoe èn prakseri di, efoe a trow, moe gi na en égi osofamiri. — Titus 2:3-5.
14 Moro fara sowan oema abi sakafasi èn no abi bigifasi, de nanga switifasi èn no grofoe, netjes èn no morsoe, boen èn no nanga stré. Èn efoe a trow, a e feti foe waka na baka na rai foe na apostel na ini 1 Petrus 3:1-5.
15. (a) Sortoe marki wan oema di abi frede gi Gado moe feti na en baka èn fa a e doe na ini disi? (b) Fa a e hori baka gi en man? (c) Foe san-ede den e tan lobi en na ini na osofamiri?
15 Boiti foe dati, wan oema di abi frede foe Gado no de wan sma di e sori taki a sabi ala sani, ma e feti foe kweki wan jejefasi. A e lési fajafaja na ini a bijbel èn e poti den gronprakseri foe en na ini en libi (Psalm 119:66). A no e doe disi soso foe égi belang, foe di a wani kisi sabi wawan gi ensrefi, ma moro foeroe a abi na ini prakseri foe prati den boen sani di a ben leri gi tra sma na ini na kristen diniwroko èn ooktoe na ini en aladé kontakti nanga birti, famiri, nanga mati. Wan kristen trowman bréti nanga wan trowoema di leki wan jepi foe en, de wan takmakandra-patna gi en na ini jeje afersi, wan sma di abi ooktoe warderi gi jeje sani èn di makandra nanga en wani sabi Jehovah moro boen (Odo 9:9, 10). Wan oema di e frede Gado foe dat’ede e sori na makti foe si sani èn foe ferstan sani. Efoe a trow, a e ferstan a rol foe en leki a jepi foe en masra. A e ondersteun en na ini a gi foe jeje leti na den pikin, spesroetoe efoe a no de na oso. (Teki gersi 2 Timóteus 1:2, 5; 2 Johannes 1, 2.) A sa tan go doro foe sori lobi èn kisi lobi na ini a osofamiri langa baka di na moifasi foe den jongoejari kande go a baka. En masra kan reken a tapoe dati san a si de boen èn abi wan fundamenti, dati a abi wan gesontoe mening èn e gi opregti dek’ati, foe di a abi switifasi èn ferstan (Odo 25:11). Di Abigaïl ben handri wantewante foe di a ben si sani srapoe meki David ben taki: „Blesi foe na ferstan foe joe.” — 1 Samuël 25:32, 33.
16. Sortoe wortoe nanga doe de aparti na wan oema di abi frede foe Gado?
16 Na bescheidenkrakti foe boen di wan oema e sori foe hori baka gi en man, no sa de ini srapoe, bita, ofoe spotoe wortoe. Boen-ati wan sma e kisi nanga wan switi laf’fesi, wortoe di fiti, safoe èn foeroe-nanga-lobidoe, faja, safrifasi, switifasi nanga wan bigi ferstan. (Teki gersi nanga Odo 25:11; 31:10-28; 1 Thessalonika 2:7.) Safri-atifasi, bribi nanga bescheidenfasi, dati na den sani di wan oema di abi frede foe Gado e meki den kan lobi en. — Psalm 37:11; Hebrewsma 11:11, 31, 35; Odo 11:2.
17. Sortoe waarde na égifasi lobi abi gi wan oema di abi frede gi Gado?
17 Ete wan égifasi di e kon boen a fesi foe wan oema di abi frede foe Gado de na makti di a abi foe sori firi gi tra sma èn lobi (Romeini 12:10). Na moro moi prodo foe en na lobi, wan égifasi di sa meki dati a no doe wan fasi di no e sori switifasi na ini pikin sani. O moi den e skrifi foe na lobi dati na ini 1 Korinte 13:4-7 pe wi e lési: „Na lobi de nanga foeroe pasensi èn switifasi. Lobi no e djaroesoe, a no e meki ensrefi bigi, a no e opo ensrefi, a no e tjari ensrefi tapoe wan fasi di no fiti, a no e soekoe en égi belang, a no e kisi atibron, a no e teri ogri. A no e prisiri foe onregtvaardikifasi, ma a e prisiri nanga waarheid. A e ferdrage ala sani, a e bribi ala sani, a e howpoe ala sani, a e tan hori doro na ini ala sani.”
Sortoe sma wi de?
18. Na fesi sortoe persoonlek aksi ibriwan foe wi e tanapoe now èn san wan ondrosoekoe foe wisrefi sa tjari kon a krin?
18 Na bigi aksi de now: Sma kan kon sabi ibriwan foe wi leki wan kristensma, awinsi wi leki wan man ofoe oema ben trow ofoe no trow? Kontren de pe wi kan tjari kenki kon moro fara, foe di wi e angri foe plisi Jehovah nanga tra sma? A kan de séker dati ibri ondrosoekoe foe wisrefi sa tjari den kontren kon na krin tapoe san wi kan tjari kenki kon. Ma fa a de wan prisiri foe si den sortoe kenki dati na wisrefi, moro leki dati, foe ondrofeni dati tra sma e si den kenki di wi ben tjari kon foe di wi ben poti na ini wi libi a Wortoe foe Gado èn a leri di de na ini, èn dati den sma e prijse wi foe dati! — 2 Korinte 13:5; 1 Timóteus 4:15, 16.
19. Fa wi moe loesoe den problema di e kon tapoe wi pasi aladi wi e proeberi foe libi wan libi foe hori vréde èn foe frede Gado?
19 Wan sma di e libi wan libi sondro foe a kan trow, ma a de en wawan, kan feti a baka foe kweki den égifasi disi (1 Korinte 7:32). Èn efoe dan kande na dé doro dati leki wan man ofoe wan oema a teki na bosroiti foe trow, dan den sortoe égifasi disi séker sa tjari boen kon gi na sma di ben kweki den. Efoe wan sma tan te a ben trow, foe kweki kristen boenfasi, dan disi sa tjari foeroe kolokoe nanga prisiri kon leki bakapisi (Filippi 4:8, 9). Foe na loesoe foe problema a de fanowdoe dati ala toe patna na ini na trowseti doe ala moeiti. Dati wan sma de klari foe erken gwenti di no de so switi èn foe teki den, kan meki a weri gi ensrefi wan kristen persoonlekheid di no switi (Kolosse 3:8-10). Hori ooktoe na ini prakseri dati wan kristen man ofoe oema moesoe kan taki: „Ai spéti mi, gi mi grantangi pardon.” Wi alamala e meki fowtoe. Efoe wi e piki dati wi meki den fowtoe, dan wi e sori dati wi e kweki na warti égifasi foe bescheidenfasi èn sakafasi. — Micha 6:8; Jakobus 3:2.
20. Sortoe wortoe di fiti foe na apostel Paulus na ini Kolosse 3:12-17 de boen èn fiti gi ala sma?
20 Fa den wortoe di e kon now foe Paulus gi na gemeente ini Kolosse de fiti: „Weri gi joesrefi dan, leki sma di Gado e ferkisi, di de santa èn di a lobi leki wan krosi den safoe lobi foe sar’ati, boenfasi, sakafasi foe jeje, safrifasi nanga foeroe pasensi. Tan ferdrage makandra èn gi makandra pardon na wan frifasi efoe na wan abi wan réde na a trawan foe kragi. Soleki Jehovah ben gi oenoe pardon na wan frifasi, doe a srefi so toe. Ma na ala den sani disi weri leki wan krosi lobi, bika a de wan volmaakti banti foe wanfasi. Meki ooktoe na vréde foe na Kristus libi na ini joe ati, bika a foe dat’ede den ben kari joe te joe loekoe en leti kon na ini wan skin, èn sori taki joe de grantangi. A wortoe foe Na Kristus moesoe libi na ini joe foeroe na ini ala koni. Tan leri èn fermane makandra nanga psalm, prijse singi gi Gado, jeje singi nanga tesi, e singi ini joe ati gi Jehovah. Èn awinsi san joe e doe na ini wortoe ofoe na ini wroko, doe ala sani na ini na nen foe Masra Jezus, e taki Gado, na Tata, tangi nanga jepi foe en.” — Kolosse 3:12-17.
21. Fa wi kan gi trawan dek’ati nanga wi waka nanga libi èn den activiteit foe wi?
21 Den moi eksempre dati na ini a bijbel, èn ooktoe na ini na kristen gemeente na ini na di foe twenti jarhondro disi moe gi wi alamala dek’ati foe tan wroko na a kristen sma di wi moe de (Efese 4:22-24). Nanga disi wi sa tron wan blesi gi ala sma nanga soema wi e de. Boiti foe dati, foeroe trawan di wi e tjari na kownoekondre boskopoe gi, sa kon na ondro na indruk èn kisi dek’ati, no wawan nanga wortoe, ma ooktoe nanga faja èn na boen libi nanga waka di den e si na ini na grontapoe famiri foe Jehovah Kotoigi. — Johannes 13:34, 35.
San joe ben sa taki leki wan loekoe sjatoe foe san de na tapsé?
◻ Sortoe égifasi wan man foe Gado moe kweki?
◻ Fa wan kristen man moe sorgoe gi en oema nanga en osofamiri?
◻ Nanga sortoe boenfasi wi e kon sabi wan kristen oema?
◻ Fa sma di no trow ete kan bow nanga koni na a ten di de na den fesi?
[Prenki na tapoe bladzijde 6]
Wan man di abi jejefasi abi égifasi di e hari tra sma kon na en
[Prenki na tapoe bladzijde 8]
Wan oema di abi frede foe Gado e lobi trawan èn trawan e lobi en
[Prenki na tapoe bladzijde 9]
Kristen di de den wawan èn di no trow kan kweki na njoen sma di den moe de foe libi wan libi di foeroe nanga wroko èn prisiri