Jezus libi nanga diniwroko

Foeroe Samaritaansma e sori bribi

TE DEN discipel e drai baka foe Sichar kon nanga njanjan, den e feni Jezus na a Jakob fonten pe den ben libi en a baka. Ma now a e taki nanga wan Samaritaan oema. Te den discipel doro, a oema e libi en watra-djogo, èn e waka go na a foto.

Foe di den sani di Jezus ben ferteri en ben abi en belangstelling srefsrefi, a e taigi den sma na ini a foto: „Kon nanga mi èn loekoe wan sma di ben ferteri mi ala sani di mi ben doe.” Èn foe meki den kisi gridi, a e aksi: „A sma disi no ben sa de kande na Kristus?” Na aksi no e misi en krakti — den sma e go loekoe densrefi.

Ini a pisten dati den discipel e gi Jezus dek’ati foe njan njanjan di den ben teki kon foe a foto. Ma a e piki: „Mi abi njanjan foe njan di oenoe no sabi.”

„Wan sma ben tjari kande wan sani gi en foe njan?” den discipel e aksi makandra. Jezus e tjari kon a krin: ’Mi njanjan de dati mi e doe a wani foe en di ben seni mi kon èn foe klari en wroko. Oenoe e taki tog taki a de fo moen ete bifo na kotiwroko doro?’ Ma dan Jezus e sori a tapoe a jeje kotiwroko èn a e taki: „Now kaba na sma di e koti e kisi wan paiman èn e tjari froktoe kon makandra gi na tégo libi.”

Kande Jezus ben kan si kaba na toemsi moi fasi fa na kotoigiwroko foe na Samaritaan-oema ben o go. — dati foeroe sma ben sa poti bribi na ini en foe na kotoigi foe na oema. Te den sma foe Sichar e kon na en na a fonten, den e aksi en efoe a wani tan foe ferteri den moro sani ete. Jezus e teki a karl èn e tan toe dé.

Te den Samaritaansma e arki na Jezus, dan foeroe moro sma e poti bribi na ini en. Dan den e taigi na oema: „Wi no e bribi moro langa san joe ben taki, ma wi ben jere en wisrefi èn wi sabi dati a man disi séker de na ferloesoeman foe na grontapoe.” Na Samaritaanoema séker e gi oenoe wan boen eksempre foe na fasi foe gi kotoigi foe na Kristus foe di a ben wiki na gridi foe den arkiman foe en, sodati den go soekoe moro fara!

Prakseri taki fo moen de ete bifo na kotiwroko doro — a de krin dati a de na koti foe gerst, di e fadon na ini na mofojari na ini Palestina. Soboen a de now kande november ofoe december. Disi wani taki dati Jezus nanga en discipel baka na Pascha ini 30 G.T. ben leri sma èn dopoe sma so wan aiti moen na ini Judéa. Den e go now na Galiléa, na kontren pe den mama ben meki den. San e wakti den drape? Johannes 4:27-42.

◆ Fa na Samaritaanoema e gi kotoigi èn nanga sortoe boen bakapisi?

◆ Fa na njanjan foe Jezus abi foe doe nanga na kotiwroko?

◆ Fa wi kan kon sabi olanga na diniwroko foe Jezus na ini Judéa ben tan baka na Pascha foe 30 G.T.?

[Wan prenki di e tapoe heri bladzijde 7]