KAPITEL 19

Yesus e gi leri na wan uma fu Samaria

YESUS E GI LERI NA WAN SAMARIA UMA ÈN NA TRA SMA FU SAMARIA
A FASI FU ANBEGI DI GADO FENI BUN

Te Yesus nanga den disipel fu en e waka fu Yudea go na Galilea di de na noordsei, den e waka pasa na ini a distrikt Samaria. Den weri fu di den waka fara. Wan pisi ten fu twarfu yuru bakadina den e rostu na wan peti krosibei fu a foto Sikar. A kan taki na Yakob ben diki a peti disi noso kande a ben pai sma fu diki en hondrohondro yari pasa. Na ini a ten fu wi yu kan feni a peti disi krosibei fu a foto Nablus.

Te Yesus e rostu na a peti, den disipel fu en e go na ini a foto fu bai nyanyan. Te den gowe, wan Samaria uma e kon teki watra na a peti. Yesus e taigi na uma: „Gi mi pikinso watra fu dringi.”—Yohanes 4:7.

Yesus e rostu na wan peti, den disipel fu en e waka gowe, èn wan uma fu Samaria e kon fu teki watra

Langa ten kaba a de so taki Dyu nanga Samariasma no e bumui nanga makandra èn den no lobi makandra. Dati meki na uma e fruwondru te Yesus e taki nanga en. A e aksi Yesus: „Fa a du kon taki yu leki wan Dyu e aksi mi, wan Samaria uma, wan sani fu dringi?” Yesus e piki en: „Efu yu ben sabi san Gado e gi sma fu soso èn efu yu ben sabi suma na a sma di e taigi yu: ’Gi mi wan sani fu dringi’, dan yu ben o aksi en èn a ben o gi yu watra di e gi libi.” Na uma e piki: „Masra, yu no abi wan emre srefi fu kisi watra, èn a peti dipi. Dan fu pe yu o puru a watra disi di e gi libi? Yu wani taigi mi taki yu bigi moro wi afo Yakob? Na en gi wi a peti èn ensrefi dringi fu a peti disi nanga den manpikin fu en èn nanga den meti fu en.”—Yohanes 4:9-12.

Yesus taki: „Efu wan sma e dringi a watra disi, dan watra o kiri en baka. Efu wan sma e dringi a watra di mi o gi en, dan watra no o kiri en noiti moro. Ma a watra di mi o gi en o tron leki wan peti na ini en. A o gi watra di o gi en têgo libi” (Yohanes 4:13, 14). Aladi Yesus weri, toku a de klariklari fu fruteri a Samaria uma tru tori fu Gado di kan gi en têgo libi.

Baka dati na uma e taki: „Masra, gi mi a watra disi, so taki watra no o kiri mi moro, dan mi no o abi fu kon dyaso moro fu kisi watra.” Now Yesus e drai a tori èn a e taigi na uma: „Go kari yu masra, dan yu kon dya.” Na uma e taki: „Mi no abi masra.” A musu de so taki na uma e skreki te Yesus e taigi en: „Yu abi leti fu taki: ’Mi no abi masra.’ Bika yu ben abi feifi masra èn a man di yu abi now, a no yu masra.”—Yohanes 4:15-18.

Na uma e frustan now taki Yesus no de leki ala tra sma. Dati meki a e taki: „Masra, mi si taki yu na wan profeiti.” Now na uma e taki wan sani di e sori taki a lobi sani di abi fu du nanga Gado. A e taki: „Den afo fu wi [sobun den Samariasma] ben anbegi Gado na tapu a bergi disi [dati na Gerisim-bergi di de krosibei], ma unu [Dyu] e taki dati Yerusalem na a presi pe sma musu anbegi Gado.”—Yohanes 4:19, 20.

Ma Yesus e sori en taki a no prenspari na sortu presi wan sma e anbegi Gado. A e taki: „A yuru o kon taki unu no o anbegi a Tata na tapu a bergi disi, noso na ini Yerusalem.” Baka dati a e taigi na uma: „A ten o kon èn a de nownow kaba taki den tru anbegiman o anbegi a Tata nanga yepi fu a santa yeye èn nanga yepi fu san tru, bika a Tata e suku den sortu sma disi fu anbegi en.”—Yohanes 4:21, 23, 24.

Gi a Tata, a no prenspari pe sma e anbegi en, ma na a fasi fa den e anbegi en prenspari gi en. A sani disi e naki na ati fu na uma trutru. A e taki: „Mi sabi taki a Mesias, di sma e kari Krestes, o kon. Te a sma dati kon, dan en o fruteri wi ala sani krin.”—Yohanes 4:25.

Dan Yesus e taigi en wan prenspari sani. A e taki: „We, mi na a sma dati” (Yohanes 4:26). Prakseri nomo! Na watra na uma kon teki nomo na a bakadina disi, dan Yesus e fruteri en so wan prenspari nyunsu. Soleki fa a sori, dan na uma disi na a fosi sma di Yesus taigi krin taki en na a Mesias.

FURU SAMARIASMA E BIGIN BRIBI

Den disipel fu Yesus e drai kon baka fu Sikar nanga nyanyan-sani. Den e si Yesus na a peti fu Yakob pe den ben libi en, ma now a e taki nanga wan Samaria uma. Te den disipel e waka kon, na uma e gowe libi a watrakan fu en èn a e go na ini a foto.

Den disipel fu Yesus e drai kon baka na a peti èn a Samaria uma e waka gowe

Na ini Sikar na uma e fruteri den sma san Yesus taigi en. Nanga ala overtoigi a e taigi den sma: „Kon luku wan man di taigi mi ala den sani di mi du.” Èn fu di a wani hari den sma prakseri kande, a e taki tu: „A kan taki en na a Krestes?” (Yohanes 4:29) Sensi a ten fu Moses sma ben wani sabi suma ben o de a Krestes (Deuteronomium 18:18). Fu dati ede den sma e komoto na ini a foto fu si Yesus nanga den eigi ai.

A Samaria uma e fruteri den sma fu a foto Sikar san Yesus taigi en

Na a srefi ten den disipel e taigi Yesus meki a nyan a nyanyan di den tyari gi en. Ma Yesus e taki: „Mi abi nyanyan di unu no sabi.” Den disipel e aksi densrefi san disi wani taki èn den e taigi makandra: „A kan taki wan sma tyari wan sani kon gi en fu nyan?” Na wan switi fasi Yesus e fruteri den san den wortu fu en wani taki. A e taigi den wan sani di prenspari gi ala bakaman fu en. A e taki: „Mi nyanyan na fu du a wani fu a sma di seni mi kon èn fu klari a wroko fu en.”—Yohanes 4:32-34.

A kotiwroko fu groto o bigin baka fo mun. Ma a no fu a wroko dati Yesus e taki. A e taki fu wan agersi kotiwroko. A e taki moro fara: „Opo un ai luku den gron, dan unu o si taki a nyanyan lepi kaba fu koti. Nownow kaba a sma di e du a kotiwroko e kisi en pai èn a e piki froktu di sa gi en têgo libi. Dan a saiman nanga a sma di e du a kotiwroko kan breiti.”—Yohanes 4:35, 36.

Kande Yesus sabi taki a takimakandra di a ben abi nanga a Samaria uma o abi bun bakapisi. Iya, furu sma fu Sikar bigin bribi na ini Yesus di na uma fruteri den fu en. Na uma taigi den sma: „A taigi mi ala den sani di mi du” (Yohanes 4:39). Dati meki te den sma fu Sikar e kon na a peti, den e aksi Yesus fu tan moro langa nanga den fu gi den leri. Yesus e agri èn a e tan ete tu dei na ini Samaria.

Te den Samariasma e yere san Yesus e taki, dan moro nanga moro fu den e bigin bribi na ini en. Den e taigi na uma: „Wi no e bribi moro fu di na yu taigi wi. Ma wisrefi yere èn wi sabi taki a man disi na a frulusuman fu grontapu trutru” (Yohanes 4:42). A Samaria uma ben e taki na so wan fasi taki den sma ben angri fu sabi moro fu Krestes. Disi na wan moi eksempre gi wi. Wi srefi musu preiki na so wan fasi taki sma o angri fu kon sabi moro fu Krestes.

Soleki fa wi si kaba, dan baka fo mun a kotiwroko o bigin. Na ini den kontren dati sma gwenti koti groto na ini a mun maart noso april. Sobun, a kan taki now na november noso december. Disi wani taki dati baka a Paskafesa fu a yari 30, Yesus nanga den disipel fu en tan na ini Yudea sowan aiti mun langa, pe den ben e gi sma leri èn pe den ben e dopu sma. Now den e go na den oso na ini Galilea di de na noordsei. San o pasa drape?

SUMA BEN DE DEN SAMARIASMA?

A kontren di den ben e kari Samaria ben de na mindri Yudea nanga Galilea. Yudea ben de na zuidsei èn Galilea ben de na noordsei. Baka di Kownu Salomo dede, den tin lo fu Israel di ben de na noordsei prati fu den lo Yuda nanga Benyamin.

Den sma fu den tin lo dati bigin anbegi falsi gado. Den ben e anbegi popki fu pikin kaw. Dati meki Yehovah gi pasi taki den Asiriasma teki Samaria abra na ini a yari 740 Fosi Krestes. Den Asiriasma tyari furu fu den sma di ben e libi drape go tan na tra presi, èn den meki tra sma fu a Gran Kownukondre Asiria libi na ini Samaria. Den sma disi di ben e anbegi tra gado, trow bakaten nanga Israelsma di ben tan abra na ini Samaria. Te fu kaba den sma fu Samaria seti den eigi anbegi. Den ben bribi son sani di ben skrifi na ini a Wet di Gado gi Israel èn den ben hori densrefi na son gwenti di ben skrifi na ini a Wet dati. Fu eksempre, den ben e besnèi den manpikin fu den. Ma disi no wani taki dati Gado ben feni na anbegi fu den bun.—2 Kownu 17:9-33; Yesaya 9:9.

Den Samariasma na ini a ten fu Yesus ben e bribi na ini den buku fu Moses, ma den no ben e anbegi na a tempel na ini Yerusalem. Furu yari langa den ben e anbegi na wan tempel na tapu Gerisim-bergi, di no ben de fara fu Sikar. Srefi baka di sma broko a tempel dati, den tan anbegi na tapu a bergi dati. Na a ten di Yesus ben e du en diniwroko na grontapu, a ben de krin fu si taki den Samariasma nanga den Dyu no ben lobi makandra srefisrefi.—Yohanes 8:48.