Libi gi na wani foe Gado — Now èn foe tégo
’Foe na tra pisi foe joe ten ini skin joe no moe libi moro gi den lostoe foe libisma, ma gi na wani foe Gado.’ — 1 PETRUS 4:1, 2.
1, 2. (a) Fa foeroe sma e teki a prakseri foe saka densrefi na ondro a wani foe wan tra sma? (b) Fa wan ten na ini na kristen gemeente e teki a tori disi kande? (c) Sortoe aksi foe dat’ede e kon na fesi?
FA JOE e doe tapoe na prakseri foe meki Gado tjari joe libi? Foeroe sma na ini a ten disi e feni soso a prakseri foe saka densrefi na ondro a wani foe wan tra sma wan skreki sani. Srefi na ini sokari stabiel libi-makandra joe e si fa na opo joesrefi tége na makti e kon moro bigi. Oproeroe protest-betoging, broeja, nanga tranga de ala dé sani. Na ondro druk e kon na krin dati na vernis foe beschaving de dun nanga bros. — 2 Timotéus 3:1-3.
2 Ini kontrari nanga disi dan Jehovah Kotoigi e libi gi na wani foe Gado, soleki foe eksempre e kon a krin ini na getrowfasi foe den ini na oso-foe-oso-diniwroko foe den. Tokoe sontron srefi na wantoe foe den na iniśe foe na kristen gemeente wan jeje foe onafhankelekheid e kon na fesi. Den ati e bron kande foe na tranga leri di den owroeman e gi. Wantoe foe den no e sori respeki gi „na getrow èn koni srafoe”-klasse nanga en Tiri Skin (Mattéus 24:45-47; Tori foe den Apostel 15:21-23). Foe dat’ede den aksi e kon na fesi: Foe san’ede mi ben sa saka misrefi na ondro na wani foe Gado? Foe san-ede Gado moesoe tjari mi libi?
Na eksempre foe Kristus sondro foe denki na ensrefi
3. Sortoe rai ini a tori foe na jejefasi foe wi Petrus e gi?
3 Petrus, di ben ondrofeni foeroe sani makandra nanga Jezus, ben bribi dati wan boen réde ben de foe san-ede wan sma ben sa libi gi na wani foe Gado na presi gi en égi wani. A ben taki: „Foedi Kristus dan ben pina na ini skinfasi, wapen joesrefi dan ooktoe nanga na srefi jejefasi, bika na sma di ben njan pina na ini na skin, tapoe foe sondoe, foe na tra pisi foe en ten na ini skin no libi moro gi den lostoe foe libisma, ma gi na wani foe Gado.” — 1 Petrus 4:1, 2.
4. Fa Jezus ben sori taki a ben saka ensrefi na ondro en Tata?
4 Foe san-ede Jezus pina na ini a skin? Foedi a ben tanapoe na a sé foe en Tata na ini a stré-aksi di abi foe doe nanga na universele soevereiniteit ofoe tirimakti. A ben bewési dati Gado de troe èn Satan de wan léman. Èn a ben doe dati foedi a ben meki Gado tjari en libi a grontapoe, awinsi disi ben abi leki bakapisi dati a ben dede foe en bribi ede. — 2 Korinte 5:14, 15.
5. Gi sortoe tjalansi na eksempre foe Jezus e poti wi?
5 Tokoe a dede foe en ben de wan sori foe a lobi foe Gado nanga jepi foe Kristus (1 Johannes 4:10). Fa so? Foedi winimarki ben sa kon gi na heri libisma famiri (Romeini 5:8; 6:23). Ma omeni sma de klari foe teki den winimarki disi? Omeni sma de klari foe waka baka Kristus èn foe poti égi lostoe foe den a wansé foedi den e saka den srefi a ondro a wani foe Gado? — Hebrewsma 13:15, 17.
Den winimarki now èn ini a ten di e kon
6, 7. San de den winimarki di e kon foe na saka di wan sma moesoe saka ensrefi na ondro na wani foe Jehovah?
6 Fa na kari di Jehovah ben meki kon na Israël 2700 jari psa kaba de foe dat’ede wan sani di fiti srefi ini wi ten: „Mi, Jehovah de oen Gado, na Sma di e leri oenoe foe gi oensrefi wini, na Sma di e meki oen waka tapoe na pasi di oen moe waka. O efoe oenoe soso troetroe ben sa poti prakseri na mi gebod! Dan a vréde foe oenoe ben sa de netleki wan liba, èn oen regtvaardikifasi, leki na skwala foe na se.” — Jesaja 48:17, 18; teki gersi nanga Genesis 22:18.
7 Jehovah e leri wi fa wi kan gi wisrefi wini te wi e libi gi en wani — èn den winimarki di e kon foe sowan fasi foe libi no de soso vréde nanga regtvaardikifasi tapoe a momenti disi. Den wani taki ooktoe den blesi di e kon foe tégo libi soleki Jezus Kristus ben pramisi: „Bikasi disi de a wani foe mi Tata, dati ibriwan sma di e si a Manpikin èn e sori bribi na ini en, abi tégo libi, èn mi sa wiki en tapoe na laste dé.” — Johannes 6:40.
8. Fa na pramisi foe Jezus foe wan opobaka de wan trowstoe na ini a ten disi?
8 Den wortoe disi e gi foeroe trowstoe na getrow kristen na ini a ten disi di kon de boen owroe. Na seti foe sani disi de foe sensi na jari 1914 na ini en di foe 72 jari. A grontapoe foe Satan tan de moro langa leki foeroe sma ben ferwakti. Wan lo getrow kristen dede srefi di ben ferwakti Armageddon èn foe ben si a bigin foe na njoen seti foe sani ete. Tokoe a libi foe den, di den ben gi abra na a doe foe a wani foe Gado, no ben de foe soso. Jezus sa hori en wortoe èn opo den foe dede èn meki den kisi na blesi foe tégo libi. — Johannes 5:28, 29; 1 Korinte 15:58.
Na jejefasi foe Kristus
9, 10. (a) Nanga san wi moe wapen wisrefi? (Filippi 2:5-8) (b) San de so aparti na a Griki wortoe di vertaal na ini 1 Petrus 4:1 nanga „jejefasi”?
9 San kan meki a de moro makriki gi wi foe saka oensrefi na ondro a wani foe Gado? Leki fa na rai foe Petrus di tanapoe na ini paragraaf, dri taki, dan wi moe wapen oensrefi „nanga na srefi jejefasi di Jezus ben abi”. — 1 Petrus 4:1.
10 Petrus e gebroiki dja wan Griki wortoe di wi e feni soso toe tron ini den Griki Skrifi — èn.noi’a. Aladi a moro bigi pisi foe den vertalers e vertaal en nanga „prakseri”, tokoe a no de a normaal Griki wortoe gi „prakseri”, san de nous, Foe dat’ede meki Petrus na ondro krakti foe na Santa jeje ben abi wan spesroetoe punt na ini prakseri di a ben ferkisi foe gebroiki na zelfstandig naamwortoe di no e gebroiki foeroe. W. E. Vine, wan leriman na tapoe a kontren foe na Grikitongo, e taki dati en.noi’a „e sori na tapoe marki, bedoeling, èn sani di joe e feti na en baka”. J. H. Thayers Greek English Lexicon e skrifi en leki „a fasi foe denki èn firi”.
11. San wi kan leri foe na eksempre foe Jezus foe na fasi fa wi moe gebroiki wi libi?
11 Foe na libifasi foe Jezus pe a ben offer ensrefi dan a marki foe en ofoe san a ben poti na en fesi ben kon krin a doro. A no ben e libi wan libi di ben de frafra, di ben de soifri na tapoe prisiri nanga njanpré. A ben sabi dati a no ben libi en fosten libi na ini hemel foe pori wan toe jari na grontapoe nanga a feti baka activiteit pe joe e prakseri joesrefi nomo. (Loekoe na kontrari na ini Genesis 6:1, 2, 4 nanga Judas 6.) Foe dat’ede meki a ben taki: „Mi no ben saka komoto foe hemel foe doe a wani foe mi, ma na wani foe en di ben seni mi kon” (Johannes 6:38). Jezus no ben meki noti poeroe en foe a gi di a ben gi ensrefi na a afersi foe en Tata èn a ben e poti dati alaten moro hé leki en égi wani srefi di disi ben wani taki dati a ben moesoe dede wan pina dede. — Lukas 22:42.
12, 13. (a) Fa Jezus ben sori na a Jakobpeti san ben de en jejefasi?
12 Srefi efoe Jezus ben weri èn a ben abi angri, dan a ben e sori krin san en jejefasi ben de ini a tori foe a wani foe en Tata. Na wan bepaalde okasi di en discipel ben go bai njanjan, a ben teki bro pikinso na a Jakobpeti. Na presi foe ben teki wan sribi di a ben ferdini aladi a ben e wakti tapoe a kon foe den discipel foe en, a ben doe moeiti foe doe a wani foe Gado. A ben doe wan sani di no ben de gewoon gi den djoe. A ben bigin wan takmakandra nanga wan Samaria-oema. A ben opo en ai, sodati a ben go ferstan wan sani foe a troe Gado. Leki wan bakapisi foe dati ’meki foeroe foe den Samariasma foe na foto dati ben poti bribi na ini en foe na wortoe foe na oema’. — Johannes 4:6-26, 39-42.
13 Di den discipel foe en ben drai baka, den ben taki tranga nanga en foe njan wan sani. Sortoe piki a ben gi den? „Mi abi njanjan foe njan di joe no sabi.” Den ben froewondroe foe na piki foe en te leki a ben taki moro fara: „Mi njanjan de dati mi doe a wani foe en di ben seni mi kon èn klari en wroko.” A ben de krin dati a ben gi Jezus prisiri foe saka ensrefi na ondro a wani foe en Tata. Disi ben de gi en leki njanjan, èn net soleki fa a ben de nanga a njan foe boen njanjan, na so a ben gi en wan troetroe firi foe satisfaksi. Efoe wi wani kisi satisfaksi troetroe foe wi libi, dan a moro boen foe waka na baka na eksempre foe Jezus Kristus. — Johannes 4:31-38.
Den bakapisi foe na jejefasi foe Kristus
14. San wi abi fanowdoe foe abi na jejefasi foe Kristus? Ferklari disi.
14 Sortoe krakti na abi foe na jejefasi foe Kristus moesoe abi tapoe wi? Efoe wi e leri foe denki na a srefi fasi leki Kristus, dan wi sa abi inisé krakti di sa meki wi doe den sani san Jezus ben sa doe ooktoe ondro sortoe omstandigheid toe (Lukas 22:42; Efese 4:23, 24). A krakti disi no sa kon foe soso frede foe strafoe, soleki tranga leri foe owroe man na ini na gemeente, ma moro foeroe foe bigi warderi gi Jehovah wèt nanga gronprakseri. Wi kan teki na situwasi gersi nanga di foe wan sma di e hori ensrefi soso na den verkeersregel (dati wani taki den wèt di joe moe hori te joe e rij oto, bromfiets nanga so moro fara.) Te wan skowtoe de ini a birti — a e saka ensrefi soso nawan krakti di e komoto na dorosé. Ma wan sma di abi warderi gi na libi, e lobi den sma na en sé èn e si dati a de wan ferstan sani dati verkeersregel de, sa hori ensrefi na dati foedi a e respeki a wèt. Na inisé foe en a abi wan tranga bewégi foe ati. — Psalm 51:10.
15. (a) San e bewijsi dati Jezus ben abi wan inisé krakti di ben e poesoe en denki? (Efese 4:23) (b) Sortoe eksempre foe soifri-retifasi de wan bewijsi dati disiten kristen abi na jejefasi foe Krestes?
15 Jezus ben abi na inisé krakti dati di ben e ’poesoe en denki’. Foe dat’ede te na dede srefi a ben de getrow na a wani foe en Tata. A ben verdrage pina sondro kragi ofoe foe skempi en ferfolgoeman (1 Petrus 2:21-24). Sontron wi kan kon tanapoe leki kristen na ondro den sortoe druk disi. A kan de dati makti di de tége oenoe, e proberi foe tapoe wi prékiwroko èn foe meki wi no man foe hori komakandra, soleki disi ben psa na ini Spanje na ini a ten foe Franco èn ini difrenti Europese kondre na ini a ten di den nazi-sroedati ben teki abra. Den ben mishandel foeroe brada nanga sisa ini wan moeiti foe tjari den go so fara foe tori den brada di ben abi frantwortoe na ini den gemeente. Aladi ferfolgoe ben de, tokoe na moro bigi pisi foe den ben tan stanvaste (loekoe Jariboekoe foe Jehovah Kotoigi 1979, blz. 171, 172, 181, 182; Jariboekoe foe Jehovah Kotoigi 1986, blz. 137-159.)
16. San de wantoe foe den fasi fa wi kan kisi tesi na ini a ten disi? Fa joe kan kakafoetoe?
16 Wi kan kon tanapoe na ondro druk na ini a tori foe wi kristen neutraliteit ofoe na gebroiki foe broedoe transfusie (Tori foe den Apostel 5:29; 15:2-3, 29). Dan a tori e kon now: Wi e libi gi a wani foe Gado ofoe gi a wani foe libisma? Ofoe kande wi e kon tanapoe na fesi wan tesi foe wan kombinatie foe skinlostoe èn mati di no boen. Kande na okasi e sori ensrefi na skoro ofoe tapoe joe wrokope foe smoko ofoe foe gebroiki drug sondro dati wan tra sma ini a gemeente sabi wan sani foe en. Ofoe fa a de nanga na tesi foe dobbel ini loterij? Ofoe foe gi wisrefi abra na hoeroedoe ofoe soetadoe? Wan grontapoe wrokope-atmosfeer nofotron de kefarlek boen gi wan fowtoe denki èn fowtoe doe — efoe wi no de nanga na faste bosroiti leki Jezus foe doe a wani foe Gado. San joe sa doe? Wan krin krakti sa poesoe joe sodati joe sa waka na baka na libifasi foe Kristus na ondro den sortoe omstandigheid disi? — Efese 4:17-20; 1 Johannes 2:15, 16.
17, 18. (a) Sortoe krakti punt Petrus e meki kon na fesi foe den sma di e doe sondoe? (b) San de fanowdoe foe kakafoetoe gi na kon na inisé foe sondoe?
17 Petrus e poti krakti moro fara tapoe na fanowdoe foe doe Gado wani èn ai gi a rai di e kon now: „A nofo dati na ini a ten di psa joe ben doe a wani foe den naatsi, joe ben gi joesrefi abra na a doe foe loesoefasi foe libi, lostoe, dringi win pasamarki [ofoe tra dringi di abi sopi], njan èn dringi pasamarki, dringi partij nanga afkodré. Foedi joe no e waka moro langa a pasi disi nanga den go na asrefi lagi swampoe foe sjen libi, meki den e loekoe ferwondroe èn den e go doro foe taki skempi foe joe. Ma den sma disi sa gi frantwortoe na a sma di de klarklari foe kroetoe den libiwan nanga den dedewan.” — 1 Petrus 4:3-5.
18 Petrus e meki na krakti punt di e kon now kon na fesi — den sma di e poti a wani foe Gado na wan sé moe gi frantwortoe. (Teki gersi nanga Romeini 14:12 nanga Hebrewsma 13:17.) Paulus e kon tapoe wan srefi sortoe bosroiti ini en brifi gi den Kolossesma, te a e skrifi: „Kiri foe dat’ede joe skinmemre di de na grontapoe ini a tori foe hoeroedoe, fasi di no krin, sekslostoe, takroelostoe nanga big’ai san de afkodré. Foe den sani dati na atibron foe Gado e kon.” Ala den sma di e doe den sortoe sani disi, séker no e libi gi na wani foe Gado ma moro foeroe gi na prisiri foe den égi gridi firi nanga lostoe. Tokoe sma kan hari densrefi poeroe foe sowan sortoe moreel takroe libi, bika soleki Paulus e taki, „ooktoe oenoe ben waka wan dé na ini den srefi sortoe sani disi, di wi ben libi a ete na ini”. — Kolosse 3:5-7; Efese 4:19; loekoe ooktoe 1 Korinte 6:9-11.
Kon si san de a wani foe Gado
19. Fa foeroe sma e sori now dati den e libi gi a wani foe Jehovah? (Romeini 12:1, 2)
19 Ini den laatste jari disi foe na di foe twenti jarhondro dan moro leki dri miljoen sma ben kon si san na wani foe Gado ben de gi den. Dati ben abi leki bakapisi dati nanga faja den ben préki na boen njoensoe foe na Kownoekondretiri foe Gado (Tori foe den Apostel 8:12; Markus 13:10). Den no e libi soso gi densrefi, soleki a moro bigi pisi foe den tra sma. Den sabi taki Gado sa tjari na pori seti foe sani kon heri esi na wan kaba èn ini akroederi nanga na rai foe na apostel Paulus di e kon now den e tjari offer foe jepi tra sma foe kisi na soifri sabi disi: „Loekoe boen fa joe e waka, no leki donwan ma leki koniwan, bai gi joesrefi na ten di fiti, foedi den dé de godelowsoe. No de foe dat’ede onrédelek, ma tan si san na wani foe Jehovah de.” — Efese 5:15-17.
20, 21. (a) Fa wi moe si na presenti foe na libi? (Jakobus 4:13-17) (b) Fa wi kan sorgoe dati a grontapoe no masi wi go ini en vorm?
20 A libi de leki wan grasi kowroe èn krin watra. Na ini na fosi tin jari foe wan sma libi a e „dringi” dipi èn esesi — teleki a e bigin foe aksi ensrefi omeni libi-jari de ete ini a „grasi”. Dati de na laitori di e froewondroe ala sma. O prenspari a de foe dat’ede foe libi wan libi di e sori dati wi e ferstan a frantwortoe di wi abi a fesi foe Gado èn tra sma! O tranga fanowdoe a de foe teki a wani foe Gado na prakseri èn no soso wi égi gridi wani! — Mattéus 7:21, 24, 26.
21 Ma foedi wi e libi na ini na grontapoe di na jeje foe Satan e hori na en ondro, meki a no de alaten makriki foe libi gi a wani foe Gado. (Openbaring 12:9). Alaten druk e kon a wi tapoe foe masi wi go na a wani foe a grontapoe èn na a grontapoe jejefasi. Modo nanga rage kan abi srefi krakti tapoe wantoe na ini a gemeente, sodati den o gersi precies so leki a wan ofoe tra barinen sma foe na grontapoetiri. Fa na rai foe Paulus fiti foe dat’ede: „No meki na seti foe sani disi masi joe go ini en vorm, ma kon kenki foedi joe e kenki joe jeje, sodati joe kan ondrosoekoe san de na boen èn switi èn volmaakti wani foe Gado”! — Romeini 12:2.
22. (a) San na a wani foe Gado ini wi ten? (b) Fa wi kan sori dati wi e libi gi a wani foe Gado? (c) Sortoe blesi e wakti den sma di troetroe e libi gi a wani foe Gado?
22 A de a wani foe Gado dati „a njoensoe disi foe a Kownoekondre” e préki na ini a heri grontapoe bifo a tjari na disiten grontapoe seti kon na wan kaba (Mattéus 24:14; Openbaring 14:6, 7). Disi de foe dat’ede wan réde moro, efoe joe omstandigheid e gi pasi foe disi, foe opo teki na kari na wan boen fasi foe moro foeroeten-bedinari. A de ooktoe gi den owroeman nanga dinari ini na diniwroko wan réde foe de klarklari foe froisi go na gemeente pe a jepi foe den kande de fanowdoe. Èn gi ibri Kotoigi disi de wan bigi réde foe de wan troetroe kristen kotoigi — no soso foe tjari na etiket kristen ma foe libi now èn foe tégo gi na wani foe Gado. Sabi dati te joe e doe so ’joe e poti gi joesrefi wan toemsi moi fundamenti gi na ten di e kon leki wan goedoe, sodati joe kan graboe hori stéfi na troetroe libi’. — 1 Timotéus 6:19.
Fa joe ben sa piki?
◻ Fa Jezus bon sori dati a ben libi gi na wani foe Gado?
◻ Sortoe winimarki de gi den sma di e libi gi na wani foe Gado?
◻ San ben de na jejefasi foe Kristus ini a tori foe a wani foe Gado?
◻ Fa na ’krakti di e poesoe na jeje’ moe abi krakti na tapoe wi?
◻ Fa wi moe si a libi?
[Prenki na tapoe bladzijde 4]
Joe e gi jesi foedi joe e warderi na wèt, ofoe soso foedi skowtoe de ini na birti?