Jezus, wan model foe waka soifri na en baka
„Te joe loekoe en boen dan den ben kari joe kon na a pasi disi, bika Kristus ooktoe ben njan pina foe oenoe ede èn ben libi wan model gi oenoe sodati oenoe ben sa waka soifri na ini en foetoestap.” — 1 PETRUS 2:21.
1, 2. (a) Sortoe discipel Petrus ben de na ini a ten foe en diniwroko nanga Jezus?
INI WAN pisten foe dri nanga afoe jari Simon, di sma ben kon sabi leki Cefas of Petrus, ben abi na grani foe de ini na krosbé demakandra nanga Kristus Jezus (Johannes 1:35-42). Di a ben de wan jari so wan discipel, a ben kisi na grani foe de wan foe den twarfoe apostel (Markus 3:13-19). Na ini den evangeliumtori e kon a fesi dati Petrus ben abi dekati, san a ben firi a ben doe wantewante èn ben abi foeroe sani foe taki. Na en ben de na sma di ben taki dati noiti a ben sa taki dati a no ben sabi Kristus, san ben sa kan pasa ooktoe. Ma, di a ben kon na ondro druk, a ben taki te dri tron dati a no ben sabi en, soleki Jezus ooktoe ben taki a fesi. — Mattéus 26:31-35; Markus 14:66-72.
2 Petrus ben de na apostel di ben taigi Jezus: „Seker joe no sa wasi mi foetoe noiti.” Ma di Jezus ben fermane en, a ben fadon go te na a tra sé èn ben taki: „Masra, no wawan mi ma mi foetoe, mi anoe èn mi ede” (Johannes 13:1-17). Di den ben kisi Jezus a ben na srefi Simon Petrus disi toe, di ben hari en owroe poeroe èn ben naki na retisé jesi foe Malchus, na srafoe foe na hépriester, poeroe. Ooktoe disi ben tjari wan strafoe kon foe na sé foe Jezus: „Poti joe feti-owroe baka na en saka. Mi no sa dringi seker na beker di mi Tata gi mi?” — Johannes 18:10, 11.
3. San wi kan leri foe na eksempre foe Petrus?
3 San den sani disi nanga trawan e sori foe Petrus? Dati nofotron a no ben denki èn ben e tak-go-tak-kon leki Jezus. Èn ooktoe dati a no alaten a ben abi na denki foe Kristus. A de so ooktoe nofotron nanga wisrefi. Te wi e loekoe bepaalde afersi dan wi e misi foe loekoe fa Jezus e denki. Den fasi fa wi e doe tapoe sani e sori den marki foe wi onvolmaakti libisma natuur. — Lukas 9:16-50; Romeini 7:21-23.
4. Sortoe sani di psa ben abi krakti tapoe na denki foe Petrus bakaten?
4 Ma foe sensi Pinksteren wan sani bigin foe kenki gi Petrus. Foedi santa jeje ben poesoe en meki a ben teki fesi na ini a prékiwroko na mindri den djoe na ini Jeruzalem (Tori foe den Apostel 2-5). Foedi santa jeje ben meki a koni foe en foe si sani kon moro dipi, meki a ben tjari en denki kon ooktoe ini akroederi nanga na denki foe Kristus, ooktoe ini a torl foe den heidensma (Tori foe den Apostel kap. 10). Petrus ben sori taki a abi sakafasi, wan jejefasi di de fanowdoe gi wi efoe wi wani de ini wanfasi nanga Kristus. — Mattéus 18:3; 23:12.
Aladi wi no ben si en tokoe a de bekenti na wi
5, 6 Foedi wi no ben si Kristus noiti, dan dati de wan skotoe gi wi foe wi waka na baka en boen eksempre?
5 Di Petrus ben skrifi en fosi brifi nanga jepi foe santa jeje, na ini den jari 62-64 G.T., dan a ben abi na ten foe go denki foe en diniwroko nanga Jezus èn foe go ferstan moro betre fa Jezus ben denki foe bepaalde afersi. Na a bigin foe a brifi disi na apostel e erken a sani disi — dati wani taki dati a moro bigi pisi foe den brada na ini Pikin Asia no ben sabi Jezus so persoonlijk leki en. Ma dati ben de wan skoto foe abi na denki foe Kristus èn waka baka en eksempre? Petrus e taki: „Aladi oenoe noiti ben si en, tokoe oen lobi en. Aladi na a momenti disi oenoe no e si en, tokoe oen e poti bribi na ini èn oenoe e prisiri srefsrefi nanga wan prisiri di psa marki, foedi oenoe e kisi na laatste marki foe oen bribi, na ferloesoe foe oenoe sili.” — 1 Petrus 1:8, 9.
6 Den wortoe foe Petrus moesoe de gi ala memre foe Jehovah pipel na ini a ten disi. Wi no ben sabi Jezus persoonlijk, ma efoe wi ’e aksi sani finifini èn e ondrosoekoe soifri’ èn net soleki den proféti „e tan ondrosoekoe”, dan wi kan kisi na wan moro bradi fasi ete na denki foe Kristus. — 1 Petrus 1:10, 11.
Jezus, na volmaakti model
7, 8. (a) Sortoe algemene rai Petrus e gi ini en fosi brifi? (b) San na a gron betekenis foe hu-po-gram’mos? Fa Petrus e gebroiki a wortoe disi?
7 Now di Petrus ben kisi wan moro krin ferstan foe na denki foe Jezus, dan santa jeje ben kan tjari en foe gi en kompe-bribiman rai foe na fasi tapoe san den ben kan sori na denki foe Kristus (2 Timóteus 3:16). Foe dat’ede a e fermane ala kristensma foe „hori densrefi farawe foe skinlostoe leki freemde sma èn wakaman”. A e gi den dekati, aladi den e njan pina foe regtvaardikifasi ede, foe kibri ini den aladé libi wan toemsi moi waka nanga libi. — 1 Petrus 2:11, 12.
8 Wantoe regel moro fara Petrus e poti wi prakseri na tapoe wan boen sani di joe kan si na joe fesi èn ai taki: „Ma efoe joe e doe boen èn e njan pina, èn e ferdrage en, dan dati de wan sani di switi na Gado. Te joe loekoe en boen, dan den ben kari joe kon na a pasi disi, bika Kristus ooktoe ben njan pina foe joe ede èn ben libi wan model gi oenoe, sodati joe ben sa waka soifri ini en foetoestapoe” (1 Petrus 2:20, 21). Na Griki wortoe di vertaal nanga „model” ofoe ini foeroe tra vertaling nanga „eksempre” na hu-po-gram’mos. Na letterlijke betekenis foe a wortoe disi de „wan skrifi na ondro”, ofoe „skrifi-eksempre di ben abi na ini en ala letter foe na alfabet èn di den ben gi na sma di ben bigin leri leki wan jepi sani foe leri marki den letter” (A Greek English Lexicon of the New Testament, J.H. Thayer). Na so den ben gi sontron na skoroboi pikin tafra nanga was tapoe san na leriman ben skrifi nanga wan skrifiprin den letters ini modelskrifi. Na studenti ben moesoe waka na baka na eksempre èn proberi foe skrifi soifri na ondro asrefi sani. Petrus e tjari wan krakti punt kon dja na wi prakseri, bika en de na wan enkri skrifiman foe den Griki skrifi di e gebroiki a wortoe hu-po-gram’mos. Na sofasi a ben poti krakti na tapoe disi dati Jezus ben libi gi en bakaman wan volmaakti eksempre foe waka na en baka.
9. Tapoe san na Griki wortoe di vertaal nanga „jejefasi” e sori? (Teki gersi nanga Mattéus 20:28.)
9 Bakaten Petrus e meki wi si fa wi kan njan boen foe na fasi tapoe san Kristus ben ferdrage pina. „Foedi foe dat’ede Kristus ben njan pina na ini skin, dan wapen oensrefi toe nanga nasrefi jejefasi [Griki: en-noi’an]” (1 Petrus 4:1). Ooktoe dja ai gebroiki wan wortoe di den no e gebroiki alaten dati wani taki en-noi’a, di soso toe tron e kon ini den Griki Skrifi. (Loekoe Hebrewsma 4:12, The Kingdom Interlinear Translation.) Leki fa J.H. Thayer e ferteri dan en-noi’a wani taki „jejefasi, ferstan, wani; fasi foe denki èn firi”. Foe dat’ede wi moesoe poti wisrefi na tapoe a fasi fa Kristus e denki èn firi. Ma fa wi kan doe dati? Ofara wi moe doe disi?
10. San Petrus e bedoel nanga den wortoe „wapen joesrefi”?
10 Petrus e gebroiki na wan apartifasi na Griki werkwortoe ho-pli-sa’sthe, dati wani taki ’wapen joesrefi leki wan sroedati’. Wan sroedati di no e feni en so prenspari foe weri wan fetisani seker no sa meki en langa na ini feti. Foe datmeki den wortoe foe Petrus no e gi pasi foe wan brokokowroe waka na baka na denki foe Jezus. Wi moesoe wani abi na „jejefasi” ofoe „denki foe Kristus” nanga wi heri ati (1 Petrus 4:1, Today’s English Version). Disi e meki wi prakseri na a fasi tapoe san Paulus ben poti krakti dati kristen moesoe weri na heri fetisani foe Gado foe kan tanapoe stéfi tege Satan nanga en grontapoe. — Efese 6:11-18.
San na jejefasi foe Kristus wani taki gi trowoema
11. Sortoe rai Petrus e gi na kirsten trowoema?
11 Afpasi foe en brifi Petrus e poti en prakseri a tapoe trowoema nanga man. Ini na owroe heiden grontapoe, pe oemasma troetroe ben abi pikinso reti nomo, dan a ben de wan toemsi moeilek sani gi wan kristen oema nanga wan masra di no de na ini bribi foe kibri en soifri retifasi. Foedi a ben drai baka gi den gado foe en fosten tata, meki a ben de opo-opo gi sjen pina èn kande srefi brokotrow. Na ini a ten disi na situatie no de boen foeroe trafasi, ma Petrus e poti krakti baka tapoe o prenspari a de foe abi na jejefasi foe Kristus èn foe de klari foe njan pina foe regtvaardikifasi ede. A e taki: „Sosrefi toe oen oema [akroederi na eksempre foe Kristus di wi taki foe den dja a fesi] tan saka oensrefi na ondro oen égi masra, sodati efoe sonwan no gi jesi na a wortoe, sondro wortoe den kan wini den nanga na waka nanga libi foe den oema, foedi den de aikotoigi foe joe krin waka nanga libi makandra nanga dipi respeki.” — 1 Petrus 3:1, 2.
12. (a) Fa na sakafasi èn safri-atifasi foe wan trowoema de wan sori foe na eksempre foe Jezus? (1 Korinte 11:3) (b) Fa Gado èn kande en man ooktoe e si na safri-atifasi foe en?
12 Ija, wan trowpatna di no de ini bribi joe kan wini no nanga wan koni foe horidoro ini préki, ma nanga na „dipi respeki” èn na „getrow eksempre nanga heri a konsensi” foe na oema di e saka ensrefi (1 Petrus 3:2, The Jerusalem Bible). Na „safri èn tiri jeje di de foe bigi waarde na ini na ai foe Gado”, kan meki dati a masra si sortoe boen bakapisi a abi te wan sma e sori na ini en aladé libi na denki foe Kristus (1 Petrus 3:4). Foe san-ede na safri-ati jeje e sori na fasi foe Jezus? Jezus srefi ben taki: „Teki mi tjatjari tapoe joe èn leri foe mi, bika mi abi safri-ati èn mi de nanga sakafasi foe ati, èn joe sa feni kowroe-ati gi joe sili.” — Mattéus 11:29.
San na jejefasi foe Kristus wani taki gi trowman
13. Fa man moe doe nanga den oema foe den? (Efese 5:28, 29, 33)
13 Ooktoe trowman moe sori na jejefasi foe Kristus ini na fasi fa den e sori troe lobi gi den oema foe den. Petrus e fermane baka: „Oen man, tan libi na en akroederi sabi, foedi oenoe e sori en respeki leki na wan swaki patoe, na oemasmafasi” (1 Petrus 3:7). Gi na heiden grontapoe dati foe owroeten dan disi ben de wan ferwondroe rai — sori respeki gi wan oema! Ma na kristen gemeente ben moe de tra fasi leki na grontapoe. Wan kristen trowlibi ben moe abi leki marki na wartifasi èn respeki gi makandra. — 1 Petrus 4:3, 4.
14. Fa wan man kan sori en oema respeki èn hori en na prakseri?
14 Kristus ben e hori alaten en discipl na prakseri nanga den ipi sma di ben e waka na en baka (Markus 6:30-44). Disi e kroederi boen nanga na rai foe Petrus gi trowman foe hori na prakseri na oemasmafasi foe trowpatna. Wan Spanjoro vertaling e taki en so: „Foe na sé foe mansma: sori na ini a libi di joe e teki prati nanga joe oema tact èn hori en na prakseri, bika en fasi de dati ai firi sani moro esesi” (Nueva Biblia Espanola). Efoe wan trowman e waka baka na eksempre foe Kristus, dan a sa hori den firi foe en oema na prakseri. Disi a moesoe doe ooktoe ini den ten foe den moeilijk dé foe en, te a abi moro switifasi, pasensi èn-sorgoe fanowdoe. Seker wan lobi masra sa sori taki ai dwengi ensrefi na den sortoe okasi disi èn no sa aksi foeroe. Troe lobi e offer ensrefi. — Teki gersi nanga Leviticus 15:24; 20:18; 1 Korinte 7:3-6.
15. Sortoe eksempre Jezus ben gi ini na afersi pe en makti leki edeman ben de ini a tori?
15 A de troe dati ’a man de na ede foe a oema foe en’. Ma soema de leki wan model gi en ini a sori foe en makti leki edeman? Paulus e tjari disi kon na krin te ai taki morofara: „Net soleki Kristus de na ede foe na gemeente” (Efese 5:23). Na sani disi di ai taki no e gi pasi foe dwengi wan trawan èn handri na wan ogri-ati fasi na ini na trowlibi. Ini a demakandra foe en nanga en discipel, Kristus noiti ben gebroiki en makti tapoe wan fowtoe fasi, (en makti leki edeman), ma a ben gebroiki en makti morofoeroe ini akroederi nanga bijbelgronprakseri. — Teki gersi nanga Mattéus 16:13-17, 20; Lukas 9:18-21.
Na model foe Kristus gi mansma
16. (a) Foe san-ede Petrus ben sabi boenboen na fanowdoe foe de nanga sakafasi? (b) Soema spesroetoe moesoe sori na égifasi disi?
16 Na ini en diniwroko Jezus alaten ben poti krakti na tapoe na égifasi foe sakafasi. Na ini na agersitori di a ben ferteri foe den sma di ben kisi kari foe wan trowoso, a ben taki: „Bika ibri sma di e hé ensrefi, den sa lagi en, èn a sma di e lagi ensrefi den sa hé en” (Lukas 14:11). Petrus ben abi boenboen na jejefasi foe Kristus ini prakseri ini a tori disi. A no ben kan denki èn memre a eksempre di Jezus ben gi di a ben wasi den foetoe foe den discipel? (Johannes 13:4-17) Foe dat’ede meki a e fermane ini en fosi brifi den owroeman èn den moro jongoe man foe sori wan sakafasi jejefasi. Den owroeman ’no ben moesoe de leki basi tapoe na gemeente, ma ben moe tron eksempre gi na ipi’. Den jongoe man ben moe saka densrefi na den owroe man. Ma morofara a ben taki dati den alamala ofoe den ben de now jongoe ofoe owroe ’ben moe tai den mindri nanga sakafasi gi makandra bika Gado e kakafoetoe gi den hémemrewan, ma ai gi no-ferdini boenfasi na den sakafasiwan’. — 1 Petrus 5:1-5.
17. Fa na Griki werkwortoe foe „tai oen mindri” e poti krakti tapoe sakafasi dienst?
17 Ooktoe dja Petrus e gebroiki tapoe wan apartifasi wan bepaalde wortoe foe meki wan punt foe sakafasi kon a krin. A e taki: „Tai oen mindri [Griki: eg-kom-bo-sa’sthe] . . . nanga sakafasi foe jeje”. Na werkwortoe disi komoto foe na roetoe di wani taki knopo ofoe tai wan sani fasi, èn na betekenis foe en abi foe doe nanga „den weti srafoedoekoe ofoe fes’koki, di ben tai na a mindri foe wan krosi . . . èn disi ben poeroe den srafoe poti aparti foe den friwan, foe dat’ede . . . tai oen mindri nanga sakafasi leki oen dienstkrosi . . . dati wani taki sori taki joe e saka joesrefi na makandra foedi joe e weri sakafasi leki wan krosi”. — A Greek English Lexicon of the New Testament, J.H. Thayer.
18. (a) San man di gi densrefi abra na Gado moe hori na ini prakseri ini a tori foe den boewégi foe ati foe den? (b) Ini sortoe spesroetoe fasi foeroe sisa de wan eksempre ini sakafasi?
18 Fa man di gi densrefi abra na Gado kan poti a rai disi ini den libi na ini a ten disi? Foedi den e erken dati ibri positie foe ferantwortoe na inisé foe na kristen gemeente wani taki wan wroko foe sakafasi dienst. Sonwan e denki kande no nanga leti, dati wan sma di tron dinari na ini na diniwroko ofoe gemeente owroeman, ofoe kring- ofoe districts- ofoe Bethelopziener, e kisi nanga dati wan positie foe respeki èn makti. Na ini a geval dati den no abi na denki foe Kristus foe na afersi. Na jejefasi foe Kristus no e gi pasi foe ambitie pe wan sma e prakseri en égi wini nomo. Na boewégi foe ati foe wi foe dini Gado nanga wi brada moe de soifri. Foeroe foe wi kristen sisa foe eksempre de a fesi ini na pionier- èn zendingsdienst. Tra sisa de faja prékiman foe na boen njoensoe, aladi ferfolgoe ofoe gens na oso de. Èn ala disi sondro wan prikkel foe tron oiti dinari ini na diniwroko ofoe opziener.
Lobi — na oekoeston foe na eksempre foe Kristus
19. San na a oekoeston foe na eksempre foe Kristus? Fa wi sabi disi?
19 Tapoe san Petrus morofoeroe e poti krakti ini na tori foe Kristus? A e skrifi: „Abi morofoeroe faja lobi gi makandra, bika lobi e tapoe wan ipi foe sondoe” (1 Petrus 4:8). Fa Jezus ben sori a lobi dati? A ben leri: „Disi na mi gebod, dati oen lobi makandra net soleki mi ben lobi oenoe. Nowan sma abi moro bigi lobi leki disi, dati wan sma e gi en sili abra foe a boen foe en mati” (Johannes 15:12, 13). Sjatoe a baka dati Jezus ben offer en libi foe a boen foe na libismafamiri èn a lobi foe en seker ben tapoe wan ipi foe sondoe! Foe dat’ede, efoe wi abi troetroe na jejefasi di Jezus ben abi, dan wi toe, sa sori „faja lobi gi makandra” èn gi makandra pardon. — Kolosse 3:12-14; Odo 10:12.
20. Fa wi alamala moe doe efoe wi wani waka soifri na baka na model foe Kristus?
20 Ini wán wortoe wi taki foe na eksempre foe Kristus — de lobi. Efoe ini ala sani san wi e denki, e taki, e doe, e waka troetroe soifri bika Jezus model, dan wi sa sori ooktoe lobl. Soleki Petrus ben taki: „Te foe kaba, oen alamala moe denki asrefi, sori sari-ati, abi brada lobi, safoe, sari-ati, de nanga sakafasi foe jeje, no pai ogri nanga ogri ofoe skempi nanga skempi, ma kontrari foe dati, gi wan blesi, bika na foe na pasi disi den ben kari joe, sodati joe ben sa de wan blesi.” — 1 Petrus 3:8, 9.
Joe kan memre disi ete?
◻ Fa wi moe waka na baka na eksempre di Kristus ben libi a baka?
◻ Fa wan kristen trowoema kan waka na baka na eksempre foe Kristus?
◻ Fa kristen trowman moe sori respeki gi den oema foe den?
◻ Fa Petru’s ben poti krakti na tapoe sakafasi?
◻ San de na oekoeston foe na eksempre foe Jezus?
[Prenki na tapoe bladzijde 10]
Na leriman ben skrifi wan modeltekst tapoe den tapsé lin; na sma di e kisi leri ben proeberi foe meki wan volmaakti prenki (hu-po-gram’mos)