Rai di ’moksi nanga sowtoe’

„A taki foe oenoe moe de alaten switi, moksi nanga sowtoe, sodati joe sabi fa joe moe gi ibriwan sma wan piki.” — KOLOSSE 4:6.

1, 2. Foe san-ede a de spesroetoe prenspari dati kristen rai ’moksi nanga sowtoe’?

NA INI na heri historia sowtoe ben e pré wan spesroetoe rol na ini na sreka foe njanjan. Sowtoe e meki dati wan sani no pori èn e gi tesi na wan njan, sodati foeroe njanjan pe sowtoe no de na ini de sondro tesi. Di Paulus ben skrifi dati na taki foe kristen moe moksi nanga sowtoe, a ben e taki foe dat’ede dati na taki foe wi no wawan ben moe bow trawan, ma ooktoe den ben moe teki en èn feni en switi (Kolosse 4:6). Disi de spesroetoe so ini a gi foe rai. Foe san-ede?,

² Na marki foe gi rai no de soso foe ferteri wan sma foe wan sani. Ini foeroe geval a sma di e kisi a rai sabi kaba wantoe sani foe den bijbel gronprakseri di abi foe doe nanga den situwasi, ma a abi moeiti foe tjari en kon ini en libi ofoe foe si prensparifasi foe en. Te joe loekoe en boen dan a sma di wani gi kristen rai foe dat’ede tanapoe na fesi na tjalansi foe kenki wan sma denki (Galacia 6:1; Efese 4:11, 12). Foe dat’ede meki sowtoe de fanowdoe.

3. Sortoe jepi foe kristen raiman a bijbel sorgoe?

³ Ija, gi rai na wan tjalansi, èn foe kaka foetoe gi disi, na raiman abi sabi èn a koni foe si sani fanowdoe (Odo 2:1, 2, 9; 2 Timóteus 4:2). Kolokoe dati Jehovah gi a bijbel, di no abi wawan na fanowdoe sabi ma ooktoe foeroe eksempre foe rai di man di e frede Gado èn di abi koni foe si sani ben gi. Te wi go loekoe wantoe foe den eksempre disi, dan wi sa kisi jepi foe de boen raiman.

Loekoe na ’Wondroe Raiman’

4. Fa wan kristen raiman die gi rai na a gemeente kan waka baka Jezus Kristus?

⁴ Loekoe foe eksempre Jezus na ’Wondroe Raiman’ (Jesaja 9:6). Na a kaba foe na fosi jarhondro Jezus ben meki brifi nanga rai go na den sébi gemeente ini na distrikt Asia. Den brifi disi de wan moi eksempre gi owroeman di moe gi rai na den gemeente — èn den gronprakseri de net so boen foe gebroiki te rai e gi na aparti sma. Den problema di Jezus ben taki foe den ben de serjoesoe wan: fadon komoto na bribi, wan „Izebel-krakti”, broko-kowroefasi nanga a lobi foe goedoe foe kari wantoe (Openbaring 2:4, 14, 15, 20-23; 3:1, 14-18). Foe dat’ede meki Jezus ben taki foe den problema disi fri, sondro foe kibri wan sani. Onséker-fasi no ben de foe den sani foe san a ben wani taki gi den aparti gemeente. Te kristen owroeman ini a ten disi di e gi rai na den gemeente, dan ini a waka baka Jezus den moe moksi sakafasi èn switifasi ini a rai foe den (Filipi 2:3-8; Mattéus 11:29). Na a tra sé, ooktoe na ini a waka baka Jezus, den moe taki fri sondro foe hori wan sani a baka. A rai no moe de so frafra èn so algemeen dati a gemeente no e ferstan foe san a tori e go.

5, 6. San wan kristen raiman kan leri moro ete foe den boskopoe foe Jezus na den sébi gemeente?

⁵ Loekoe dati Jezus ben bigin efi dati ben kan foe prijse den gemeente tapoe wan krakti fasi èn ben tapoe a rai foe en nanga dekati di ben bow den (Openbaring 2:2, 3, 7; 3:4, 5). Ooktoe kristen raiman moe moksi ini a rai foe den wortoe di e prijse wan sma èn gi en dekati. Soleki wan owroeman nanga ondrofeni ben taki: „Joe no e doe troetroe wan sani efoe joe e poeroe wiwiri nomo gi den brada.” Te owroeman e gi krakti rai, dan den no moe libi den brada na baka na wan fasi pe den lasi ati, ma moro foeroe den moe libi den a baka nanga dekati èn nanga na faste bosroiti foe doe en moro boen na ini a ten di e kon. — Teki gersi 2 Korinte 1:1-4.

⁶ San de foe taki te foe kaba foe den boskopoe foe Jezus na den gemeente foe Smyrna èn Filadelfia? A no ben feni sani foe taki foe den brada disi. Ma foe di den ben ondrofeni hebi tesi, a ben gi den dekati foe hori doro (Openbaring 2:8-11; 3:7-13). Ooktoe kristen opziener no wawan moe gi rai te a de fanowdoe foe tjari kenki, ma den moe de alaten gaw foe prijse den brada foe den boen wroko foe den foe gi den dekati foe hori doro. — Romeini 12:12.

Gebroiki eksempre

7, 8. (a) Fa na rai foe Jezus gi en bakaman ’moksi nanga sowtoe’? (b) Foe san-ede eksempre abi foeroe waarde te wi e gi rai?

⁷ Na wan tra okasi Jezus ben gi rai di en discipel ben broko den ede soema ben sa de na fosi wan ini a kownoekondre foe den hemel. A ben kan poeroe wiwiri gi den bakaman foe en, ma na presi foe dati ’a ben moksi den wortoe foe en nanga sowtoe’. A ben kari wan jongoe pikin kon na en èn ben taki: „Ala sma foe dat’ede di sa saka ensrefi leki a jongoe pikin disi, en dati de na moro bigi wan na ini na kownoekondre foe hemel” (Mattéus 18:1-4; Lukas 9:46-48). A rai ben de krin ma switi èn ben bow den. Foe meki kon a krin dati a kownoekondre foe den hemel ben de heri tra fasi leki den kownoekondre foe a grontapoe disi, meki Jezus ben gi dekati na den bakaman foe de nanga sakafasi èn a ben proeberl foe teki na réde foe a trobtrobi foe den poeroe.

⁸ Loekoe na toemsi boen leri taktiek foe san Jezus ben e gebroiki ini a geval disi. Wan libi eksempre, wan jongoe pikin! Koni raiman e moksi ini den wortoe foe den nofotron eksempre foe di den disi kan poti krakti tapoe a serjoesoe fasi foe wan afersi ofoe kan jepi a sma di e kisi na rai foe tak-go-tak-kon foe wan afersi èn foe si wan problema ini wan njoen leti. Nofotron eksempre e jepi foe loesoe na span.

9. San na wantoe tra bijbel eksempre ini a tori foe eksempre ini a gi foe rai?

⁹ Di Jehovah ben warskow Kaïn dati a ben de ini bigi kefar foe doe wan bigi sondoe, dan a ben ferteri foe sondoe tapoe wan moi fasi leki wan wilde meti. A ben taki: „Sondoe e loeroe na joe mofodoro èn na tranga lostoe foe en e go na joe” (Genesis 4:7). Di Jona ati ben bron foe di Jehovah ben kibri den Ninevé sma di ben abi beraw, Gado ben gi en wan batrakrabasibon leki skaduw. Di na bon ben dede baka dati èn Jona bigin kragi Jehovah ben taki: „Joe foe joe sé firi sari gi na batrakrabasibon . . . dan mi foe mi sé no moe firi sari nanga Ninevé, na bigi foto, pe moro leki wan hondro twenti doesoen sma de?” (Jona 4:5-11). Foe troe a ben de krakti rai!

10. Fa wan disiten kristen raiman ben gebroiki wan eksempre foe jepi wan jongoe pikinwenke foe ferstan moro boen den boewégi foe ati foe en papa nanga mama?

¹⁰ Na ini a srefi fasi wan opziener di ben e loekoe gemeente ben proeberi foe jepi wan pikin wenke di ben broeja foe di en papa nanga mama ben poti skotoe gi en ini a tori foe a demakandra foe en. A ben doe disi nanga na gebroiki foe na eksempre di e kon now: „Joe lobi nai krosi, a no so? Kow taki joe ben gi foeroe ten na a nai foe wan moi japon gi wan meisje di de joe mati. Ma baka di joe gi en a japon, joe e kon sabi dati ai dweri na gron foe na oso nanga en. Fa joe o firi foe dati?” A pikinwenke ben piki dati a ben sa firi ensrefi broeja. Foe dat’ede na bedinari ben taki moro fara: „Na so joe papa nanga mama e si a tori. Den ben gi foeroe ten foe kweki joe èn den ede bigi tapoe joe. Den wani soboen dati joe abi demakandra nanga sma di sa handri nanga joe tapoe joistifasi, no nanga sma di te foe kaba sa doe joe ogri.” Na eksempre ben jepi na meisje foe ferstan san en papa nanga mama ben e proeberi foe doe.

Poti aksi

11. Fa Jehovah ben meki wan boen gebroiki foe aksi di a ben gi Jona rai?

¹¹ Joe ben si kande dati Jehovah di a ben taki nanga Jona foe na onredelek atibron foe en ooktoe ben poti aksi. Di Jona, di ati ben bron, foe di Ninevé no ben pori ben aksi efoe a ben mag dede, Jehovah ben taki: „Joe ati e bron nanga reti?” Jona no ben piki. Foe dat’ede meki Jehovah ben meki wan batrakrabasibon gro èn dede bakadati. Tapoe dati Jona ben broeja moro ete. Foe dat’ede Jehovah ben aksi en: „Joe e bron nanga reti tapoe na batrakrabasibon?” Na a lési disi Jona gi piki: „Nanga reti mi ati e bron, te foe dede”. Now di Jehovah kisi piki foe Jona a ben teki now na fasi foe Jona ini a tori foe so wan bon gersi nanga en égifasi ini a tori foe Ninevé foe di a ben poti na aksi di koti a tori: „Mi no ben moe firi sari nanga Ninevé?” (Jona 4:4, 9, 11). Na so fasi Jona ben kisi na rai foe waka na baka na fasi foe Jehovah ini a tori foe den Ninevésma di ben abi beraw.

12. Oemeni waarde aksi abi ini a gi foe rai? Tjari disi kon na krin.

¹² Ija, aksi e jepi na raiman foe kon a baka san de a denki foe na sma di abi rai fanowdoe. Den e jepi a sma dati ooktoe foe ferstan krin san en égi problema èn boewégi foe ati de. Wan sma foe eksempre ben kan hori stré srefsrefi dati a abi ala reti foe dringi wan sani bifo a rij panga oto go na oso. A e denkl kande troetroe: ’Sopi no e doe mi noti!’ Wan mati ben sa kan tak-go-tak-kon nanga en kande na a fasi disi: ’Ma kow taki dati joe kon na ini wan ongolokoe pe joe no de fowtoe. San skowtoe ben sa denki efoe den ben si dati joe ben dringi? Èn kow taki dati na sopi ben abi krakti wel tapoe fa joe e doe, awinsi a de pikinso nomo. Joe ben sa wani tjari na oto troetroe efoe na reaktie vermogen foe joe no de 100 procent? Wan pikinso dringi de warti a moeiti foe teki sowan risiko?’

13. Tapoe sortoefasi wan bepaalde raiman ben gebroiki na bijbel, makandra nanga aksi foe gi rai? Foe san-ede disi ben de toemsi boen?

¹³ Kristen rai alaten abi en fundamenti na tapoe na bijbel. Èn pe a kan, dan kristen raiman e gebroiki a bijbel ooktoe troetroe pe den e gi rai. A bijbel de wan krakti jepisani (Hebrewsma 4:12). Foe gi joe wan eksempre: Wan owroeman nanga ondrofeni ben proeberi foe gi jepi na wan sma di no de moro actief ini na prékiwroko. Na owroeman e poti na prakseri tapoe na agersi tori foe Jezus foe na man di ben abi toe pikin, na soema a ben aksi foe go wroko ini en windroifidjari. Na fosiwan ben taki dati a ben sa go, ma a no ben go. Na di foe toe ben taki dati a no ben sa go ma te foe kaba ben bosroiti tokoe foe go (Mattéus 21:28-31). Dan na raiman ben aksi: „Leki sortoe wan foe den toe pikin disi joe e handri tapoe a momenti disi?” Na prékiman e ferstan a punt foe san a tori e go srefsrefi spesroetoe di a raiman ben aksi: „Fa joe denki dati Jehovah, na éginari foe na windroifidjari e si joe situwasi?”

14. San de wantoe tra situwasi na ini san aksi ben sa kan de wan warti jepisani ini a gi foe rai?

¹⁴ Tapoe net so wan srefi fasi rai kan gi, te wan sma e proeberi foe gi jepi na den di e degedege, na den di abi trow- ofoe tra osofamiriproblema, na den di abi moeilekheid nanga trawan ofoe na sma di de ini tra situwasi di lai nanga tesi.a Aksi di e poti nanga wan bepaalde marki na ini prakseri e jepi den sma di e kisi rai foe tak-go-tak-kon foe na afersi foe ondrosoekoe densrefl èn kon na joisti bosroiti.

Arki boen

15. (a) San den dri „trowstoeman” foe Job no ben doe? (b) Fa arki sa de wan jepi gi wan kristen raiman?

¹⁵ Hori na ini prakseri dati na poti foe aksi wani taki dati joe wani jere den piki (Odo 18:13). Raiman no moe fadon go na ini na trapoe na ini san den dri „trowstoeman” foe Job ben go. Job ben taki nanga den ma den no ben arki troetroe. Gi den a ben de so kaba dati na pina foe Job ben de na bakapisi foe en égi sondoefasi (Job 16:2; 22:4-11). Kontrari foe disi dan wan kristen raiman moe arki boen. Dan kande a o jere pauze nanga kenki foe a sten di wani taki wan sani, èn di e sori dati ala sani no taki ete. Kande wan aksi foe kon sabi wan sani moro sa tjari wan prakseri kon a tapoe di kibri ini den dipi oekoe foe na jeje foe na sma nanga soema joe e taki. — Teki gersi Odo 20:5.

16. San a e aksi foe wan raiman te a de moeilek foe arki na a sani san wan kristen e taki di broeja na emotioneelsé?

¹⁶ A de troe dati disi no de alaten makriki. Wan sma di broeja kan taki sani somaar: „Mi no wani si mi papa nanga mama na ai” ofoe: „Mi no kan libi makandra moro nanga mi masra!” A e seki joe foe jere den sortoe sani disi. Ma hori na ini prakseri dati Jehovah ben de klari foe arki di Asa ben kragi dati en getrowfasi gersi taki a ben de foe soso (Psalm 73:13, 14). Ooktoe Gado ben arki di Jeremia ben taki dati den ben kori en (Jeremia 20:7), Habakuk ben kragi leki fa a ben sori dati den godelowsoesma e kwinsi den regtvaardikisma èn dati Jehovah no ben e si dati srefi. (Habakuk 1:13-17). Kristen raiman moesoe de net so klarklari foe arki. Efoe sma abi den sortoe firi disi, dan na raiman moesoe sabi disi sodati a kan jepi. A moe hori ensrefi farawe foe gi tranga na wan fini fasi na a sma di e kisi rai foe ferteri foe sani di leki fa a raiman e prakseri a moesoe abi ini ede, na presi foe den prakseri di en troetroe abi. Na raiman moe hori ensrefi ooktoe fara foe piki krakti ofoe foe kroetoe a sma, sodati a e meki a sma ini na afersi disi e lasi ati foe opo en ati moro fara ete. — Odo 14:29; 17:27.

17. Foe san-ede soso arki na wi brada sontron de wan fasi foe trowstoe den?

¹⁷ Sontron a gi foe rai moro foeroe de ini arki, pe wi e meki a sma ini a tori taki foe den firi foe en di kisi pen, foe taki foe en ati di broko ofoe foe en emotioneel pen. Di Naomi ben drai baka foe den gron foe Moab, den oema foe Israël ben gi en odi nanga den wortoe: „Na Naomi disi?” Ma Naomi ben piki nanga sari: „No kari mi Naomi. Kari mi Mara, bika na Almaktiwan ben meki mi kon bita srefsrefi. Nanga foeroe mi ben gwe, èn nanga légi anoe Jehovah ben meki mi drai kon baka. Foe san-ede joe sa kari mi Naomi, te a de Jehovah di ben lagi mi èn na Almaktiwan di ben tjari rampoe kon tapoe mi?” (Ruth 1:19-21) Den oema foe Israël no ben kan taki foeroe tapoe dati. Ma, nofotron soso dati wan sma tapoe wan lobifasi e poti ensrefi foe arki aladi trawan e taki foe den emotioneel pen, kant tjari a kon boen foe en kon.b

Loekoe fa sani de troetroe

18. (a) Fa toe sma ben doe nanga rai di den ben kisi foe Jezus Kristus? (b) Sortoe égifasi wan kristen raiman moe kweki?

¹⁸ A no de foe taki dati ibri sma e teki rai na tra fasi. A de krin dati Jona ben teki tapoe wan boen fasi na rai foe Jehovah. Na proféti ben kren psa soboen na bitafasi nanga atibron foe en dati a ben skrifi den ondrofeni foe en sodati tra sma ben kan leri wan sani foe en. A ben teki wan pisten foe Jezus bakaman ben leri na les foe sakafasi. Ija, srefi a neti bifo Jezus ben dede den ben kon agen na ini wan stré nanga wortoe foe na aksi soema ben sa de a moro bigwan a mindri den! (Lukas 22:24) Na sma di e gi rai foe dat’ede moesoe abi pasensi (Prékiman 7:8). Wan sma di abi wan fowtoe jejefasi di meki dipi roetoe, sa moe kenki gewooniek en libifasi tapoe a gron foe soso wanuoe wortoe di wan owroeman e taigi en. Problema a mindri trowpatna di e tan langa go nomo no e gwe baka takimakandra nanga wan lepi kristen. A kan teki moen bifo hebi siki kon betre, so a kan de ooktoe nanga hebi jeje problema. Èn wantoe no sa arki eenvoudig na gesontoe rai. Aladi Kaïn ben kisi srefi rai foe Jehovah, tokoe a ben go so fara foe kiri en brada. — Genesis 4:6-8.

19. Fa na bijbel kan jepi den sma di kisi mankeri na emotineel sé?

¹⁹ Den wan di abi serjoesoe problema, moe loekoe sani fa den de ini a tori foe den sani san den kan ferwakti foe a gemeente. Wan kompe kristen no kan poeroe na jeje brokosaka di e tan go doro ofoe na emotioneel pen di kande doe kon foe wan rampoe ofoe wan takroe ondrofeni. Te wan sma e siki na skinfasi, dan datra e sorgoe nofotron soso nomo foe meki na sikiman kan tjari a siki so boen leki a kan ini a ten di a skin abi fanowdoe foe kon boen baka. Na so a de ooktoe te wan kristen e ondrofeni emotioneel skinati. Na gemeente kan proberi foe meki a ’kan tjari en so boen leki a kan’ foe di den e begi nanga en èn gi en te disi kan foe taki wan wortoe gi en di e gi en dekati èn gi en ala praktis jepi di den man gi. Èn gewoonlek dan ten nanga Jehovah jeje e tjari betre kon (Odo 12:25; Jakobus 5:14, 15).Na so wan sma di fadon go ini incest (hoeroe nanga famiri) ben skrifi: „Aladi incest kan meki wan takroe emotioneel druk doe kon tokoe Jehovah organisaatsi e doe foeroe foe jepi nanga jepi foe na bijbel èn na jepi foe brada nanga sisa joe kan komoto na ondro”.c

20. Sortoe rol rai e pré ini a libi foe wi alamala di e proeberi foe tan dini Jehovah?

²⁰ Ija, tapoe kristensma na frantwortoe de foe jepi makandra. Owroeman spesroetoe, ma ooktoe ala trawan na ini na gemeente moe broko ede foe na tanboen foe makandra èn di efoe a de fanowdoe e gi switi bijbel rai (Filipi 2:4). A no de foe taki dati den sortoe rai disi no mag gi leki wan dictator of nanga tranga ati. Ooktoe rai no moe gi na indruk dati wi e proeberi foe basi a libi foe wan tra sma. Rai moro foeroe moe abi en fundamenti tapoe na bijbel èn ’moksi nanga sowtoe’ (Kolosse 4:6). Ibriwan sma ten na ten abi jepi fanowdoe, èn biten rai, moksi nanga switifasi èn dekati, sa jepi wi alamala foe go doro tapoe a pasi foe tégo libi.

[Foetoewortoe]

Joe kan memre disi ete?

◻ Sortoe marki ini a rai foe Jezus gi den sébi gemeente kan jepi owroeman ini a ten disi?

◻ Sortoe bijbel eksempre de ini a tori foe na gebroiki foe eksempre ini a gi foe rai?

◻ San de gi wan kristen raiman na troetroe waarde foe aksi?

◻ Fa wan bekwaam raiman kan gebroiki na bijbel?

◻Foe san-ede wan sma di e gi rai moe de ooktoe wan boen arkiman?

[Prenki na tapoe bladzijde 7]

Foe gi wan eksempre foe wan bepaalde punt, meki Jezus ben teki wan pikin foe gi en discipel krin èn switi rai di ben bow den

[Prenki na tapoe bladzijde 8]

Jona ben kon bita, èn ben kisi atibron, ma a de krin dati a ben teki na rai foe Jehovah tapoe wan boen fasi